Love Curse ( အချစ်ကျိန်စာ ) Season 3

Part 19

‌အမှောင်ထုဖုန်းလွမ်းနေတဲ့ တောအုပ်လေးဟာ ညအချိန်နဲ့အပြိုင် တိတ်ဆိတ်နေတော့သည်။ ညဘက်တွင် ကျက်စားသည့် အချို့သော တိရစ္ဆာန်ငယ်လေးတွေမှလွဲ အခြား တိရစ္ဆာန်တို့မှာလည်း အိပ်စက်အနားယူနေကြပြီဖြစ်သည်။ သို့သော် ကံဆိုးလှစွာသော သမင်ငယ်လေးတစ်ကောင်မှာတော့ ညအချိန်နှင့် ပနံသင့်စွာ စီးဆင်းနေသည့် တောင်ကျ စမ်းရေလေးကို သောက်သုံးနေ၏။ သနားဖွယ်ရာ သမင်ငယ်လေးမှာ သူသောက်သုံးနေသည့် ‌အေးမြလှသော စမ်းရေကြည်သည် သူ့ဘဝမှာ နောက်ဆုံးအနေနှင့် သောက်သုံးနေရသည်ဆိုတာကို မသိပေ။

အဘယ်ကြောင့်ဆိုသော် သူ၏ အသက်အားအဆုံးသတ်ပေးမည့် အရာတစ်ခုသည် ထိုစီးဆင်းနေသော တောင်ကျစမ်းရေ၏ တစ်ဖက်တစ်ချက်တွင် ထိုသမင်လေး၏ လှုပ်ရှားမှုကို မမှိတ်မသုတ်စိုက်ကြည့်နေလေ၏။

ဝေါ..............

သမင်လေးမှာ အေးမြလှသည့် စမ်းရေကြည်ကို သောက်သုံးနေရင်း သူ့နားသို့ အလျင်အမြန်နီးကပ်လာသည့် အမည်မသိ အရာတစ်ခုကြောင့် အလျှင်အမြန်ပဲ ပြေးဖို့ အရှိန်တင်လိုက်၏။

သို့သော်........

ဗွမ်း!!!!!!!!!

ထို သမင်လေး၏ ခန္ဓာကိုယ်ပင် အနောက်သို့ မလှည့်ရသေးခင်မှာဘဲ ထူးဆန်းစွာ အသက်ရှူသံကင်းမဲ့သွားပြီး စမ်းရေကြည်စီးကျနေသည့် ရေထဲမှာပင် လဲကျသေဆုံးသွားတော့သည်..........

ထိုသမင်လေးအား လဲကျသေဆုံးစေခဲ့သည့်အရာမှာ ထိုသမင်လေး၏ အနီး၌ပင် လှည့်လည်နေသည်။ သေချာကြည့်ပါက ထိုအရာသည် သားရဲလည်း မဟုတ်၊ အမဲလိုက် မုဆိုးလည်းမဟုတ်ပါဘဲ ထူးဆန်းလှသည့် အနက်ရောင်အခိုးအငွေ့ကိုမှ နီရဲနေသည့် မျက်လုံးကြီးနှစ်လုံးပါရှိနေသည့် မကောင်းဆိုးဝါးတစ်ကောင်‌ပင် ဖြစ်ပေတော့သည်.......

ထိုမကောင်းဆိုးဝါးမှာ အားလုံးသိထားကြပြီးသားဖြစ်သည့် အဂ္ဂိနှင့်အတူ ကပ်ပါးမကောင်းဆိုးဝါးအဖြစ်‌ မွေးဖွားလာခဲ့သော အရိပ်ပင် ဖြစ်သည်။ ငယ်စဉ်အခါတည်းက အတူမွေးဖွားလာသည့် ညီဖြစ်သူနှင့် မတူညီစွာ မိမိအားမိမိကိုး၍ အားလုံးထံမှ ပုန်းလျှိုးကွယ်လျှိုးလုပ်ကာ ကြီးပြင်းလာသူမို့ သတ္တဝါလေးတွေရဲ့ အသက်ကို သတ်ဖို့ ဝန်လေးနေသူမျိုးမဟုတ်။ ထိုသို့ ဝန်မလေးရသည့် အဓိက အကြောင်းအရင်းမှာ သူ့လို နာမ်မရှိသည့် ‌မကောင်းဆိုးဝါးစင်စစ်‌တစ်ကောင်အတွက် အရသာအရှိ‌ဆုံးအစားအစာက သက်ရှိသတ္တဝါတို့၏ အကြောက်တရားနှင့်ပြည့်နှက်နေသော အသက်ဝိညာဉ်ပင် ဖြစ်သည်......