ليّت اللِذي خَلق العُيون السُود ... خَلق القُلوب الخَافقات حَديد

البارت الثامن والعشرين

الجود غمضت عيونها وقالت : ام تميّم حبيت ! عسى الله يتمم ع خير وانت معي يارب
عقاب ابتسم وقال : الله م يجيب الا الخير
نزل ظهره بزيادة بحيث يكون مستلقي ع الارض ، هي بأحضانه والضو جمّرت والبراد بعيد فاضي ، اسر والميلا مو موجودين ولا لهم حسّ حتى ، غمض عيونه بصعوبة ونام علطول وهو كل م تنفس استنشق عطرها ..
" فالرياض تحديدًا بيت ماهر "
رجع من دوامه وهو يشوف شايب معطيه ظهره حارمه النظر لوجهه ، تقدم وقال : وشلون اساعدك يعم ؟
لف وانصعق ماهر من شاف عمه قدامه ، ايه نعم عمه اللي تسبب في وفاة ابوه وخروجهم من بيت ابوه ، ذّلهم ع حلال ابوهم وخذا الورث كامل ، هو نفسه اللي كان يضرب امهم لأنها توقف بينه وبينهم ، وهو نفسه اللي صاب مزون بالبّكم والصُم هو سبب حادثها وهي بعمر السنتين ، انعّاد شريط الذكريات السيء جدًا والتعذيبي بحياة ماهر وهو يشوف ابتسامته المرعبة هو انسجن بس ماهر كان صغير وقتها ولا يذكر المدة يحسّ انه م طول ابدًا واللي يذكره ان عمه قضى سبع سنين فالسجن فقط لا غير ..
ابو خالد : ماهر ؟
ماهر بدأ يتعرّق ووجهه سّود ونطق : انت وش جابك بهاه !!
ابو خالد بحدة : جاي اشوف سواد فعايل ولد اخوي !
ماهر مشى يتعداه ويدخل البيت اللي دانه تكون موجودة فيه وبدون زواج يخليها تسكن براحة ، ابو خالد نطق وقال : م انت بمضيف عمك ؟
ماهر اخد نفس عميق وهو يشّد ع قبضته اللي ماسكه الباب ونطق : تفضل
ابو خالد مشى وهو يبتسم ونطق : قوه ! قوه
دخلوا وهي تراقبهم من الدور الثاني ، لفت ومشت تركض وشافته يركض مع الدرج بعد م دخل عمه للمشّب الخارجي ، دانه مسكت كتوفه وقالت : وي وي !! شفييك ؟
ماهر اخذ نفسه وحضنها علطول ونطق : م عنده خلاف
دانه خلخلت اصابعها بشعره وتأكدت دانه انه مو بخير من رجع للهجته وقالت : ماهري انت بخير ؟
هز راسه بالإيجاب ومشى تاركها ينزل ، لف بنص الدرج وقال : لا اسمع صوتتس ولا تطلعين
دانه بتوتر : مين اللي جاء وشفيك كأنك خايف ومتوتر ؟
ماهر بأستعجال : اهقاه مثلوه مثل اول نكس لأجل يسوي لنا مصايب !
نزل تاركها في حيرة خلفه ورجعت مثل م قال تطلع للغرفة وتراقب من ورا الستارة ..
" فالمشّب الخارجي "
ابو خالد : بوه حدن غيرك ؟
ماهر رفع حاجبة وقال : لا بس انا
ابو خالد نزل عيونه ليّد ماهر وقال : متزوج ؟
ماهر فز وهو م ظن ان عمه يلاحظ الدبلة ونطق يخفي التوتر بالكامل : وشنوح ؟
ابو خالد سحب عصاته وضرب اصبع ماهر بشبه قوة وقال : ماش ماش !!
ماهر سحب يده وقال : هدية من حدن اعرفوه
ابو خالد : انت ابخص !
ماهر بحدة عيونه : ايه من ياعيلوه م شفناك ؟ متى طلعت ؟
ابو خالد ضحك وقال : لي فتره طويلة بحايل عند اهلنا
دق قلبه هو من فترة م راح حايل ، اخر اتصال بينه وبين امه كانت تقوله لا تخاف علينا وخلك مركز بشغلك ، نطق بتوتر وقال : اييه ؟
ابو خالد : وجاين بهاه لأجل اخذك معي لحايل
ماهر ضحك وقال : تخثردز واجد انت ؟
ابو خالد بحدة : ياملا اللسنة !! تسذا ترد ع عمك !!
ماهر : الخوف والصمت والبكي ؟ هذاك اول معادهو الحين والحين محلي يتعذرك ي تطلع بالطيب ي بالشرطة !
ابو خالد بحدة : هاليودعه دانه اللي بتتوجع هالمره !
ماهر بحدة : اقطع واخس !!
ابو خالد قام وقال بحدة : الفقه !!! تدري وش اللي يحزنني فيك ؟ انك تتحداني وانت تعرفن زين انكس لأهلك محتاجينك
ماهر : وش مسوووي انت !!
ابو خالد : ادري بك م تزوجت وتدري بي اني م بخلي زواجك يتم ! اطلع ورجع بنت الناس لأهلها ومدّ لها اوراق الطلاق سامع ولا والله محد ياكلها فيكم الا مزون !!
عضّ شفايفه وهو يشوف عمه طالع من بيته ، مسك راسه رجع ورجعت المصايب تدخل حياة ماهر من اوسع ابوابها ، دخل يركض وقال : جهزي نفستس بسرعة برجعتس لبيت اهلتس م يقدر يوجعتس هناك
مشت وهي تجهز وخلصت ومشت له وقالت : وشفيه لونك انخطف !؟
ماهر مسك راسها وباسه بكل قوته وقال : ان م زانت الامور سامحيني يالغلا !
مشوا مشابكين ايديهم ، ركبوا السيارة وانطلق ماهر لبيت ابو دانه ، وصلوا بعد فترة ونزلت ومشى لأبوها الواقف ع الباب ومعصب ، ماهر : العذر والسموحة ي..
قاطعته ايد ابو دانه اللي ضربت بوجهه متوسدة خده ، تاركه علامة حمراء ، شهقت ودفعها ابوها داخل وصرخ بماهر : احنا حتى الشوفة الشرعية م هي من عاداتنا وسلومنا وشلون تاخذ بنتي معك يوم كامل !! انت عارف امي فريت الرياض كلها وخبرت مراكز الشرطة كلها بنتي وييينها ووش سوييت فييهاا !!!
ماهر ابتسم وهو يحسّ بطعم الدم دليل قطع حصل بشفايفه ونطق : بنتك اللي تقولها بيني وبينها عقد نكاح !! وعلى ذمتي بعد قلبها في مخك وبتفهم !
ابو دانه بحدة : مالك بنتن عندنا سامع !!
ماهر بحدة وعيونه تطلع شرار : ماهو ع كيفك الطلاق م يحصل الا بمراضاة الطرفين وان كانك اجبرتها م بتجبرني انا !!
ابو دانه بصراخ : تووككلل تخسسى تاخذها !!
سكر الباب في وجه ماهر ، صدّ ومسح وجهه وشنبه واستغفر وقال : لا اله الا الله ! من خروج الحثالة ذاك والمصايب تنهمر علي مثل نزول المطر ع ديرةٍ ذبحها الضمى !
مشى وركب سيارته واتجهة لحايل علطول تارك دانه وراه ومقفل جوالاته ، م وده يوجعها من الوجع اللي يحسّ فيه ..
" في بيت ابو دانه "
لف عليها وقال بحدة : ادخلي داخل زواج منه م فيه !!
دانه ببكي : باابا !! تعرف ماهر رجال كفو والله م سووا شيء ليه تفكر فيه كذا وبعدين زوجته !!
ابو دانه بصراخ : اقطععيي الصوت يبنت !! وادخلي داااخل انا واليتس وم بعد مت !
طلعت ام دانه تركض وحضنتها وقالت : يمه ملهم وشفيك !؟
ابو دانه بنفس طبقة الصوت المرتفعة : ادخلوا داااخل فكونني !!
ام دانه سحبت بنتها اللي تبكي منهارة ودخلت فيها داخل البيت تتجنب ظهورها قدام ابوها اقّلها هالفترة ..
