بقلم 💐ماريا محمد💐
مرت فترة طويلة وأميرة تستنى في عمر يخطي خطوة ثانية يناشبها برسالة مثلا أو حتى يعلقلها علي منشور لكن عمر اكتفي بطلب الصداقة وكأنه يقوللها اني بديت بالخطوة الأولى وانتي كملي بس أميرة نفذ الصبر يلي عندها وقررت انها تبدا هي بالخطوة الثانية ولأن كيدهن عظيم لقت حيلة تقدر تكلم بيها عمر من غير مايفكر انها ترمي في روحها عليه لكن زعمة عمر بتفوت عليه🤔
ياودي ماندري وخصوصا انه عمر يعرف انها معجبه بيها
المهم أميرة فتحت الفيس ومن حسن حظها لقاته نشط فقررت تراسله واللي بيصير ايصير
أميرة:-هلا
بعد دقائق رد عليها عمر
عمر:-اهلين بيك
أميرة:-بنسألك
عمر:-تفضلي
بعتتله أميرة صورة لي منتج وسألاته
أميرة :-عندكم منه هذا☝️
عمر:-حتى لو ماعندناش نوفروهولك ادللي
أميرة طبعا طايرة من الفرحة لكن قررت انها تثقل شوي بعد ماحست انه عمر كان مستني منها كلمة
أميرة:-شكرا هذا من لطفك
عمر:-لكن من حسن حظي انه موجود
أميرة :-كيف
عمر:-عفوا قصدي من حسن حظك
أميرة:-(تجس في النبض)خلاص تو نبعثلكم خوي العشية
عمر:-تم
طبعا الزوز جتهم خيبة أمل عمر كان متوقع انها بتقوله تو نجيك اني وهي كانت متوقعه انه بيقولها علاش ماتجيش انتي و..و..و وكل واحد يستنى في الثاني
( صارلهم زي ندى ومهند زعمة حتى هما بتكون نهايتهم سعيدة زيهم🤔)
عند عمر
قعد كل مرة يكتب حاجة وبعدين يمسحها مرة واثنين وثلاثة بعدين اكتفي بكلمة تم قعد في المحل للعصر وبعدين روح للحوش
الهادي:-وين وين وين
عمر رجع للخلف ووقف
الهادي:-هات اعطيني100 جني خلي نجيب قضية للحوش
مد عمر ايده لي جيبه وطلع فلوسه كلهم ومدهم لي بوه
الهادي:-هادوم 80 شنو بيديرو يادوبك يجيبوا خضرة
نورية:-علاش الخضرة عندي قضيتي كلها من أول ماخلص مسكين جابلي كل شي بعدين هو يادوبك يصرف علي روحه تريش فيه وانت عندك مرتبك وين يمشي شنو مداير حوش تاني وحني مانعلموش
الهادي:-كان ماتسكتيش توا بنديره الحوش التاني ألهي في روحك وماتدخليش بيني وبين ولدي
نورية:-توا طلع ولدك؟الحمد لله غير اللي قاعد مذكر
عمر واقف ويسمع من دون اي ردة فعل كأنه متعود عالموشح هذا وحافظه كويس وعارف انه بوه يبي الفلوس لغرض تاني وانه الحوش ماناقصه شي بس كان يبي يتفادى المشاكل وبس مشي لي داره تغطى ورقد
عند أميرة
أميرة:-شن الجو ياأحلى اخ في الدنيا
أحمد:-اختصري شن تبي
أميرة:-هههه احسن مافيك انك تفهم عالطاير
اميرة عندها زوز خوت أحمد وأيمن والزوز اصغر منها هي واختها الكبار
أميرة:-نبي نمشي لمحل...... شفتهم منزلين في صفحتهم كريمة ليا هلبة ندور فاها بناخد منها
أحمد:-لالا فكيني يسمع بيك بابا تشري في المكياج لما يوريك
أميرة:-عينك هذه مش مكياج كريمة متاع ايدين ورجلين
أحمد:-اه باهي تو نرفعك كان عطاني بابا السيارة (طبعا احمد فيسع ماينضحك عليه بعكس خوه)
أميرة:-انت ماتقوللاش بنرفع أميرة قله ماما ترا شن تبي من المحل
احمد:-وكان يسأل ماما وتقوله كذب
أميرة:-انت الموضوع اهوا خليه عليا برا لي بابا
أميرة قدرت تقنع أمها وبوها طبعا يحب ولاده الزوز ومايرفضلهمش في طلب لأنهم جو بعد زوز بنات
لبست أميرة وفتلكت روحها ومشت وصلت للمحل ودخلت قعدت ادور بعيونها بس مالقاتاش
سامي:-(يعرف اللي بين عمر وأميرة)اهلا وسهلا
أميرة:-اهلين (ودارت دورة وماشرت شي )
سامي:-تفضلي شنو طلبك
أميرة:- كنت نبي واقي شمس بس الباين ماعندكمش
سامي:-لا والله لكن تلقيه في الصيدليات
أميرة:-تمام شكرا
وطلعت روحت للحوش وهي طايرتلها
أماني:-شنو شفتي حبيب القلب؟
أميرة:-نقصي صوتك مالقيتاش
أماني:-قتلك فوتيه حسيته غامض ولا معقد مافهمتاش كيف ماعمري سمعته حتى يتكلم علي قد مانتردد عالمحل فوتيه احسن ولا تريثي وماتتسرعيش شوفي اميته وين تصب
أميرة:- ماخدمتش في السباكة قبل
أماني:-هاهاهاها بايخة
أميرة:-مش عارفة كيف بندير حصلت تعبه عالفاضي اليوم تسبلت بالكريمة وغدوة باش بنتسبل اححح
