ابو رعب

#_البارت 25

حور: وانتي ليش ضايجة ست لبوة .. لو تغارين ؟

أشرت على نفسي وحجيت

لبوة: اني اغااار ؟ وليش يمه من حوره عاد هو الاجلح الاملح .. امرأة عزباء كافية خيري شري خلوني بمكاني وانتو بمكانكم

حور: لاااا ترة والله انتي دتظلميه .. هو غير بشرتة برونزية تخبل وصار فترة يلعب حديد صاير جسمه يخبل طالع جنه كيك

فتحت حلكي على كلامها ضربتها بجتفها على كيفي

لبوة: فلك طرج على كولت جدتي .. عينج طالعة ولج حورية ، ضاعت تربيتي بيج والله كايمة تدورين حلوين

حور: الحلو هو لكاني

لبوة: انهجم بيتج .. وشراد بله الحلو مالج ؟ .. ما ناوي يتقدم خطوة

حور: ما ادري .. هو اني هم سألته يكول ليش مستعجلة

لبوة: مستعجلة ؟؟ صار 4 سنين خلصها عليج اريد اكون نفسي واريد اكون نفسي .. شوكت ناوي يخطبج ويفضها ؟؟
حور: يكولي بعد وكت

متت بدمي من حجت هيج

لبوة: بعد وكت بعينه ال*** شنو هذا يضحك علينة ؟ لو شايفنه غشمة ويقشمر بعقولنة وعود احنه نسكت

حور: يعني شسويلة كل ما احاجي ع هل موضوع يكولي بعد مو هسه

لبوة: شوفي حبيبتي اجيج من الاخير .. هذا مرتضى دوا عندي :

تغلقين تليفونج وتنقطعين عنه فترة لا رسالة ولا حبجيات ولا هل سوالف .. تشوفي بلة يسأل عليج يفتقدج لو الموضوع عادي عنده، اذا هو كول وفعل ويحببببج ( واني اشدد ع الكلمة ) من صدك .. من باجر يسحل اهله وعشيرتة ويجيبهم يخطبوج اله
بس اذا......

سكتت شوي .. ردت

حور: اذا شنو ؟ احجي يمعودة والله خوفتيني بكلامج

حجيت بجدية

لبوة: اذا مرتضى طلع مو ذاك مرتضى اللي نعرفة ويضربج بعرض الحايط ويعتبرج نزوة عابرة فهنا انتي تقرين عليه السلام .. يعني بحححح تنسينة مو تكتلين روحج عليه بعدين وتعاي يا لبوة الحكيني

حور: عفية ليش هيج تحجين .. لا لاا ان شاءالله ماكو هيج شي .. هو يحبني والله بس يريد يجمع اقلها فلوس المهر خما يجي ايد ورة وايد كدام

لبوة: شهل حجي هذا ؟ لج بابا هذا يجذب عليج لو يريد من صدك يخطب من باجر يجيبلج ابوه وأمه وتتفقون حاضر وغايب هم .. اشو الحمد لله اهله جيبهم متروس وبيوتهم مطشرة خير من الله بعد ليش يماطل .. ميريد ، يكول اني ما الي نيه اتزوجج ليش مخليج معلعله

حور: لا شبيج مو هو من نوع يحب يعتمد على روحة ميحب يمد ايدة لابوه لو ياخذ من اي احد .. كلي ( اجمع فلوس مهرج بتعبي واجيج )

لبوة: شطلعت هاي اذا هو صدك هيج نفسه عزيزة .. صارلة سنين ما كدر يجمعلة كم فلس لهيج يوم ؟؟