مُناي يهل غيثك ويسقي جفا روحي

Part 7

خالد:اسمع وقف عند البقاله نجيب بططسات نتسلى عليها ويتسلون البنات
مشاري ابتسم:ياخوي أرفق بروحك لاتكلف على نفسك اكيد جا..
خالد:ماعليك انا بجيب لهم أنت تعرف أكيد ماخلوهم ينزلون يختارون الي
يبونه وتعرف رماح مستحيل ينزلهم
وقف مشاري عند البقاله ونزل خالد ياخذ بططسات ومن بينهم أكثر بطاطس تحبه عروب
مد يده ياخذ ولف على المحاسب يرفعه وينطق بصوت عالي:ابي كيس من هذا كبير بكم؟
العامل:٢٠ ريال
خالد تبسم:اجل عطني الحجم الكبير وحط لي على جنب كيس كامل
العامل:تمام
لف خالد لكل قسم وهو ينقي الأغراض الي تحبها عروب وكل اغراضها
كان يحسب لها على جنب لان في راسه فكره ابتسم من خلص ونزلها يحاسب
طلع يركب السيارة دق الباب يفتح له مشاري نزلها وقفل الباب يركب قدام
ضحك مشاري:ياخوي وش جبت انت
خالد بضحك:قشيت البقاله لعيونها اجيب لها كل الي تحبه
لف مشاري وناظر الكيس الي على جنب بأستغراب:وذاك وش؟
خالد استند يتكي على نافذة السياره:هذي اغراضها على جنب تسهرعليها بعدين
شهق مشاري يضحك:خويلدوه لايكون تبي؟؟
خالد:لا لا لكن ان قالها الله وبالغلط ماقول لا
ضحك مشاري يحرك:الحمدلله والشكر الحين تأكدت انك منت بصاحي
كملوا طريقهم لين وصلوا بعد كم ساعه توجهو للخيم وهم يفحطون ويضحكون
ومشغلين حبيبي شارب شاهي بنعناع ، صرخوا العيال بتعزيز يطلعون ويوقفون
فلاح وهو يصفر بيدينه:ياعيينييييي اقعدد مشاريوه يفحط
مشعل ضحك:هييي انزل لاتدعسنا ماتعرف تفحط انت
استغربوا البنات اصوات العيال وفزت عروب من سمعت صوته من بينهم
وهو يصرخ لمشعل:ياااليت يدعسكم بس ماباليد حييله ، ضحكت بحب وسلمى
تدقها بخفه:اشوووف الإبتسامه شاقه الوجه يوم جاء حبيب القلب وحنا لنا الله
ضحكته تبعدها:تكفيييين ابشوفه خلينا نطلع
سلمى بحده:اقول انثبري مكانش تبين رماح يحول علينا؟
عروب تنرفزت:ياخي مع نفسه ذا يعصب على خواته مو علينا انا طالعه
سلمى:بكيفش بس علميهم قبل تروحين
عروب لفت لأمها:يمهه ابروح اتمشى شوي
ام فيصل:زين يمش بس لاتروحين بعيد!
طلعت عروب من ورا وهي تبي تلمحه بس ماقدرت من مشاري ولزام مغطي عليه
تأففت وهي تجلس تراقبه بعد خالد وهو يطلع الأكياس ويتقدم لخميتهم شهقت عروب
وصرخة من شافت كلب صغير يتقدم لها بعد مابعدت شوي عن خيمتهم
سمع خالد صوت ورا وركض من سمع صراخها وقف بصدمه يكتم ضحكته
ينطق:تراه مايعض
لفت عروب على صوته وهي تركض وراه بخوف:ابعده تكفى
تبسم خالد وقلبه طااااار والود وده يحب الجرو ومايتركها ، قرب الجرو منهم
صرخة عروب وبصراخ:ابعده ابعددددده تكفى
خالد ضحك يمسكه:شوفي مايسوي شي
سكتت عروب ونطقت بخفوت:بس الكلب حرام وانت مسكت وهو نجس
خالد وقف:صح بس بتغسل
عروب بهدوء:مافي حمامات هنا
خالد ضحك:ايي بس فيه مويا هنا
عروب:بس المويا مو كثيره يمكن تخلص وان..صرخة برعب
من شافت كلب كبير ينبح بحده ومتوجه لهم انتبه خالد وهو يبعد عنه
ركضت عررب خلفه:يمههه خالد بيعضناا