" في بيت ابو فلاح "
دخلوا ونطق علطول : علامتس ي خدوج ؟
ام تالين ببكى وجزّع وصراخ : قذفووني وسبووني وذلووني حريم اخووانك وبنت اخوك البزر ذيييك !! يقولوون عني كلام ماهو بززيين ! ترضى ؟
صقر توسعت عيونه بصدمة من الكذب والتلفيق اللي قاعده تسويه ، هو من الحزن اللي بداخله معاد يهمه وش بيصير فيهم كلهم م يهمه احد ابدًا ، البندري وطارت من يدينه وش يبي بعد ، مشى متجاهلهم ولحقه هيثم علطول
ابو فلاح بحدة : تقولينه صادزة !!
ام تالين حضنته وهي تبكي وقالت بهمس : اجل عمري كذبت م تشوف انهياري اوجعوني ي سويلم
شّد ع ظهرها وقال : دموعتس حرام ان تطلع من ظهورهم !
ام تالين بأبتسامة خبث عريضة : واولهم ام تركي وتركي !!
تالين وهو محتضنه نفسها بذراعينها نطقت : لحظة ! وشدخل عمتي ؟ وتروك !
ام تالين بصراخ : زي م قذفت فيني عمتتس تبططي عظم تاخذتس لولدها !!
تالين شهقت ونزلت دموعها بحرقة وقالت : يمه !! تسمعين الكلام اللي يطلع من منطوقتس انتي بالصريح قاعدة تخربين زواج بنتتس !!
ام تالين بصراخ : اللي يشوفتس يقول اني كنت موافقة عليه من البدايية !!!
دالين بصدمة : ادحرّوا ابليس الشيطان شاطر وفكري فيها يمه انتي كبيرة وعاقل المشاكل اللي تصير بينكم لا تدخلون احد فيها وخصوصًا ناس مُقبلين ع الزواج !
ام تالين بنفس طبقة الصوت الحادة : اقووول شوفوا من قاعد ينصح !! نفسها اللي انخطفت وبغت تفقد شرفها !!! انطمي وعلى غرفتتس لا تشوفتس عيوني !!
دالين شهقت بقوة شلون امها تقولها كذا ، لفت من مسكت تالين يدها ومشوا داخل ، لفت ام تالين لأبو فلاح وقالت : انت اللي بينهم لا تخليني !
ابو فلاح حضن راسها وقال : معليتس هونيها وتهون اشري بيدتس ع اللي م تبينه وم بتحصلين مني الا لبيه وتم !!
دخل فلاح وضحك وقال : وش رومانسية العجز ذي ؟
ابو فلاح بحدة : ولد !! صدّ مني هناك
فلاح ضحك بسخرية وقال : تراها تحّل لي يالشيبه واخر عمري اجلس اتأمل بالساحرة ذي !!
مشى وهو يسمع صراخ ابوه عليه ، فلاح حاليًا م يهمه شيء ابدًا ولو تنطبق السماء ع الارض م قدروا يزعلونه اماله ووافقت واخذ مراده ، قرب من غرفته وهو يسمع بكاء مرعب فيها ، عجل خطواته ودخل شاف تالين حاضنه مخدته تبكي ودالين تعضّ اصابعها بتوتر ع حالها وحال اختها وتركي ، مشى وقال : افا ي ذا العلم من مضيّق ع بناتي !!
دالين ركضت وحضنته بكل قوتها وقال : فلاح امي بتخرب بين تالين وتركي !!
فلاح ضحك وقال : تركي رجال خطّ الشعر شنب في وجهه ماهو اللي يمشي ع رأي الحريم ! معليكم م بيصير شيء اصلاً دخلت وشفت منظر يلوع التسبد !
دالين رفعت راسها له وقال : متحاضنين ؟
فلاح نزل عيونه لها وضحك بصوت عالي وضحكت معه ، ابعدت من مشى لتالين وقال : توته ! عاد مفروض اني اهاوشتس ع..
قلد صوتها وحاول ينعّم صوته ونطق : اعلى م في خيلك اركبه !!
ضحكت دالين وضحكت تالين معهم وقامت تمسح دموعها وقال : لو انتس من البنات الجّيدات كان قلتي لها اعلى م في خيلتس اركبييييه !!
تالين بضحك : ايه والقم واصير عاقّه ؟
فلاح : معليش بس محد يستاهل تنزلين
ورفع عيونه لهم ثنتينهم وكمل : تنزلون دموعكم عشانه !
دالين جلست ع السرير وقالت : دام امي ناويتها حرب علينا انا عندي لكم سالفة خطيرة !
فلاح سحب ثوبه ونزله وبقى بالفنيلة والسروال ونطق : اسلمي
دالين بتوتر : امي سبب ادمان فلاح ع الممنوعات !
فلاح اختفى لونه وانخطف وسّود وجهه وقال : ايش ؟
تالين بصدمة شهقت وبكت علطول ، هي اللي شهّدت انهيار فلاح وهي اللي اجبرته كل ليلة يتماسك ، فلاح ع انه كان يجيها سكران ضايع الا انه يعرف انها اخته ، م كان منه اذى لها بس اذاه الوحيد انها تشوفه منهار ويبكي ولا هو قادر يتخطى ابدًا وترجع توعيه ويرجع لنفس الخطأ ، بكت بشكل اسوء وقالت : وش السالفة !!
دالين بكت معها وقالت : امي كانت تعطيني دايم مشروبات مختلفة مثل شاهي اذا سوّت لنا او عصير اذا سوّت لنا ومن ذا المثل وتحط فيه نوع مخدر خطير جدًا
فلاح بصدمة : دقيقة دقيقة كل العصيرات والشاهي والقهوة اللي كنتي تجيبينها لي كان فيها مخدر !!
دالين بكت زيادة وقالت : فلييح والله م كنت ادري ووالله كانت نيتي اتقرب منك ي اخوي مثل م كانت تالين بس كل م شفت محاجرك سوداء ومعصب اخاف وارجع عشرين الف خطوة ورا !!
فلاح حضنها وقال : مالتس ذنب يبنتي وحتى لو انتس اللي تحطين لي السم تقبلته منتس !
حاوطته وقالت : لو في منك اثنين والله الدنيا كلها بتكون بخير !
تالين مسحت خشمها المحمّر ونطقت : كملي !
دالين رفعت عينها لها وقالت : طيب فلاح تذكر وقت قطعت معاد جيتك بعصير ؟
فلاح ضحك وقال : ايه وجيت سألت عنتس ولعاد شفت وجهتس
ضحكت وكمل وهو يقول : عساس كنتي تمدينه لي يالنصابة تحطينه عند الباب وتدقينه وتركضين راجعة كأنتس خايفة من وحش بيفتح الباب وياكلتس !
دالين ابتسمت وقالت : اصلاً مصدومة واحس اني مو مستوعبة اني بغرفتك الحين ولا بين احضانك !
فلاح باس راسها وقال : اسلمي ؟
دالين : وقتها دخلت المطبخ بوقت مبكر يعني قبل تناديني امي انا متأكدة انها م كانت تجيب طاري تالين لأنها كانت تحبك واكيد بتفطن لأمي عشان كذا استغلتني بخبثها وسوء عمايلها ! المهم شفتها تحطه وشهقت علطول عرفت وش هي كانت تسوي وترابطت الافكار براسي المهم انها هددتني اذا تكلمت انها بتطردني ولا بيرّف لها جفن !! وانا خفت وجلست ايام واسابيع ابكي منهارة ع حالتك واسمع ونّين وبكاء تالين اخر الليل اذا رجعت من عندك بس بعدها حسيتك طبّت وصارت تالين ترجع مبسوطة وتضحك
فلاح ابتسم وقال : ايه انها اختتس شغالة مستشارة نفسية علي ويوم معاد جبتي العصير اللي تعدمين فيه شغلها بديت اتجاوب معها وحمدلله
تالين ابتسمت وقالت : والله م عمري فكرت اخليك وراي والله م افكر ابدًا فيها
فلاح ابتسم وقال : لا خلا ولا عدم ي بناتي
حضنهم وباس رؤوسهم ونطق : امكم لازم تتحاسب ولازم نحصل الدليل اللي تسويه شيء خارج القانون تمامًا !!
