عند نورية
مشت لي ضرتها وهي مش طايب علي خاطرها لكن بالسيف ومن غير علم عمكم الهادي يلي قاعد مايعرفش ان حكايته انفضحت وعرفتها بنفسها
نورية:-(من غير نية)شنو قالولك بيطلعوك ولا مزال
هناء:-غدوة احتمال
نورية:-وتوا وين بتروحي لما بيعطوك خروج لي حوشك ولا لي أهلك
هناء:-(تبكي)أرض ربي واسعة أهلي ميتين والحوش بايعينه خوتي وماعندي وين نمشي كونش لي واحد من خوتي هذا كان قبلوني ولو حتى قبلوني مش رح يقبلوني بي ولدي
نورية:(وجعتها)توا في البداية روحي معاي اني لين نلقولك حل
هناء:-لااني معاش نبي نرجعله والله يقتلني
نورية:-منو بيقوله هو توا قاعد في المستشفى وعلاجه مطول لين يطلع هو نلقولك حل بعون الله
هناء:-صحيتي اني والله خوتي غصبوني عالماخدة كان هذا ماناخد واحد صاحب عيلة ونقعد نلقط في الدعي لكن اهو شكلك دعيتي علينا و باب العرش مفتوح طول استجابت دعوتك
نورية:-لا دعيت عليكم ولانعلم حتى بيكم اني واني كان بندعي بندعي بالهداية مش بالهلاك
هناء:-اي عندك حق صح
الممرضة:-معليشي ياماما ولدك راهو ماعنده شي راهو خديناله كل شي من البيبي اللي بجنبه كلمي بوه يجيبله ساكوه
نورية:-اني توا نمشي ونجيبله كل شي ناقصه
مشت نورية لي عمر وحكتله كل شي وكان طايرتله هلبة وعلي خاطر أمه مشي وشروا كل شي للبيبي وقفطان وملابس داخلية لي أمه ورفعتهملها والبيبي قالولها ممنوع يطلع من هني إلا مع أمه روحت للحوش وعمر رجع عند بوه
الهادي قاعد وضعه صعب شوية وقعد يذكر شنو يلي صار معاه الليلة الماضية
مروح عمكم الهادي في الليل وكان المفروض انه يمشي لي نورية لكن غير وجهته لي حوشه الثاني فتح الباب ودخل وقعد واقف شوية يسمع في صوت ضحك طالع من غرفته قعد يمشي ويدعدع لين وصل فتح باب الدار وتفاجأ بمرته وهي في احضان راجل تاني بمجرد ماشاف الهادي ناض يجري دفه وطلع يجري هرب والهادي كان شارب هلبه ماقدرش يلحق عليه وصب كل غضبه في هناء ضربها هلبة لين نزفت وفزعوا الجيران وسعفوها ووصل الخبر لي خوتها وصار يلي صار
الهادي كان مغلول هلبة ومش قادر يحكي شي من يلي صار
عند عمر
دخل عند بوه و ولقاه راقد طلع فتح نت بس مالقاش ولا رسالة من أميرة استغرب و قعد ايناشب فيها شوية وفتحت
أميرة:-شن الجو
عمر:- وينك ياأكسجيني فقدتك اني
أميرة:-هني موجودة
عمر:-غريبة قبل ديما تناشبي
أميرة،:-قلت توا لاهي مع بوك مابيتش نلهيك
عمر:-افتحي فيديو استاحشتك
أميرة:- مبارح متكلمين فيديو مسرع استاحشتني
عمر:-خيره جوك هكي؟مبكري كان مليح
(عمر حس انه أميرة عرفت بعمايل بوه)
أميرة:-لا عادي
عمر:-ماتبيش تفتحي فيديو
أميرة من غير ماترد عليه أتصلت بيه طول مكالمة فيديو
أميرة متكية ووجها تاعب
عمر:- أشرلها بمعنى (خيرك مريضة)
أميرة:-(تحشمت)شوي مش هلبة
عمر:-أشرلها بمعنى(شنو تحسي)
أميرة:-هكي ضهري شوية وشوية مغص تو يمشي
عمر:-(الخطير فهمها وهي طايرة)صكر المكالمة وكملوا كتابة
عمر:-باهي خودي مسكن ولا حاجة
أميرة:-خديت
عمر:-جننتيني حتى وانتي مريضة حلوة
أميرة:-انت احلى
عمر:- توا بري ارقدي شوية ارتاحي وبعدين نحكوا تمام؟
