⭐️⭐️⭐️
مجلس بن عفيف
جالس وعلى يمينه ولده عمران، يسمع اقاويلهم وحكاويهم، واكتفى بأنه ينهيها : يارجال! الي صار صار وحفيدة مضحي صارت عندي
احد رجاله نطق بغضب : ويروح دم رجالنا عبث! ماهم برجال بن عفيف الي يثبطون عشان مراه!
عقد حاجبينه بغضب ورفع يده بتهديد : الكلام الي عندي ووصلكم، صار النسب وانتهى الثار!، وان به احد عنده كلمه فوق كلمتي ينطقها الحين!
عمّ السكوت وماينسمع الا اصوات الهمس، مابين معارض ومؤيد، ارخى ظهره يسمح لهم بالطلوع، ولف عمران لأبوه يهمس : يبه الرجال ماهم مقتنعين
الشيخ حابس : وعساهم مااقتنعوا!
رفع نظره للولد الي دخل يلقي السلام ويقبل راس الشيخ حابس وكتفه، وكان من حابس السؤال : احد جاء؟
هز راسه الولد يهمس له بإذنه : عراب حفيد مضحي ياشيخ ودخل اغراض كثيره
شد على فكة بغضب: دخل البيت؟
هز راسه الولد يبتعد من امره، وبعد ساعات كثيرة مضت، استقبال رجال وودعهم، ينهر هذا ويقهر هذا، والكل كان ملاحظ ومن ضمنهم ولده عمران ان ابوه متملكه الغضب، ويفرغ غضبه على الرجال، حلّ الليل وقام الشيخ حابس ووراه ولده متجه للبيت
قبل ساعات في بيت بن عفيف، وعند الشيخة مهره الي بشخصيتها وعفويتها كانت ترتب الغرفة وتحط جهازها فيه، تبتسم وتفرح من ان كل شي صار عندها، وكيف ان ماخلوا شي ولا بقّوه الا وصار بيدها، وغير اطقم الذهب الي تدري انها من ذوق المها واختياراتها، انضرب الباب بخفة تستأذن ام سعد، تنهدت مهره تتقدم تفتح لها وتطلع من الغرفة : شفيتس ؟
ام سعد : ام عبيده جات
ابتسمت مهره بمكر تهز راسها : ضيفيها شويات وجايه
هزت راسها ام سعد بتاكيد، تدخل مهره للغرفة وبشكل سريع تستبدل ملابسها بفستان ناعم ولبست ذهب وتزينت بالكامل تحت مسمى " زينة العروس "، نزلت تحت تبتسم للي قامت من مكانها تسلم عليها : يا هلا بام عبيدة وشلونتس
ام عبيدة : الحمدلله بخير دامتس بخير يالشيخة
جلست مهره تأشر لها بالجلوس بجانبها: ايه قولي لي وش الي صار ؟ وش الي انقال وماانقال عطيني العلوم
ابتسمت ام عبيده تناظرها وتناظر لبسها وذهبها : والله الي بقوله مارح يسرك يالشيخة مهره
تنهدت مهره تهز راسها بتاكيد وتبتسم : ماعليتس قولي لي
ام عبيدة : تكلمو عليتس وعلى اهلتس كثير، قالوا ان رجال بن عفيف يقولون ان شافوكم في مكان ماهو بزين واهلتس عشان يسترون عليتس زوجوتس للشيخ حابس عشان سمعتكم
شهقت مهره تحط يدها على فمها : منجدتس ذا الكلام كله طلع من رجال بن عفيف؟
هزت راسها بتاكيد، تسأل مهره مره ثانيه : متاكده ام عبيده؟
هزت راسها ام عبيدة تاكيد : والله يالشيخة ان الكلام طلع منهم ولا زودت من عندي شي
بعد الكلام الطويل وبعض الاحاديث، استأذنت ام عبيدة تقوم من مكانها تنطق : كثر الله خيرتس يالشيخة ابد والله ابوعبيدة ينتظرني بالبيت ولا ودي اني اخليه
مشت معاها لباب البيت : عاد مااوصيتس ياام عبيده، ابيتس تدورين الديار والبيوت بيت بيت وتقولين لهم ماشفت عز مثل عز الشيخ حابس للشيخة مهره، معززه مكرمه، وارجعي لي اكرمتس كرم يعجبتس
ابتسمت ام عبيدة تهز راسها بتاكيد : ابشري ماطلبتي شي
