ابتسم من شاف فرحتها وقال صقر : الحين بتطلعونه الغرفه العاديه ؟
سعود بابتسامه : لا بيجلس بالعنايه لين نتاكد بتستقر دقات قلبه
ابتسم صقر وناظر لعز وقال : ماعرفتنا عليك ؟
ناظرت الهنوف بعز وقال : معك الدكتور عز بن خالد
صافحه صقر وقال بابتسامة : والنعم والله ياعز
ناظر عز بالهنوف اللي مبتسمه وقال : والنعم بحالك ، من وين انتوا ؟
صقر بابتسامه : انا صقر بن حمد ال فهاد ، من نجد قحطان
ابتسم عز وقال : وش يصير لك فهد بن راشد ؟
صقر : ولد عمي ، تعرفه ؟
هز راسه بالايجاب عز وقال : الله الله صديقي من الابتدائي
صقر بابتسامه : حياكم ١٥ رمضان لاتردوني
سعود ابتسم وقال : ودنا والله لكن مره ثانيه
صقر ناظره وقال : لاتردوني يارجال
عز بابتسامه : تم الله يكثر خيرك
صقر ابتسم وقال : وخيرك يابو خالد
ابتسموا عز وسعود وراحوا للمكتب جلس عز وهو يتذكرها وملامحها الحمراء قاطع افكاره سعود وقال : والله اني دخلت اليوم اكثر من ثلاث عمليات ، مافيني ابد اناوب
عز بهدوء : استلم بدالك ؟
سعود بسخريه : من جدك ؟ ماصدقك
عز بابتسامه ويبي يمسك حالة ابو الهنوف قال : والله ياسعودي
سعود بفرحه قام واخذ اغراضه وقال : عزززز يابو العز
ضحك العز وقام يوقع بدال سعود مناوبه
< عند الهنوف >
الهنوف بهدوء : آلماس روحوا خلاص برافق معه انا
آلماس هزت راسها بالنفي وقالت : لا اخاف تحتاجين شي
الهنوف : لا والله ماحتاج شي ، وصقر بيّن تعبان خليه يروح يرتاح
هزت آلماس راسها بالايجاب وقامت عند صقر وقالت : صقر بنطلع للديرة رفضت الهنوف نجلس
صقر بهدوء : تم يابنت العم وقام عند الهنوف وقال : اذا احتجتي شي هاذ هو رقمي
اخذت رقمه الهنوف وقالت : ماتقصر ياصقر
ابتسم صقر وقال : ودعتس الله ، بنت العم مشينا
حضنت آلماس الهنوف وقالت : مع السلامه
الهنوف بابتسامه : الله يحفظكم
ركضت آلماس تلحق صقر ركبت ورا بالسياره ومسكوا خط للديرة ناظرت الهدوء والقمرا والنجوم مُرافقتهم الطريق وقالت تقطع الهدوء : صقر بسألك سؤال
صقر بابتسامه : اسألي يابنت العم
آلماس بفضول : تحب ريناد ؟
ضحك بخفه وقال : سؤال غير متوقع يابنت راشد ، ايه احبها بس مادري اذا هي تبادلني او لا
رجعت آلماس ظهرها لورا وقالت : تدري ماعاد عرفت مشاعرها تجاهك بس اللي لاحظته تحبك بس خايفه
صقر بتساؤل : ليه خايفه ؟
آلماس بعدم معرفه : مادري
صقر بهمس : انا اعرف ليه
تنهد ونزع شماغه وحطه بحضنه ويناظر القمرا اللي تسبقه ويتذكرها بفستانها المُورد ابتسم بهدوء ومسح على وجهه تعبته افكاره وجداً كلها عن ريناد كيف يثبت لها انه مو قاسي وثقيل مثل ذياب ؟
< بالمخيمات >
كان نايم بهدوء بعد ماغرقته افكاره عنها يحسب انها زعلانه عليه تركها بدون وداع لكن للاسف شيء اكبر من الزعل جداً ، النسيان نسته فعلاً ، فز من صوت الفريق اللي ينادي برا وقال بصراخ : خمس دقايق ويبدأ الحرب تجهزوا سريع ، بروح المكتب انا
قام يلبس المضادات الحاميه من الرصاص ناظر يشوف ضيدان باقي نايم راح عنده وقال : ضيدان قوم يالله
قام ضيدان وقال : روحوا حاربو انتوا وخلوني هنا انام
ذياب بسخريه : لا بالله احلف ؟ بلعبه حنا ؟ قمّ اخلص
قام ضيدان ولبس وطلع مع ذياب
