ماتقروش وتفوتوا علقوا واعطوني رايكم ونتقبل النقد ونبهوني لو في أخطاء بجد رايكم ايهمني وشكرا❤️❤️❤️
طبعا طلع عمر متكنطي من تصرف مرت بوه الغير متوقع في أول يوم ليها عندهم بدل ماتكون متحشمة وماتطلعش من دارها بالعكس كانت جريئة وواخده عالوضع وكأنها متعودة عليهم
طبعا عمر نسي تليفونه في داره وطلع
هناء لما جت بترجع للدار سمعت صوت رسائل ماسنجر لما تأكدت من انه عمر طلع مشت شدت تليفونه وقرت الرسائل وكانوا رسائل من أميرة كلهم حبيبي وينك وو..و...ووو.. المهم هناء من وقاحتها اتصلت بيها وأميرة استغربت لأن عمر مش من عوايده يتصل بيها مكالمة ماسنجر بس فتحت الخط
أميرة:-ألو
هناء:-ايوا
أميرة:-منو معاي
هناء :-انتي اللي منو ياغزالة
أميرة:-انتي يلي اتصلتي بيا وشن وصل الهاتف هذا ليك
هناء كيف بتتكلم لين سمعت الباب ايطق وكان عمر جاي بياخد هاتفه صكرت المكالمة بسرعة وحطت الهاتف وطلعت تجري خدي عمر تليفونه ولقي رسائل أميرة ورد عليهم
أميرة:-وين انت؟
عمر:-في الحوش
أميرة:-اه عندكم ضيوف الباين
عمر:-لالا ماعندنا حد بس غريب سؤالك
أميرة:-لا غير لما مارديتش علي رسائلي قلت الباين مشغول وعنده ضيوف
عمر:-لا والله كنت طالع وناسي الهاتف اذكرته وليت خديته وبنطلع بنمشي للمستشفى
أميرة:-تمام نستأذنك توا ماما تنادي
عمر:-وانتي كيف حالك توا
أميرة :-الحمد لله احسن
عمر:-سلامتك ياقلبي❤️
أميرة صكرت بدون ماترد وكانت قريب تموت تبي تعرف شنو يلي صاير وتتمنى ان شكوكها كلها تطلع وهم ومافيش منها
وفات باقي اليوم عادي لين جي الليل
في الليل أميرة متكية عالسرير وتتوجع وحالتها حالة
أماني جاية وجايبة معاها طاسة قرفة لي أميرة
أماني:-هاك أشربي هذه بالك ايخف عليك الوجع
أميرة:-ساد كبدي سحقت من الاعشاب وبلا فايدة
أماني:-غير خودي منها حتى شوية كويسة القرفة
أميرة:-حطاها توا خلي تبرد
دخلت أمهم
فاطمة:-شنو ياأميرة توا ماخفتش عليك حتى شوية
أميرة:-ايش مازايد الوجع
فاطمة:-نوضي خلي نرفعوك اني وبوك تضربي يبرة
أميرة:-حاشاني شن منظري قدام بابا
فاطمة:-غير نوضي شنو غابي فيك هو حتى كان الدنيا نهار راهو رفعك خوك لكن الدنيا ليل وخوك مانقدروش نخلوه ايسوق في الليل
أماني:-نوضي نوضي اضربي مسكن اقل شي تستريحي وترقدي
أميرة:-باهي جيبيلي عبايتي
فاطمة:-بري معاها انتي أماني أخف مني
أماني :-باهي
وبالفعل لبسوا أميرة ورفعوها للمستشفى ودرسوا قدام قسم الإسعاف
عند نورية
مقعمزة ومعاها نساوين جايين ايحمدوا بي سلامة الهادي وطبعا اغلب جيانهم تقصقيص المهم قتلهم انه الهادي متزوج وان صارله حادث هو ومرته وبدت مسكينة كل مرة اطلع كذبة باش تبعد الشكوك والتساؤلات وبجهد جهيد جاوبت علي كل أسئلتهم اللي ماليهاش داعي طبعا فريق صدق القصة وفريق قال كذب ومغباكم عاد في الليبيين مايفوت عليهم شي الله يبارك
المهم قالولها ناديهالنا خلي نشوفوها ناضت نورية من جنبهم ومشت لي هناء لقتها راقدة مابتش تنوضها طلعت نورية للجارات وقتلهم انها راقدة عاد مرا نافس وتعبانة المهم شوية وناضوا روحوا مشت نورية لي هناء استغربت منها كيف راقدة بكري بلكي مريضة ولا حاجة لمستها لقت حرارتها مرتفعة قعدت نورية لاهية بيها وهي كل مالها وتزيد حرارتها علي جية عمر مشتله أمه وحكتله وقتله لازم نرفعوها للمستشفى أشرلها عمر بمعني هيا تلقوني في السيارة لبست نورية لي هناء عبايتها ووشاحها وركبتها لي عمر في سيارته
عمر:-أشر بمعنى البسي بري معاها
نورية:-والولد كيف بنديرله برا انت ارفعها وخلاص تو يتلقوها منك الممرضات ايدخلوها
وافق عمر غصبا عنه ومشي وهو طايرتله وصل بيها قدام قسم الاسعاف نزل فتحلها الباب نزلت هناء تكر في روحها كران ماشية ورا عمر تلفت عمر لقاها مش قادرة تمشي معاش عرف شنو ايدير قعد يستنى فاها ولما وصلاته شدت في ايده بس اضطر ايسايرها لين يدخل للداخل لأن وضعها مايسمحش انه يجبد ايده منها
عند أميرة
بعد مانزلت دخلت هي وأماني وضربولها ابرة مسكن وطلعت بتروح ولما وصلت للباب شافت عمر داخل ومعاه وحدة وشاده فيه كأنهم راجل ومرت
أميرة قعدت تشوف ومصدومة بالموقف مالقتش ولا تفسير للشي يلي قدامها حبيبها يلي قبل شوي كان يعبرلها عن حبه ليها جاي للمستشفى مع مراه مش معروفه شنو تكونله وأميرة تعرف كويس انه عمر ماعنداش خوات يعني مستحيل تكون وحده من محارمه واللي زاد أكدلها شكوكها المراه يلي اتصلت بيها من تليفون عمر العشية
