نفوس محطمة (ضحية اوغاد) الجزاء الأول قصة حقيقية جزائرية

حلقة 1

#بقلم_هاندا ريفالدا handa rivalda ✍️✔️

قبل عامين ......
مكسلة رجليا للشمس ف الحوش حاطتهم عل الطابلة و  كيتمان في وذنيي مقابلتني مرت خويا وماما يفركو ف الجلبانة كنا نستناو ف خويا اليوم جاي من السفر توحشناه هذا خويا الكبير (حسان)  كان ف طاليان كان عندو مدة ملي طلع  ..شوية و عيط لمرتو قالها راني وصلت اني مع فلان ف الطريق نص ساعة نوصل. قاعدين نستناو فيه انا منكدبش خويا هذا مقلشني وش نحتاج يحضر دايرني كما بنتو خاصة كي نبقى من وراه وش جيبلي ووش جيبلي من هيه وهو حاجة ميخليها ف بالي وحت مرتو تان قايم بيها ههههه اصلا انا وياها نفس العقلية نحبو نبانو شوي نحبو نلبسو نحطو عكس نسا خاوتي لوخرين جاين من النوع لي سامبل اصلا دايرين جلابيب خاوتي لوخرين عقليتهم تع بلادنا سيرتو الصغير متشدد نوعا ما  بصح حنان ويحبو نساهم وانا تان يبغوني بصح مش كما خويا الكبير شغل ملي توفا بابا دارني من مسؤوليتو وخاصة كي راني المازوزية ميحبش يردلي أي طلب ربي يخليهم ليا هما السند تاعي ف هاد الحياة .....
وصل خويا هذا عشا وهذا تحلية وهذا ديسار   ههههه هو يحب الماكلة بصحتو وحت مريم مرت خويا فنانة ف الطبخ ستفنا هذيك الطابلة قعد خويا وجات ماما وبنت خويا أروى هي الوحيدة تاعهم عندها 12 سنة  تشبهني خرجت ليا جابونية المهم تعشينا نحنا تعاونا ف ماعين كلمناهم ستفناهم
وصلت اللحظة لي نحبوها ههههه وقت لي يفتحلنا فاليزات ونشوف وش جابلنا انا ومرتو ووبنتو نولو نرجفو هههههه ماما تولي تضحك علينا  ياااااا حي ع اللفعات وانا نقول اليوم علاه ناشطات وترا نتوم تقارعو غي ف صوالحكم مهم خيرات ربي يجيبلنا من كلشي قش مكياج روايح وحت شواكل أشكال وأنواع كي العادة .....وحت حق نسا خوتي يجيبلهم مينساهمش