مُناي يهل غيثك ويسقي جفا روحي

Part 3

......••........
في بيت الجد حمد كانوا الكل مستنفرين يتجهزون للعزيمه ،الكل متجهز الا ام فيصل وعروب وامجاد الي كانوا ينتظرون فيصل عشان يلبسون بالبيت وسلمى لابسه فستان ابيض ناعم وطويل شوي ,طلعت الخاله هيام من المطبخ وهي تقول:سويت صينينة حلا فشله نجي ويدنا فاضيه
الجده فايزه:عشتي يابنتي والله هذا الصح
دخلوا الجد وفلاح وفيصل ودخلت أمجاد وسلمى في المجلس..
و طلع فلاح وهو يقول:انا بطلع اتجهز وراح
جاء فيصل لأمه يلهث:يمه سريع مافي وقت امشو اوديكم تتجهزون
ام فيصل:لا كان تأخرت أكثرر
الجد:ماعليه الحين حنا بنسبقكم واذا خلصتوا تعالوا
راح فيصل واهله لبيتهم يتجهزون والجد والجده وفلاح وام سلمى
وسلمى،توجهوا لبيت الجد الي اول مالمحهم بدا يرحب ويهلل
تقدم الجد حمد يسلم على الجد محمد والأبتسامه شاقتهم وقرب فلاح يسلم على الجد ،شافهم خالد وهو يدور بعيونه على عروب لكن عبس وجهه يوم ماحصلها بينهم ولا امها..جاه سلمان وهو يضحك:
بعض العرب يدورون على احبابهم هههههه شفيك تحوس احرقت الجماعه بنظراتك
خالد بحلطمه:ليه ماجت تتوقع صار لهم شي؟؟
سلمان:اهدى ناسي انهم مايعيشون مع الجد فـ أكيد راحوا لبيتهم
يتجهزون شفت فيصل وهو طالع يوديهم وسلمت عليه وقالي
ابتسم خالد:تكفى بقعد بالوجه أستقبل الضيوف وأنت قهوهم
ضحك سلمان:يسير خير ان شاء الله
دخلوا كلهم وخالد ينتظر متأمل جيتهم
.....••.....
في غرفة عروب
وقفت وهي تحط آخر لامساتها كانت لابسه فستان أحمر هادي و ناعم ويوصل للركبه حطت من عطرها المفضل الي كانت ريحته تثبت بسرعه وتنتشر في المكان تنهدت وضحكة بخفه:الحين يحسبني ماجيت،نزلت عروب وهي تنتظر الكل يجهز وحصلت امها ولزام وعزام بالصاله قربت من امها سلمت على راسها وجلست:
متى نروح؟
ام فيصل:انتظر فيصل وأمجاد يجهزون بعدها بنمشي
-في غرفة فيصل
خلصت أمجاد كانت لابسه فستان أزرق هادي وأنيق حطت من عطرها وهي تتمكيج اما فيصل لبس وخلص بس جلس ينتظر أمجاد
تنتهي تنحنح وهو يقول:باقي مطوله!.
لفت أمجاد بأبتسامه:لا قربت اخلص
تاه فيصل يتأمل ملامح أمجاد الي توترت من لاحظت ملامحه
وقفت بسرعه وهي تقول:خلصت يلا نمشي
نزلوا وتحركوا....ضحك سلمان:امش بس شكلهم مابيجون
خالد:فال الله ولا فالك ،ماني متحرك لين اشوفهم طس عني
هز سلمان راسه بأسى:الحمدلله والشكر...صرخ خالد وانخرش سلمان:شفيييه
ضحك خالد بقوه وهو يشخص شماغه:جوو
قرب سلمان وهو يضربه على راسه:الله لايوفقك احسب صار شي
اثر ماعندك سالفه..سكتوا من نزل فيصل والعيال وسلموا عليهم وخالد عيونه على عروب وعروب عيونها على خالد
ضحكت ام فيصل وهي تشوف نظراتهم:السلام عليكم كيف حالك ياخالد واخبار الكل
خالد:وعليكم السلام بخير الحمدلله وانتوا اخباركم
ام فيصل:الحمدلله بخير دامكم بخير
لفت ام فيصل لعروب:يلا ندخل؟.!