دالين : سهلة معي دليل بس اقدم وحنا وراك
فلاح ابتسم وقال : تم اجل خلوا الامور تهدأ وتتزوج توته وتفلح وبعدها يصير خير مع العجوز الحمقاء اللي داخل
ضحكوا بخفه ومشوا طالعين من غرفته ، سكروا الباب وراهم بعد م وصلهم فلاح للباب ورجع لغرفته ..
" فالعزبة "
الساعة ٣ الليل ، صحت بهدوء وهي تشوف خشمه ملاصق خشمها ، شهقت بقوة وفز اسر مبتعد عنها ، الميلا برعب : فجعتني !!؟
اسر بحدة : احلفي ؟ انتي اللي طيريتي الباقي من عقلي !!
الميلا ابتسمت وباست راسه وقالت : معليش سعادة النقيب اسر معليش العذر والسموحة
اسر ابتسم ورجع ينسدح وقال : ع وين ؟
الميلا : قريب بروح الخلاء
غمض عيونه وقال : لا تبعدين
الميلا وهي تمشي نطقت : تمام
مشت ومشت ومشت وحسّت انها بتقدر تاخذ راحتها هنا ، قضت حاجتها وشهقت من آلم داهمها ، قامت بصعوبة ورفعت لبسها ومشت وهي ماسكة ارحامها تحسّ فيه شيء ثقيل بيسقط م ودها تصدق الفكرة اللي داهمة مخها ومشت متجاهلة الآلم ، شافت ظل وهمست : جودي ؟
الجود لفت لها وهي تشرب ماء وغصّت وصرخت : يييممهه !!!!
الميلا صرخت برعب تحسب شيء وراها والجود شافته ، فز اسر وفز عقاب يركضون للصوت ، لا الجود كانت متغطية ولا الميلا بالمثل بس من شّدة الظلام م يشوفونهم زين ، اسر تقدم ومسك الجود وعقاب مسك الميلا ، لكنهم ابعدوا علطول واستنفروا من عرفوا من ملمس اليد انهم ماهم حريمهم وانهم لخبطوا ، عقاب بصوته الجهوري : يوولدد !!
اسر ضحك وسحب الميلا وقال : علامكم !؟
الميلا برعب : الزفت ذي لعاد تصارخ فجعتني !!
الجود بحدة ورعب : تستهبلين صح ؟ انتي اللي فجعتيني وتناديني بهمس بعد !!!
عقاب ضحك وقال : صوتتس لا يرتفع !
الجود حضنته ومشت وتعاكسوا الاخوان والخوات فالاتجاه ، عقاب : وش مصحيتس ؟
الجود بتوتر : اشرب ماء
عقاب تمعن النظر فيها وقال : فيتس شيء ؟ دامنا رضينا علميني
الجود مسكت يده وسحبته وراها يمشي ، جلسوا ومدت الجوال له ، سحبه وشاف اتصالات ورسايل من عساف للجود في اخر ثلاث ايام واخر رسالة كانت " تشوفين رسايلي وم تردين انا اوريك !! " اخذ نفس عميق ونطق : هذا مين ؟
الجود شابكت يدينها وبدأت تجرح نفسها كالعادة ونطقت برعب : واحد قابلني وعرف مين انا وعرف اني زوجتك وصار يهددني اذا م جيت معه المقابلة اللي بتكون بكره بينشر صوري مره ثانيه بس بعناوين مرعبة وخالية تمامًا من الانسانية !!
عقاب مسح وجهه وشنبه ولحيته وقال : طيب بتقابلينه
الجود هزت راسها بنفي وقالت : لا طبعًا ؟!
عقاب : انا م اسألتس انا اقولتس تقابلينه عشان اقدر امسكه واحقق معه
الجود فزت وحضنته بكل قوتها وقالت : يكبر الحب !! احبببك يعقاب احبك !
لف بوجهه لنحرها وطبع قبلته بهدوء ونطق : وخالق عقاب اعشقتس !
ضحكت وقالت : تم وش الخطة ؟
ابعدها وسحبها تجلس ع حضنه ونطق : سهلة منزمااان ابي مهمة وحصلتها وحَرمي هي اللي مهددة ؟ م اقول الا الله يحرمني وجودتس ان خليته حيّ !
الجود تكت بظهرها ع صدره ورفعت يدها تخلخلها بدقنه وقالت : بسم الله علي وعليك
ابتسم وقال : بكره اذا رجعنا للبيت بنقول كل شيء وننهي الخطة واجهزتس له فريسة وبعدها افترسه انا !
ابتسمت وقالت : واثقين فيك ي حضرة الفريق ! والثقة فيك بصر وعمى وسمع ونظر ي بطلي !!
عقاب ناظرها وعيونه تتلألأ ومبتسم ابتسامة عريضة : شف شف من صاير يمدح ويقول كلام حلو !! وكلام كبيير
الجود ضحكت وقالت : اللي يعاشرك غصب عليه يصير كذا
عقاب باس راسها وقال : يويل حالي والكلمة ويلاه !
الجود : بسم الله علييك من الويل !
عقاب رجع ينسدح وقال : ارسلي لي رقمه واحظريه من عندتس
الجود اشرت بأصبعها ع خشمها وقالت : ع ذا الخشم يعقيب !
عقاب ضحك بخفه وقال : علييه الشحم يجوييد
ارسلت له وحظرته ، فورًا ارسله لضيدان اللي يعتبر خبير بالاشياء ذي وقاله برسالة مختصرة : خلك جاهز ي ضيد
ضيدان رد وقال : تم يطويل العمر
سكر جواله وانسدح وغمض عيونه ، انسدحت وغمضت عيونها معه وناموا ع هالحال عقاب صاير متفهم وجدًا والجود قررت من بعد اليوم اي شيء تعرفه لو مو مهم وصغير تنطق به عنده ..
" بعد ثلاث ساعات عند الميلا واسر ورا الشبك "
قامت وقالت بهمس : فيني آلم مو طبيعي
اسر لف لها وقال : تتحملين لبعد الفطور واوديتس ؟
هزت راسها بنفي وعضّت شفايفها السُفلية من قّو الآلم ، قام وقال : امشي
الميلا : اسر م فيه سيارة !
اسر بجدية : فيه الوايت !
ضحكت بصدمة وقالت : مو منجدك !!
" بعد دقايق "
الميلا انفجرت تضحك وهي راكبه وتقول : يغبي رايحين المدينة بوايت !!
اسر ابتسم وقال وهو يفك عقدة حواجبه : اوديتس ع المرسيدس انتظري بس
لفت منه لقدامها وشافت انوار الديرة الخافته ، وصوت الوايت اكبر فضيحة لكن اسر م كان مهتم ابدًا ، قال لعقاب السالفة وعطاه الضوء الاخضر ومشوا للديرة ، وصلوا وطفاه وطمّر يركض لجهة بابها وفتحه ومد يده تتمسك فيها وتنزل ، مسك خصرها وثبتها ع الارض واقفه وقال : كيف الحين ؟
الميلا : يروح ويجي
اسر : امشي اجل م برتاح وانتي فيتس لو ذرة آلم !
ركبوا سيارته الفارهة اللي كساها اللون الاسود ، ابتسمت بوسع ثغرها وهي تشوف مسّكة زواجها فالسيارة ، ضحكت وقالت : م عفنت ذي ؟
اسر وهو يفتح الباب الخلفي ويطلع ثوبه نطق : ايه جبت ورد كذبي ع لونها
الميلا ضحكت وقالت : كذبي !! قصدك اصطناعي
اسر : كلها واحد
ابتسمت وهي تشوفه يعدل شكله ويركب جنبها ، لف وقال : علامتس تطالعيني !؟
الميلا انحنت براسها ع المرتبة وقالت : u look handsome my nomad man !!
*انت تبدو وسيم ي رجلي البدوي*
اسر لف لها وهو يربط حزامه وقال : ويش هو !؟
الميلا بأبتسامة عريضة : احبك
اسر ابتسم وباس راسها بقوة وقال :
أحبّتس ولا أملك غير قلبٍ عليتس يخاف
‏انتي حلالي وقصيدٍ نرجس عيونتس إلهامه !
-
الميلا ابتسمت وقالت : صح لسانك يحبيبي بس سؤال
اسر وهو يرجع عيونه للطريق المنور اللي بدأت اشعة الشمس تبيين فعيونه وتبيين ملامح الارض قدامه ، تكلم بدون م يطالعها : لبيه يابو عييون وساع وسود عيوني ياللي م غيرتس احدٍ البي له !
