🦋 إسكريبتات شروق حسام 🦋

الجزء الأخير 🦋

بقلم شروق حسام 🦋

وللأسف الخطوبة تمت في ظروف زي دي من غير أي مراعاة، وسط فرحته هو وأمه وحزن أخوه ومراته.

واللي عرفته بعدين إن أحمد أخو علي، أخوه من الأب بس عشان كده بيحقدوا عليه.

حصلت الخطوبة وأنا لابسة فستان عادي ولا حطيت ميك أب ولا أي حاجة وماحستش بفرحة زي أي بنت.

حماتي هي اللي جهزت كل حاجة وعلي ما ادخلش وبسبب ده ماما قالت لي كده أحسن ليكِ حماتك مسيطرة وأنتِ هتبقي زيها وهتعرفي تخلي جوزك زي الخاتم في صباعك.

كلامها ده حسسني بجد إنِ رخيصة وأي حد هيتقدم هيرموني ليه.

⭑⭑⭑⭑⭑⭑⭑⭑⭑⭑⭑⭑⭑⭑⭑⭑⭑⭑

بعد سنة من الخطوبة

كانت سنة من الأوامر والتحكمات والخناقات اللي مابتخلصش قررت أخيرًا أتشجع وأفسخ الخطوبة بس حتى ده ماحصلش.

هو وأمه في نفس اليوم راحوا عندنا البيت وفضلوا يعيطوا ويترجوني أدي له فرصة تانية وهو هيتغير بس أنا رفضت.

وماما وبابا بعد ما مشيوا فضلوا يدعوا عليا إنِ أموت وربنا ياخدني من وشهم عشان يرتاحوا وفضلوا على نفس الوضع لكام يوم يدعوا عليا ويعيطوا ويلطموا.

فقررت أدي له فرصة تانية عشان أبعد عنهم ويرتاحوا مني زي ما بيقولوا قلت على الأقل هيجيب لي شقة بعيد عنهم وهرتاح من كل المشاكل دي.

⭑⭑⭑⭑⭑⭑⭑⭑⭑⭑⭑⭑⭑⭑⭑⭑⭑⭑

_" السلام عليكم ورحمة اللّٰه وبركاته. "

_" وعليكم السلام ورحمة اللّٰه وبركاته. "

_" إزيك يا روان عاملة إيه؟ وحشتيني. "

_" بخير الحمد للّٰه، شكرًا. "

_" شكرًا؟! أنتِ بتهزري ياروحي أنا نفسي مرة واحدة بس تتصرفي زي أي واحدة بتتكلم مع خطيبها وتتكلمي بشوية رومانسية نفسي مرة أنتِ اللي تبدأي الكلام مش أنا. "

_" حرام يا علي وماينفعش أنا لسه مابقتش مراتك. "

_" بس أنا خطيبك وده من حقي. "

_" حقك إيه؟ أنت شكل جرى لعقلك حاجة أنت عايز نتخانق وخلاص أنت مش قلت هتتغير وتبطل حركاتك دي سلام يا علي أنا هروح أنام شوية سلام. "

أيمن من وراها بحدة " مهما إيه اللي حصل لازم تصبري وتستحملي ولو إتطلقتي إياكِ ترجعي هنا لأنِ هموتك بإيديا. "

_" حاضر. "

⭑⭑⭑⭑⭑⭑⭑⭑⭑⭑⭑⭑⭑⭑⭑⭑⭑⭑

حاولت أشغل نفسي بأي حاجة روايات وقرأت صديقات بنات وإتعرفت عليهم من جنسيات كتير دورت على شغل وللأسف بترفض كل مرة عشان مش معايا خبرة.

حاجات كتير عملتها رغم كلام أهلي وإخواتِ اللي زي السم وإحباطهم ليا، حاولت كتير أسافر بس للأسف أنا من عيلة متوسطة الحال فظروفنا مش هتسمح.

وللأسف بعد كل ده الفرح إتحدد على آخر السنة دي، وماعرفش أعمل إيه، عايزة أسافر أشتغل وأبقى مستقلة بنفسي وأجيب اللي نفسي فيه أنا كل يوم بحس إن تعليمي اللي كملته بالعافية هيروح على الفاضي.

أنا مش عايزة اتجوز أنا حاسة إنه واخدني خدامة لأمه وليه لأنِ عرفت بعدين إنه ابن أمه وبيمشي وراها زي الأعمى.

⭑⭑⭑⭑⭑⭑⭑⭑⭑⭑⭑⭑⭑⭑⭑⭑⭑⭑

بعد فترة إتعرفت على هنا وحكيت لها اللي حصل لي وهي قالت لي على منحة الدراسات العليا بره ومن هناك أقدر أشتغل وأجمع فلوس وأقدم على طلب للإقامة.

وعشان حد يقدم لي على المنحة كنت محتاجة مبلغ ماكنش معايا فأنا اللي خلصت الورق والإجراءات والموضوع كان صعب جدًا.

بعدها بفترة كانت كل حاجة تمت وسافرت بس من ورا أهلي لأنهم لو عرفوا إنِ هسافر كانوا هيجوزوني غصب وهي أصلًا الجوازة كانت غصب عني.

⭑⭑⭑⭑⭑⭑⭑⭑⭑⭑⭑⭑⭑⭑⭑⭑⭑⭑

بعد 10 سنين

كنت واقفة في شركتي اللي بنيتها بتعبي كل السنين اللي فاتت من غير مساعدة حد ورغم الكره اللي في قلبي ليهم بس دايمًا ببعت لهم مبلغ يصرفوا بيه ولحد دلوقتي هم مش عارفين مين اللي بيبعت لهم.

_" أنا أهو روان البنت البسيطة اللي كان أبسط أحلامي أبعد عن أهلي بقي عندي شركتي الخاصة لمستحضرات التجميل. "

_" وكله بسبب ربنا ثم هنا اللي بقت زي أختي وأكتر كمان بجد أنتِ عوضي في الدنيا أنا بحبك يا أحلى أخت في الدنيا. "

تمت

#العوض
#شروق_حسام