عروب:يلا...مشوا كلهم وخالد غمز لعروب وانصدمت بس تنهدت يوم شافت محد منتبه..لكن سلمان لمحه وسحبه على جنب:مجنوننننن انتتتتتت!!كيف تغمز لهاا الله لايوفقك بتنكبنا لو شافك فيصل ولا عزام حرام لاتكون نهايتك عليهم
بعده خالد بخفه وهو هيمااان:ابعدد ياشيخ بعد العيون الجذابه هي الي ذبحتني اههخخخخخ ياكثرر الحبب ياعروبيي
سلمان:اقسم بالله انك خفيفييييف
ضحك خالد ومشى يصب القهوه للضيوف بالمجلس وجاه الجد وهو يأشر له من بعيد
يصب لأبو عزيز ،رغم انه يكرها ولا يواطنه لاهو ولا ولده لكنه قرب وصب له احترامًا للجد وابو عزيز يناظره
بتمعن مد له خالد فنجال القهوه واخذها وهو للحين مابعد عينه عن خالد ونطق وهو يناظر للجد محمد:الا ماشاء الله،
وش صار على الأسطبل؟
لف له خالد وناظره بسخريه:بخيير اذا أمثالك فكوهم شرها قام ابو عزيز بعصبيه واحتدت ملامحه:افااا هذا كلام ينقال لي
بمجلسك يامحمد!!(ابو عزيز شخص يحب يستفز الكل بفعايله خصوصا خالد مايرتاح الا اذا تدخل بشيء ما يعنيه وزوجته وولده وبنته يطابقون بأفعاله لكن بنته رغم أطباعها الشينه والتكبر وتشوف ان محد قدها تحب رعد من كانت صغيره لكنه مايعطيها وجه ولايدري عنها اصلا)وقف الجد محمد وهو يغمز لخالد بمعنى ،خلاص لكنه قال:بعد أنت الله يهديك يابو عزيز ماترتاح لين تناقر أحد
ابو عزيز:وانا احسبك بتسكت البثور (الطفل)اثرك واقف معه
رعد:والله من دق الباب سمع الجواب،وأحشم عمرك دامك فمجلس جدي ماودنا نقول كلام يزعل ضيوفنا منا
عصب ابو عزيز واخذ اهله ومشى بعد ماقال:مجلسك يامحمد يتعذرني لين يستسمح مني خالد
الجد محمد:اجل فمان الرحمن مانجبر أحد على مجالسنا ولانجبر عيالنا يعتذرون وهم على صح،راح ابو عزيز وأهل الديره
يسالفون مبسوطين ولا هم معبرينه تقدم خالد لرعد وهو يسلم عليه:ياخييي أنا وش اقوللل ياكثررر الحب يارعديي
ضحك رعد وهو يبعده:ابعد وعشان تعرف كيف ادافع معك مو تجحد!
خالد:كيف أجحد دفاعاتك يالخوي؟.جاهم سلمان وهو مبسوط:والله كفو ثنينكم بس كن جدي زعل؟..
ضحك خالد وهو يحط يده على ظهورهم:عاد جدي يدافع معنا قدامهم ووراهم يورينا الحساب هههههه
ضحكوا كلهم وفعلًا كان هذا طبع الجد مايحب يحاسبهم قدام أحد ودايم هم الصح لكن ورا الكل يهاوشهم
.....••.......
دخلت عروب وأمها وبدو يسلمون على المتواجدين والجده ماراحت عينها عن عروب وهي تطالعها كل شوي ولاحظت سلمى نظراتها لعروب وهي تضحك دقتها عروب:وش فيش تطالعين بالجده؟..قربت سلمى وهي تهمس لها:ولاشي بس تذكرت شي يضحك..رجعت عروب وهي تسالف مع غدي صديقتها صديقتها وسولاف أخت أمجاد،،قامت سلمى وناظروا لها بإستغراب لكن رجعوا يسالفون بعد ماجلست سلمى عند ريوف تبسمت ريوف لها بخفه
سلمى:ياخي احسش كييوت ابي اتعرف عليش عادي؟.
