🦋 إسكريبتات شروق حسام 🦋

الجزء الأخير 🦋 نهاية آخرى

بقلم شروق حسام 🦋

_" باركوا لي يا جماعة أنا قررت اتجوز بعد محاولتين فاشلين ههههه وشكل هتبقي التالتة تابتة. "

معتز بص له بصدمة لأنه حس إن هند بدأت تحب أخوه وكان متوقع إن عمران يتقدم لها عشان بدأ هو كمان يحبها.

هند بصدمة حاولت تخفيها " تتجوز ألف مبرووك ومين بقي العروسة. "

_" ممثلة في الوسط أكيد هتعرفيها فيروز الزيات. "

_" طول عمرك بتعرف تختار هههه. "

هند في سرها بوجع " الحمد للّٰه على كل حال مافيش حاجة بطلبها بتتحقق شكلي كنت بتوهم لما حسيت إنه بيحبني أنا اتوجعت بما فيه الكفاية ومش هوجع نفسي تاني عشان أي حد الحمد للّٰه. "

عمران بفرحة وعبوس في نفس الوقت " هند هند أنتِ يابنتي سرحتي فين؟ "

هند بإبتسامة " سمعاك يا عمران كنت بتقول إنك عايز نحتفل بره وبعدين. "

_" هههه دايمًا مركزة حتى وأنتِ سرحانة وبعدين يا ستي الفرح آخر الأسبوع وأنا جهزت كل حاجة عشان أتقدم لها ونعمل الفرح بسرعة. "

_" هتتقدم لها امتى؟ "

_" كان نفسي أتقدم لها النهاردة قبل بكرا بس الصراحة عايز أحتفل الأول معاكم. "

عمران باستغراب " إيه يا معتز هتفضل واقف عندك كتير مش هتبارك لي ولا إيه؟ "

معتز بارك له وسابه ومشي بسرعة.

عمران بهمس " ماله ده زعلان ليه أنا عارف إنه مش هيقدر يعيش من غيري بردوه هههه. "

⭑⭑⭑⭑⭑⭑⭑⭑⭑⭑⭑⭑⭑⭑⭑⭑⭑⭑

عدى يومين

هند قررت تسيب الشغل بس بعد مالقت شغل في عيادة لدكتورة قلب بس كل اللي مزعلها إنها هتسيب ماسة بعد ما اتعلقت بيها. بس هتعمل إيه؟ مفيش حاجة في إيديها تقدر تعملها غير كده.

هند لسه هتدخل لمعتز مكتبه تبلغه إنها هتسيب الشغل دخل عمران من باب الفيلا وهو في حالة يرثي لها.

هند بقلق " عمران أنت كويس حصل إيه؟ "

عمران بدموع " أنا اترفضت يا هند رفضتني فيروز شايفاني....واحد مالهوش قيمة أنا واللّٰه بحبها. أنا ليه حصل لي كده؟ كل ده عشان اتجوزت كذا مرة. "

هند قلبها وجعها من حالته " اهدي بس وأقعد وأنا هجيب لك كوباية عصير تفوق من القرف اللي أنت شاربه ده. "

بعد شوية

كان عمران فاق شوية من آثار الكحوليات اللي شربها.

_" هند تتجوزيني أنا عارف إنك بتحبيني من زمان فوافقي تتجوزيني وأنا هعيشك ملكة. "

هند بجمود " تصدق أنا حقيقي عمري ما شوفت أحقر منك يعني كنت عارف إنِ بحبك وماتكلمتش ودلوقتي عايزني إستبن بدل فيروز اللي رفضتك. "