وقال ذياب : سريع الفريق مكتمل بس عايض وين ؟
عايض ركض وقال : جيت يالعميد
لبس الخوذه ذياب وقال باستعجال : توزعوا على الجبل ذا ، توكلوا على الله وتذكروا دايماً قال الله تعالى ( قُل لَّن يُصِيبَنَا إِلاَّ مَا كَتَبَ اللَّهُ لَنَا هُوَ مَوْلانَا وَعَلَى اللَّهِ فَلْيَتَوَكَّلِ الْمُؤْمِنُون )
توزعوا فريق ذياب وراح ذياب ورا الحجرة اللي قريبة جداً من الكهف المحطم بس متخبين فيه اخذ ذياب المنظار وناظر داخل الكهف مافي احد اخذ المكبر وقال : عسكر .. الكهف مافيه احد ركزوا بالجبال قواكم الله
بعدوا العسكر عن الكهف وخلو انظارهم على الجبال ناظر ذياب بالمنظار بالجبل وشاف فوق الثلاثين شخص وقال بالمكبر : عسكر بعدوا عن الجبل برمي قنبله سريع
اخذ القنبله ذياب ورّماها عليهم حطوا اياديهم بأذنيهم العسكر من شدة الصوت اخذ المنظار ذياب وشاف الجثث بالارض وكلهم موتى وقال : الحمد لله احمدوه كثير ياعسكر انتصرنا ولله الحمد
خالد بصراخ : يالعميد ذياب فيه اصابه هنا
ذياب : سريع اسعااااف ، اسعفوه
راح ذياب متوجه للمخيمات لحقه ضيدان وقال : شكلك تعبان ياذياب ؟
ذياب بهدوء : اي والله حراره ياشيخ خلها على الله
ضيدان ناظر بوجهه ذياب اللي احمر وقال : وجهك احمر
ذياب حط يده على خده وقال : بروح اغسل وجهي واجي
هز ضيدان راسه بالايجاب
فتح الماء اللي بنص الخلا غسل وجهه اللي يلتهب حراره جلس بجانب المغسله من تذكر يوم مرض وكانت معه آلماس ضحك بخفه من تذكر هي اللي شالته توديه يغسل وجهه قال بابتسامه : ياليتس معي هالحين يالمزيونه
بعد الكاب عن شعره ونزل على وجهه رجع ظهره على الجدار تذكر يوم سوت له شوربة وصحت امها بآخر الليل عشان تعلمها ابتسم وقال : الله واعلم وش حالتس الحين ياحَرم ذياب
رفع شعره من على وجهه وقال : اللقاء قرب يآلماس
قام يتوضى يصلي الوتر وعظامه مكسر بسبب الحراره اللي فيه
< بالديره >
وقف السيارة صقر وشاف البيوت الثلاثة مافيها انوار وقال : شكلهم ناموا
آلماس ناظرت وقالت : اكيد ، يلا تصبح على خير
صقر بهدوء : وانتِ من اهله يابنت راشد
نزلت آلماس وراحت لبيتهم طلعت جوالها تتصل على ريناد تفتح لها الباب نزلت ريناد وفتحت الباب ابتسم صقر من شافها برا عند الباب نزل من الجمس ودخلت آلماس وباقي ريناد اللي تناظر بالقمرا ناظر من سمعت صوت طلع صقر ابتسمت له ودخلت ركضت على غرفتهم ناظرت بآلماس اللي تنزع عبايتها وقالت : كيف ابو الهنوف ؟
آلماس بهدوء : توقف قلبه بس الحمد لله رجع
ريناد بحزن على الهنوف : ياقلبي يالهنوف الله يكون بعونها
آلماس : امين يارب
ناظرت آلماس نفسها بالمرايه وباقي بكامل كشختها نزعت العقد من على عُنقها ورفعت شعرها لفوق ومسحت مكياجها اخذت لها بجامه لبستها ورطبت جسمها وتعطرت وراحت لسريرها رمت نفسها بتعب وبدت هواجيسها المُتعبه وماهي إلا دقايق ونامت
عند صقر راح للمقلط يشوف عزيز وسلطان باقي صاحيين دخل وقال : سلام
ردوا السلام وقال عزيز : يآدمي تتخيل انا والجود وسلطان اللي شلنا الزوالى والكراسي والعشاء لحالنا ؟
صقر بابتسامة : بسم الله عليكم كفو
انسدح صقر وقال سلطان بحده : ياشيخ معك غرفة نام فيها
عزيز بضحك : منجد محاشرنا انا وسوسو على المقلط !