ريوف:اكييد حبي،انا ريوف اخت أمجاد عمري ١٨ لسى ادرس اخر سنه ثانوي
سلمى:ونعم،انا بنت خالة عروب واقرب وحده لها عمري ٢٤
خلصت جامعه وتخصصي رياض أطفال
ريوف:تخصص رياض أطفال حلو مرههه ودي أدخله الصدق يعني اكثر تخصص أفكر فيه هالفتره
لأن باقي التخصصات محس لها مستقبل بالديره الصدق غير الدُكتاره يعني
سلمى:صح في تخصصات حلوه بس اذا الشخص عايش بالديره للأسف تخصصه مارح يفيده بعضها تغطي عليها الزراعه،شوفي يعني تخصص حقي حلو لكن عيبه الوحيد انه يحتاج صبررر بكل معنى الكلمه لو ماعندك صبر وماتتحملين الأزعاج والمسؤولية مستحيل تكملين فيه واحسش ماشاء الله انتي قدها امس سولفت لنا أمجاد عنش انتي وسولاف وقالت لنا عن شخصياتكم وانتي اكثر وحده تشبهيني نفس الخبال هههههه
ضحكة ريوف وبدت تسولف مع سلمى وهي أخذت راحتها معها
........••........
كانوا الشباب جالسين على جنب يسالفون تبسم مشاري وهو يقول:ياعيال ماودكم بكشته؟
ضحكوا خالد ورعد وسلمان:أمس كنا نفكر فيها ههههههه
مشاري:والله وشرايكم!..
خالد:والله تم بس مو الأسبوع هذا لأن ورانا تدريب
مشاري:يوووه صح التدريب نسيته بس والله خلاص الأسبوع الجاي يوم الأحد ها شرايكم..!
كلهم بصوت واحد:تم....أشر الجد لخالد بمعنى تعال وجاه خالد
الجد محمد:أسمع خلهم يسوون قهوه لأنه خلصت،بعدين نتفاهم ياخالد
هز خالد راسه بمعنى"طيب" وراح لقسم الحريم دق الباب وقال بصوت عالي:ياولدد
كانت الجده جالسه بالصاله هي والحريم وماسمعته لكن البنات كانوا جالسين عند البوابه وسمعوه وعرفت عروب
الصوت وفزت وسلمى دقتها بسرعه:روحي قولي الجده مو هنيه(هنا)
قامت عروب وراحت ورا الباب وبهدوء:الجده مو هنا في المجلس
سكت خالد وكأن مويه أنكبت عليه وهو يسمع الصوت الي ماخذ قلبه وبدون يحس قال بهيام:يالبييه حي هالصوت وراعيه
استحت عروب ماكانت تتوقعه بيقول كذا والبنات كلهم سمعوا ويضحكون حس خالد على نفسه وقال وهو يمد لها ثلاجة القهوه:
الله لايهينك عطيها الجده تسوي قهوه لأنها خلصت
أخذتها عروب وقالت:ولا يهينك،أنا بسويها مابي ازعج الجده
تبسم خالد وحس انه فمه بينشق من كثر الإبتسامه:طيب بس استعجلي عشان الشيبان ماميد يصبرون عنها(مشتهيينها)
عروب:أبشر
انهار خالد ،لاا كذا كثييير أبشر ولاويهينك والصوت اهخخخخ يارب صبرني:تبشرين بالجنه قفلت عروب وهي بتطيرر من الفرحه
اخيرا سمعت صوته عن قرب وخالد الي ماعد تشيله الدنيا من فرحته رجع عند العيال وشاف فيصل
يسولف ويضحك وهو وده يمسكه ويقول(تكفىى زوجنيييي اختتتكككك)لف فيصل وشاف نظرات خالد له وعقد حواجبه بإستغراب
أستوعب خالد أنه كان يناظر له ويتبوسم له مثل الحمار وقال بتصريفه:ياخي مو مصددقققق
ناظروا له العيال كلهم بإستغراب وكمل خالد:انك صرت متزوج ماشاء الله احسك للحين بزر ههههه
ضحكوا كلهم وهبده فيصل:لا والله؟أحلف بس قال بزر،ترا المفروص الحين ماتكلم مع عزابيه يعني على فكره
صرخوا العيال عليه وهم يضربونه
رعد:ياسعود شف لك حل مع نسيبك رجع أختك
ضحك سعود:شكل هذا الي بيصير ههههههههههههههههه
فيصل:اقطع واخسس يالورع جحدتني على طولل،حبيبي تأدب معي صرت نسيبك هاا
رماح:ونعـم النسيب ههههه
ضحك نواف:ياخي الله يعين زوجتك عليك وهي بتقابل وجهك طول الوقت
صرخ فيصل ورماه وهو يضحك:لاتنطق زوجتي قدامهم تسمع!!..بعدين وش دخلك أنت أطلع منها
........••.......