الميلا كان قلبها ينبض حُب قاعد يغرقها وعاجبها الغرق واستحالة تطلب النجاة ، غمضت عيونها وقالت : اغلب قصيدك وشعرك دايم بعيوني ليه ؟
اسر ابتسم وسحب جواله وصار يبحث وعلطول شغلها وبدأ يردد ويقول :
انا لولا الغلا و المحبه و العيون السود
‏ما جيتك من قصاي وقلتلك عاشق يامغترّه
وانا احبك ومن قلبي احب وماني بمحدود
‏ولو اني ما احبك كان ليه أزعل و أتشرّه ؟
-
الميلا طار قلبها وقالت : وتغني اغاني وصوتك حلو ! اه ي اسري اه !!
ضحك بصوت عالي وباس يدها وحطها ع صدره وكملوا طريقهم بروقان وبدأ آلم الميلا يخف وارتاحت معه جدًا ..
" سابقًا في بيت ابو تركي "
تركي بهواش : مصّر تسافر يعني !؟
هلال بحدة : اييه !!
تركي مسكه وقال : انت وراك بلا اهررج بسسرعة !
هلال بصراخ مرعب : انا ماني خالك !! انا ولد خالك مبارك ! انا اصير اخو هزاع اللي سجنتوه !! انا طردوني اهلي من وانا صغيير ! واحتضنتني عمتي اللي هي امك وقالت لي كل شيء بكيت حسرة اني اشوف بنات م يحّلون لي وعشان اخفي حزني وقهري قلت لها قولي لي اني خالهم !
تركي وقف بصدمة ولا قدر ينطق بكلمة وحدة ، مشى هلال وقال بهمس : تبي تقول للميلو والجودي قولهم معاد هي فارقة معي انا مسافر خارج السعودية وراجع للمكان اللي كنت فيه بعيد عنكم !!
مشى وفعلاً طلع راجع لطرابلس ~ لبنان ~ ، مسح وجهه وشنبه واستغفر وقال : الكلام ذا وش !!!
دخل تركي والنيران تحرقه من كل جهة ، اجل لو يدري بسالفة ام تالين وفعايلها بيحرق الارض واللي فيها وياخذ تالين بالطيب ولا بالغصب ، مشى وصرخ : يمه !!
مشت ام تركي وقالت : لا اله الا الله ! وشفيك ؟
تركي بحدة : هلال ماهو بخالنا !!
تأمل وتمعن ملامحها اللي تغيرت للصدمة وضحك بسخرية وقال : لمتى كنتي ناوية تخلينه خالنا ؟!
ام تركي بصدمة : تركي اسمعني !
تركي بحدة : م ابي اسمع شيء انا عايش بغيرتي واشوفه يتحضن بخواتي ويختلي فيهمم !!! هو حتى لو انه بالتبني م يجوز يمه انتي شلون سكتي ع ذنب كذا ابوي يدري ؟!!
ابو تركي من وراهم : ايه ادري
تركي بصدمة ضحك وقال : عيب بحق شنبك يوالدي ! وتحثني ع الغيرة !! عيييب حرام بالله انه عيب !
مشى تاركهم فالصالة وطلع لغرفته ، كفاية صدمة لليلة قرر ينام بعد م سمع اذان الفجر وبعد م صلى يدعي ربي يسخر له تالينه ويهج من الديرة ومن اهله كلهم معاد يهمه احد ..
" فالصباح تحديدًا غرفة ناصر "
صحى بهدوء يشوفها قدامه تتابع مقطع وكأنها تتطبق شيء ، مشى وباس خدها وقال : امي وش تسوي ؟
غزيل ابتسمت وهي تطبق مقطع للكيرلي بحكم نوعية شعرها ونطقت : اسوي شعري كيرلي ي ابوي انت !
ابتسم وباس خدها من جديد وقال : اووف ياربي مسك !
غزيل لفت له وقالت : نويصر حبيبي
لف وقال : عيونه ودنيته وحلاله وماله وغناته من الدنيا وم فيها لبيه ؟
غزيل توسعت عيونها من فرط المدح والاحراج اللي داهمها وقالت : بسم الله هذي المشاعر كلها فالصباح ؟ وش بقيت لآخر الليل ؟!
ناصر ابتسم وقال : مشاعري لغزالتي وحدة ! سواء صبح ولا ظهر ولا حتى مغرب ! انتي وحدة ومالتس شبيه !!
غزيل قامت وحطت يدينها ع كتفه وقالت : هيه انت !
ناصر ابتسم ع جنب وحاوط خصرها وشّدها عليه وقال بصوته الثقييل : عندي اسم ترا !
غزيل نطقت ببيت يعبر عنها وعن شخصيتها العنيدة قايلة :
اذكر اني وانا طفلة طبوعي عنيدة
لا دعوني غزالة قلت انا اسمي غزيّل !!
-
ضحك بصوت عالي وهو يحتضنها له ، حاوطته وقالت : اسمي ايش ؟
ناصر ابعد وحط جبينه ع جبينها وقال : حبيبة ناصر !!
غزيل ابعدته وهي تضحك وقالت : خطأ حبيبة الدكتور !
ناصر مشى للحمام وهو يضحك ، بينما هي رجعت تجلس تكمل باقي شعرها ، كان فاتن ومرتب ، انتهت منه وشافته يطلع وهو يناثر شعره ويتطاير الماء منه ، رفع راسه وابتسم بوسع وقال : ي حسناء المنظر ي ذات الشعر الكيرلي انا في وجه الله ارفقي بقلب عاشق ومغرم من حسنك وجاذبيتك !!
غزيل ضحكت وقالت : مشينا نلحق الفطور بس
طلعت ومشى متجهة للدولاب يلبس ، انتهى وخلص يلحقها للفطور بنص الحوش ، طلع وقال : حيّو ابو تميّم
عقاب ابتسم وقال : يمرحبا ينويصر
جلس ناصر وسلموا ع بعض " سلام الرجال " وقال : شفيك ابوي معصب ؟
عقاب كتم ضحكته وقال : ايه عشان اسر جاي بالوايت للبيت
ناصر كح بصدمة وقال : لا تقووول !!!
عقاب وناصر تذكروا وقت مضى وهم صغار ..،
" من قلب الحادثة قبل ١٢ سنة "
فالعزبة واسر يحلف يحرك الوايت وعقاب وناصر شغالين طقطقة عليه ، عقاب وهو يمشط شنبه الخفيف وهو صاحب العشرين عام نطق وقال : يولد اهجد !!
اسر صاحب السبع عشر عام نطق بحدة : اصه اعرف اسوقه ترا
ناصر صاحب الثلاثة والعشرين عام انفجر يضحك وقال : واللي اللي بتبطي عظم !
اسر بصدمة : هاه ؟
عقاب بحدة : بعيدةً ع شواربك تسوق !!
اسر بصراخ : انا اوريكم
قفل الباب وشغله ودعس البنزين ومشى طاير ، عقاب بصراخ : ابن عااايض !!!
ناصر بخوف : النااااقااات !!!!
صدم اسر بناقتين من حلال الشيبه وتوفت كلها ، وحدة منها دافع " حامل " وفقد ابو فهد افضل ناقاته اللي يسّاوم فيها عند العربان من جمالها ومن كونها احد المزايين ، توفت مصدومة بالوايت ، اسر م طلع منها سليم انكسرت يده وانجرح بفخذه جرح عميق معّلم فيه ليومهم ذا ، وم زاد وجعه الا ضرب ابوه وهواشه له ..
" نرجع للحوش "
طاحوا يضحكون ع بعض بشكل مرعب ، ضحى بصدمة : حشى !!! ضحكوني معككم
ابو فهد بصراخ : بلا سنوون ان شاءالله ويينه الهلامة !!!
عقاب مسك ضحكته وقال : فالرياض
ابو فهد بحدة : لييه ؟
عقاب : زوجته تعبت
ام فهد فزت وقالت : بسم الله علييها وشفيها ؟؟
ابو فهد ارتخت ملامحه وقال بجدية : علمه يخلص اموره ويرجع والله م اخلي فيه عظمن صاحي !
ناصر بضحك : وعقاب معه هو اللي معطيه مفتاح الوايت !
