“ ពេលវេលាល្អៗតែងតែខ្លី ”ក្លិនឈ្ងុយរបស់អាហារពេលព្រឹកជះភាយពេញផ្ទះ រហូតធ្វើឲ្យរាងស្តើងដែលកំពុងគេងលក់លង់នៅលើគ្រែក្នុងបន្ទប់គេងចាប់ផ្តើមបើកភ្នែកឡើងទាំងមានអារម្មណ៍ល្វើយខ្លាំង។ ណាប៊ី ក្រោកអង្គុយទាំងគ្មានកម្លាំងក្នុងខ្លួន មួយរយៈនេះនាងតែងតែអស់កម្លាំងនិងងងុយគេងគ្រប់ពេល មិនថានាងគេងមួយថ្ងៃពេញក៏នាងនៅតែល្វើយនិងងងុយគេងមិនចេះចប់ ប្រហែលជាពេលវេលារបស់នាងកាន់តែខ្លីទៅហើយ។
ក្រាក!
« អូនក្រោកហើយមែនទេ? » រ៉េន បើកទ្វាបន្ទប់ដើរចូលមករកអ្នកដែលអង្គុយលើគ្រែដោយទឹកមុខស្រស់ស្រាយទាំងព្រឹក។
« ក្លិនអាហារឈ្ងុយដល់ថ្នាក់នេះអ្នកណាអាចគេងបាន » ណាប៊ី ញញឹមស្រាលៗដាក់គេទាំងទឹកមុខស្លេកស្លាំងគ្មានកម្លាំង។
រ៉េន ឃើញនាងដូចគ្មានកម្លាំងក្នុងខ្លួនថែមទាំងមុខស្លេកស្លាំងទៀត ទើបគេរហ័សលើកដៃទៅស្ទាបថ្ងាសរបស់នាងពិនិត្យមើលថានាងមានគ្រុនក្តៅឬអត់...ប៉ុន្តែនាងមិនបានក្តៅខ្លួនទេ ទើបគេអង្គុយចុះលើគ្រែក្បែរខ្លួននាងហើយលូកចាប់ម្រាមស្រឡូន។ រ៉េន បារម្ភកាន់តែខ្លាំងពេលប៉ះដឹងពីភាពត្រជាក់នៅដៃរបស់នាងហើយ។
« អូនមិនស្រួលខ្លួនមែនទេ? ទៅមន្ទីរពេទ្យតែម្តងល្អទេ? »
« អូនមិនបានកើតអ្វីទេ គ្រាន់តែអស់កម្លាំងបន្តិចប៉ុណ្ណោះ...អាការៈបែបនេះជារឿងធម្មតាទេសម្រាប់អ្នកមានផ្ទៃពោះ »
« ពិតជាមិនកើតអ្វីមែនឬ? »
« ចាស អូនមិនកើតអ្វីទេ » ណាប៊ី ចាប់ដៃគេញញឹមចេញមកឲ្យគេអស់បារម្ភ។
« អញ្ចឹងឆាប់ងូតទឹកសម្អាតខ្លួនទៅ និងបានចុះទៅញុំអាហារពេលព្រឹកជាមួយគ្នា »
ណាប៊ី ញញឹមងក់ក្បាលយល់ព្រមហើយក៏ក្រោកចេញពីលើគ្រែដោយមាន រ៉េន ជួយគ្រានាង។មួយសន្ទុះក្រោយមក
អាហារពេលព្រឹករៀបចំជាស្រេចនៅលើតុ រងចាំ ណាប៊ីនិងរ៉េន ចុះមកញុំជាមួយគ្នា។ រ៉េន កាន់ដៃ ណាប៊ី ដើរមកកាន់តុអាហារពេលព្រឹកជាមួយគ្នា។
« ហេតុអ្វីអាហារពេលព្រឹកថ្ងៃនេះច្រើនមុខម្លេះ? » ណាប៊ី សម្លឹងឃើញអាហារច្រើនមុខខុសធម្មតា ហើយសុទ្ធសឹងជាអាហារដែលនាងចូលចិត្តថែមទៀត ទើបនាងងាកទៅសួរអ្នកដែលឈរក្បែរខ្លួន។
« បងធ្វើជាពិសេសសម្រាប់អូន ឆាប់អង្គុយទៅ » គេជួយទាញកៅអីឲ្យនាងអង្គុយ។
« ហេតុអ្វីក៏ធ្វើច្រើនបែបនេះ? »
« កន្លងមកបងមិនដែលធ្វើអ្វីដើម្បីអូនទេ ទើបលើកនេះបងចង់ធ្វើម្ហូបដែលអូនចូលចិត្តទាំងអស់ឲ្យអូន »
« ធ្វើមួយថ្ងៃមួយមុខក៏បាន ធ្វើម្តងច្រើនយ៉ាងនេះគិតឲ្យខ្ញុំញុំម្តងបែកពោះស្លាប់មែនទេ? » ណាប៊ី និយាយលេងសើចជាមួយ រ៉េន ។
« អញ្ចឹងចាប់ពីថ្ងៃនេះទៅបងធ្វើមួយថ្ងៃមួយមុខហើយណា? »
« ចាស »
អាហារពេលព្រឹកដល់រីករាយជាលើកដំបូងរបស់ រ៉េននិងណាប៊ី ប្រព្រឹត្តទៅព្រមជាមួយសំឡេងសើចក្អាកក្អាយមិនដាច់សូរ។
ČTEŠ
ជំនួបស្នេហ៍៣៦៥ថ្ងៃ(ចប់)
Romanceជំនួបស្នេហ៍រយះពេលខ្លី ប្រៀបបាននឹងឈុនឆាកស្នេហាដ៏ផ្អែមល្ហែមដែលកើតឡើងក្នុងជំពូកមួយនៃសៀវភៅប្រលោមលោកដែលមានកម្រាស់រាប់លានទំព័រ ជាក្តីស្រលាញ់ដែលមិនធ្លាប់នឹងនឹកស្មានដល់ ជាស្នេហាដែលកើតឡើងដោយមិនបានព្រៀមទុកជាមុន តែក៏បានក្លាយជាការចងចាំដល់មានន័យជ្រាលជ្រៅបំផុតនៅក...