عند البنات كانوا يعززون لعروب وهي مستحيههه دخلت المطبخ تسوي القهوه ولحقت سلمى وهي تضحك:اجل مسويه ذربه هاا!
وانا اطلبها وتتأفف بعدين وششششش الحركاااات ياهووو لبييه وحيي هالصوتت هههههه
ماتت عروب وهي تسكته:تكفيييين اسكتيي مو قادره أناظر بوجه البنات بيمسكوني الحين،بس اخ على مزيوني
فتحت سلمى عيونها بقوه:مزيوني بعددد والله معرفتش يالخفيفهه ههههه،أقول بروح اتوكل بس واخليك تكملين سناعتش
رجعت سلمى للبنات وشافت الكل غير الموضوع ويسولف ورجعت معها عروب على بال ماتتفوح المويه
وجلسوا كلهم وعروب تتمنى محد يطقطق عليها
(بعد ساعتين)دق الباب وجت عروب من بعيد:مين؟.
"تنحنح خالد"وقال:أنا، خلصت القهوه!.
ابتمست عروب ومدتها له وأخذها:مو أفضل نحطها بصحن؟.وازيد فناجيل قهوه!..
خالد: اتوقع يكفيهم،بس ماعليه زيدي حول العشر فناجيل أحتياط
عروب:طيب ثواني بس..راحت عروب تجيب الكاسات حطتهم بصحن وجابتهم مدتهم له ومد خالد يده بيمسكهم بس صقعت بالصحن وطاحت من يدين عروب"انحرجت عروب منه وهي تقول في نفسها(يالخبله كسرتي فناجيل الولد)عضت على شفتها السفليه وهي تجمعها وتقول:ماعليش
أنفجع خالد:ماعليه أنكسر الشر،لاتشيلينها بيدك عشان ماتضيمش
عروب: اسفه ماقصدي بلمها الحين معليك
نزل خالد بسرعه وأصتدم بعروب وهو ناسي:لااااا،لاتجرحش قومي
رجعت عروب بقوه وخالد استوعب على نفسه:ماعليش والله نسيت اني اتغطى منش العذر والسموحة
ضحكة عروب في نفسها:ل.لا عادي ماعليك،خلاص أنت خذ هذي وتوكل انا بكنسها الحين عشان ماتجرح أحـد"مشى خالد وهو طول الطريق يتخيل عروب قدامه من جديد وبفستانها الأحمر"
أما عروب صارت تقمز وهي مستحيه:ياويلي يارب انا شفيني اليوم؟عروب اعقلييي تكفين وش ذا يالخفيفه الأدمي مايقول كلمه الا وانتي تتبوسمين له!!أخذت عروب المكنسه وهي تكسن الفنجال بسرعه لايشوفها أحد"كان نصه طاح وانسكر برا عند الباب وبينه وكان الباب فاصل بين الحريم والرجال"كانت تكنس وهي كل همها لاتجي الجده وتنحرج معها زياده ومانتبهت للعيون الي تراقبها من برا،،كان واقف وهو يتأملها ولاقدر يصد عنها لأنها فعلًا كانت سيدة البنات بجمالها ومحد يقدر ينكر هالشيء وهو كان طالع للحمام(أكرمكم الله)وشافها بالغلط وماراحت عينه عنها لكنه أنقهر يوم ماعرف منهي:والله ياهي جميله جمال موطبيعي
،ماني رايح لين اعرف منهي ذي...وماطول لأن وصله صوت وحده تناديها"عروب وينش تعالي بسرعه"دخلت عروب وبقى يمسح على شنبه وهو يبتسم:أجل اسمش عروب!.أشهد انهم ماكذبو يوم قالوا سيدة البنات بجمالها!والله ان تكونين من نصيبي وماكون أنا{مفلح}
اذا ماخذتش يابنت أبوش!!!...
.....•في مجلس الرجال•.....
