صـبـاح يـوم الـثـلاثـاء، يوم يعتبر مختلف عن باقي ايامه السابقة، غير روتيني كعادته، يوم ابتدأ ب البدايات الفعليه لتجهيز احتفالية زواج الشيخ رماح، ولأنه غير عن باقي الاحتفالات تم التجهيز له مسبقًا لاختلافه عن باقي المناسبات، وابتداءً من بيت ال مغيره وتحديدًا عند الشيخة نوره الواقفه في وسط الحوش جمب ام عرّاب وام ناصر بعباياتهم وبصوت عالي تنادي البنات : ياوصيف..مهره!..بشاير! والله ان ماجيتو الحين ان لاامشي عنكم!
نزلوا مسرعين يضبطون ماتبقى من لبس عباياتهم تنطق الشيخة نوره بعصبية واضحة : وراكم متاخرين! موقلنا نبي نخلص كل شي اليوم
وصيف : العذر والسموحة ياجده
ردت مهره بعد مالبست غطاها : والله ياجده انتِ الي الله يهديتس مشغلتنا تنظيف وكرف ماخلتينا نجهز!
لفت الشيخة نوره لأم ناصر : امسكي لسان بنتس اليوم ترى واصلتن حدي! - مشت يتبعونها متجهين لخارج البيت، همست ام ناصر لبنتها : ترى جدتس صايره هااليومين ماتتحمل كلمه! تبي عرس ولدها كامل مكمل
ردت مهره بهمس : الله يعدي هالعرس على خير والله ان دبلت تسبدي من كثر الكرف
ابتدوا في السوق بمحلات الفساتين والي تعتبر الوحيدة الموجوده في الديرة، اشتروا اغلى الفساتين وازينها، مع توابع الزينه لكل وحده من نساء ال مغيره مع حرص الشيخة نوره الشديد بأن كل وحده فيهم تاخذ الي تبيه وتشتري كل شي يبرزهم في العرس، مرورًا بمحلات الذهب ونهايةً بالزينه والاكسسوارات
مـجـلـس ال مـغـيـرة
وكالعاده يتوسطها في صدر المجلس الشيخ رماح وبجانبه اخوانه وعيالهم والاساس سفاح ال كثران، دخل ولد اخوه عرّاب وولد نبهان زيد ينطقون السلام، ردوا عليهم السلام وتقدموا يجلسون مقابل الشيخ رماح الي نطق : وش العلم؟
عرّاب : العلم ياعمي ان كلام بوعبيده صح ورجال بن عفيف ثايرين من ثياران شيخهم
زفر نفسه رماح : وغيره
نطق زيد : الي عرفناه ان بس ينذكر اسم ال مغيره او ال كثران ماتلقى الا في نفوسهم الشر! وبيني وبينك ياشيخ ان لاننتظرهم ونقدم لهم الي يبونه
لف سفاح للشيخ رماح ينطق : كلام زيد عين العقل! نتغداء فيهم قبل لايتعشون فينا!
مرر مسبحته بين اصابعه يفكر لجزء من الدقيقة ثم شتت نظره يهز راسه بالنفي : مارح نقدم خطوه لانها بتكون بداية اعلان حرب وهم الي يبونه مو حنا!
عقد حاجبينه سفاح بغضب : اجل تبينا ننتظر لين يطيح الفاس بالراس ونلقم منهم! والله ياولد عمتي انت قل تم وان ماجبت لك راس بن عفيف بذات نفسه مااكون سـفـاح!
لف رماح يناظره : اهجد ياسفاح! ماقلت لكم اننا بنتتظر!
نطق اخوه ذعار : اجل العلم وش؟
هز راسه : العلم ان حنا مارح ننتظر الفاس يطيح بالراس! حنا بنكون الي ماسكين الفاس والراس بيكونون هم!
مسح سفاح على ملامح وجهه بصبر وناظره رماح كونه يفهمه، يفهم ان سفاح مايفهم بهذي الامور ويبغاها على شاكلته، ياذابح يامذبوح! لكن نطق رماح مناظر له : الي بتفهمه ياسفاح والي بتفهمونه كلكم اننا بنرسل رجال غير معروفين من عندنا لهم يعرفون منهم نواياهم ومواعيدها ووقت الي بينون على شين لنا مالهم الا الي يردعهم ويطيح عليهم الفاس! فهمت الحين ياسفاح!
هز راسه سفاح بابتسامه جانبيه ونطقوا جميع : عين العقل!
نطق نايف ( ابو عرّاب ) موجه كلامه لزيد وولده عرّاب : ماقصرتوا روحو ريحوا وعينو خير
هزوا روسهم ينطق عرّاب : صح الي سمعناه ؟
هز راسه رماح فقط ينطق اخوه نايف ( ابو عرّاب ) : ايه صحيح وان شاء الله الملكة والعرس الخميس جهزوا انفسكم
ناظر زيد اخوه سفاح لجزء من الثانيه ثم قام من مكانه، لمس رماح نظرته باستغراب تام، نظرة زيد لاخوه سفاح مستنكره منه، تبعه عراب الي همس له وقت طلعتهم من المجلس : طلع الكلام صحيح
هز راسه زيد بسكون تام وكمل عراب : وش بلاك كانك مانت راضي
هز راسه بالنفي : تعبان من السفر بس وودي اريح يالله سلام
ناظره عراب من مشى بتجاه منطقتهم وتوجه هو بخطواته لبيتهم وصادفهم امامه على الطريق يسمع ترحيباتهم فيه والي كانت من امه وجدته نوره، فتح الباب يشرعه لهم مبتسم : الله يحييكم ويبقيكم
