🦋 إسكريبتات شروق حسام 🦋

الجزء الثاني 🦋

بقلم شروق حسام 🦋

هند لسه هترد محمد رد بحدة " وإحنا من امتى يا ماما والبنت عندنا بيتاخد برأيها هند هتتجوز عبد الله لأننا مش هنلاقي أحسن منه. "

سامح بحزن " على خيرة اللّٰه يا جماعة نقرأ الفاتحة وبعدين نتفق على كل حاجة. "

هند كانت قاعدة وبتبص لهم بقهر ليه هي اللي بيحصل لها كل ده؟ ليه؟

⭑⭑⭑⭑⭑⭑⭑⭑⭑⭑⭑⭑⭑⭑⭑⭑⭑⭑

بعد فترة
كانوا اتفقوا على كل حاجة وراحوا جابوا الشبكة اللي كانت عبارة عن دبلة وخاتم وغويشة خفيفة ماتسواش ومامتها مارضتيش تجيب حاجة زيادة عشان ماتكلفهمش وحطت مع الدهب الغويشتين اللي هند كانت شاريهم لنفسها وعملوا الشبكة في محل الدهب.

هند في سرها " اللهم إنِ أسألك الصبر الجميل فيما أصابني وخفف عليَّ مصابي. "

⭑⭑⭑⭑⭑⭑⭑⭑⭑⭑⭑⭑⭑⭑⭑⭑⭑⭑

بعد شهرين

فضلت أشغل نفسي في الشغل الجديد وما أفكرش كتير بعد ما سبت مصنع الملابس بسبب ماما وكلامها الجارح ليا واضطريت أشتغل في مصنع تاني في نفس البلد اللي ساكنين فيها.

وعبد الله ههههه من بعد ما إتخطبنا مش بيسأل عليا حتى والغريب إنه جاي يزورنا النهاردة.

في اليوم ده حسيت بتعب جامد واستئذنت من المدير ولسه بدخل البيت لقيت عبير أخت عبد الله طالعة تجري وهي في إيديها علبة الدهب بتاعتي.

هند اتصدمت ودخلت الشقة بسرعة " ماما فيه إيه؟ وعبير واخدة علبة الدهب وبتجري ليه؟ "

سعاد باحراج " واللّٰه مش عارفة أقول إيه يا بنتي؟ إحنا كنا قاعدين بنتكلم وحصل مشكلة واتخانقنا أنا وأمك وعبير لقيتها خدت العلبة وجريت. "

هند بقوة " كل شئ قسمة ونصيب يا خالتي وربنا يعوض ابنك بعروسة غيري أنا داخلة أرتاح. "

عفاف ماقدرتش تتكلم من الموقف اللي اتحطت فيه وسكتت وكانت هتتشل من اللي حصل من شوية.

⭑⭑⭑⭑⭑⭑⭑⭑⭑⭑⭑⭑⭑⭑⭑⭑⭑⭑

بعد شهر

_" قومي اجهزي يا هند عريسك جاي وكتب الكتاب النهاردة. "

هند بصدمة " أنتِ بتقولي إيه يا ماما؟ عريس مين ده؟ "

_" خالد ابن طنط سميرة. "

_" خالد ده عنده 40 سنة وأنا لسه 22 سنة ده غير إنه متجوز قبل كده مرتين. "

_" فيها إيه يعني؟ راجل والراجل مش بيعيبوا غير جيبه وهو شافك وعجبتيه وكمان هو هينغنغك وهيعيشك هانم بدل ما أنتِ زي الشحاتة كده. "

هند بجنون وهي بتشد في شعرها

_" أنا يا ماما أنا شحاتة ده أنا دفعت دم قلبي عشان تكونِ مبسوطة أنت وإخواتِ أكل ماكنتيش بتأكليني وبتوفري هدوم مافيش مرتبي ومرتب بابا كله بتاخديه دهبي وخدتيه وراح. أعمل إيه أكتر من كده؟ ها قولي لي أعمل إيه؟ "

عفاف ضربتها بالقلم واتكلمت بغضب " أنتِ جاية يا وسخة تحاسبيني ده أنتِ تحمدي ربنا غيرك مش لاقي اللي أنتِ فيه دلوقتي ولما تتكلمي مع أمك تتكلمي باحترام وكتب كتابك على خالد دلوقتي مش بليل كمان ومش عايزة أسمع غير حاضر ونعم وإلا جسمك ده هحرقه ومش هتشوفي فيه حته سليمة. "

هند مسكت قلبها بوجع " الحمد للّٰه دي أمي في الأول وفي الآخر يارب خليك معايا وأختار لي الأحسن. "

⭑⭑⭑⭑⭑⭑⭑⭑⭑⭑⭑⭑⭑⭑⭑⭑⭑⭑

بعد ربع ساعة

كانت كل حاجة خلصت وهند خلاص حاسة إنها اتحكم عليها بالإعدام

عفاف بصوت عالي " هند تعالي. "

هند سمعت صوتها وطلعت بسرعة وبخوف لتعمل لها حاجة " نعم يا ماما. "

_" تعالي اقعدي جنب جوزك اتكلموا شوية وإحنا هنسيبكم براحتكم وهنطلع بره. "

_" تسلمي لي يا حماتي. "

هند بسخرية في سرها " حماتي وأنت الفرق بينك وبينها إنك أصغر منها ب5 سنين هههه يا حسرتي. "

_" إزيك يا هند عاملة إيه؟ أنتِ أكيد مش عارفاني لأنِ آخر مرة شوفتك فيها كان عندك 11 سنة. "

_" كويسة الحمد للّٰه فعلًا كنت ساعتها بتتجوز. "

خالد كمل بوقاحة " كل ده مش مهم المهم أنتِ يا جميل. "

هند بصت له بقرف وحست إنها عايزة تتقيئ خالد فضل يتكلم وهي ماردتش عليه تاني وهنا عرفت إن دي بداية جحيمها.

#قسوة_ثم_عوض
#شروق_حسام