روايه لشمس في جلدي حروق وعلى سموم القيظ تزهر حياتي

البارت الثالث

اليوم الثاني
عصر يوم الجمعه بعد مارجعوا الرجال من المسجد وتغدوا جميع جلسوا بالديوان
وكان مستوسط الجلسه الجد جبر
ابو جبر ساري ناظر باابوه بعد مارشف من كاسة الشاي:يبه الدْبايح العرس بروح أنا والعامل اكرم نجيبها من الديره لحايل لاتنقل هم
ناظر الجد جبر بعياله وأحفاده وصغر عيونه للحظة ونطق:طيب وين بشار
فز سلمان من سمع جدة نطق اسم  بشار اخوه :سم يبه وش بغيت به
الجد جبر بهدوء:مدري إذا هو صلى معنا الجمعة وماشفته قالط معنا بالغداء
سلمان براحة:جينا انا وهو بنفس السياره ومعنا ابو نايف ناصر  "زوج غروب اخت بشار وسلمان"
هز راسه الجد بصمت خفيف:خله يروح  مع سراي والعامل
-
بالطرف الثاني بالبيت
كانوا ملتمين بالصالة الداخليه ويشربون شاهي حبق حايلي
وكانت جلستهم حول جدتهم رحيمه اللي باسطين سفرة القهوه والشاي قدامها علشانها قاعده على الارض
ومتوسد حضنها بشار وتلعب بشعره قدام غادة وأمه
فقط كانت أثير قاعده بغرفتها هي وجدتها من بعد الغداء وفاتحه نصف الباب تسمع سوالفهم وهي قاعده على طرف سريرها ومركيه ظهرها على المخده وبيدها كتاب من كتب غازي القصيبي "رحمه الله"تقرا  ببطئ وتركيز مع ان اصواتهم عاليه وتسمعهم إلا انها مندمجه بالرواية ومرسومه احداثها بعقلها وغايصه بين الجمل
توقفت عن القراءة من سمعت صوت ضحكات بشار العاليه شدت على مسكتها للكتاب وحمر ووجها من الخجل وهي تسمع جدتها تتكلم بعصبيه خفيفه:وش يضحكك انت!! ماني بقايله نكته !
بشار رفع راسه من حضن جدته وناظر فيها:اسف بس شسوي تبين تتدخلين فكره الزواج براسي بالغصب قلت لك أنا مافكر الحين !،زوجوا العود"سلمان اخوه الكبير " اول ثم فكروا فيني
كان بيقوم بس مسكته مع يده بالقوه وجلس والتفت وهو مبتسم ونطقت جدته بتساؤل:طيب معنى كلامك مايهمك اي بنت ولا انت حاط براسك وحده؟
بشار ردف وهو مبتسم :لا
غاده وهي تبي تتاكد مع جدتها :متاكد من جوابك؟
التفت لغادة وضحك بااريحية:اي والله خلصتوا تحقيق؟ بقوم لديوان
فلتت يده جدته وهي تاخذ الفنجال وبدون ماتناظره :قم
قام بشار وهو يضحك بقوه من ملامح جدته المعقدة :الله!! الحين اقوم بعد مانشفتوا حلقي
نوف امه تاملت وقفته بالثوب الابيض  بعد ماقام ؛بسم الله عليك
غادة ناظرت امها بطرف عين:على شنو عيونك  تأشر قلوب
نوف بضحكه:بسك غيره
ضحكت غادة وهي تقوم :بشار اصبر بغيت انسى خذ ايبادي معك حطه بالسيارة علشان ماتنسى تصلحه لي تكفى  توقفت حياتي من بعده
ناظرت فيها جدتها باانتقاد وأسلوب صريح معتاد منها :عز الله ماعمري سمعت منك حكي سنع دايم حكيك يفشل وماهو زين
غادة عضت على طرف شفتها بقهر خفيف :الله يسلمك
وصدت عنهم وطلعت على الدرج وقف بشار مبتسم يناظر زولها يختفي عن نظره والتفت لجدته :يمه شوي شوي على غادة ترا للحين صغيره