كتم ضحكته:مابيعضنا جاي يدور ولده شهقت من تقدم لهم
ونطقت بخوف:جاااااءء شففتتتت بيعضناا
توتر خالد يهديها ولف للكلب وضحك على صرختها من تعداه وقرب لها
يجلس عند رجلها سحبها خالد على الجهه الثانية:خليش هنا مابيجيش شي ، تجمد مكانه
من رفع نظره لها يتأملها ماقدر يصد وهو يتأملها ويحفظ ملامحها داخله
كانت جمييييييله جميله جمال مو طبيعي كان يعرف بجمالها بس الحين زااد اكثر
شهقت ترفع الغطى على راسها ، تنحنح خالد يصد عنها
ونطق بلعثمه:ا خ.خلاص مابيجي روحي لايشوفش احد
عروب بخوف:طيب وصلني خايفه يلحقني
خالد تبسم:طيب الحقيني ، بدو يرجعون بشويش ويبعدون عن الكلب والجرو
وقف خالد بهدوء ونطق:عروب
وقفت عروب تناظره بتوتر من نطقه لأسمها:هلا
خالد والتوتر الف:عادي اسألك سؤال قبل تروحين
هزت راسه بإيجاب وكأنها عرفت نطق خالد بخوف:ا.تبادليني المشاعر؟ ، "أخذ نفس ينطق بغصه"
انا يشهد الله علي اني احبش واعشقش من كثر حبي لش انفضحت عند كل الخلق وصاروا يستلموني
طقطقة بس انا ابي اعرف قبل احاربهم بـ حبش اذا صدق تبادليني!.
تجمدت مكانه منه ومن نطقه لأسمها واعترافه وكلل شي:انت اكثر واحد تعرف مشاعري
اتجاهك ومشاعري واضحه والكل يشوف حبي لك لكن الغريب انت الوحيد الي ماشفتها؟!
خالد بضيق:والله اني ادري لكن متوتر خوف اني اتوهم من حبي لش معد صرت افرق
ببن الواقع والحلم
عروب تبسمت:اذا تحبني صدق تدل الباب
خالد فرح وبشدده لكن سرعان ماتحول فرحه لضيق قوي:وابوش؟
عروب:جرب منت بتخسر شي واكيد نسى الماضي
خالد تبسم بضيق:إن شاء الله
عروب:ماعجبك كلامي؟
خالد رفع نظره لها:اي شي منش حلو ، صحيح قبل انسى خليش هنا شوي
توترت عروب وبخوف واضح:وليه؟
تخطاها خالد وبضيق:مابسوي شي تطمني بس بعطيش كم حاجه
راح خالد وضاق صدر عروب من انه فكر فيها بالشينه وهي ماكانت نيتها وخوفها
مثل الي هو فكره كان كل همها مع الكلب وهو توقع شي ثاني جاء خالد واعطاها كيسين
ولمح الضيق بعيونها:وش بخاطرش ضايق يابعد هالروح؟
ضحكت عروب ونطقت:انت فكرت فيني بالشينه وانا ماخفت مثل منت تحسب
انا خفت انك تتركين والكلب للحين جالس هناك
انصدم خالد وبلع ريقه:والله اسف انا راح فكري بعيد لأنش
تناقشيني وكلامش به الحده
عروب بأستحياء:مستحيل اخذ بخاطري عليك انت بالذات
سرح خالد من بعد كلامها وهو يحط يده على قلبه وبصوت عالي:يااارب الثبااات
ماتت عروب خجل وهي تقلده بضحك:ياااارب الثباااااااات
ضحك خالد ونطق:بعد الكشته تجهزي بخطبش
سكتت عروب بأستحياء وعرف خالد انها استحت وهو متعمد
مد الأكياس لها:اول شي هذا لكم ادري ان العيال ماخلوكم تنزلون تختارون
البططسات الي تحبونها والكيس الثاني هذا لش تسهرين عليه اذا رجعتي الببت
رفعت نظرها بحب كبيييييير ولمعت بريق عينها:ياحظييي فييكك
ضحك خالد بصدمه من اعترافها ومن حست على نفسها اخذت الأغراض وهجت
لكن وقفتها مسكت خالد من نطق:اي شي تبينه تعلميني عليه وترا هالمره بس الي مسموح
تطلعين فيها والمره الثانيه تعلميني عشان العيال كلللهم هنا!