أميرة:-تمام ❤️
فات اليوم عادي من غير أي أحداث
ثاني يوم
مشت نورية ورفعها عمر باش بتروح بي ضرتها وولدها من المستشفى لقت مرت خوها معاها
نورية سلمت وقعمزت
هناء:- عمتي نورية هذه مرت خوي
نورية:- بالجودة شنو عطوك خروج
هناء:-اي عطوني خروج
مرت خو هناء:-ياعمتي هناء بتروح معانا خوها قال تروح لي حوشه وانتم ارفعوا الولد
نورية:- مصح والله وجهك ووجهه كان مش عيب توا نسمعك ماتكرهي كيف ولد قاعد ماطقش حتى اسبوع تحرميه من أمه شنو هبال هو ولا شنو ريحي روحك انتي وخوك هاني بنروح باها هي وولدها لي امتا مايحن ربي ولا تحنوا انتم
مرت خوها:-ياعمتي خليني محترماتك خير تو يسمع خوها يولي عليا اني ترا مش ناقصني هم
نورية:-تعرفي كان مااضميش فمك وتطلعي من هني تاكمك هذا لما نهده يلي ماكش متربية كان فيكم عرق الحن ماتعطوش بنتكم لي واحد قد بوها سكار نكار امشي جمري ايجمريك
هناء(تبكي)ياويلها تبي تمشي مع خوها خايفة من المشاكل ياويلها ماتبيش تبعد علي ولدها لكن اختارت ولدها وانها تمشي مع نورية ومع هذا لما سمع خوها ماقال شي فرح لأنه افتك منها وروح
طلعت نورية شادة الولد ومعاه ساكوه وهناءقايمة شوية كيسات خفيفات وطالعةركبوا مع عمر ووروحوا
وطول الطريق وهناء تخنب في نظرات لي عمر وعمر ولا على باله
وصلوا للحوش دخلتها نورية للدار يلي مجهزتهالها وقالتلها اهو الحمام بحداك وديري شن بديري وطلعت خلتها تاخد راحتها وقعمزت بحدا عمر
عمر:-بمعنى)هذه لآمتا بتقعد هني
نورية:-مش معروف خلي يستاقظ بوك ونعرفوا شن بيصير المهم راك تقولله انها هني عندنا
عمر:-هز براسه بمعنى تمام
هناء جسمها كله مدمدم ويوجع فيها غسلت اطرافها وبدلت حوايجها واتكت بحدا ولدها ورقدت دورة وناض البيبي يبكي مشتله نورية خداته دوشتله ودارتله رضعة وقعمزت بيه بحدا عمر
نورية:-وانت بنفرح بيك وبنشوف صغارك ياوليدي
عمر:-أشر بمعنى مش بعيد ان شاء الله
نورية:-بالحاااق
عمر:-هز براسه بمعنى ايه
نورية:-عندك وحدة وله ندورلك
عمر:-أشر بمعنى عندي
نورية:-من هي ياوليد وزيك حتى هي ولا تتكلم راني مانبيش ناخدلك وحدة ماتتكلمش
عمر:-أشرلها بمعنى اطمني تتكلم وتسمع وكل شي
نورية:-وراضية بيك ؟
عمر:-أشرلها بمعنى ..اي راضية بيا كيف مااني لكن مش حنتقدملها لين نتعالج ونرجع زي قبل
نورية:-الحمد لله ياوليدي ربي يجعلها من نصيبك والله كان هذا لما نديرها بنتي اللي بتاخدك انت
بس في عيون كانت تراقب في المشهد والباين مش ناوية علي خير
طلعت هناء بقفطان نص كم وقصير لي نص الساق ومن غير حجاب علي أساس ماتعرفش انه عمر هني وبمجرد ماشافها عمر ناض طول طلع وهيا زعميته متفاجأة شهقت وولت لي دارها
دخلتلها نورية
نورية:-يابنيتي اني راهو عندي عزري في الحوش البسي لبس محترم وغطي راسك عيب عليك راهو
هناء:-حاضر ياعمتي اني ماسمعت حد يتكلم قلت شورك بروحك
عمر طلع متغشش وطايرتله وعارف انه رح يعاني هلبة من هناء وشبه فهم تصرفاتها بس خلى روحه عادي جدا
( والله نكتبلكم حكم راقدة )
تمت ونحبكم ❤️ويتبع.....