رمى سلطان المخده على عزيز وقال : لاعاد اسمعك تقولي كذا
صقر بحده : اخمدو انت وياه راسي مصدع ابنام !
عزيز بابتسامه : اطلع غرفتك طيب
صقر بسخريه : مقلط ابوي مو حقك
عزيز ضحك وقال : وش يعني مو ابوي انا ؟
انسدح سلطان وقال باستفزاز : لا اخذناك من عند المسجد
عزيز ناظر فيه وقال : اجل رجعوني
صقر بحده : عزيّز خلني انوم احسن لك !
عزيز انسدح وقال : من عيوني
< بالمستشفى >
حط جواله على المكتب بملل صار له اكثر من ثلاث ساعات بالمكتب تذكر الهنوف وقام بابتسامه فتح الباب وطلع ناظرها من بعيد رافعه راسها والواضح له انها نايمه راح عندها وشافها نايمه بكل هدوء اتسع مبسمه رجع ظهره لورا يتأملها طاح قلمه من يده فزت الهنوف تناظر غمض عيونه باحراج ناظر الهنوف من قالت : دكتور ابوي فيه شي ؟
عز بابتسامه : لا صحته كويسه ولله الحمد ، تشربين شاهي ولا قهوة ؟
الهنوف ناظرت فيه وقالت : ولا شي شكراً
حك حاجبه يعرف انها بدويه ومالها بالاشياء ذي وقال : نتكلم عن ابوك بمكتبي ؟
قامت الهنوف وقالت : اكيد اذا عن ابوي
هز راسه بالايجاب ومشى قدامها وابتسم بانتصار دخل المكتب ودخلت وراه جلس على مكتبه وهي قدامه وطلب لهم كوبين شاهي
ناظرها متوتره قدامه وقال يهدي من توترها :
وش اسمك ؟
الهنوف بحده : مو لازم تعرف اسمي
عقّد حواجبه وقال : كيف اناديك اجل ؟
الهنوف ناظرت فيه وقالت : بنت عبدالله يكفيني
ضحك بخفه وقال : سمّي يابنت عبدالله
دق الباب وقال عز : ادخل
اخذ الشاهي عز وآشر على الهنوف يعطيها وقالت بهدوء : قلت مابي شي !
