دخل عمر ووقف قدام أميرة كانوا يشوفوا لي بعض وهما ساكتين وكل واحد يستنى في الثاني يبدا
بس عمر من كتر حبه وشوقه ليها بدي هو وحط إيده علي خدها وهو يتأمل فيها كويس استاحشها لدرجة انه كان يلقى يهرب بيها لي مكان مافيشي إلا هما الاثنين بس
أميرة الحركة هذه حركت فيها كل مشاعر الحب والشوق ونزلوا دموعها
مسح عمر دموعها وكان عنده رغبة كبيرة انه يبوسها بس ماحبش يضايقها
وأخيرا بعد طول صمت تكلمت أميرة
أميرة:-مبروك
عمر:-قرن حواجبه بحركة تعني مبروك علي شنو؟
أميرة:-انت شنو اللي درته فيا ؟؟ معقوله نهون عليك تخليني وتمشي وحني قاعدين في بداية المشوار؟؟تعرف انت شنو درت فيا؟؟تعرف؟تعرف ولا نحكيلك؟
عمر:-هز براسه يمين ويسار بمعنى مانعرفش وهو يتأمل فيها
أميرة:-انت دمرتلي نفسيتي كرهت الناس كلها معاش عندي نية نشوف حد ولا نكلم حد اني يوم اللي حكيتلي علي وضعك أمي جتها جلطة سمعت اختي تعيط سيبت الهاتف ومشيتلها نجري قعدت معاها في المستشفى3أيام بعدها لماروحت للحوش وفضيت شوية فتحت نت لقيت ايميلي في الحضر ماقدرتش حتى نكلمك ولا نوصل فيك باش نفهم شنو يلي صار وبعد عناء فهمت كل شي وياريتني قعدت غافلة وماعرفتش الحقيقة المرة
كانت أميرة تحكي ودموعها ينزلوا وعمر يشوفلها ويبي يحكيلها قداش عانى في بعدها وقداش ماكانت حياته عذاب من غيرها بس للأسف ماقدرش ينطق بي ولا حرف لكن دار شي ترجم كل لغات الحب شي عبر علي كل يلي بداخله
حضنها أي حضنها حضن الأب لي بنته حضن راسها وقعد يطبطب عليها بحنية وقطع عهد علي نفسه انه مش رح يزعلها طول حياته ولا رح يبكيها ولا رح يخليها تريح منه مرة تانية بس أميرة مزال مافهمتش الحضن هذا لأنها ماتعرفش انه عمر سيب بنت عمه بسببها هي وانه توا أسعد انسان في الدنيا كان يبي يشرحلها ويفهمها كل شي لكن عارف انها مش رح تفهم لغته فأكتفي بحضنها
بعدت أميرة من علي عمر وهي تمسح في دموعها أشرلها عمر بمعنى توا روحي وافتحي نت
أميرة :-تمام
طلعت أميرة وركبت مع بنت عمها وروحت وسامي دخل للمحل بعد ماشاف أميرة طلعت
سامي:- شنو صار معاكم
عمر :-أشرله بمهنى ماصار شي
سامي:-لكن هي تحبك على فكرة
عمر:- اشرله بمعنى وكيف عرفت
سامي:-عرفت وتم
بمجرد ماوصلت أميرة للحوش بدلت وغسلت وجهها وفتح النت وبدا يوصلوا فيها رسائل من عمر
عمر:-حبيبي وينك❤️
عمر:-هيا ياقلبي ❤️
عمر:-شوفتك ردت فيا الروح❤️
ردت أميرة
أميرة:-اهلين
عمر:-نحبك يانبضي انتي
أميرة:-توا معاش ينفع شي فات الوقت
عمر:-علاش
أميرة:-الكلام هذا احتفظ بيه لي مرتك
عمر:-اه يعني انتي قعدة ماتعرفيش
أميرة:-شنو بنعرف؟
عمر:-لما لقيتك توقعتك سامعة
أميرة:-لا ماسمعتش شنو في؟
عمر:-العرس التغي
أميرة:-كيف وعلاش وامتا
عمر :- مافيش داعي المهم توا انتي و بس
أميرة فرحت لما عرفت انه عمر سيب خطيبته
أميرة:-تبصر صح
عمر:-هذا شي مافيشي بصار
أميرة:-وكيف صار ان شاء الله مش اني السبب
عمر:-قتلك ماتسأليش خلينا في المهم
أميرة:-وشن هو المهم
عمر:-انتي ياعمري
عمر:-وينك
عمر:-أميرتي
عمر:-رقدتي
أميرة:-لا
عمر:-باهي خيرك ساكته
أميرة:-نتأمل في كلامك الحلو
عمر:-والله مافي حاجة حلوة غيرك
أميرة:-شكرا
عمر:-😡
أميرة،:-😁
عمر:-بتجي حتى غدوة؟
أميرة:-وين
عمر:-للمحل
أميرة:-ههههه تو نخدم غادي وخلاص
عمر:-تخدمي عينك😡
أميرة:-خيرك تغار؟
عمر:-😤
أميرة:-محلاك وانت تغار
عمر:-نسألك سؤال تجاوبيني بصراحة؟
أميرة:- أسأل
عمر:-تحبيني؟
أميرة:-الصراحة وبدون زعل (لا)
عمر:-عادي الصراحة راحة
أميرة:-خيرك زعلت؟
عمر:-علاش بنزعل
أميرة:-هكي حسيتك زعلت
عمر:-لا بالعكس مانحبش المجاملات اني
أميرة:-انت طلبت مني نحكي بصراحة وحكيت الصراحة اي مانحبكش
أميرة:-لكن نموت فيك بس مرحلة الحب تعديتها معاك❤️
عمر:-اقسم بالله لو نعلق عليك بس مش عارف شنو بندير فيك بنقتلك بين ايديا احتمال😠
أميرة:-ههههه بناخد بثاري شنو يلي درته فيا انت شوية
عمر:-اه كانه هكي مسموحلك من حقك تاخدي بثارك لكن وعد مني معاد نبكيك طول عمري وحياتي
أميرة:-ومعاش تبعد عليا
عمر:-ومعاش نبعد عليك
أميرة:-ومعاش تخدم في المحل
عمر:-😳وعلاش
أميرة:-في بنت يومها شفتها تناشب فيك لابسة أزرق قريب نقزت علاها
عمر:-والله ما ركزت علاها
عمر:-ومعاش نخدم في المحل
عمر:-لكن لحظة! وكيف بنشوفك اني؟
أميرة:-دبر
عمر:- تو نفتح محل بروحي
أميرة:-🤭حتى مكالمات الفيديو تأدي الغرض
عمر :-افتحي الكاميرا باه
أميرة:-توا
عمر:-ايه
أميرة:-باهي شوية بس
عمر:-فوتيه جو متاع تمشي تساوي روحك وتجي نبيك توا وكيف ماانتي
أميرة:-باه
حطت أميرة وشاحها عليها (علي أساس متحشمة وهي الصبح في حضنه 🤭)
وفتحت الكامير
عمر:- أشرلها بمعنى علاش هذا اللي علي راسك
أميرة:-عيب اسكت
عمر:- ضحك ضحكة خلى اميرة ادوب في دباديبه
أميرة:-باهي خلاص صكر
عمر:-أشرلها بمعنى لا وهو مستمتع بشوفة ملامحها وهي خجلانة
وكان يبي يقوللها نحبك بأعلى صوت لكن حاليا الظرف مايسمحش
صكروا الكاميرا وكملوا دردشتهم
