رواية ( أحمد )
رواية ليبية
للكاتبة lil_sara_lil
.
.
.
.
______________♡♡♡♡♡_______________
.
.
.
.
وقف قدام باب الحوش وكان قلبه قريب يطلع من مكانه من الخوف والفرحة استقبلهم محمد وخش خالد وانس للمربوعة وهناء خشت داخل حيث النساء
خالد: قعمز .. امالا احميدة وين
محمد: قال عندي شي بنديره وبنجي على جيه
خالد: شن بدير ياوخيي، هذا هَمْ الشباب ديما برا الحوش
محمد: والله عندك الحق .. وشبح لانس .. ها يا انس كيف حال الصيدلة معاك
انس: والله الحمد لله يا عمي كويسة مرة ساهلة ومرة تجي عالراس
محمد: هذا هو ياولدي شن بدير اهم شي انت شد في قرايتك وانجحلنا بتقدير كويس وارفع روسنا
انس: بإذن الله يا عمي
__عند النسوان__
كانت حنان وهناء ونور امقهمزات ويهدرزن
حنان: ايه ديما خليك هكي مرة مرة طلي علينا مش ديما اني يلي نمشيلك
هناء: وحدة بوحدة صار
حنان: امالا شنو ياحنة
هناء: ضحكت .. إن شاء الله حنكون اني الفالحة ونقعد انطل عليك كل يوم
حنان: ايه خليك هكي .. وضحكت
جت انفال وعطتهن القهوة وقعمزت وتهدرز
حنان: وين اختك اكرام
انفال: بتجيب صونية الكيكة ماتت
شوي وجت اكرام وزعت الكيكة وقعمزت، هناء كانت كل مرة تشبح فيها لين اكرام حست بشي غريب وتذكرت يلي صار من سبعة سنين لما كان عمرها 16 سنة لما شافها انس قدام باب حوشهم
[وايه اكرام اكبر من احمد وانس بسنة وانس كان يعلم بعمرها ومكانش هامه الأهم عنده هو حب حياته اكرام]
__عند احمد__
واقف في السوبرماركت يراجي في دوره بيش يدفع ويطلع
احمد: يكلم في الشخص يلي قدامه .. بالله انشط يا خوي عندي مندير
الشاب: اصبر شوي ونكمل
احمد: شكرا .. قالها بلا نفس
خلص وركب سيارته لكن جاه اتصال من رقم غريب، رد ولقاه صوت بنت
احمد: غالطة اختي .. وكان بيصكر
البنت: بالله عليك متصكرش بنقولك حاجة مهمة
احمد: خير نسمع فيك
البنت: في عندي فيديو بنبعته ليك توا بالله عليك لما تشوفه متخليش أعصابك ينفلتن
احمد: عدل تقعميزته .. خيره شن فيه الفيديو
البنت: توا بنصكر وتو نبعته ليك
احمد: هي
صكرت البنت وبعتت الفيديو يلي قالت عليه ولما شافه احمد معاش يعلم على روحه لين لقي روحه قدام باب الحوش
____في المربوعة___
خالد: والله الحق يا خوي اني جاي بنخطب بنت من بناتك لولدي ها شن رايك
محمد: والله وهذي الساعة المباركة من نلقوا خير من ولدي انس يكون نسيبي لكن مقلتش من هي يلي تبي تخطبها لانس نور ولا انفال
خالد: لا نور ولا انفال اني جاي نبي اكرام
محمد: استغرب .. اكرام؟ ياخوي راهو اكرام اكبر من انس بسنة
خالد: ايه نعلم وقلت لانس هذا وقالي فرق سنه ميدير شي
محمد: ابتسم وشبح لانس .. والله عليا اني مواقف يا خوي بس انت تعلم لازم ناخدو رأي البنت
خالد: من حقك ياخوي ومن حق بنتي اكرام تقرر
