البارتات الاضافية للاطلس دمليج الاسود (نسخة الكتاب)

مشهد من بعد ما مريم هلوست وهية بلتخدير وكعدو علي ودعاء شوة

ابتسم وهز براسه گمت على حيلي متحججة..

-اروح اصلي الفجر من رخصتك

ابتسم وهز براسه شردت بالغرفة اعيط بالهمسة واكمز بمكاني خرب حظي المصفط

دورت على تربة ما لكيت تذكرت ماعدهم هنا فتحت الباب ومديت راسي ماكو احد طلعت
اتسحب اروح اجيبلي حجارة من بره وصلت لحديقة المستشفى وشفت نسوان عجايز
كاعدات على جهة وجهة كاعدين شلة شباب مبينين جايين يزورون مريض وطلعو يكعدون
هنا

دورت على حصوة ما لكيت ابتعدت للاشجار اخذ ورقة شجر واشتغل الصفير ورايه..

انداریت اشوف شكو واذا اللكه الشلة كلها تباوعلي ،ويبسبسون ما انطيتهم أهمية ورجعت

اعود ادراجي وصاح واحد بيهم بصوت عالي..

-زوينة بزاااف

تخربطت احوالي اني تعبانة والوقت فجرية والعجايز كامن بقيت ويه ذولة وحدي توترت
وقررت اتغاضى عنهم
عدت ادراجي ادخل المستشفى وصارو ثنين بوجهي يحجون مغربي وكلامهم كله غزل وتحرش

-دعاء: حيد من حدايا (وخر عني)

-كلشي مزيان يا زوينة (كلشي بخير يا حلوة)

گمت ارجف من حاصروني ويضحكون صرت ادور بعيوني اريدلي واحد عرف ماكو، ما اجه ببالي غير اگول بصوت عالي مسموع

-زوجي ينتظرني جوه واخوانه هنا ممكن طريق مستعجلة

واحد يباع بوجه الثاني من حچيت عراقي ركزت عيوني على امن المستشفى بدون لا احجي

مجرد شافونه حسوا اكو شي مو طبيعي واجوا علينا بسرعة الشباب تفرقوا واني ركضت جوا قبل لا احد يحجي ويايه..

ركضت لغرفة مريم شفت علي واگف بالباب وبيده موبایله يلعب بي، من شافني وكف عاكد حاحبه...

-عليي وينك انت ويين

-علي: شنو دعاء شبيج ؟؟

-راح اموت خوف اكو شباب.. شباب.. انو...

- شباب ؟؟؟ شسووا شبيهم ویااچ ؟؟؟

هدأت نفسي من شفت لهفته حطيت ايدي على كلبي و حركت راسي "لا" بلعت ریگ و گلت...

-رحت اجيب ورقة شجر اريد اصلي واكو شباب رادوا يحچون ويايه .....

-وينهم ؟؟؟؟؟

-اجه الامن بسرعة تطمن ما صار شي

-وينهم ؟؟؟ بعدهم موجودين؟؟؟

تركني يريد يروح صحت بسرعة ..

- أستاذ علي راحو والله شبيك

-ليش تطلعين وحدج دعاء احنه بغربة بله صارلج شي شسوي بروحي اني!!

-دورت عليك ما لكيتك

-دعاء لا تخطين خطوة قبل لا تبلغين احد ابوس ايدج

- تمام

زفر ضايج ومسح وجهه تركته واگف ضايج ودخلت الغرفة ورغم خوفي بس گلبي احسه
طاير شفت الخوف والغيرة بعيونه ذولة كلهم سريعين الاشتعال...