تبسمت عروب بخجل وراحت وهي تركض ضحك خالد وهو يجلس
على الأرض يحس الدنيا ذي كلهاااا مو شايلته سعييييد سعيييد لدرجة وده يطييرررر من الفرحه
كااانت خطوه وكبييييره لأبعد حد والي هو يعرف مشاعرها تجاهه قبل يتسرع
والخطوه الجايه بتكون اصعب وبكثيييير ، رجع والإبتسامه شاقه الوجه
الجد محمد ابتسم ينطق:اقول ياخالد فيك؟
تنحنح خالد بورطه يضحك:هه ولا شي
غمز الجد محمد وفهم خالد عليه وتورط ناظر بلزام بتصريفه:وين عزام غريبه وابو فيصل؟
لزام توتر وأجتاحه ضيق يخفيه:ابوي عنده دوام وعزام مدري وين راح
الجد حمد لف لفلاح:يابوك دق على عزام وخله يجي يوسّع صدره
قام فلاح:هذا اذا لقيت ابراج بس بحاول ، طلع فلاح يدور أبراج
وبعد وقت طويييل حصّل وأتصل على عزام ، جاه صوته بخمول:هلا
فلاح بستغراب:وينك يارجّال كلهم مجتمعين بالبر
عقد حواجبه يفرك عيونه:وش نايم وينكم انتم
فلاح:وين بالبر بنكشت تعال وسّع صدرك ، بعدين وين ابوك كمان
كشر عزام من طاريه:مدري عنه المهم بجي أرسلي الموقع بس مين معكم؟
فلاح بشك:اهل العم محمد وابو نواف والعم سعيد بس ، بعدين وش فيك على ابوك
وااضح صار شي لاتخبي علي ياعزام أنطق وش عندك
تنهد عزام بضيق يقول له كل الي صار وهو مكتووووم يحس بضغط من كل الجهااات
وختمها بـ:ياخي قسم بالله تعببت ورب العباد تعبت ابي ارتاح مو طبيعي كل يووم هوااش!
مستوعب حرفيًا على أتفه الأسباب هواش وصراخ ودعاوي ، تصدق وش أمنيتي؟!.
فلاح:وش؟
عزام:إنّ أمي وأبوي يتطلقون قسم هذي أمنيتي من كثر المشاكل تعببببت
فلاح بهدوء:الله يهديك اسمعني اولاً مهما يكون هذا ابوك وحراام ترفع صوتك
عليه مهب اصغر عيالك مهما صااار ويصير قول أسف وحقك علي لاتناقشه ابدًا
والي بين ابوك وأمك يبقى بينهم بس وهم الي يقررون لكن تأكد إنّ كُل شيء بأجره وتذكر
"اللهَ يُعْطِي أصعبَ المعَارِكِ لأقوى جُنُودِهِ أَبْدِعْ في معركَتِكَ !"وماضاقت إلا لتفرج وتذكّر دوم
بسم الله الرحمن الرحيم {فَإِنَّ مَعَ الْعُسْرِ يُسْرًا إِنَّ مَعَ الْعُسْرِ يُسْرًا} [الشرح: 5-6]
تنهد عزام برااحه كبيييرره وهو يحس أنه بخييير وجدًا من بعد مافضفض لفلاح
الي دايم يحس أنه أقرب واحد له بـ هالدنيا أكثر حتى من لزام الي توأمه ومستحيل يفضفض
عزام نطق بسعاده:قسم بالله في حياتي ما أجي أشكي لك إلا وأروح وأنا مبسوط ومنشرح
صدري الله يسعدك يافلاح سعاااده تبكي منها والله يفرج همك ويرزقك من واسع فضله!
تبسم فلاح:أمين ومن يقول ، ويلا تعال برسلك الموقع ولازم تجي
عزام بضحكه:أبششرر على هالخشم!
فلاح بشبه حده:عليه الشحم!
-
تقدمت عروب تعطيهم الأغراض واستغربوا من جابها!.
الجده عبير:من جابها يابنتي؟
تورطت عروب بأرتباك:اء خالد كان يناديك وأنا برا وشكلك ماسمعتيه
تبسموا كلهم وشافتهم يتبسمون حست بخجل فضييييع داهمها
ومن غمزة أمها لها أرتبكت ونطقت تلف على البنات:تعالوا نبلع هههه!
قاموا البنات يجلسون ويفتحون البططاسات ، صرخة سلمى من لقت كِندر
ونطقت غزل:حبيبتي سلمى اقسميه
لفت سلمى وضحكت تهرب فيه:تخسسسون!.، قاموا كلهم يطاردونها فيه
وسلمى تصرخ:حسبيي الله عالعدو يعنيي مافي غيير ذا عشان تحطون عينكم علييه!
عروب:يالدبه كلنا نحبه أقسميه واصلًا قلتيها مافي غيره يلا اقسمي
إلهام:لاتصيرين انانيه محد جاب كندر الا خالد
سلمى بلعانه:في بساكيت كثيير غيره خذوها حلالكم
صرخة ريوف:حقت عجاايز مانبي عطينا ذاا ، سكتت ريوف واعتلت ضحكات الحريم
من حذفتها(رمتها) الجده فاطمه بـ قارورة مويه فاضيه:الحين ذي حقت عجايز!