دخل وهو يتنحنح،جلس بجنب خالد وقال بنفسه(أجل هذي الي خذت عقلك والله ماتنلام بس أحلم تكون من نصيبك)
لف خالد له وابتسم:وشفيك عسى ماشر؟
تنحنح مفلح وتصنع الإبتسامه:هاا لا مافي شي بس ذكرتني بشيء قديم
مد له خالد فنجال قهوه وضحك:وانا أقول شفيك من اليوم تبحلق بي ههههه
أخذ مفلح الفنجال:ههههه الا ماقلت لي ياخالد
خالد:سم!.
مفلح على صوته بإستقصاد:ماتعرف وين أهل أبوك معقوله مايعرفون ان أهلك ماتوا!!..سكت الجميع بعد كلامه وأنلجم خالد ماتوقع
بيسأله عن شي حاول سنين انه يدفنه ويمحيه من مُخيلته "شد بقوه على فنجال قهوته وحركه بخفه":مع ان مدري وش طرى
عليك تسأل هالسؤال بس ماعرف عنهم ولابي أعرف شيء
مفلح:ليه طيب!!بينكم شي؟.....قام الجد محمد بيصرف الوضع وقال:كنكم تأخرتوا عن العشاء؟قوموا ياعيال شوفوا للعشاء
راحوا العيال يشوفون بعد ماخذت لهم الجده طريق وقال رعد:مارتحت لمفلح ذا
سلمان:حتى انا احس اني ماني بالعه وراه ماصيب صدقوني!!
خالد بهدوء:لا ياعيال حرام والله مسكين ترا
رفع رعد راسه وحط السكين على جنب:ياحبيبي سمعت وش قال قبل شوي واضح متعمد يسأل ويعلي صوته بعد
خالد:مستحييييل ترا انتم ماتعرفونه زيين ياما فزع لي بأشياء واااجد
ضحك سلمان بخفه:يابوي ماتعرفه لين تنقرص منه صدقني هذا الأدمي وراه بلاوي
خالد:مسوي فيه المحقق كونان على راسي؟أهجد بس وقطع الحم انا بطلع اساعد جدي..لحقه سلمان وقال"وانا كمان بساعدك"
ناظر فيهم رعد وهو يصرخ عليهم:حسبييي الله على بليسك انت وهو،وين سحبتو عليي!!والله ان اطلعها من عينك انت وهو وتشوف
دخلت الجده على صراخ رعد:بس وش ذا الصراخ عندنا ضيوف
اخذ رعد يقطع الذبيحه بحلطمه،ضحكة الجده عليه راحت تاخذ وتساعده
وقف رعد بإعتراض:لا والله ماتسوين شي،انا بسوي العشاء وانتي روحي ارتاحي
وقابلي الضيوف،راحت الجد بتإييد وبقى رعد يقطع بالذبيحه لوحده بعد ماسحبوا عليه العيال
........••........
عند البنات كانوا جالسين بالصاله يسالفون دخلت عليهم الجده
وابتسمت وهي تشوف عروب من بينهم وقالت للحريم:أعذرونا بيتأخر العشاء شوي،،نطقوا بـ لا عادي معليش)جلست الجده مع الحريم وبدت سوالفهم والبنات مجتمعين وجالسين دائره حول بعضهم في الأرض على الزوايه،معزولين شوي عن الحريم
سولاف:بنات ودي نسوي شي أحس طفش كِذا!.
سلمى:منجدد بخاطري لو نلعب لعبه او شرايكم"قربت منهم أكثر
عشان محد يسمعها من الحريم":نطلع السطح ونشوف العيال وش يسوون من فوق؟؟.
إجابوا بتإييد وقاموا لكن أستوقفهم صوت الجده بإعتراض:يابنات ترا رعد بالمطبخ يطبخ العشاء فـ أنتبهوا عشان مانكشفون عليه
سلمى:طيب ياجده معليش مابنجي صوبه،هزت الجده عبير راسه بإيجاب وراحوا البنات السطح متحمسين،ركضت عروب قبلهم وهي تصرخ:الله حماسسسس،قولكم ويش يسوون الحين!!