عقاب انفجر يضحك بصوت عالي من نبرة صوت ناصر ، وناصر هيهات ! اسوء منه غصّ بحليب الشاهي وخذلك ضحك مو طبيعي ، ركض ابو فهد بمعكازه يلحق عقاب اللي ركض بكل سرعته وجاء ورا ام فهد اللي نطقت : في وجهي والله م تمسّه !
باس راس امه وقال : يعساني م اخلا !
كانت تتأمل ضحكاته وبسطته بين اهله وابتسمت بحب وقالت بنفسها ( دوم ياربي هالضحكة وهالزول دايييم يارب ) مشت من جنب البندري وجلست ، بدأ الفطور والكل جالسين بهدوء ..
" فالرياض تحديدًا مستشفى النساء والاطفال "
نزلت بنظرها للورقة اللي مكتوب عليها رقم موعدها ، مرت ساعتين ونص من شافت اسر اللي راح لغرفة انتظار الرجال ، م تحبذ اجواء المستشفيات ابدًا تجيب لها غلقة والحين اسر مو موجود ، زفرت بملل ولفت ع اللي جنبها من نطقت : لو سمحتي ؟
الميلا بهدوء : سمّي ؟
خلود : عادي تبدلين مع رقمي ؟
الميلا نزلت نظرها للرقم حق خلود وكان " ٤٨٩ " بينما الميلا رقم موعدها " ٢٧٤ " ابتسمت وقالت : كم رقمتس ؟
خلود سفطت ورقتها ونطقت بربكة : امم ميتين وخمسين !
الميلا بسخرية : اللي استدعوه قبل عشرين دقيقة ؟
خلود : تكفين ابي اشوف سلامة ولدي
الميلا بنظراتها الحادة قالت بجدية : لا معليش ! حتى انا ابي اشوف سلامة بنتي !! تدرين اني هنا من رقم ثلاثة وعشرين !! وجلست ساعة انتظر اخذ موعد وعطوني وشوفيني كملت ثلاث ساعات !!
*السبيكرز : موعد رقم مائتان واربعة وسبعون ، الرجاء التقدم للعيادة رقم سبعة عشر *
الميلا قامت واخذت شنطتها وطلعت علطول ، لفت بعيونها وم شافته عضّت شفايفها السُفلية بتوتر ومشت ، صارت تطالع ارقام العيادات بالسيب الابيض ولفت وراها من وصلها صوته وهو يقول : ميالتي ؟
ابتسمت وقالت : كويس جيت !! وينك ؟
اسر تقدم يضحك وحاوط كتوفها بذراعه ومشى وقال : رحت اجيب قهوة لنا
شافت الكيس بيده اليمين ويده اليسار ع كتفها ضحكت بخفه وقالت : هذي العيادة
اسر : توكلنا ع الله !
دخلوا واستقبلتهم الدكتورة عائشة ونطقت : فين الموعد حضرتك ؟
الميلا مدته لها وقالت : هذا هو
قرأت الورقة والاعراض وابتسمت وقالت : تتفضلي ؟
قامت الميلا وفسخت عبايتها ومشت ، اسر كان جالس وثانية تنزل عينه لجواله وعشر ع الميلا قدامه ، لفت وقالت : معليش دكتورة بس وين اعلقها ؟
الدكتورة اشرت بيدها ونطقت : اه بوّصي ورا الباب
مشت الميلا وتقدم اسر واخذها منها يعلقها بحكم ارتفاع المعلاقة ، ضحكت بخفه وقالت : شفتك تضحك حسابي معك بعدين
اسر جلس وبدأ يترشف من قهوته ينتظر الميلا ..
" داخل غرفة الكشف "
الدكتورة : حاولي توصفين لي الآلم ازاي ؟
الميلا حبست انفاسها لثواني ونطقت : مدري احس بآلم قوي يجي ويروح !
الدكتورة : فين بالزبط ؟
اشرت الميلا عند ارحامها وقالت : هنا
الدكتورة كشفت وانتهت ، سحبت السونار وحطته ع بطنها وضحكت علطول من شافت الجنين في بطن الميلا ، لفت عليها وقالت : دا بتصيري ام يحبيبتي !!
الميلا انفجرت دموعها ونطقت برجفة : ياربي لك الحمد !! يارب احفظ لي بنتي !
الدكتورة : اول حمل مو ؟
هزت راسها بنعم وكملت الدكتورة : ماشاءالله ماشاءالله ! عاوزاها بنت ؟ الله يرزقك يحبيبتي
الميلا وهي تمسح دموعها : اميين ! معليش تأثرت شوي
الدكتورة : لا بقد عادي خذي راحتك
مسحت الجل وغطّت الميلا بطنها وجلست ، لفت للدكتورة من بدت تتكلم وتقول : شوفي حبيبتي ممكن حملك يكون بالبداية خطير عليكي وعلى البيبي ببطنك حاولي قد ماتقدري تنتبهي لنفسك ولصحتك كويس تمام ؟
الميلا هزت راسها بمعنى " تمام " ومشت تطلع ، فتحت الباب وفز ونطق : بشري صرتي ام كنوز ؟
الميلا ضحكت بخجل وقالت : ابشرك يبو كنوز !
فز وركض وحضنها ونطق : يالله لك الحمد والمنة ياربي !
لفت له تشوف دموعه بعيونه ودعت ربها داخلها قايلة ( يارب بعد فرحته ودموعه تتم الامور ع خير ويشيل بنته بين يدينه ياارب ساعدني وقّوني بك يارب ! )
جلسوا قبال الدكتورة وبعد كلام طويل ونصايح منها كتبت لهم موعد بعد شهرين وان صار آلم قبلها تجي الميلا ضروري ، ومن وجبات واكلات اكتشفت الميلا ان صحتها اضعف من الجود اللي م شكت من شيء ابتسمت بخفه وقالت بنفسها ( الله لا يضرتس يجودي ! انحف مني ولا جاتس شيء يجعل هالصحة دايمة !! ) طلعت مع اسر وفور م ركبوا السيارة ضحك بصوت عالي وهو يربط الحزام ، لفت له وقالت : ضحكني معك ؟
اسر غطى وجهه وقال : تخيلي يجي ولد
الميلا شهقت بقوة وقالت : لا شكرًا م ابغى !! يارب بنت
اسر ضحك وقال : الله يجيب الخير ولد ولا بنت
الميلا : امين بس يارب بنت
شابك يده بيدها ومشوا وبعد مسافة الطريق طلعوا ع خط الديرة ، لفت بملل وقالت : امداك تشتاق ؟
اسر : لا والله بس ضروري ارجع
الميلا برعب : لا تخوفني فيه شيء صاير ؟!
اسر ابتسم وباس يدها وقال : لا يالميلا بس ابوي درى اني حركت الوايت ويطالبني فالبيت
الميلا : وش بيسوي لك ؟
اسر : ع حسب العصبية اللي بجيه وهو فيها وقتها بقيم العقوبة
الميلا زفرت بتوتر وقالت : مستحيل يضربك صح ؟
اسر ابتسم ع جنب وقال : م فيه شيء مستحيل عند عايض بن مساعد ال مقّبل !
الميلا بحدة : لا مستحيل يضربك !! رجال طولك عرضك والشنب واللحية ملت وجهك مستحييييل تسمع !؟
اسر : شفيتس عصبتي طيب ؟
الميلا : لا توترني وانطق ! بيضربك
اسر : لا يبنت الحلال ! اهدي
حطت راسها ع كتفه وحاوطها وكمل طريقه ، حسّ بثقلها وعرف انها نامت من الصباح صاحية ، باس راسها وكمل الطريق للديرة ..
" في بيت ابو تركي "
طلع تركي يبخ عطره ويمشي بأرجاء البيت ، ام تركي لفت من سمعت الصوت وقالت : تركي تعال
مشى ونزل العطر ع الطاولة وشماغه بيده ، وقف عند المراية وبدأ يكشخ ، نطقت من وراه : وين بتروح ؟
تركي بهدوء : معزوم مع اخوياي فالرياض
ام تركي بحزن تنهدت وقالت : هلال تربى معكم من وعمره سنتين ونص جاء البيت وانا حامل بميلو بالأشهر الاولى واذكر فرحتك فيه تحسبه احد اخوانك بس كنت بعمر السبع سنوات وقلت لك انه خالك وعرفت وصرت احيان تقوله خال والاكثر هلال..