ضحكت سلمى بقوه تطلع تركض برا:تستاهليين مع السلامة باكلهاا
لفوا البنات يلحقونها من شردت بالكندر وركضوا وهم يصارخون
سولاف:سلموووه يالخايسه رجعييه
غزل بصراخ:ياااكلبه والله منسامحك عينا فيه احسن خل يجيك مغص
إلهام بضحك:ياجعلل كلب يلحقك عشان تعرفين ان الله حق ، ماهي ثواني إلا جاهم صراخ
سلمى ووراها كلبين كبار يلحقونها صرخوا البنات بقوه يركضون وسلمى وإلهام مسكتهم
حالة ضحك عجيبه وقفت إلهام بتعب تضحك:مقدددرر مقددر الله ياخددكم
صرخة سلمى وفزت إلهام يسبقونهم من قرب الكلب الثاني منهم ، فزوا الحريم والرجال
على صراخ البنات وهم يشوفونهم يركضون صوبهم ضحكوا الشيبان عليهم
سولاف ورويوف وأمجاد وغزل كانوا بالمقدمه وبالخلف عروب والجود وسلمى وإلهام
ضحكت عروب من شافت إلهام طاحت وصرخة من شافت الكلاب كثروا
هجت وسحبت عليها وصرخوا بقوه ، راحوا العيال يبعدون الكلاب
وهم يصرخون:تغطووووا بسرررعه ، تقدم جرو صغير يلحق البنات
عروب:الله ياااخده هذا الي لحقني طلع جايب القبيله ، ضحكوا كلهم ونست عروب
إنها ماهي حاطه على وجهها شي لا هي ولا البنات فز خالد يرجع يصد:تغطوا
شهقوا البنات يركضون للداخل ولزام ضحك ينطق:جعل كلب يلحقك ياعروب
طلعت عروب تحذفه بقارورة مويه مليانه تضحك:ومن يقول ياارب
سلمى بصراخ:حييي عيننننشش يابنت الخاله
تبمست عروب ونطقت للزام وهي تشرد:جعل جمل يبرك فوقك يالدب
صرخة من مسكها وهو يرجعها للكلب:تعالي والله اذلع من عينش!
صرخ فلاح:نزلها لأربطك عند الكلاب
ضحك لزام ونطق الجد حمد:لزاموه ويمين بالله مايصير لك طيب لو سويت لها شي
عضته عروب ورجعت للخيمه ضحكوا عليه من صرخ:الوعد بالبيت لا جدي ولافلحوه
ام فيصل:اقول اذلف انا عندها
صرخة عروب تصفق:هاااردللك ، تقلع يلاا
لزام:افااا يا يمه وش هالخيانه ، تبيعيني عشان ذا الملسونه؟ ، صرخ من هبده جده بالعصا
وهو ينطق:أعقب تقول عن أختك ملسونه!
كتموا ضحكاتهم وهو بينهار:كلكمم ضديي وش ذااا زعلت خلاص بسافر مع السلامة
راح لزام يجلس عند الشاهي يشرب ، ضحك خالد ينطق:وين الي يقول بيسافر؟
ياسر بضحكه:خله قعد يزط بهالشاهي ، ماتوا عليه وشرق لزام:تقلع بس
سلمان:اقول ماودكم نلعب؟
فلاح:جاكم البزر
رمى سلمان كرتون منديل على وجهه واعتلت ضحكات العيال
سلمان بحده:احسن درس لك ولغيرك اجل انا بزر يالثور!
قام فلاح يتعدل:لااا الحين يبي لها تصفيق ، قمط سلمان وضربه فلاح وهو يبرك فوقه
وبسخريه نطق:أجل انا بزر قلت؟
سلمان بصراخ:اااناا بزرر الله يااخذك يالدب ، ياجدد وش تأكلونه انتم!!
شهق فلاح والكل منهاار على صدمته ، وقف يقفز تحت صراخ سلمان
فلاح بعصبيه:يمين بالله لو ماتقولل ماشاء الله لأدفنك حي
الجد حمد بضحكه:والله ياولدي ماخلى شي مابلعه ، لف فلاح بصدمه:شف شف حوّل علي !