أمجاد:أكيد متجمعين الكبار بالمجلس والعيال برا عوايدهم
وصلوا وبدو يتبادون عليهم (السور كان قصير)،،كانت تقلب بعيونها تدور عليه بس مالقوا أحد
ناظرت سلمى بإستغراب ونطقت:وين ذلفوا غريبه؟
ضحكوا البنات وقالت سولاف:لايكونون بس في المجلس وحنا ننتظرهم هههههه
ريوف:اكيد انهم بالمجلس حسااافه كنت بشوف وش يسوون
عروب:عاد وش بيسوون ماعندهم سالفه أكيد غير حش بخلق ربي
لفت غزل(اخت مشاري) لها وقالت:الحين ليه مانروح الحوش الخارجي مو احسن؟
إلهام اختها:لاا اقول فكينا،لا يشوفنا مشعل ويخلينا العشاء...ضحكوا البنات
سلمى:ليه،عادي ترا مابنكشفهم
إلهام بخوف:ياختي والله ماتعرفينه نفسيه،اساسا من حنا بالسياره يقول لاشوف وحده فيكم،انثبروا عند الحريم
ريوف:سلااماات ويش يحس فيه ذا معليش بس اخوكم نفسيه
ناظرته امجاد بحده:عيب،مالش دخل انتي!
الهام:تستهلبين امجاد ويش الي عيب ماقالت شي يغلط هو تعدى أصلًا مرحلة النفسيه مسوي فيها الرجل الغيور
ضحكة ريوف وهي تناظر امجاد:ها شفتي كلهم يقلون له نفسيه مجت علي عادي
هبدتها امجاد بخفه:هم اهله انتي من اهله؟،لا
غزل:يابنتي عادي ترا وش قومش عليها، خليها مسكينه،الحين وش نسوي ننزل ولا لا..؟
رجعت سلمى مشت تنزل:ايييه يلاا اخر وحده توصل حماره هههههههه
صرخوا البنات وهم يركضون تحت وفازت عليهم سلمى وهي تصفق:انشهد اني كفووو
ضحكة عروب:اقول دزيها انتي اول من نزل اكيد بتفوزين
قربت سلمى منهم:الحين وش نسوي صدق ملل
غدي:اقول شرايكم نرجع بديت احترق هنا
نطقت الجود(اخت نواف):بناتت ا تكفوون خلونا نلعب اونو شراايكمم؟؟
عروب:اييييه يلا بس وين الأونو
سلمى:اسمعوا دايم اشوف عيال الجد محمد يلعبون هنا وامس شفتهم يلعبون اونو اكيد انه في غرفة واحد فيهم،
خلونا نجيبه!..نطقت عروب بحده:تستتهبليين انتي ويييين،انسي بس
إلهام:منجد لا عيب ندخل غرفهم عشان اونو خلاص ننثبر هنا ونلعب افضل
سولاف بحده:بناتت تستهبلون منجدكم تبون نقعد هنا بس نسولف؟،مستحيل انا ابي العب،اعدي نروح انا وانتي ندور وخلي الخوافين
ريوف:ماله دخل خوافين في هذي انا اقولش لا عيب والله مهو بيتنا
مشت سلمى وسولاف متجاهلين كلامهم طلعوا الدرج ووقفوا عند الممر ونطقت سلمى:اسمعي كل وحده تدخل غرفه ندور فيها
هزت سولاف راسها بإيجاب:تمم،انا بروح الغرفه هذي وانتي شوفي الاخير،دخلت سولاف وهي تقلب بعيونها
كانت الغرفه نظيفه وريحتها عوده بدت تقلب وشافت بدلة عسكريه مسكتها وهي تتفحصها:شكل ذي غرفة رعد واضح أساسًا
.........••.........
خلص رعد وقام ينادي الجده بصوت عالي عشان تسمعه،جت الجده:ها يارعد ويش بغيت
رعد:سويت العشاء وركبت عليه الحين بس ابطلع غرفتي اغير عشان ثوبي تلطخ بالدم
الجده:ايه روح اساسا محد في من البنات...تحرك رعد لفوق وتوجه لغرفته الي كانت ببداية الممر فتحها
وانصدم من شاف بنت في غرفته تحوس فيها نطق بحده:وش تسوييين هناا يابنت
لفت عليه وصرخة بصوت عالي....تفاجئ رعد وقرب يسكتها:يعني داخله غرفتي وتصرخين تسوقين امهاا انتيي!!