ذراري الهجرس

الفصل الثامن عشر

فما الحب إلا للحبيب الاولي
كيف ابدل حبك الذي عشعش في قلبي متوسط اياه واخذا كل أركانه
لا بأس فأن لم تكوني لن يكون هناك حب ينبض داخل خافقي المتعب

طوفان 🍁

يابه تفاعلوا بلكي تصعد القصة يعني حرامات كل هل التعب وماكو لا تفاعل ولا مشاهدة 💔🚶🏻‍♀️

*********************************

🍁

الفصل الثامن عشر.......

مر على وجودنا بهاي المزرعة شهر كامل تعرفنا بي على عائلة حجي زيدان عائلة كلش حلوه وطيبة وماخلونا نستوحش بهذا المكان ابدا بحيث كلما ملينا نروح يمهم حاليا جنه كاعدين وفارشين الكاع ناكل وسط هذا الزرع ويا بنتهم بدرية مدري هي شتخيط ونفله تساعدها

نافله : بدرية شوفي هذا صحيح

بدرية : اي صحيح بس شديها جثير حتى من يوكعن المشمشات مايطافرن بل كاع

: شتسوون بيها ورا ماتخيطوها

بدرية : نفرشها بل كاع ونهز الشجر حتى توكع ثمرها

: هاا والنحل

بدرية : هذا موش شغلنا ابوي واخواني يطلعوهن

: هذيج المره عمو زيدان مدري شجاب من العسل كلش طيب جان وغريب

بدرية : قصدج خبزه العسل

: اي اعتقد هذا الشي جانت طيبة بس ماكدرت اكل هواي منها بس خاشوكه وحده وحسيت الحلا ضرب براسي

بدرية : انتي اكلج اكل طير وين تكدرين تاكليها نفله شديها اكثر لمن نرفعها ينفتح خياطج

نافله : والله دا اشدها

بدرية : لا تصيرين فاهيه لا الطشج بل كاع اشتغلي عدل

ضحكت : اي طلعيها شوي من فهاوتها حتى نزوجها اذا بقت هيج محد راح يريدها غير صخمان

بدرية : اي صحيح اشتغلي عدل وهذا مني صخمان

: واحد فاهي اخترعته من خيالي لنافله

بدرية : والله بهذا شغلج محد راح يريدج نافله

نافله : ولا رادو اذا مايعجبهم خل يلطخون راسهم بأقرب حايط

صدحت صوت ضحكاتنا على حجيها

ام بدرية : بنوات تعالن اكلن صار وكت الاكل عوفن القماش ورا الاكل نخلصه

بدرية : نفله خلصي الي بيدج وتعالي واذا شفته مامضبوط اكعدج تسويها مره ثانيه

نافله : اهووو

حسيت بواحد لزمني من ايدي لزمتني من ايدي وراها حجت بدرية : تردين اصيحلج نافله لو عادي تمشين وياي

: لا عادي ماكو فرق

مشتني لبيتهم بس كلتها بل طريق : خاف نافلة تخاف وحدها