مين طافح امس بالعريكه ماشاء الله ولاا زودها بالجريش ، طاح خالد ولزام
من صراخ الجد حمد: قللل ماشاء الله لعنبوا دارك بتحسد ابووك ، هج فلاح ورا الجد محمد
وسعيد وهو يضحك:تف تف ماشاء الله والله ماصيدي يايبه ، تقدم ابو فلاح يخطبه بالعصا
على دخول عزام الي مستغرب الأزعاج:السلام علـ.. ههههههههههه
لف الجد حمد عليه يضربه بدال فلاح فز يمسك كتفه وينقز ورا العيال بصدمه
وألم:وشوووو وشدخلنيي!!
عقد الجد حمد حواجبه بحده نطق:ويينك يالصايع الضايع ماجيت
عزام نطق بألم وهو يتحسّس مكان الضربه:نايم الله يسامحك اخ ياحرّها
ضحكوا العيال عليه وتبسم ياسر لحياتهم الي يشوفها بنظره حنونه وسعيده بلمّة
الأهل والأحباب ،
..............•أبها البهيّه•............
-في مركز الشرطة تحديدًا
وقف بغضب وأرهاق كل الي قاله له ابو صابر كان كفيل بأنه يهّد حيله
وقوته كيف كذا ووش لوون صار كل هذا!...والعجيب أن مر كل شي بخيير يعني
حرفيًا نجوا من التحقيقات ومراكز الشرطة كيييييف؟...عقله بيطير مستحييل كيف كذا
والصدام أكثر أنّ كل شكوكه بمفلح طلعت في محلها دخل مكتبه وضرب يده بالطاوله
بغضب عاارم:الله ياخذك يالخسيسسس الله يشلك ومسوي خوي مع خالد
طارق بذهول:فيك؟
رفع رعد نظره لطارق بغضب:مابلاي شي غير كل شي طااح فوق راسي
اخ يا طارق جسمي مو قادر يشيلني كيف بواجه خالد؟..طاح رعد وصرخ طارق
يمسك كتفه يحركه:ولدد رعد هيي..."صرخ بقوه للي برا"دقوووا على الأسعاااااااف
......
~بالمستشفى~
صحى بأنزعاج وهو يفرك عينه بتعب ويحرك راسه بصعوبه ، ناظر للي مجتمعين
حوله وسمع صوت أيمن بفرح:قاام قااااام رعد
فزّوا كلهم له يناظرونه بخوف ونطق حمد:وش فيك بسم الله عليك
طارق بقلق نطق:الله يسامحك شلعت قلوبنا عليك
صقر بعدهم شوي:ياعيال ماينفع كلنا نتجمع حوله كذيه بعد شوي
خلوه يتنفّس شوي كتمناه ، فعلًا رجعوا العيال شوي عشان مايختنق رعد
مسك رعد راسه من داهمه صداع خفيف ونطق بغثيان:ويني؟ ووش صار!
أيمن دق سلطان الي اخذ غفوه على بال مايصحى رعد
فز يوقف بخرشه:بسم الله وش فيه
أيمن بشويش:اص صحى رعد شوفه
فيصل:أنت بالمستشفى طحت على طارق بالمكتب ودق على الأسعاف
سكت رعد لكنه توجّع من الي رمى نفسه بحضنه ، شهق بألم
وبعد سلطان:ياخي لك وحشه
هبده رعد بيده بخفه ونطق بألم:الله لايعطي الشيطان عافيه ياسلطانوه أحد
يدف نفسه كذا على مريض ، ااااا كتفي يوجعني
دخل الدكتور ونطق:صحى المر.."شهق الدكتور بدهشه"ينطق
وش هذا فضوا الغرفه ياشباب ماينفع كذيه بيختنق المريض!
رعد بصوت عالي أشر على سلطان:علييك وجه الله يادكتور أقلع ذا برا
كتموا العيال ضحكهم وتقدم الدكتور:يلا ياشباب لايبقى ألا شخص واحد
فيصل بصرامه:انا ببقى
صقر:لا انا بقعد انت روح ريّح لك شوي
فيصل هز راسه بنفي:مستحيل والله ماخطي خطوه وحده بدونه ، انتو ريحوا لكم
شوي من اليوم تعبانين ، تنهد صقر يهز راسه بإيجاب:أجل انت اقعد وحنا بنريّح
شوي دامه صحى وإن شاء الله طيّب ومافيه إلا العافيه...
طلعوا العيال ومابقى الا فيصل نطق يناظر الدكتور بخوف:وش فيه يادكتور تكفى قول!
الدكتور ابتسم بخفه وهو ملاحظ خوف فيصل عليه من أول مادخل
وكيف من اول مادخل شافه بجنب رعد وماسك يده:الحمدلله بخير بس لازم
وضروري يرتاح

(نكمل إن شاء الله بعد الأختبارات النهائيه🌷)