كشرت رحيمه :اي اي مابقى إلا انت تعلمن الاسلوب
أنا اعرف للبنات وتربيتهم
والتفت لنوف بلوم  وسكتت
نوف حست بنظراتها وابتسمت بتوتر خفيف
تكره انتقادات الجدة رحيمه اللاذعه وبنفسها دايم حفيداتها يمشون مثل المسطرة وبااسلوبهاالمعقد والقديم تجرح فيهم
بدون ماتحس ولاترحم
نزلت لهم غادة بالايباد وعطته بشار ومشت لغرفة اثير بدون كلام وبداخلها مشحونه من جدتها
دخلت غرفة اثير بعد مااستاذنت وسمعت صوت أثير ترد عليها بالدخول
سكرت الباب وهي تتكي عليه ناظرتها آثير بتعجب:شفيك؟
غاده وهي ترفع خصلات شعرها الاسود بشباكها:قاهرتني يمه رحيمه اه بس متى يجي عرس جبر وإيثار ابي اشوف رياكشنها لاشافت فستاني تتيقن وتعرف اني افشلها صح ولالا
اثير بصدمه:وش وششش تبين يشلل ضغطها ترا يوم ملكه إيثار صكها راسها من رفعه الضغط بسببك وتحلفت تفتن عليك سلمان
غادة وهي تتخصر:مايهمني جسمها ولا جسمي؟ وسلمان ! مايهمني واذا فتنت علي ابوي براسه !وش بيصيير يعني طالعه للرجال أنا ولا للحريم؟امي شافت التصميم وماقالت لي شى ابوي ماراح يقول شى إذا امي موافقه
بس يمه  رحيمه تفكيرها مصدي مشكلتها
اثير بزعل :حرام عليك والله ترفعين ضغطها وتزعلينها على فستان ترا هي تبي ترضين ربي!، اللبس القصير
قاطعتها غادة وهي تسد اذانها:اللبس القصير والمشلح يوقعني بالنار على راسي هذا كلامها تحسبين ماحفظت كلامها وتضخيم المواضيع عندها؟
ماردت اثير
كملت كلامها غادة بقهر:لاتسوين فيها على راسي حتى انتي تنقهرين من كلامها وأسلوبها معنا بس مسويه تهدين الاوضاع
أثير بغصه كتمتها:لا ماانقهر منها لانها هي اكثر وحده بالدنيا تبي مصلحتي ومصلحتنا كلنا لايصير قلبك اسود غادة وتحقدين ترا بالنهاية هي جدتنا
جلست غادة باارتباك من سمعت نبرة صوت أثير وعيونها  كيف حمرت:هيه شفيك ادري تعلميني انتي؟ بعدين تعرفين قلبي أنا ازعل واهاوش وأنسى بعد دقيقه
مااحقد
ماردت أثير وبقت ساكته
طال الصمت ورجعت تكلمت غادة بنبره منخفضه:عادي اسألك؟
أثير بعدت الكتاب عن ورا ظهرها ونطقت بهدوء:اي
غادة بنفس نبرتها الخافته: شفيك هالايام دمعتك صايره قريبه؟
أثير ابتسمت :هرومونات يمكن؟
غادة ناظرتها بتركيز :بس؟
اثير بكتمان:اكيد
اخذتها  غادة بحنيه بحضنها ورصت على كتوفها :تراني اختك إذا ناسيه!، لاتخبين عني اي شى يحزنك ويضايقك سااامعه
ابتسمت اثير وهي تشد على حضن غادة:ادري لاتخافين ماانسى
بعدت غادة وهي تضحك :كويس والحين قومي نشرب حبق مع امي برا بشار مشى لديوان
دخلت جدتهم بنفس اللحظه وهي تخلي الباب وراها مفتوح :غادة خالاتك جو روحي سلمي عليهم
فزت غادة:شجن معهم؟؟؟
جدتها بقلة صبر:روحي وشوفي
ضحكت غادة بفرحه وهي تطلع
ناظرت الجدة رحيمه بـ أثير :وانتي شفيك معتكفيه بالغرفه للحين ترا بشار مشى ومحد بالبيت