عز رفع حاجبه وقال : اشربي والله مو حاطين فيه شي
خزته الهنوف بحده واخذت الشاهي وقالت : وشو موضوع ابوي ؟
عز رجع ظهره لورا وقال : عندك اخوان ؟
هزت راسها بالنفي وكمل عز : طيب امك وين ؟
جمعت يدينها ببعض من حست برجفه ناظر عز فيها واستغرب وقالت بهدوء : ماتت الله يرحمها
عز بهدوء : اسف على السؤال ماكنت ادري الله يرحمها تجمعت دموع بعيونه وكمل يقول : انا عندي سؤال ليه دايماً اللي نحبهم يروحون ؟
ناظرت فيه الهنوف وبعيونه اللي تلمع وقالت :
فقدت احد ؟
عز غمض عيونه لاتدمع وكمل يقول : فقدت اغلى ماعندي وتعتبر كل شي عندي ، فقدت امي ماتت بسبب سكته قلبيه وانا عمري ١٦ وصرت دكتور قلبيه عشان انقذهم مابي احد يعاني مثلي ربيت خواتي لوحدي تتخيلين ؟ كنت اطلع من المدرسه اروح اشتغل عشان اجيب لهم لقمه بس
دمعت الهنوف وقالت : طيب وين ابوك ؟
ضحك بخفه وقال : ابوي ؟ خلنا من عمري عشر سنوات
الهنوف بتساؤل : توفى ؟
ناظر فيها وقال : يعتبر انه ميت بالنسبه لي بس للاسف عيشنا الفقد وهو حي تزوج وراح يربي عياله وخلانا انا وامي الله يرحمها وخواتي
الهنوف مسحت دموعها وقالت : طيب حلو عندك خوات وش اسمائهم؟
ابتسم وقال : خواتي كل شي بالنسبه لي اسمائهم
توق و عهد
الهنوف بابتسامه : كم اعمارهم ؟
ناظر بعيونها اللي صغرت لانها ابتسمت وقال :
توق ٢٥ وعهد ٢٢
ابتسمت الهنوف وقالت : قريبين من عمري
ابتسم عز وقال بفضول : كم عمرك ؟
الهنوف بابتسامه : ٢٣
ضحك عز وقال : اوف والله طلعتي بزره
خزته الهنوف وقالت : ليه كم عمرك يالكبير ؟
عز بابتسامه : ٣٠
ضحكت الهنوف ابتسم من ضحكتها وقالت : والله طلعت كبير ! ، المفروض حتى متزوج
ضحك عز وقال : مالقيت بنت الحلال غمز لها وقال : تقبلين ؟
طلعت عيونها الهنوف بصدمه وقامت وقالت : ياولد الناس لو تبيني تعال من البيبان مو من الشبابيك !
ضحك بعلو صوته وقال : ابشري نجي من الباب ليه مانجي دامها بنت ناس ؟
ابتسمت باحراج وطلعت قفلت الباب وقالت بابتسامه : اوووف يجنن
< بالديره >
دخل الجد المقلط المظلم وصارخ : قمّ انت وياه اذن الفجر عقّد حواجبه وقال : بسم الله انتوا ثلاثه والا انا اخرف ؟
ضحك عزيز وهو بنص نومته وقال : تخرف ياجد بس انا وسلطان
قام صقر وقال : انا صقر ياجد
الجد باستغراب : شفيك مارقدت بغرفتك ؟
عزيز بضحكه : اشتاق لنا المخنز
صقر بسخريه : عزيّز اسكت لاصبح عليك
الجد بحده : اول مره اشوف احد يقوم من نومته يضحك !
ضحك عزيز باقوى ماعند وقال الجد : قوموا اخلصو يمين بالله لو ماشوفكم وراي عند البوابه ماتلومون الا انفسكم
طلع الجد وقام صقر ياخذ كوب المويه اللي بجنب سلطان وكبه كله فوق عزيز شهق عزيز من برودة المويه وقال : قّم ياعزيز صلاة وي !
شرد صقر وضحك سلطان على عزيز وقال : نعيماً ياعزوزي
خزّه عزيز بحده وقال : اعوذ بالله لازم تخربون يومي
سلطان ضحك وقال : ياشيخ بعد شوي الاقيك تضحك
قام عزيز وقال : طيب طيب ياسوسو
وقف الجد عند البوابه وقال : وينهم ذولي !
ابو محمد بهدوء : هّد يايبه بيجون هالحين
الجد بصراخ : يعني لازم انت وياه تخلونا بالصف الاخير
سمعه عزيز وضحك همس للعيال : كيف الصف الاخير وهو شوي بيصلي بدال الإمام ؟
ضحكوا صقر وسلطان
أنت تقرأ
الله ياغرامٍ اعذّب من قصيَد
Poetryالكاتبة ألين انتي دليل الشعر لا حَل هوجاس أحيان أصب الشعر وأحيان أصبّتس شوفتس يشد العين ويشدّ الأنفاس مفتون منهو ذاق جرحتس وطبتس الياس ما يدخلتس والقد ميّاس يالمايس اللي كل ما ضقت أذبّتس أحيان أحبتس مثل ما تفعل الناس وأحيان لا والله "...
