🦋 إسكريبتات شروق حسام 🦋

إسكريبت 🦋 ندم بعد فوات الأوان 🦋

إسكريبت 🦋 بقلم شروق حسام 🦋

_" أنا متجوز عليكِ من 6 سنين وعندي ولدين. "

منار بعدم تصديق " بتقول إيه؟! لأ، لأ، أنت أكيد بتهزر، مش معقولة تتجوز عليا بعد الحب ده كله؟! "

سليم ببرود " ده حقي الشرع محللي 4 فيها إيه يعني لو اتجوزت عليكِ وكمان أنتِ مابتخلفيش وأنا عايز أخلف مش هفضل طول عمري محروم من الخلفة. "

منار بانهيار " طب وأنا ذنبي إيه إنِ مابخلفش أنا قلت لك أول ما عرفت إنِ مش بخلف طلقني وروح كمل حياتك مع غيري. "

_" فاكر قلت لي إيه ساعتها؟ أنا مش عايز عيال ولا عايز حاجة من الدنيا غيرك طلع كل كلامك كذب في كذب أنت خاين. "

منار وهي بتقرب منه وبتضربه على صدره وهو واقف مابيتكلمش " قدرت تتجوز غيري وتقرب منها وتخلف كمان وأنا على ذمتك. "

_" طلقني أنا بكرهك طلقني. "

قرب منها سليم بخوف وحاول يهيدها " اِهدى ياحبيبتي ماتنسيش إنك عندك القلب. "

شدها لحضنه بقوة وهي عمالة تقاومه " أنا مش هقدر أبعد عنك أنا بحبك أنتِ حب عمري أنا اتجوزتها بس عشان الخلفة. "

_" خايف عليا؟ ههه تمثيل هايل يا فنان برافو. "

منار وهي بتحاول تطلع من حضنه " ابعد عنى. "

_" مش هقدر. "

_" سيبني. "

_" مش هقدر. "

_" طلقني أنا مابقتش عايزاك أنا بكرهك. "

سليم من غير قصد " وبعد ما أطلقك هتروحي فين؟ أنتِ مالكيش حد غيري وأهلك ميتين. "

منار بصدمة وهي مش مصدقة إن ده سليم حب عمرها اللي حاربت أهلها والدنيا كلها عشان يكونوا سوا

_" عندك حق فعلًا عارف لو كنت سمعت كلام بابا وماما من 8 سنين ماكنش حصل لي كل ده. "

سابته ودخلت أوضتها بسرعة حاول يلحقها بس كانت قفلت عليها من جوا.

فضلت تكسر في كل حاجة حواليها وهي مش مصدقة أي حاجة حصلت حاسة إنها في حلم لأ حاسة إنها في كابوس وعايزة تفوق منه بس مش عارفة.

_" كــذاب وخــاين ليه عملت فيا كده؟ ليه؟ لــيــــــه؟ "

خبط سليم على الباب جامد " افتحي يامنار اهدى ياحبيبتي عشان ماتتعبيش. "

بصت لانعكاسها في المرايا وقالت بقوة وهي بتمسح دموعها

_ " أنتِ قوية ومستحيل حد يكسرك من امتى وأنتِ بقيتي ضعيفة كده اللي يوجعك أوجعيه ماتخليش حد يخليكِ ضعيفة. "

دخلت غسلت وشها ولمت هدومها وخرجت بره كان لسه هيتكلم.

قاطعته وقالت له بقوة " أقسم باللّٰه العظيم بحلف باللي خلقني لو ماطلقتنيش وبعت لي ورقة طلاقي لأخلعك يا سليم وأنا عارفة إن أهم حاجة عندك سمعتك ف بالذوق تطلقني وفي كل الحالات هتطلقني. "

_" أنتِ إتجننتي إيه اللي أنتِ بتقوليه ده أنا مستحيل أطلقك وكمان أنتِ واخده شنطة هدومك وراحة فين؟ "

_" يبقى هخلعك وشوف بقى لما الناس تشاور عليك في الشارع المهندس سليم الأنصاري المخلوع. "

اتعصب سليم جامد ورفع إيده ولسه هيضربها على وشها راحت مسكت إيده بقوة ونزلتها وردتله القلم اللي كان عايز يضربهولها.

منار وهي بترفع صباعها ناحيته بتحذير " إياك تفكر إنِ ضعيفة تؤ تؤ تؤ تؤ تبقى غلطان كان ماضي وجبر هي 24 ساعة بس وورقة طلاقي توصلني سلام يا هااا طليقي. "

#ندم_بعد_فوات_الأوان
#شروق_حسام