ضحك تركي بخفه وكملت ام تركي تقول : بعدها جات الميلا وبعدها الجود وكبرتوا كلكم حول بعضكم ولما صار عمره سبعطعش قلت له الحقيقة كاملة وانفجع وطلع من البيت وبكيت عليه كأنه واحد من عيالي انت مستوعب خالك م كان يفكر ع كثر زياراته يجي ويقول كلمة طيبة لهلال ولا يحّن عليه !! ومرت السنين وهو في طرابلس بعيد عننا وقرر يرجع وقت زواج الميلا واسر وم فكرت ابدًا بالنية اللي فكرتوا فيها ولا ادري وش صار بينه وبين خواتك عشان تهاوشني الصباح انت تغار والرجال م يسمى رجال اذا م عنده غيرة ع خواته وابوك يدري بحقيقة هلال م يدري باللي انت تدري به ! عشان كذا لا تتهمني انا وابوك وانت م تعلم بنيتنا ! غير كذا انا والدتك ي تركي شلون تتصرف معي كذا وشلون تقول لأبوك كلام مثل اللي سمعه الصبح اليوم !
تركي : انا انصدمت وهذا اقل شيء ممكن اسويه ! لو اني طلعت العصبية اللي بداخلي اليوم كان م بقى شيء في محله ! وسالفة هلال معاد تهمني كثر م اني كرهته وكرهت خالي الزلابة وش مسوي له ورع السنتين عشان يتبرون منه وش الحياة والمصخرة ذي !!
مشى طالع وترك امه وراه ، صدّت واستغفرت وقامت تسوي شاهي وقهوة لراشد اللي لساته نايم ..
" عند باب بيت ابو فلاح "
تركي نزل من سيارته ومشى لفلاح اللي تاكي وزقارته متوسدة شفايفه موطن لها ، زفر دخانها وقال : نمشي ؟
تركي : دقيقة بشوف تالين واجيك
مشى واستوقفته يد فلاح اللي انمدت قدامه ونطق : م انصحك
تركي لف وقال : وش قاعد تسوي ؟
فلاح بجدية وهو يرمي دخانه ويدعسه : عجوز قريح فجرت فينا امس الله ياخذها اخذت عزيز مقتدر !
تركي قطب حواجبه وقال : فليح لحد يرعبني وانطق العلم زين !
فلاح : طيب يحبيبي اسمعني ام تالين الزفت امس من رجعنا وهي قالبة البيت فوق تحت وحلفت م تاخذ تالين زوجة لك
ضحك بسخرية وقال : ومين قالها ذي ان رأيها مهم
فلاح : لو تفكر فيها ام زوجتك رأيها مهم وجدًا
تركي بتحدي : يرجااال بعيييد ع شوارب ابوها وامها ياخذونها مني !! حرك بس
دخل البيت وارتفع صوته وهو يقول : يولدد !! تالييني
فتحت الباب الرئيسي وركضت فالحوش له ، شافها تطلع بقميص الروز الابيض والسليبر وشعرها اللي تاركته براحته ، فزت وحضنته بكل قوتها وقالت : ياربي الحمدلله شفتك ! والحمدلله جيت وقت م امي نايمة !!
تركي حاوط خصرها وشّدها عليه وقال : م صار شيء اصلاً وبتشوفيني طول عمرتس ارتاحي ي معاليق روحي !!
تالين ابتسمت وابعدت وهي تحط شعرها ورا اذنها ، ابتسم لها وقال : بروح انا وفليح للرياض تبين شيء خاطرتس بشيء ؟
تالين عبست بشفايفها لثواني ونطقت : ابي خاتم
تركي : بس ؟
تالين : يكون دبلة وطقم لي ولك تمام ؟
تركي مسك خشمها وتركه وباس يده ونطق : تبشرين
تالين ابتسمت وقالت : وابي ورد طيب ؟
تركي : وتبين عيوني ؟ خذيها تفداتس
ابتسمت وتقدمت ورفعت رجولها تبوس خده ابتسم ومسك قلبه ونطق : بشويش ولد المدينة قلبه رهيف !
تالين ضحكت وقالت : وبنت الديرة بتعذبه واجد !!
تركي باس راسها وهو يستنشق عطرها وينطق : اووه تاليني حرام حرم الدم اني جايتس والضيقة معاد خلتني حتى اتنفس والحين ! يالله وش كثر الرضى ويالله وش كثر انتي كثيرة ي تالين !!
تالين مسحت ع صدره بيدينها وقالت : بسم الله ارقيك من كل شر يؤذيك يارب طمن قلبه وابعده من كل حزن وغم يارب
لفت وتركته يطلع ودخلت للبيت بينما تركي ركب السيارة مع فلاح اللي نطق : مرّ ع بيت عمي عايض قبل نوجه
تركي : سلامتك ؟
فلاح : الله يسلمك ودي اكلم عقيب في موضوع
تركي ابتسم وقال : اووه دام فيها مواضيع ومع حضرة الفريق اجل انا معك
مشى مسافة بسيطة ونزلوا اثنينهم متجهين لبيت ابو فهد ، ثامر من عند الباب : يمرحبًا !
تركي : هلا هلا ثويمر وين عقاب ؟
فلاح تقدم ومسك اذنه وقال : يالسربوت وينك فيه ؟
ثامر ابتسم بضيق وتنهد وقال : بديت جامعة
ضحكوا عليه ونطقوا بصوت واحد : ع البركة ، الله يوفقك
ثامر ابتسم وقال : عشان الدعوات بتغاضى الضحك !
مشى وقال : يعم عقاب
ابو فهد بحدة : جاء عمك ؟
ثامر ابتسم وقال : باقي بس احسني بديت اشم ريحته
عقاب ضحك بخفه وقال : تنكت انت ووجهك ؟ وش تبي
ثامر : اخر حياتي ابيك..
ابو فهد بصراخ وهو يرمي الحصى ع ثامر : احترم عمك واحشمني !!
عقاب ابتسم وباس راس ابوه وقال : م حصل شيء يابه
مشى له وقال : هلا والله عيال ؟
فلاح سحبه ومشى عقاب بينهم ، فرق الطول كبير وفرق الهيئة والهيبة اكبر ، من وقت م صارت مشكلة الهنوف محد قوى يطالع بعيون الفريق ، عقاب بحدة : وين انت ذالف انطق !
فلاح تنحنح وقال : تعرف سالفة ادماني ؟
هز راسه بنعم وكمل فلاح يقول : خديجة السبب
عقاب طارت عيونه وقال : نعمم !!!
فلاح : مثل م سمعت وابي ارفع قضية عليها
عقاب : حقك وابسط حقوقك يبو سالم ! ابد تعال بكره معي اذا داومت وبوصيك عند محامي اعرفه
فلاح ابتسم وقال : م تقصر يبو تميّم
عقاب : افا عليك م بيننا يولد عمي !!
تركي ضحك وقال : اجل عندي موضوع بيشيب راسك
عقاب وهو يحكّ لحيته نطق : فوق الشيب اللي فيني ؟ الله يستر
تركي ضحك بصوت عالي وقال : لا يبو تميّم عاد وردة شبابك تووها تزهر شفيك ؟
عقاب بجدية : وردة شبابي كلتها الغنم اسلم ؟
انفجروا فلاح وتركي يضحكون بشكل هستيري ، صدّ وهو يبتسم ونطق : تركي عجل !!
تركي : هلال ماهو بخالي
فلاح بصراخ درامي : اااييععشش !!!
عقاب فز وضرب ظهر فلاح ونطق : وجعااااه اذني الله يفجعك !!!!
سكت لثواني يترقب انفجار القنبلة الموقوتة اللي تسمى " عقاب " صدّ وتحولت ملامحه لعصبية عنيفة ، عروقه برزت وبشكل مرعب ، حواجبه تعقدّت بصعوبة ، اول م طرى بباله من سمع اسم هلال وصلة القرابة حُضن الجود له ، شّد ع قبضته وقال بعد م زفر النيران : وش قاعد تخربط انت ؟!
تركي : روق يبو تميّم العلم توو عرفت..
قاطعه صراخه المرعب والمميت ، يحلف تركي بعدها انه م بقى عنده احبال صوتية ابدًا : وييينن ابنن الحرررام !!!!
