طبعا أميرة كل يوم حالتها تزداد سوء وديما هي مهمومة وكئيبة وسرحانه وفاقده عمر هلبة وزعلانه منه بقدر حبها ليه بس كرامتها ماتسمحش انها تتنازل مهما صار
عمر قرر انه ايخلي موضوع أميرة علي جنب لأن في مواضيع أهم منها واللي هي مواضيع عيلته يلي كلها علي راسه بس كيف قدر يأجله وهو كان مايقدرش يصبر من غيرها ولا يوم بدون مايكلمها او يشوفها لكن الباين انه في حاجات بتتغير أو تغيرت بالفعل
الهادي بدي يتحسن نوعا ما بس مزال حالته ماتسمحش انه يطلع من المستشفى وهذا لي حسن حظه طبعا
هناء حاطة عينها علي ربيبها عمر يلي المفروض يكون محرم ليها بس هي المهم عندها انها توصل للشي يلي تبيه بغض النضر علي العواقب
نورية مش مستريحة لي ضرتها نهائيا وملاحظة تصرفاتها الغريبة وانها تحاول تتقرب من عمر وتراقب فيها ومقررة انها رح اطلعها من حوشها لو لاحظت عليها أي تصرف لا أخلاقي لأنها في النهاية مش مجبورة بيها وعندها اهل هما أولى بيها
عند عمر مقعمز بجنب بوه يلي راقد في سابع حلم وصلوه رسائل من ايميل غريب
....:-الو
.....:-هلا
.......:-شن الجو
عمر:-منو
......:-معقوله ماعرفتنيش
عمر حس أنها اميرة
عمر:-لا والله كيف بنعرفك
.....:-اني هناء
عمر وهو فرحان وكان مستني اللحظة هذه بفارغ الصبر
عمر:-اه شن جوك
هناء:-مش حلو
عمر:-علاش
هناء:-خيرك ماروحتش
عمر:-الحق قعدت لاهي مع بوي
هناء:-باهي امتا بتروح
عمر:-شنو تبي حاجة
هناء:-اي
عمر:-شن تبي قولي عادي ماتتحشميش
هناء:-نبيك انت
عمر:-كيف؟
هناء:-شنو كيف
اني من اول يوم شفتك فيه عجبتني هلبه وحسيتك محترم هكي وماشاء الله عليك الحق عجبتني
عمر:-بس ماتنسيش انك علي ذمة بوي راهو الشي هذا حرام
هناء:-يعني ضروري اذكرني بالشي هذا؟ بوك ضلمني هلبة وقهرني ماعشتش معاه يوم حلو وخوتي تخلوا عليا واني ماعنديش غيرهم في الدنيا قعدت من غير سند وبوك استغل الشي هذا وذلني وكل مانتكلم ايقوللي لو فيك خير راهو اهلك ماتخلوش عليك😭😭
وتوا انت مستخسر فيا اني نعيش حياتي ونحب زي الناس خلاص انسى اني كلمتك كنت نبي نفضفضلك لا أكتر
عمر:-خلاص اهدي اني مش قصدي هكي تبي الحق وحتى اني معجب بيك هلبة من أول يوم شفتك فيه وقلت خسارة وحدة زيك تاخد واحد قد بوها
هناء:-بجد
عمر:-وجد الجد
هناء:-واميرة؟؟
عمر:-من أميرة وانتي وين تعرفيها
هناء:-كيف وين نعرفها صاحبتي هذه قارية اني وياها
(طبعا كذابة ماتصدقوهاش)
عمر:-بجد
هناء:-ايه اني مش عارفة كيف حبيتها قصدي يعني مش من مستواك وماتستاهلكش
عمر:-كيف؟
هناء:-هكي قصدي متاع ولاد وعلاقاتها هلبة
عمر:-اصلا اني سيبتها من يومين فاتوا
هناء:-بجد
عمر:-ايه والله
هناء:-أحسن افتكيت منها
عمر:-توا نكلملوا هدرزتنا بعدين
هناء:-باهي بتروح الليلة
عمر:-مندري
هناء:-تعالى حتى شوية طل عليا استاحشتك
عمر:-ان شاء الله تو نروح اصلا بندوش ونغير حوايجي
هناء:-تمام نستنى فيك
