- ماما! اي الورقة دي؟!!! اللي قريته ده صحيح؟!!! بابا دخل مصحة علشان يتعالج من إدمان المخدرات؟!!!
قالتها نور بصدمة وذهول كبير لوالدتها التي سكتت ولم ترد، فأكملت قائلة بعصبية ممزوجة بالدموع في عينيها:
- ردي عليا يا ماما!!!! بابا كان مدمن مخدرات؟!!!! ليه؟!!!!! وازاي انا مكنتش عارفة؟!!!!
رفعت والدتها رأسها ببطء وقالت بهدوء:
- كان لازم أخبي عليكي علشان حاجة زي دي ممكن تخليكي في حالة نفسية أسوأ من اللي كانت عندك
نور ببكاء: لازم أعرف كل حاجة دلوقتي حالا!!! لازم أعرف كل حاجة خبتيها عليا!!!
أجلستها بجوارها وقالت وهي تمسح دموعها بيديها:
- نور! انا مش هقدر استحمل وانا شايفاكي بالحالة دي تاني ارجوكي
نور برجاء: علشان خاطري احكيلي .. انا مش هرتاح غير لما اعرف كل حاجة
تنهدت والدتها بقوة وقد اغمضت عينيها بقوة ثم قالت:
- الحكاية وما فيها أن باباكي .....
لم تستطع أن تكمل لتقول نور: بابا ماله؟!!!
زفرت بقوة وقالت: باباكي كان متجوز قبلي ومخلف بنت اسمها رقية .. كان بيحبهم بطريقة مش ممكن تتخيلها .. وفي يوم من الأيام كانوا رايحين يتفسحوا زي كل اسبوع وباباكي كان سايق العربية بسرعة كبيرة كنوع من الهزار معاهم وأنه عايز يخليهم يخافوا شوية .. رقية كانت طفلة عندها ٧ سنين واترعبت أوي .. مامتها شافتها مرعوبة فقالتله أنه لازم يهدي السرعة .. باباكي بص لبنته واتأسفلها وفجأة مراته صرخت وهي بتقوله حاسب! و.....
أغمضت عينيها بقوة وقالت بحزن:
- عملوا حادثة شديدة أوي وباباكي دخل في غيبوبة ولما فاق عرف أن مراته وبنته هما الاتنين ماتوا .. من يومها وهو في حالة صدمة كبيرة ومش قادر ينساهم .. لأنه حاسس أنه السبب في كل ده .. بعدها قابلني وطلب ايدي واتجوزنا .. بس حسيت أنه بقا شخص تاني غير اللي كنت بشوفه قبل ما نتجوز
ثم دمعت عيناها وقالت:
- باباكي لسه تحت تأثير الصدمة واتجه للمخدرات علشان ينسى بس صدقيني يا نور هو اتعالج منها من زمان وبقا شخص تاني دلوقتي الحمد لله
كانت نور تستمع لها بعين شاخصة لا تصدق ما سمعته للتو، أيعقل أن كل تلك الأشياء لا تعلم عنها شيئا؟! هل كان لها اخت ماتت من زمن بعيد حقا؟!، لم تستطع كتم دموعها وبكت بشدة قائلة:
- علشان كدا بابا بيعاملني بالطريقة دي!!! علشان مش قادر يشوفني مكان رقية!!!
أخذتها في حضنها باكية وقالت:
- لا يا حبيبتي بابا مش بيكرهك .. صدقيني هو مش بيكرهك خالص بس هو تعبان شوية اللي مر بيه مش سهل أبدا لأنه عايش حياته وهو فاكر نفسه القاتل اللي أنهى حياة أسرته اللي كان بيحبها
ابتعدت نور عنها وقالت بعصبية ممزوجة بالبكاء:
- لأ بيكرهني!!! كون أنه بيعاملني المعاملة دي فعشان اكيد بيكرهني!!! .. لما ماتت أسرته حب يعمل أسرة بديلة علشان تنسيه حالة الصدمة اللي هو فيها .. ولما مقدرش يشوفني زي رقية عمل فيا كل ده!!! يعني انا كنت مجرد دوبلير في الفيلم اللي هو صنعه بنفسه
أنت تقرأ
كما وعدتك - الجزء الثاني
Romanceما الذي حل بك؟! ... هل رفعت راية الاستسلام؟! ... كلا هذا ليس من شِيَم الرجال أمثالك أبدًا، فأنت الذي من اعتدنا أن يبقى مقاتلًا حتى آخر رمق، أنت الذي من اعتدنا أن يفي بعهوده ولا ينقضها مهما حدث، إذًا هل ستخلف وعدك لأول مرة؟! ... لا من المستحيل أن تفع...
