إعلان مُمَوّل ( مكتملة )

الثاني والعشرون

_ دهب ايه يا افكار ؟؟ أنتِ جاية ليه على المسا وعايزة ايه ؟!

_ دهب ايه ؟؟ دهبي اللي دخلت البيت واخدته يا راضي، أو خليني اقولها ليك بشكل احسن، دهبي اللي سرقته من دولابي يا اخويا.

أبتلع راضي ريقه ثم اشتدت ملامحه يصرخ في وجهها :

_ دهب أيه وعبط ايه ؟! ومين قالك اساسا اني روحت البيت ولا شوفت اللي بتقولي عليه ؟؟

_ امي ..امي اللي قالتلي أنك دخلت اوضتي عشان الشاحن، بس الست المسكينة مكنتش تعرف أن ابنها داخل يسرق أخته ويعرها قدام عيلة خطيبها .

كانت تتحدث وهي تبكي بحسرة وقهر، لا تصدق ما وصل به الحالة، يسرقها ويتبجح في وجهها.

وراضي الذي يبصر أمامه انهيار شقيقته لم يتأثر مقدار شعرة يدفعها بقوة :

_ بقولك ايه أنا وأنتِ عارفين كويس اوي إن امك عقلها على قدها وتلاقي حد تاني دخل واقنعها أنه أنا، أنا لا روحت البيت ولا أخدت دهب، روحي ارمي بلاكي على غيري .

وقبل أن يتحرك خطوة شعر بصفعة تسقط على وجهه وصوت أفكار يعلو هادرًا :

_ يعني مش حرامي وبجح، لا وزبالة كمان، بتتهم امك بالجنون عشان تفلت بعملتك.

فجاة امسكت ثيابه تهزه بقوة كبيرة تصرخ في وجهه بجنون :

_ اقسم بالله يا راضي أما خرجت بالدهب لأكون مودياك في ستين داهية وابقى وريني هتخرج منها ازاي يا ابن امي وابويا .

نظر لها راضي بشر متحديًا إياها:

_ هتعملي ايه يعني ؟!

ابتسمت له بجنون ثم هتفت من بين أسنانها :

_ فاكر وصولات الأمانة اللي كنت ماضيها على نفسك بتلاتين ألف وجيت تعيطلي وتقولي هتحبس وعيالي يتشردوا وأنا بغبائي روحت سددتها وأنت ضربت الطرشة ونسيت الموضوع؟؟ فاكرها ؟؟ اللي دفعتها من ورث ابويا ومن حقي عشانك، اهي الوصولات دي معايا يا غالي في البيت ومتقطعتش ودلوقتي أما خرجت الدهب هطلع بيهم على البوليس وأبلغ عنك ومش بس كده هقولهم أنك سرقت الدهب واشهد كل اللي في الحارة عليك يا نصاب يا حرامي.

شحب وجه راضي بقوة وشعر بالصدمة من كلماتها، ابتلع ريقه يردد :

_ الوصولات لسه معاكِ ؟؟ ماسكة عليا وصولات يا افكار؟؟ مش قولتي قطعتيها؟!

ابتسمت أفكار بسمة مرعبة تهمس بكذب فهي مزقت تلك الوصولات منذ استلمتها من الرجل، لكنها بالفعل لم تخبره بذلك ولن تفعل :

_ قليلة الأصل بقى معلش، طالعة ليك يا راضي، ودلوقتي هتطلع بالدهب بتاعي ولا تتفضح في وسط الحارة وعيالك وتضيع عمرك في السجن؟

تنفس راضي بصوت مرتفع وهو يشعر بالغضب يتملك منه :

_ أنا ...أنا بيعتهم .