فلاح بحدة : ويينه !؟
تركي بلع ريقه ولعن نفسه مليون مره ، مو وقته يعلم عقاب ابدًا مو وقته ، زفر برعب ونطق : في طرابلس لبنان
فلاح عضّ شفايفه ونطق : ولمه مسرع هّج !
تركي : اصلاً سالفة طويلة !!
عقاب بحدة وصدره يطلع وينزل : م يهمنني !! لا سالفة ولا غيرها جيبوه لي لا الحقه وادفن جثمانه فالغرب محد درى عنه لا اهل ولا قرايب !!
تركي : تعوذ من الشيطان يبو تميّم !!
فهد تقدم ونطق : وش العلم ؟
عقاب اشر بعيونه يسكتون ولف عليه وقال فلاح : هلابي يستود سوالف خاصه حقت مراهقين وش يهمك ؟
فهد عبس بوجهه وقال : بدعسك يفليييح !! ابوي يبيك عشان تتصل ع اسر طول
عقاب وهو متخصّر : ورا م تتصل انت ؟
فهد : يخوي انت تعرفه يصمّت العالم كلهم الا انت !!
سحب جواله ودق علطول ووصله صوته وهو يقول : ارححبب يالعضيييد !! ارحب يامال الغناة !
عقاب ابتسم وقال : البقى جعلني فداك وفدا حسّك وصوتك وين وصلت يحبيب اخوك ؟
اسر : قريب قدني ذيا اشوف حدود الديرة
ضحك عقاب وقال : حمدلله ع السلامة
لف لفهد وقال : وصل
فهد هز راسه ومشى راجع للحوش ، سكر من اسر بعد م ودعه وقال : السالفة اسر لا يدري بها سامعين ؟
تركي : ليه ؟ ماهو انت اسوء منه ؟ وشوفك دريت بها
فلاح ضحك وقال : هاهاهي م كأنك تعرف اسر !! اسوء واحد غضب وارعب واحد غيرة في عوال عمي كلهم
تركي : خير ان شاءالله تبشر ي عقاب
عقاب مسح وجهه وشنبه واستغفر وقال : يالله توصون ؟
هزوا رؤوسهم بنفي ومشى عقاب راجع للبيت ، ركبوا سيارة تركي ومشوا للرياض هم قابلوا اسر وكبسّ لهم بالفلشر وسووا مثله ترحيب وتوديع ، ومشوا ..
" في سيارة اسر "
نزلوا وشال شنطتها وعلاجاتها ونطق : ميالتي بتعلمينهم ؟
هزت راسها بنفي وقالت : خلنا نعدّي الاشهر الاولى بسلام
ابتسم ومسك ذراعها وباس راسها وقال : ابشري وان شاءالله خيير يالخيير بعيوني
ابتسمت ومشت تدخل ، ام فهد قامت وقالت : ي حيّ هالشوف وهالزول ي اسيّييير وميالته !
ابتسموا وقال : البقى ي جعلني فداتس يميمتي
مشى ومشت وراه ، سلمت ع عمها ونطق : الحمدلله ع السلامة يبنتي وش جاتس عساه دافعة شر عنكم ؟
الميلا ابتسمت وقالت : الله يسلمك يعمي وابد جاتني حرارة ورحت للمستشفى
ابو فهد بحدة : م كان يستاهل المشوار ذا كان جيتي عند عمتتس قمراء وم هي مقصرة
ابتسمت بهدوء وقالت : ادري بها يعمي م تقصرون
مشت وسلمت ع ام فهد وردت عليها سؤالها وتحمدها للميلا بالسلامة ومشت داخل المطبخ ، ضحى لفت لها وهي تجهز القهوة والبنات كلهم متجمعين وقالت : م بغينا نشوفتس ! صرتي مثلتس مثل احلام
غزيل وهي تاكل ضحكت وقالت : الكوابيس قصدتس ؟!
ضحى وهي تاخذ اغراض الميلا قالت : يووه عاد بعد م طلعت قدام اخواني بالروب اقسم بالله انها من اشنع الكوابيس لهم م حيّيوا !
الميلا بصدمة : لا عاد !!
غزيل بحدة : ويييلمها !! وينها فيه العجيز والله لا اطلع عيونها !!
الجود بصدمة : لحظة لحظة !
لفوا عليها كلهم من نطقت وكملت تقول : مين اللي شافها ؟
ضحى انفجرت تضحك وقالت : نويصر..
غزيل صرخت : فكوووني عليييها !!!
ضحى مسكتها بكل قوتها وكملت التعداد تقول فيه : وعقيب واسر
الجود تشمّرت وقالت : فكيها
الميلا بحدة : هي تبيها جلد ومطارح ؟ يويلها مننا
البندري ضحكت وقالت : حااااي يبنات راشد وحاااي يبنت عبدالملك !
مشت الجود اول وحدة وهي تحسّ بنيران تحرقها ، لفت ع دخول ام تالين وام تركي ..
" قبل دقايق فالحوش "
ابو فهد ابتسم وقال : اييه نعم ي اسيّييير وحشتني يبوك !
اسر ابتسم بتوتر ونطق : م يوحشك غالي يبه بس استهد بالله النظرة ذي م عيّنا منها خير
ابو فهد سحب معكازه وقال : ايه والله انك م بتعّين خير !
فز اسر اول م رمى عليه ابوه المعكاز بكل قوته وقال : ييويلي يبه مانت بصاحي !! تبي تذبحني !
ابو فهد صرخ وقال : كتفووه !! لا العن والديكم !
عقاب وناصر وفهد فزوا كلهم برعب لا يجيهم الدور ومسكوا اسر ، اسر مسح دقن عقاب وباسه وقال : انفدا لحيتك يخوي !! تكفى يعقاب !
فز عقاب وشال اسر ع كتفه وركض فيه وهو يقول :
ما احتزمت بـ محزم هيّن وبايد
‏احتزم بـ اللي يردّ القوم عقاب !!
-
اسر ضحك وقال : والله اللي وسبعة انعام يبو تميّم حيي والله ذا العين !!
مشى ونزله ودخلوا غرفة عقاب والجود ، اسر ابتسم وباس خشمه ونطق : لا عدمتك !
عقاب : هو انا بتلطم من ابوي بس تهون لأجل عيونك !
اسر ابتسم بوسع ثغره ونطق : يجعل يومي قبل يومك !!
عقاب فتح الشباك وهو يقول : مجار الله يطول بعمرك مجار
شاف ابو فلاح وابو تركي يدخلون ابتسم وقال : وصلوا الشيبان معناته معاد فيه ضرب
اسر : ايه ازييين ! تعال نشوف وضيحي اشم ريحة قهوتها
عقاب دفعه بخفه ونطق : يالله امش
طلعوا ماشين للمطبخ وفجأة اعتلى صوت حريمهم داخل البيت ..
" عند البنات "
غزيل ضربت الباب وصرخت احلام : خييير ان شاءالله !!
غزيل بحدة : م ورا دخلتي خييير وجاتس العلم !! والله ان اطلع فعايلتس من ظهرتس !
فزوا الحريم كلهم فالصالة من صرخت غزيل واحلام معها ، كلهم يدرون وش سوت غزيل فالهنوف والكل شهّد المجزره اللي صارت بزواج عقاب والجود اللي م يسمى زواج اصلاً ، ام تالين مباشرةً ركضت ووقفت بصّف احلام هي تدري ومتيقنة انها بالكفة الاضعف لكن بتقاتل وبتشوف وش بيطلع معها ، الميلا بحدة : لعنبوتس اني م تستحين !!
احلام بحدة : ورا م يغضون البصر !
الميلا صرخت وقالت : اطلع لتس عيونتس الحييين !!
غزيل ركضت وسحبت شعرها وقالت بصراخ : يبنت التسلاب !
الجود بديهيًا دخلت فالمضاربة بحسّرة منها ، واحتّد الضرب والمطاق بينهم شعور تقطعت ويدين تمشخت واظافر تكسرت والدم بدأ يظهر عن طريق جروح طفيفه ، ام تالين سحبت يدها وضربت بكل قوتها الميلا وضحى اللي طاروا علطول واللي شاف المنظر يحلف ان خديجة ضربت واللي ضرب معها عشر رجال ، طاحت الميلا ع بطنها وشهقت بكل آلم وضحى طاحت الباب وانجرح راسها ، صّرت ع اسنانها وركضت وصفقت ام تالين كف بكل قوتها ونطقت بحدة : يحييوواانه م تضربييين اختي وبنت عمي سااامعة !
