⭐️
ديرة بن عفيف
دخلت البيت بخطوات مسرعه وغاضبه، تشوف ام سعد الجالسه عند الجلسة وكاشفه، لفت تستوقف دخول الشيخ حابس بحيث انها وقفت امامه تحط يدها على صدره عند الباب وتهمس : وقف ام سعد داخل
تنهد يصد بنظره لثواني تلف فيها مهره ناحية ام سعد الي تغطت فورًا، ثم ابتعدت عنه يفهم انه مسموح، دخل البيت يلمح دلوف مهره لفوق، ولف لأم سعد وينطق : عمران نام؟
هزت راسها بالايجاب : قبل ساعة
هز راسه يتمتم ب " زين "، وسرعان ماعلّا صوته ناحيتها : خلاص روّحي لبيتس وبكره تعالي المجلس
شبكت يدينها ببعضهم وبنبرة توتر نطقت : ليه ياشيخ وش الي سويته انا؟
هز راسه بنفاذ صبر ثم اردف : الله يستر عليتس ياام سعد روّحي لبيتس ومن اصبح افلح يلا!
هزت راسها تشيل اغراضها وتطلع برا البيت، انتظر لما سمع صوت الباب وتقدم يقفله ويتجه ناحية غرفة ولده، يتطمن عليه ويغطيه باللحاف ويتجه لغرفة الي شاغله عقله وجاء الوقت الي ينفرد بها
قبل عشر دقايق من الان، ووقت دخلت الغرفة تشيل عباتها وكلها غضب مكبوت، من اسلوبه وعصبيته الزياده ومن السبب الغير مبرر برضوا، وقفت عند المرايا تشيل الذهب الي عليها كله وترجعه لاماكنهم، جهزت لها بجامة حريريه مستوره بتعمد على دخوله للغرفة، لمح جم الغضب وبراكينه على ملامح وجهها، الي تدارك انه يفهمها من لمحه، يشوف تجاهلها له ويشوف انها في صدد الروحة لدورة المياة بنية تغيير ملابسها، ومن تقدمت قاصده تعديه مسكها من معصمها يرجعها امامه ويردف : وش له كل العصبيه الي اشوفها الحين؟
ردت بسخريه : وش له! يعني تشوف ان عصبيتك في السيارة لها لكن انا مالها!
تنهد يمسح على ملامح وجهه وشنبه : الحين وش المطلوب مني؟
هزت راسها بالنفي : ماهو مطلوب منك شي غير انك تعدّني ماني موجوده بحياتك
عقد حواجبه يرجعها امامه من قررت تبعد مره ثانيه : وش هالكلام الي اسمعه منتس الحين!؟ صاحية انتِ الا فيتس بلا
مهره ردت بانفعال : ايه ماجاني البلا الا منك! تشك فيني مع ولد عمي الي تربيت معه بنفس البيت من انولدنا ولا قد صار بيننا ذرة مشاعر غير الاخوه!
الشيخ حابس : كلامي ماينعاد يامهره! هذا الولد مااشوفه حولتس مرتن ثانيه!
تنهدت تهز راسها بتاكيد ثم كملت : من عرفتك ودخلت بحياتي وانا قدرتي بالتحمل بدت تنفذ!
عقد حواجبه باستغراب وكملت : لا صار لي عرس وانزفيت مثل باقي بنات ديرتي ناهيك عن اني بنت ال مغيره وغير سمعتي الي صارت بالحضيض بسبب رجالك! وغير اهلي الي ماصرت اشوفهم ولما صارت فرصه ماسمحت لي بالقعده عندهم وقت اطول! وبدل ماتوضح لي السبب استقبل هواشك وصراخك علي بسبب مالي ذنب فيه! استكثرت علي كل شي ياحابس! كل شي اسكثرته علي
نطقت اخر جملتها بنبرة مهزوزه تبين حالتها الداخلية ومشت بخطوات مسرعه لدورة المياة توازن نفسها، وتركته على حالته المصدومه من كلامها، ماكان يتوقع ان كل هذا في قلبها رغم تقبلها الي يشوفه لواقعها، حاول انه مايقصر عليها بشي من فترة تواجدها في بيته لكن استوعب اشياء كثير بعد كلامها، تنهد يستغفر ويمسح على شنبه يسمع صوت الماي داخل دورة المياة
