رواية ( أحمد )
رواية ليبية
للكاتبة lil_sara_lil
.
.
.
.
______________♡♡♡♡♡_______________
.
.
.
.
يوم الاربعاء في الليل كان الشباب امقعمزين برا قدام حوش ناجي يلي كانت امه دايرة جَمعة نسوان، ويهدرزوا ويلي يدخن يدخن ويلي شاد تلفونه ويلي كان يهدرز ويقرم في الناس
جمعة: امتى يا تريس انتلحلحوا ونتزوجوا والله منظرنا يحشم وحني نحضروا في عراس ناس اصغر منا
عمر: تكلم على روحك يا وخيي انت يلي عمرك 31 سنة اني الحمد لله مازلت صغير
ناجي: ها السنتين يلي بينك وبينه
جمعة: صدقت والله يا وخيي انت أصغر مني في العقل ممكن لكن في الشكل كأنك بوي
عمر: كلامك مايعنيلش ياحبي قلبي ميت
انس: تنهد بصوت عالي ومد يده لجمعة .. عندك طرف سبسي تاني
جمعة: فكك ياولد بالله عليك كملت باكو كامل اليوم ومازلت تبي؟ اوعى لروحك
انس: شبحله بربع عين .. بتعطيني ولا لا؟
جمعة: تهدد فيا قصدك، لا مش حنعطيك
انس: وقف ومشي
عمر: وين بتمشي
انس: بنمشي نشري باكو دخان شكله وخيي جمعة باخل عليا بطريف سبسي
جمعة: شده من يده وقعمزه .. والله ماصارت يا انس عيب عليك اني نبخل على وخيي هاك شد .. مدله باكو الدخان .. كنت ننصح فيك بس، بس الواضح انك مصكر راسك.
انس: طلع طرف وولعه .. اوهه هكي نقدر انركز على هدرزتكم
كملوا هدرزتهم الفاضية يلي مامنها فايدة لأنهم قاعدين يتخيلوا بدون مايديروا حل لرواحهم
وفجأة وقفت سيارة هما كانوا عارفين هذه السيارة لمن بالضبط شبحوا لسيارة وبعدها شبحوا لانس يلي كان شاد باكو الدخان بقوة لين تمزط تحت يده
انفتح باب السيارة وطلع منها كان هو شاب طويل بشرته بيضة وشعره اسود كثيف ماشطه ورا بيش ميجيش على عيونه كان لابس تيشيرت ابيض وشرط بيجي وكاويش ابيض رياضي ايه كان (احمد) ولد عمهم محمد
نزل من السيارة ونحى نظارته وشبح لأربعة يلي كانوا امقعمزين تحت السور
احمد: شن الجو يا شباب
عمر: مية مية وانت كيف حالك
احمد: الحمد لله بخير
جمعة: تعال عكس معانا
احمد: لا صحيت بس جيت بنروح بالعيلة
انس ضغط على سنونه بقوة لين طلعن صوت
جمعة: غير تعال مش حيصير شي كان تأخرت على اهلك
ناجي: شبح لانس يلي كان يتنفس بصوت عالي وضاغط على سنونه .. شن تقول انت كيف تقوله يتأخر على أهله متتحشمش انت
جمعة كان حيرد على ناجي لكن تكلم أحمد
احمد: سامحوني يا شباب بس والله مانقدر نتأخر على امي باذنكم
ناجي: اذنك معاك ياغالي
عمر: سلملي على مرت عمي وقوللها وين حلوان السيارة الجديدة
احمد: متخافش حاطتكم في رأسها بديرلكم عزيمة مقومة قريب هي مع السلامة
وقف احمد في سور عمه يراجي في اهله يطلعو هو كان يعلم ان ناجي كان ميبيشي يقعمز معاهم على سبات انس يلي كان ميطيقش في احمد