هزت راسها أثير بـ زين وقلبها يضرب طبول بصدرها بس لحظه ماتسمع صوت بشار ولا ينذكر اسمه ماتدري وش الشعور اللي يداهمها ويسر خاطرها ويستبشر من تسمع ضحكاته ومزحه تعرف وقتها ان مزاجه زين ويزين مزاجها معه
طلعت اثير بعد وقت قصير
لتسلم على اخوات نوف
نوار وتحرير اللي وصلوا حايل الظهر وجو يسلمون على اختهم
سمعت صوت ازعاج الاطفال وابتسمت ببشاشه من شافتهم يركضون ويسلمون عليها  مسكت بنت تحرير الصغيره "سمر" ونطقت بحنية:ماشاءالله من ذي الحلوووه وش اسمك ؟
سحاب أخت سمر بدلع ؛هذي اختي سمر
اثير مسحت على شـعورهم وهي تضحك:تبارك الرحمن تهبلون
نزلت غادة من الدرج وهي تسمع حوار أثير والبنات الصغار وابتسمت لهم
التفت اثير من حست غادة وراها ونطقت بخجل خفيف :سلمتي على خالاتك؟
غادة بضحكه؛اي وترا نسيت اعلمك ان غروب جايه من اول ماقعد عندنا بشار جابها زوجها قبل الظهر بس راحت تنام فوق وتوي صحيتها بتنزل
هزت راسها وهي تدخل مع غادة المجلس
وقفوا لها نوار وتحرير من شافوها داخله وهم مبتسمين
سلمت عليهم وتحمدت لهم بالسلامه وجلست مقابلهم بنعومه تسمع سوالفهم
خلال دقائق بسيطة اندمجت مع سوالفهم وضحكهم على بعض
تحرير مسكت يد نوار وهي دموعها تنزل من الضحك:تكفين سكتي خلاص مو قادرة
نوار ببتسامه وهي تناظر خواتها يضحكون:وانا الصادقه يكلم بوسط الطياره ولا همه احد هالشايب ولامفكر إلا بمزرعته اللي بالقاعد"محافظة من محافظات  منطقة حائل
قطع سوالفهم صوت غادة وهي داخله تاشر لـ أثير :جبر بيسلم على خالاتي
قامت أثير بسرعه وطلعت
ناظرت تحرير بااختها نوف:المسكينه هذا وضعها دايم؟
تنحرم من الجلسات علشان العيال بيدخلون؟
هزت راسها نوف :اي والله مع انهم مثل اخوانها عيالي وعادي عند عمتي تقعد معهم بحجابها الكامل  بس هي تستحي منهم وتدخل غرفتها ماتطلع إلا إذا طلعوا
قطع كلامهم صوت تنحنح جبر
تبسموا من دخل عليهم بهـيبته
زغرطت نوار بحماس من لمحته بالثوب الابيض ومرسم بشماغة الاحمر
ضحكت تحرير على استقبال نوار لجبر:ياحيالله العريس
قرب منهم جبر وهو يسلم عليهم ببتسامه :الله يحييكم ويبقيكم يارب تو مانورت حايل اول ماشافن ناصر نازل من السيارة بشرني انكم داخل قلت ماراح ادخل مجلس الرجال قبل ماسلم عليكم
ضحكت نوار:عساك تسلم من كل شر والله ان الفرحه مو شايلتنا عسى الله يتتم عليك فرحتك
كانت غادة واقفه وراه وتصور استقبال خالاتها لجبر
مقطع بسناب ارسلته لشجن خالتها ولقروب اللي يجمع إيثار واريام وهيوف
مقصدها توري إيثار طبيعه جبر وترتاح له
خذت وقتها وهي تنتظر إيثار فتحت المقطع
وبعد مرور ربع ساعه فتحت ايثار المقطع
وتبسمت بخبث وقفلت جوالها وهي تتسمع لسوالف خالاتها مع جبر اللي آخذهم الوقت بدون مايحسون
-
ببيت ابو تركي ساري
كانت ايثار ترتب شنطه الميك اب الجديد وترمي القديم بالدرج انكسر ظهرها من الوقفه واخذت جوالها من الشاحن وانسدحت على السرير اخذها الفضول تفتح مقطع الفديو اللي مرسلته غادة
