عمر معاه وحدة ماسك في ايدها ويدور هو وياها في المحل
أميرة&أماني:-السلام عليكم
سامي :-وعليكم السلام
عمر فرح لما شاف اميرة لكن دار روحه ماشاف شي
نورية:-شنو ياسامي كيف حال امك وبوك والعيلة كلها كويسين
سامي:-والله بخير ياعمتي نورية
نورية:-سلملي عليهم هلبة
سامي:-يوصل ان شاء الله
خلصت عمتك نورية بضاعتها وطلعت هي وعمر باش ايروح بيها
أميرة رجعلها عقلها شوي لما شافت انه اللي مع عمر مراة كبيرة وعرفت انها أمه دارت دورة وخدت شوية حاجات عطت لي خوها خلصهم وطلعوا روحوا للحوش
أماني:-ياوخيتي عليه يهبل شني هذا تقول نازل من السمي نيالك ياكبدي
أميرة:-ضمي فمك احترميني اني اقل شي
اماني:-شن شعورك لكن شفتي المراة اللي معاه
أميرة:-المرة الأولى انصدمت وبعدين لما تلفتت عرفتها امه
أماني:-اسمعي اني والله معاد قاصة معاك خطوة منا وجاي شنو اللي محصلاتك منك غير التعب عالفاضي
أميرة:-مصح وجهك ماهو سيورك تحتاجيني
أماني:-لانحتاجك ولاشي اني لما نحب نحب في القدو مش زيك انتي يشوفلك وتشوفيله وخلاص لاكلام ولا سلام
أميرة:-هذه اسمها لغة القلوب ياغبية حني صح مانتكلموش لكن قلوبنا هي اللي تتكلم
أماني:- الفلسفة الزايدة هذه ماتمشيش معانا حني جو لغة القلوب ولغة العيون ولغة الخشوم اني كان مانضربش معاه ميعاد للفجر مايمشيش الحال وغيره كله دوة فاضية قالك لغة القلوب😏
أميرة:-وااااك مكتر دوتك انتي شن عرفك عليه هذا كله قعدة صغيرة
أماني:-مصح وجهك مدامني صغيرة علاش رافعتني معاك مالا
أميرة :-باش تلهي خوك عارفاتك ممثلة موهوبة
أماني:-😎
غير اسمعي قوليله يلخبطلي صاحبه اللي معاه حتى هو طريف
أميرة:-نوضي تحشمي علي وجهك بدلي حوايجك ديريلنا قهوة خلي الواحد يعدل مزاجه
شوية ووصلتها رسالة من عمر
عمر:-هلا
أميرة:-اهلين
عمر:-طالعة حلوة اليوم
أميرة☺️ :-عيونك الحلوات
عمر:-عيوني حلوات من لما شافوك
أميرة:-شكرا
عمر:-هههه عفوا
جو الرسميات فكينا منه
أميرة:-لا مش رسميات عادي يعني كلمة شكرا تنقال لأي حد
عمر:-قصدك اني اي حد
أميرة:-لا مش هكي لكن عادي يعني
عمر:-ارخي روحك خيرك متشنجة لو ضايقتك عادي قولي واني معاش نكلمك
أميرة:-لا بالعكس
عمر:-حسيتك مش تمام
حتى اليوم لما شفتك حسيت جوك مش حلو
أميرة:-اي ذكرتني حقا من هي اللي معاك مبكري
عمر:-أمي
أميرة:-الله يبارك ربي يحفظها
عمر:-ويحفظك
أميرة:-واضح ان جوها حلو وشهلولية
عمر:-كيف شهلولية شن معناها
أميرة:-معناها ديما تضحك و جوها مليح لكن انت ماجبدتش فاها
عمر:-علاش
أميرة :-حسيتك ديما كئيب ومهموم وهادي بزيادة
عمر قعد يذكر في ماضيه وفي حياته اللي مليانه مشاكل
عمر:-صح لكن لكن لما نشوفك ننسى همومي كلها
أميرة سعيدة بكلام عمر وقريب اطير
أميرة:- شكرا
عمر:-رجعنا لنفس الموال؟شن قتلك عليها كلمة شكرا
أميرة:-ماشية فيا 😅 شن بندير
عمر:-باهي ماقلتيليش خيره جوك ملخبط
أميرة:-تبي الصراحة؟
عمر:-اكيد
أميرة:-حني توا لينا فترة مع بعض صح وله
عمر:-صح
أميرة:-مافيش ولا مرة تكلمت معاك فيس تو فيس ولا مكالمة فيديو ولا حتى مكالمة صوتية حسيتك تتهرب مني ماعرفتش علاش لو ماتبيش تكلمني مافيش حد غاصبك بالعكس الحاجة هذه بالذات ماتجيش بالغصب
عمر:-انتي تبي تعرفي علاش؟
أميرة :-لو ماكنتش نبي نعرف راهو ماسألتكش
عمر:-لأني......
عند سلسبيل
تلقى في عمر نشط بس مايردش علي رسائلها وكأنه مشغول مع حد ثاني بعتتله رسائل نصية علي رقم هاتفه برضو مايردش وهي كانت فاهمة وعارفة انه هو مايبيهاش وعمره مافكر فيها لكن متأملة انه يتغير مع الوقت بس الباين ان عمر قلبه معلق مع أميرة لدرجة انه لما يكون معاها ينسى إنه خاطب
يأست سلسبيل وحست بي ملل من علاقتها الباردة بي عمر تغطت ورقدت ودموعها علي خدها
عند لطفيه أم سلسبيل
لطفية:-شنو خوك الهادي الباين مادارش حل
مختار:-الهادي خوي ماعنداش طارقة ولا عنده كلمة الصبح يقولك كلام وفي الليل يقولك كلام
لطفية:-اني والله الجيزة هذه ماني راضية عليها توا انت واني وسلسبيل والعيلة كلها عارفين انه عمر مايبيش سلسبيل وبوه بالسيف عليه خطبهاله ولا جي ولا كلمها حتى عالنت وحتى بيجيبلها حاجة يعطاها لأمه تجيبها ومع هذا كله قاعد مكبش فيه توا لما يتزوجها ويطلقها عندك باهي هكي
مختار:-خير ماتقعدلي في الرقبة خلي تمشي تخدم علي راسها
لطفية:- ربي يهديك وخلاص انت وخوك بتظلموهم والله بتضلموهم اني لو يطلقها واللهي ماني مسامحاتك لا انت ولا خوك هالسكار هذا
مختار:-مش واقفة علي سماحك وخليك برا منه الموضوع خير لك
لطفية ناضت وهي تنفخ وتدعي وتتحسب
