حقيقة مظلمة🖤(روايات ليبية)

#20🤍

﴿ وماتوفيقي إلا بالله عليه توكلت واليه أنيب ﴾⁦❤️⁩
﴿ ألا بذكر الله تطمئن القلوب ﴾⁦❤️⁩
.
.
#حقيقة_مظلمة
بقلم خديجة رمضان (دوجي رمضان)⁦❤️⁩
الحلقة عشرون (20)⁦❤️⁩
.
.
زينة قعدة مقعمزة في مكانها وتستنى في أحمد ودموعها ينزلو ورا بعض!
نــــدمــــت بسبب العملة يلي دارتها بس شن الفايدة
توا؟ مهما ندمت مستحيل ترد شي او تقدر تصحح شي لأنها بدت زوجته ، تزوجت وهربت بالسر 💔
أحمد وصل الشيخ للباب وخش وهوا مبتسم قعمز جنبها ومسك يديها ... مبروك علينا ياقلبي🤍
زينة شبحتله ودموعها ينزلوا ... الله يبارك فيك
أحمد نصدم ... شنو الدموع هادم؟ شن في؟
زينة حطت يديها ع وجها ونهارت💔
أحمد جبدها في حضنه ... زينة وقفي بكي ، مش اليوم هادا يلي كنا نتمنو فيه
زينة بصوت باكي ... تمنيته وهلبا يااحمد بس ماتمنيتش أنه يكون هكي
أحمد بعدها من عليه وشبح في عيونها ... اسمعيني زينة ماتخافيش من اي شي احني سفرتنا رح تكون غدوا ومش ح يصير شي بينا ومش رح نطلب منك اي حق شرعي لين نسافرو وتشوفي عيلتي وتتعرفي عليهم وتتعودي أني عارف الظروف يلي تمري بيها ونبيك تعرفي أنه أني نحبك وواقف معاك لأخر عمري🤍
زينة نزلت عيونها وقالت بصوت باكي ... اسفة ، أنا رح نسببلك هلبا مشاكل اصلا انا دي....
أحمد قاطعها ... أنتي سبب سعادتي في الدنيا هادي ، وانا حاب حياتي معاك وهادا يكفي
زينة ابتسمتله وسط دموعها 🤍
أحمد ضحك ... ايواا اهيا الأبتسامة يلي نبو نشوفوها🤍
زينة ابتسمت بحشمة✨
أحمد ... هي نوضي نطلعو نتغدو برا
زينة شبحتله بخوف ... لو حد شافنا
احمد ... مستحيلل احني في مدينة مقطوعة عن الناس الراقية هيا نوضي
زينة ابتسمت وناضت للغرفة بتبدل ملابسها؛

~~~~~~~~~~~~~~~~~~

حسن خش للحوش وفي يده كيسة ... أمي ، امييي
بسمة مقعمزة في الصالة ... أنا هني تعالى
حسن خش للصالة وباسها ع رأسها وقعمز جنبها ... غريبة اليوم قعدة مش شغل أمالا؟
بسمة ... اليوم سبت ماعنديش ، وإنت وين كنت أنا ع بالي بايت في الحوش
حسن ... كنت عند صاحبي
بسمة ... فطرت؟
حسن ... لا ، وين زينة؟
بسمة ناضت وقفت ... شكلها راقدة مانزلتش ، المهم تو نمشي نديرلك فطور خليك هني
حسن ناض وقام الكيسة ... اوكي انوض نغير ملابسي بين ماجهزتيه
بسمة هزت برأسها بمعنى تمام وخشت المطبخ؛
حسن ركب فوق وجت عينه ع غرفة زينة مفتوحة ، خشلها وولع الضي مالقي حد وزع عيونه في انحاء الغرفة وحس أنه ناقصها هلبا حاجات زي الزيانه يلي عن غير عادتها فارغة ، والصور يلي كانو معلقين في الغرفة مش موجودين؛
طلع وهوا ع باله أنها انتقلت لدار ريم ، خش لغرفته وبدي يغير في ملابسه من غير اهتمام؛

~~~~~~~~~~~~~~~~

فتحت عيونها وهيا تحاول تركز هيا وين!؟
قعدت تشوف قدامها في الأشجار والمنظر كأنها في غابة ، بدت تركز شوية شوية باش عرفت نفسها هيا في سيارة تلفتت جنبها لقت غسان حاط رأسه ع الدومان قالت بصوت واطي ... غسان
غسان قام رأسه وشبحلها؛
غصون تحركت ساوت روحها ... أنا وين ، احني شن نديرو هني؟
غسان ... جينا هني عشان نحكو بعيد عن الزحمة
غصون اذكرت يلي صار ، فتحت عيونها بصدمة ... خطفتني؟؟ خطفتني غسان؟
غسان ... ممكن بس رح يكون اختطاف مؤقت تسمعيني فيه ووقتها خودي قرارك براحتك
غصون ... قرار شني ؟؟ شن تبي مني
غسان خبط الدومان وعيط بصوت عالي ... نبيك انتي انتيييي بسس
غصون خافت من منظره شعره كيف متناثر وعيونه يلي مايلة للحمرة ، وعيونها دمعو من الخوف
غسان تنفس بعمق ... عطيني شي واحد بس يخلي بوك يرفض
غصون تشوفله وهيا مش فاهمة هوا ع شنو يحكي؛
غسان ... يرفضني ويطردني من الشركة طزز في الشركة وطز في كل شي تمام ، لكن انتيي نبيك ورح ناخدك غصباً عنهم كلهم
غصون بصوت باكي ... أنت ع شنو تحكي؟