အပိုင်း ၂
အနောက်ဘက်ထနောင်းပင်ရွာမှပြန်ရောက်ရောက်ချင်းဒေါ်မြမြနှင်းတစ်ယောက် ခေါင်းပေါ်မှခမောက်အားစားပွဲပေါ်တင်၍ ဦးချစ်ကိုငှဲ့ထားသောရေနွေးကြမ်းခွက်အားကောက်သောက်လိုက်သည်။အညာနွေကညနေစောင်းထိအရှိန်မသေသေး။အပူငွေ့တရိပ်ရိပ်နှင့်ချွေးစို့စေဖို့လုံလောက်ပါသေးသည်။
အမျိုးသားချင်းခိုးပြေးသည်ဆိုသောရွှေကျီးသတင်းက ရွာနီးချုပ်စပ်တွင်နံမည်ကြီးလှသည်။အမျိုးသားချင်းရည်ငံသည်မှာမကြားဖူးသည်မဟုတ်ငြားသော်လည်း ယခုကဲ့သို့တရားဝင်လူသိရှင်ကြားလက်ဆက်ပေါင်းသင်းမည်ဆိုတော့အထူးဆန်းဖြစ်ရသည်။
ရွှေကျီးမှာအမေတစ်ခုသားတစ်ခုဖြစ်သော်လည်းရိုးသားကြိုးစားသောကြောင့် သမီးရှင်များမျက်စိကျနေသူ သို့သော် သူကမူမိမိနှင့်ကလေးကတည်းက ကစားဖော်ကစားဖက် ယောကျ်ားလေးတစ်ယောက်အားချစ်ခင်စုံမက်ပါသတဲ့။သံယောဇဥ်လို့ပဲဆိုဆို မေတ္တာလို့ပဲပြောပြော သူတို့နှစ်ဦးကတော့တစ်ဦးနှင့်တစ်ဦး တရားဝင်ပိုင်ဆိုင်ချင်သည်။
ဤသို့ဖြင့် မိဘများမှာလည်းဖြစ်သမျှအကြောင်းအကောင်းဟုသာသဘောထားလိုက်ရာ ယနေ့လက်ဆက်ပွဲဖြစ်မြောက်လာရခြင်းဖြစ်သည်။လက်ဆက်ပွဲဆိုရာ၌အကြီးကျယ်မဟုတ်ဘဲ နှစ်ဖက်မိဘနှင့်ရပ်ရွာလူကြီးအနည်းငယ်အပါအဝင် ဆွေမျိုးနီးစပ်များအားဧည့်ခံကျွေးမွေးခြင်းမျိုးသာဖြစ်သည်။
ဒေါ်မြမြနှင်းတန်းလျား၌ဝင်ထိုင်ရင်း ဘေးဘီဝဲယာအားလှည့်ကြည့်လိုက်သေးသည်။ထို့နောက် ဘေး၌ထိုင်နေသူဦးချစ်ကိုအား လက်တို့၍
"ကိုကိုချစ် တော့်သားပြန်မရောက်သေးဘူးလား "
"သြော်နှင်းရယ် အခုမှအတူတူပြန်လာတာကိုကွယ်ကိုကိုချစ်လည်းဘယ်သိမှာတုန်း နှင်းသားကဘယ်နေ့တုန်းကများအိမ်ကိုကပ်ဖူးလို့လဲ မသိရင်အိမ်စောင့်နတ်နဲ့ရည်းစားလုဖက်အတိုင်းပဲ ပူမနေပါနဲ့ နှင်းသားကကလေးမဟုတ်တော့ပါဘူး အချိန်တန်ပြန်လာမှာပေါ့ အိမ်ပြန်လမ်းတော့သိလောက်မှာပါ"
YOU ARE READING
သူကြီးသားကဆိုးလိုက်တာ(Complete )
Romanceတစ်ချို့လူတွေက ချစ်တဲ့သူပျော်ရွှင်ဖို့ဆိုတဲ့ အကြောင်းပြချက်နဲ့ ချစ်သူကိုစွန့်လွှတ်တတ်ကြတယ်တဲ့ ကျွန်တော်ကတော့ ချစ်ရတဲ့အစ်ကို့ကိုပျော်ရွှင်အောင်ထားနိုင်ဖို့ ပိုင်ဆိုင်ရမှကိုဖြစ်မှာပါ #ဘုန်းဋီကာမောင် ကိုယ်အမြဲပြုံးနေဖို့ဆိုရင် မင်းအမြဲပျော်နေဖို့ပဲ လိ...
