# طشت خرز
كنوز القحطاني
وَلي
مثل نار بگطن مابينت مهموم
بارد بالوجه واني احترگ سكته
********************************الحاضر
رايه :: ذبيت ع وجهي مي بارد من الثلاجه الدنيا موت حر وصايمه وآخر دقائق قبل الإفطار هاي أصعب دقائق احس روحي وصلت الرمق الأخير
بدأت الشمس تسلم و الغيوم تلونت بالبرتقالي ممزوج بالأحمر متوزعه ع بحر السماء،، دم الشهيد
هاي الكلمتين سمعتهم من امي أول مره شفت بيهم الغيوم بهذا الألوان وسئلتها كان جوابها من كلمتين فقط
دم الشهيدكلمتين خطت تاريخ كامل ،، تاريخ قلب كل الموازين من احدعش أخ غدروا باخوهم إلى اخ وأحد فدى أخوه بروحه ودمَه
من تفكير كان يقيد المرأة بقيود العادات والتقاليد إلى امرأة هزت عرش الطغاة بكلمات محتسبة راضية بحكم الله تعالى،،
مديت رأسي من المطبخ لأمي وحچيت
_ يمه تردين شي راح اصعد فوگ السطح
اندارت امي عليَّ بيدها الچفچير تهيج بجدر التمن وگالت
_ لا بس ثرمي الزلاطه
_ ثرمتها وحطيتها بالثلاجه تبرد
هزت راسها هاي هي ردت اروح ورجعت دخلت المطبخ بستها من خدها ابتسمت الي وعفتها وصعدت لمكاني المفضل
عدلت حجابي فوگ راسي اباوع ع فرع الأطفال تلعب طوبه ابتسمت ع ايامي چنت الدفاع اني و مُهره بالفريق و
وَلي الله و حمزه الهجوم وحيدره الكولجي وأخوه الياس حكم بس دائما لحكم لصالح فريقنا والا شيخلصه من حمزه
جريت نفس و زفرته أكثر من مره احس براحه بهذا الوقت من اليوم وقت الغروب
لفحني الهوى واني مغسله ومنگعه صدر فانيتلي اقشعر جسمي بس شعور منعش بعد الحر والعطش
ارتجيت ع تيغه وگعدت اتأمل إبداع هندسة الله تعالى بالسماء والغيوم شي يفوق الوصف والخيال
شويه وعلىَّ صوت قصيده باسم الكربلائي هذا الغريب منين،، بدأت الزوار تمشي ايام قليله ع موعد الزياره
عادة الميت يا شيعة لمّن يسكّن ونينه ..
تحضر أولاده وأخوته عن يساره وعن يمينه
هذا الي يوسده ويجبله وهذا اللي يغمضله عينه ..
احنا ما شاهدنا ميّت بالحديد مقيّدينه
من شدة التقييد .. ينزف دما من القيد ..
باقي الأثر لليوم .. وبيا ذنب مسموم ..شكد اسمع قصائد بس هذه القصيده احس باحساسها احس بخنگة السجن والظلم كل كلمة اعيش مضمونها داخلي يمكن لان أغلى شخص ع گلبي و روحي انحبس ظلم واتهم بهتان

أنت تقرأ
طشة خرز
Mystery / Thrillerطشت سنين المحبّة و من بگاياهن شلمّ ؟ مرّة تغفى جروحي بيّه و مرّة أحنّ وانلچم