🦋 إسكريبتات شروق حسام 🦋

الجزء الثاني 🦋

بقلم شروق حسام 🦋

_" معاكم دكتورة أزهار هدرس لكم الكيمياء الحيوية إعتبروني زي أختكم الكبيرة ولو إحتاجتم أي حاجة في المادة قولوا لي إحنا لسه في بداية السنة فعايزاكم تشدوا حيلكم ومع الوقت هتعرف عليكم واحد واحد "

بدأت أزهار المحاضرة وهي عينيها علي هدفها اللي هتدمره 

بعد فترة كانت المحاضرة خلصت والكل خرج من المحاضرة وهو بيشكر في شرحها

بدأت تلم حاجتها وهي بتبتسم بخبث

_" دكتورة لوسمحتي كان فيه جزئية مش فاهمها عايز حضرتك تفهمهالي "

أزهار بإبتسامة " تمام عايز جزئية إيه وأنا هشرحهالك "

بدأ يشاور علي الجزئية اللي مش عارفها وأزهار وضحتهاله وحس إن الجزء اللي كان بيحسبه صعب بقى سهل وبسيط

_" شكرًا يا دكتورة "

_" العفو ولا يهمك يا ... "

كملت بخبث " قولت لي إسمك إيه أصلي لسه ماحفظتش الأسماء "

_" أواب أواب المهدي "

أزهار بغضب تحاول إخفاؤه " عايزني أشرح لك حاجة تاني يا أواب "

_" لا شكرًا يا دكتورة "

سابها وخرج وهي كانت بتبص لأثره وهي حاسة بمشاعر مختلطة كتير مابين حقد وغضب

_" إبنك أو مش إبنك مليش فيه يا فارس أنت خنتني وشكل خيانتك بقى لها سنين  وحتي لو الكل كدبني وقال لي إنك مش خاين عيني مش هتكدب ولا تخون "

⭑⭑⭑⭑⭑⭑⭑⭑⭑⭑⭑⭑⭑⭑⭑⭑⭑⭑

_" يا فارس أنا زهقت بجد مش ناوي تعرفها بجوازنا شوف بقى لنا كام سنة متجوزين وأنت مخليني مراتك في السر أنا تعبت وقرفت من الوضع ده أنا حامل دلوقتي ومش عايزة إبنِ يجي في السر عايزة الكل يعرف إنِ مراتك واللي في بطني ده إبنك "

_" يا جمانة يا حبيبتي إحنا خلاص قربنا علي هدفنا وهطلقها وهعرف العالم كله إنك مراتي حبيبتي "

_" مراتك الأولى والوحيدة مش كده يا فروسة "

_" أيوه يا روحي أنتِ هي الأولى في كل حاجة بحياتي حبي الأول ومراتي الأولى "

جومانة بغضب " بس أول خلفة كنت أنا الأولي ؟ لأطبعًا "

_" أهدي بس يا جوجو ماتتعبيش نفسك وماتفكريش كتير كل اللي عايزك تفكري فيه هدفنا اللي ضيعنا عليه كل السنين ده ماشي "

جومانة بزهق " أوووف حاضر يا فارس حاضر "

فارس حضنها بقوة وبدأ يبوسها في شعرها " هي دي جومانة اللي أنا أعرفها "

جمانة بادلته الحضن وهو سرح في عالم تاني سرح في أزهار لأنها لو عرفت مش هترحمه وهتعمل فيه اللي ماتعملش في حد هو عارفها كويس مش بتسيب اللي بيجي عليها أو اللي خدعها مرتاح في حياته

⭑⭑⭑⭑⭑⭑⭑⭑⭑⭑⭑⭑⭑⭑⭑⭑⭑⭑

بعد فترة

أزهار روحت البيت وزي ما توقعت مش موجود وهيرجع متأخر زي كل يوم بدأت تلاعب إلياس وحماتها بتكلمها وهي مش واخدة بالها

صفوة بصوت عالي نسبيًا " أزهااار "

_" ها نعم يا ماما قولتي حاجة "

صفوة بقلق " فيه حاجة يا حبيبتي أنتِ كويسة حصل حاجة في الكلية النهاردة سرحانة في إيه "

أزهار بإبتسامة مزيفة " مفيش حاجة ماتقلقيش أنا بخير وماحصلش حاجة في الكلية أنا بس سرحت في اللي هعمله بكرا ههههه "

_" طب الحمد لله عاملة إيه أنتِ وفارس حاسة إن بقى لكم فترة مش بتخرجوا سوا ومش بتقعدوا مع بعض كتير "

أزهار بسخرية خفية " عادي يا ماما أنا حاسة بيه عارفة إنه مضغوط في الشغل ومش ملاحق علي هنا وهناك فلازم نراعي بعض إحنا الاتنين "

_" ربنا يكمل لك بعقلك يا بنتي ربنا يخليكم لبعض "

ضحكت أزهار ضحكة بسيطة ومردتش عليها في الوقت ده تليفون أزهار رن وكانت جنان

طلعت أزهار أوضتها عشان حماتها متلاحظش حاجة

_" آلو يا أزهار عاملة إيه "

_" ماعرفش "

جنان بتنهيدة " بصي عايزاكِ تهدي خالص وأنتِ بتسمعي اللي هقوله "

إتعدلت أزهار في وقفتها وقالت لها بزهول " فيه إيه يا مجنونة حصل حاجة "

_" فاكرة الصورة اللي أنتِ ورتهالي اللي بتدل علي خيانة فارس واللي طلبت منك بعدين تبعتهالي علي الواتس "

أزهار وهي بتضغط علي أسنانها " مالها الزفتة "

_" من ساعة ما شوفت الصورة وأنا حاسة إنِ شوفت اللي كانت معاه دي في مكان قبل كده وبعد محاولات كتير عشان أفتكر إفتكرت شوفتها فين "

_" شوفتيها فين يا جنان بسرعة قولي لي "

#إنتقام_أنثي
#شروق_حسام