🦋 إسكريبتات شروق حسام 🦋

الجزء الرابع 🦋

بقلم شروق حسام 🦋

_" ها بقى قولي لي حصل إيه زهرة "

_" فاكرة لما إتقابلنا من 3 سنين يا سديم "

سديم بإبتسامة واسعة " طبعًا فاكرة وعمري ما أنسى إنِ إتعرفت علي أحلى وأجمل أخت "

كملت بحيرة " ماعرفش بس أنا حاسة إن فيه حاجة حصلت لك "

أزهار بدموع " أنا عارفة إن ممكن اللي هقوله ده تحسيه إستغلال مني بس مافيش حد غيرك هيقدر يساعدني أنا بعتبرك بنتي وأختي وبحبك جدًا "

سديم بصدمة وهي بتمسك إيدها " زهرة أنتِ بتعيطي لييه بس حصل إيه لكل ده "

بدأت زهرة تحكي لها كل حاجة حصلت لحد ما هي شافتها

سديم بغضب " إزاااي إزاااي الحقير ده يعمل كده فيكِ أنا لو شوفته قدامي دلوقتي همرمط بيه مصر كلها وهخلي اللي يسوى واللي مايسواش يتفرج علي خيانته "

_" عشان كده عايزة مساعدتك أنتِ بالذات أنا عارفة إنك واخدة دورات في التمثيل فعايزاكِ تقربي من أواب وتمثلي عليه "

سديم بحيرة " بس هو ذنبه إيه في الموضوع "

أزهار بغضب وهي بتمسح دموعها " ذنبه ذنبه الوحيد إنه يقرب للخاينين دول "

كملت برجاء " لو سمحتي وافقي بصي هي فترة لو لقيتيه مايعرفش حاجة عن الموضوع سيبيه وماتعمليش ليه أي حاجة "

سكتت لثواني وبعدين إتنهدت بغضب " بس لو طلع عارف هيبقي ليا تصرف تاني معاه "

سديم بتنهيدة " ماشي خلاص هعمل اللي أنتِ عايزاه "

كملت بغضب مصطنع " بس بعد كده ماتقوليش إستغلال والكلام ده إحنا إخوات يا زهورة "

أزهار بحب " ربنا يخليكِ ليا يا سديم "

سديم حضنتها وقالت لها بحب " ويخليكِ ليا يا ماما أزهار "

⭑⭑⭑⭑⭑⭑⭑⭑⭑⭑⭑⭑⭑⭑⭑⭑⭑⭑

عدي شهر ونص

وأزهار إندمجت في الكلية والطلبة حبوها جدًا وماخلتش سديم تبدأ في خطتهم لغاية ما تلاقي الفرصة المناسبة

خلصت المحاضرة وأزهار ندهت علي كذا إسم يستنوا ومنهم أواب والباقي خرج

كانوا خمسة موجودين ندهت علي واحد واحد يجي لها وبدأت تتكلم معاهم عن الأجزاء اللي شافت إنهم ضعاف فيها ومش فاهمينها كويس

لحد ما جيه دور آخر واحد وهو أواب بدأت تشرح ليه وتتكلم معاه في الأجزاء اللي ضعيف فيها بس شافت إنه ضعيف في الأجزاء اللي فيها انجليزي

_" بص يا أواب أنت حاليًا في كليه طب وأكتر الكلمات اللي بتحتاجها إنجليش وأنا شايفة إنك ضعيف فيها "

أواب بتنهيدة " فعلًا عندي المشكلة دي من زمان يا دكتورة وحاولت أحلها بس مافيش فايدة "

_" إيه رأيك أساعدك أنا كل يوم بعد الكلية نتقابل في الكافيه اللي جنب الكلية وأشرح لك وكمان هبدأ لك من الأساسيات "

أواب بإبتسامة واسعة " بجد شكرًا جدًا ليكِ يا دكتورة "

_" ولا يهمك يا أواب أي طالب بدرس له في الكلية لازم يكون شطور وأنت واحد منهم "

بص لها بإبتسامة وإستأذن وخرج تحت نظراتها الساخرة

_" إضحك كويس يا إيبو لأن من بعد اللي هيحصل مش هتعرف تضحك تاني "

⭑⭑⭑⭑⭑⭑⭑⭑⭑⭑⭑⭑⭑⭑⭑⭑⭑⭑

عدي كام يوم

لحد ما جيه ذكرى جواز فارس وأزهار

_" ياحبيبتي خدي أجازة من الكلية النهاردة عايز نقضي اليوم سوا من أوله "

_" ليه هو النهاردة في مناسبة أو حاجة "

فارس بصدمة " معقولة نسيتي زي النهاردة إتجوزنا ده أنتِ اللي بتفكرني كل سنة مش معقولة تنسي "

أزهار بإبتسامة مزيفة " معلش بقى يا فارس مضغوطة شوية في الشغل فنسيت "

_" خلاص يا حبيبتي عادي ولا يهمك يلا قومي إلبسي وإلياس هسيبه مع ماما "

_" تمام ماشي "

⭑⭑⭑⭑⭑⭑⭑⭑⭑⭑⭑⭑⭑⭑⭑⭑⭑⭑

عدي كام ساعة

وفارس وأزهار خرجوا وراحوا أماكن كتير لحد ما جيه الليل وراحوا مطعم عشان يكملوا السهرة هناك

_" عارفة يا حبيبتي جوازنا أحلي حاجة حصلت في حياتي "

أزهار في سرها بسخرية " كداب وخاين وكمان منافق "

أزهار بإبتسامة مزيفة " فاكر أول مرة إتقابلنا فيها "

_" وهي دي حاجة تتنسي لما كنا في الثانوي في آخر سنة وعينيا وقعت عليكِ ماقدرتش أقاوم ووقعت في حبك من أول نظرة "

_" كنت أول حب ليك ولا حبيت قبل كده في كل السنين دي أنت حبتني بجد "

فارس بتوتر " إيه السؤال ده يا حبيبتي طبعًا أنتِ أول حب وعمري ما حبيت غيرك "

_" أنت ...... "

قطع كلامها صوت موبايلها اللي بيرن برقم غريب

_" آلو مين "

_" حضرتك أستاذة أزهار "

_" أيوه "

_" خال حضرتك الأستاذ بدر التهامي محجوز في المستشفي "

أزهار بصدمة وهي بتقف " أنت بتقول إيه خالي ماله "

_" الأستاذ عنده كانسر في الدم وبقت حالته متأخرة "

_" ربع ساعة وجاية إهتموا بيه كويس "

قفلت المكالمة وبصت ناحية فارس اللي بيبص لها بخبث خفي

_" فيه إيه يا حبيبتي خالك ماله "

_" خالو تعبان ولازم أروح له "

_" طب إستني هاجي معاكِ "

_" لا روح أنت وخلي بالك علي إلياس "

خلصت كلامها وسابته وجريت لبره

فارس سند ضهره علي الكرسي براحة وسعادة وإتصل علي جومانة

_" جوجو إجهزي يا حبيبتي هنخرج نتعشي بره "

_" بجد دقايق وهجهز ياحبيبي "

كملت بغضب " مش كنت خارج مع اللي ماتتسمي "

_" إهدي بس يا قلبي بصي أنا مستنيكِ هبعت لك اللوكيشن علي الواتس تعالِ وهحكي لك ساعتها علي كل اللي حصل هتفرحي جدًا "

#إنتقام_أنثي
#شروق_حسام