وتصلب جسمها من شافت ظهره العريض مغطي على جسم خالات غادة استنكرت بالبدايه لكن رجف قلبها من سمعت زغاريد نوار وترحيبها بجبر بلعت ريقها بصعوبه وهي تتامل ملامحه وهو مبتسم ويرد عليهم بصوته الخشن كانت  الفرحه معتليه ملامحه
ارتخى جسمها للحظه مالمحت ابتسامته وهو يجلس
وقلبها ينبض بقوه طفت جوالها بسرعه ورمته جنبها وبداخلها مشاعر متضاربه إلى الآن قلبها مو مرتاح لجبر وتحس بخوف
-
نسرع الاحداث -
بعد مرور اربع ايام
وبيـوم زواج جبر وإيثار
بالقاعة متواجدين فيها لحضور الزواج
جميلة واسيا ونوف وخواتها نوار وتحرير
وشجن اللي جت بنفس اليوم بالطيارة من الكويت لـ حائل
كانوا حايسين اغلبهم مع الميك اب ارتست يتجهزون
والاغلب يضبطون بالقاعة مع المشرفات
اريام وغادة خلصوا الميك اب وجالسين مع الهير ستايل
همست اريام:وين غروب تاخرت مابقى شى الحين ويوصلون الناس
غادة بسخرية ناظرت بالمرايه:اسكتي من عقب ماجاء ناصر عافتنا لها اربع ايام ماجتنا بس تكلم امي
ضحكت اريام لما دخلت عليهم فجاه غروب وهي تاخذ نفسها  وتجلس على الكنبه:يمه يابعد الغرفة هذي انهلكت
غادة وهي تطالعها من المرايه العاكسه :حبيبتي والله
غروب عدلت جلستها وهي تبتسم:معليش بنات باخذ نفسي وأسلم عليكم
اشرت لها غادة بيدها:لا لا واصل سلامك
مسحت على بطنها غروب ببتسامه بعد ماحست بحركه الجنين :اشوا
اريام وهي تساعد الهير ستايل برفع الشبكة الشعر:اي مضبوطه حبي تسلم يدينك
الهير ستايل:الله يسلمك عيوني نادي لي اللي بعدك
اريام وقفت وهي تاشر على غروب؛مابقى إلا هذي خذي بريك وتقهوي وحلي على ماتاخذ نفسها وترتاح
ضحكت الهير ستايل وهي تناظر غروب :الله يقومك بالسلامة
ابتسمت غروب بمجامله:الله يسلمك ياروحي
جلست بجنبها الهير ستايل وهي تتقهوى وتتأمل حركات غادة واريام قدام المرايه وهم يصورون
مر الوقت بسرعه مع تجهيزاتهم
كانوا العيال بديوانيتهم ينتظرون يجي جبر ويسلم عليهم
كان التوتر ماكله بس يحاول يصير ثابت بالواقع ومتماسك
دخل المجلس على العيال وهو لابس البشت الاسود وقاموا له وهم يسلمون عليه ويوقفون جنبه للاجل يصورون معه 
كانت عيونه تدور عليهم وابتسامته ثابته
مسك كتفه جسار وهو يسلم عليه :الله يبني بيتك
زادت ابتسامه جبر  بمحبة ومعزه لجسار خاصه :ربي يسلمك ويحفظك
بعد ماخلصوا تصوير ركب مع بشار وسلمان
وبقيه العيال ركبوا سياراتهم وزفوه لقاعة الزواج اللي كان جدهم جبر وعمامهم سابقينهم ويستقبلون الضيوف
وصلت سيارة الزفه للقاعة ونزل منها جبر وهو متماسك والابتسامه شٰـاقة  بمحياه كان يحس الفرحه مو شايلته
قرب من جده وهو يسلم عليه يبوس راسه بااحترام وكمل يسلم على الضيوف وهو يستقبل تبريكاتهم ويسمع دعواتهم بفرحه تغمر جوفه
-بعد العشاء
بدوا الرجال ياخذون سيـوفهم للاجل العرضه