رواية ( أحمد )
رواية ليبية
للكاتبة lil_sara_lil
.
.
.
.
______________♡♡♡♡♡_______________
.
.
.
.
كان انس يفكر في كل هذي الذكريات ودموعه ينزلن كيف صار هكي مكانش يرمي في اللوم على روحه، لا الشيطان كان يوسوسله أن احمد يلي خلاه هكي
وقاطعه صوت امه يلي تنادي فيه
هناء: انس الساعة 10 ونص بش قلت بترفعني
انس: جيت جيت .. مسح دموعه وطلع من الدار
هناء: خيرك انسيت الوقت
انس: كنت راقد
هناء: كان تبي تكمل نومتك عادي نمشوا بعيدين
انس: لا لا خلاص
هناء لاحظت الدموع في عيونه بس مكانتش تبي تزيد تنكد عليه فسكتت وطلعوا ومشوا لسوق
__في حوش محمد__
الكل كان يضم ويمسح محد فاضي الكل يدير في حاجة حنان تغسل في الماعين يلي بيضيفوا فيهن، وانفال توتي لرز بالخلطة في مكوناته، ونور تخلط في النسكافيه وأدير في الحار
حنان: نور البيتزا شاطت
نور: طارت تجري للكوشة بيش تشوفها .. لا مشاطتش
انفال: ظهريييي
حنان: غير شن درتن
نور&انفال: شبحن لامهن بصدمة .. شنو؟
حنان: ضحكت .. انبصر وانتن تراجن في الزلة
انفال: قلت اني كان هكي ومدرت شي امالا كيف كان اندير
حنان: هيا انشطت قبل ليجن خالاتكن ونساوين عمامكم، ويلقنا حايسات
نور: يا امي والله الساعة 10 ونص محد حيجي في هذا الوقت الا يلي شاقي التعب وخاطره يكسر ظهره
وسمعن صوت الباب يدق
حنان: ما قلتلك اني انشطت لكن لا وانتن كان تضاحكن زي السكرانات
انفال: مش منا عاد رقدنا الساعة 4 الصبح ونضنا 6 أكيدة بتجيني حاله هستيريه
حنان: امالا شن انقول اني مديت ظهري بس ربع ساعة وها نجري معاكي
نور: الباااب
مشت انفال فتحت ولقتها خالتهن زهرة
انفال: خالتي .. فرحت بيها لقت من بيعاونهن
سلمت عليها وخشت مسكينة زهرة عالتعب حتى هي تقطعت معاهن
___عند انس___
كانت هناء تلود في قسم الهداية وتفكر شن تاخد
هناء: كان نشري ساعة شن بيديروا بيها هما مش خاشين لحوش جديد، ولا ناخد ساعة للبنت بروحها؟ شن بدير بيها أكيدة عندها، ها انس شن ناخد
انس: شبح لأمه باستغراب .. وشن عرفني بحاجات النسوان
هناء: غير بالله عليك والله تعبت .. وخدت كرسي وقعمزت .. توا دورك دور انت
انس: ها؟ وشن دخلي اني؟
هناء: هذا هو دور بدور
انس: آمنت بالله حاضر .. وخدي بعضه ومشي يدور في هدية
هناء دارت هكي بيش تطلعه من حالة التفكير يلي كان فيها من لما قالتله أن اكرام جت كانت تبيه يتفاعل مع العالم تبيه يغير مزاجه ولو شوية
قعد انس يدور في الممرات وكان يدور في شي مميز صح هي ضاعت منه لكن قاعد منساهاش "هي مليهاش ذنب الذنب الوحيد هو على احمد يلي فرقنا" والشيطان شغال توسويس
لفت انتباهه سلسلة فضة فيها فراشة كانت على قد ماهي بسيطة على قد ماهي حلوة، مشي يشوف في الألوان واخيرا لقي فراشة يلي يبيها فراشة لونها أخضر، خداها خضرة على لون عيونه ^ فاهمين حب وهكي^