ان فهد شهقت وقالت : بندري !
تالين صرخت وقالت : يممهه !! شفيييك علييهم
الجود ركضت وضربت احلام ضربة طاحت منها وانتهى فيها وهي مغشي عليها كذبًا ، وركضوا الحريم يفرعون ومن بينهم كانت واقفة قدام ام تالين اللي توسعت ابتسامتها بشكل مرعب ومخيف ورفعت يدها بتضرب البندري قدامها وفجأة دخلوا الرجال من عقاب واسر وناصر وصقر وفلاح وتركي وثامر وغيرهم ، مدت يدها ع البندري وسرعان م سحبها صقر لحضنه وطلع فيها هو وقف ثواني يشوف رجفتها ودموعها اللي تنزل بصدمة ، كل واحد فز وسحب حَرمه من الهوشة الغبية بنظرهم ، ناصر بحدة : ي امي انتي خلااص !
غزيل بحدة : وتطاااالع بعد جعل عيونك الفقع !! صدّ يملا الوجع صدّ
ناصر سحبها معه ودخل غرفته ، عقاب سحبها من بينهم هو من دخل وعينه عليها م شاف احد ولا لمّح احد شالها بين يدينه وطلع فيها وقال : شاطرة ! حامل وتتضاربين ؟ وش خليتي للبزارين ؟!
الجود وصدرها يطلع وينزل بعصبية نطقت : عقاااب اكرمني بصمتك لا اكمل عليك !!
عقاب ابتسم وقال : كملي علي راضي ! انا راضي وشتبين ؟ م يخصتس صح ؟!
صدّت وحطت راسها ع كتفه تشوفه يطلع معها من البيت ويتجه لغرفتهم ، وعند اسر فز ورفعها وقال وعيونه تطلع شرار : من اللي سوا فيتس كذا !!؟
الميلا بآلم ضحكت بسخرية وقالت : م صار شيء امش كلنا تضاربنا وطلعنا اللي بخاطرنا ولقمنا بعد !
اسر قومها معه ودخل فيها غرفته وسكر الباب وراه وقال بحدة : ميالتي ! تستهبلين صح وش صار اصلاً ؟
الميلا رفعت شعرها وقالت : م صار ش..
فزت ومسكت بطنها بآلم ، ركض لها وقال : وشفيه !!؟
الميلا عضّت شفايفها السُفلية ونطقت : م فيني شيء خلاص اطلع للرجال انت
ضحى دقت الباب عليهم وفتح اسر علطول ، دخلت وقالت : يزفت ! انتي حامل والحيوانه الكلبة ذيك دفتتس ع الباب ؟ جاتس شيء ؟
اسر ابتسم وباس راسها بقوة وقال : انتي اللي جاتس شيء ؟
ضحى مسك راسها وتركته وشافت الدم في يدها ، ضحكت وقالت : تضحك تحسب بتهلكني بالضربة ذي ؟ م تدري اني انفقشت مليون مره
اسر ابتسم وقال : اسمعي منها رافضة تعلمني شيء
ضحى غمزت له وطلع اسر من عندهم ، تقدمت للميلا ونطقت : فيتس شيء ؟
الميلا برعب من الفقدان : خوفي افقد بنتي
ضحى : لا ان شاءالله !! وبعدين يلعن والديها والضربة تقول معها جن يضربون !!!
الميلا زفرت بتوتر وقالت : اصلاً وضعها مو طبيعي ومن خذاها عمي سالم وهو قالب ع فلاح وبقوة ! اسر يعلمني اشياء صدعت فيني
زفرت بقهر من تذكرت السالفة فالسيارة ونطقت : يارب تكون امال عند الهقوة ! وتكون امل لفلاح فالحياة من جديد !!
ضحى ابتسمت بضيق وقالت : يارب وتكون له خير اكثر مني
الميلا حضنها وقالت : المهم خديجة ذي ماهي طبيعية والعلم سلامتتس !
ضحى : الله اعلم وش وراها الله يكفينا شرها وبس !!
مشت ضحى بعد م تطمنت ع الميلا وطلعت برا الغرفة ومشت للمطبخ ..
" فالحوش "
البندري حاوطته بهدوء وطاحت براسها ع كتفه تشاهق تبكي هي م تحملت اللي تسويه ام تالين بالفترة الاخيرة وانهارت من شافت ضحى تنزف والسبب خديجة ، ربتّ ع ظهرها وقال : هونيها يبنت العم هونيها !
ابعدت منه وضربت صدره وقالت ببكي : انت السبب !! انت اللي خليتني اكتم واتوجع بداخلي ومحد يدري وشفيني خليتني بين نارين نار اني م رديت عليك ونار اني فقدتك !!
صقر زفر بتوتر وقال : بروح م يستاهل يشوفوني معتس وورا البيت انتبهي لتس !
البندري توسعت عيونها وقالت : اييه تهرب من عيوني !؟ م تبي تشوفني ويين اللي يقول شاريتس ومدري وش ! لييه تقول كلام م انت قده ولا بتجي قده
صقر بحدة وعيونه تلاقت بعيونها ونطق : انا قدها وتعرفين اني قده !! بس انتي رديتيني وشكيتي برجولتي والرجال حياته كرامته ! عافتس الخاطر والله يوفقتس !!
البندري مسحت دموعها بعنّف وقالت : رح الله لا يوفقك !
مشت ودخلت داخل ، زفر النيران ومشى طالع للمجلس وهو يدري كيف عيونها تآسره بس قاعد يقاوم ويكابر بكل قوته ..
" في غرفة عقاب "
دخل وسكر الباب وراه ومشى داخل وجلس ع الكنب وهي بحضنه ونطق : اوجعوتس ادخل واحرقهم ؟
الجود : يوجعوني وانا ام تميّم ؟
عقاب ابتسم وقال بثقل صوته : ونعم !
الجود ابتسمت وابعدت وهي تقول : معليك زود يبطلها !! بتنام ؟
عقاب : ايه وبحضنتس ! الواحد بيحّلل كل شيء قبل رمضان
الجود توسعت عيونها وقالت : دز محد ينام الظهر !
عقاب : خلاص م بنام وتحمّلي اذا تعبت
الجود : شف شف !!
عقاب توسعت عيونه وفز وقال : المقابلة !!!!
الجود صرخت برعب وكتمها وهو يحاصرها بالسرير وراها وينطق : م بتتوبين صح ؟!
الجود وهي تبعد يده عن منطوقها : بعد ساعة !! معنا ساعة بس
عقاب : البسي وخلصي
الجود رفعت حاجبها وقالت : تستهبل ونطلع قدامهم !! عساس بيخلوننا نروح شف كيف نشب عمي لآسر عشان يرجع !
عقاب حكّ راسه وباس خدها وقال : قولي عندي موعد عشان حملي
الجود توسعت عيونها وقالت : عقاااب محد يدري اصلاً !!
عقاب : يووه خلاص بنطمّر !
الجود ضحكت لثواني وبعدها صرخت بشكل درامي : كيييف !!!!
عقاب مسك فكها بقوة وسحبها له وهو يقول : والله اذا عاد صرختي لا اسوي شيء م يرضيتس !!
الجود بصدمة : طييب !! مستحيييل اطمّر تسمع !
عقاب مشى قدامها ولف وغمز لها وقال : ارفعتس ولا تزعلين
الجود تخدرت من حركته هي خفيفة وعنده تذوب ، حركاته البسيطة وملامح وجهه الفاتنة كافية انها تجيب اجله نطقت وقالت : شلون ؟
عقاب ابتسم ودخل الحمام اخد شور طويل وطلع بعد فترة طويلة لف بعيونه وشافها واقفه عند المراية تتمكيّج وتحط اخر لمساتها روجها الاحمر ، شعرها اللي كساه لون البُن كان ستريت وويفي ع اطرافه ، كانت منتهية من اكسسواراتها والحُلي يزينها فوق زينها ، لفت له وضحكت ومدت له كوب قهوته ، مشى لها ومنشفته محاوطه خصره ، اخذه وقال : بتروحين كذا ؟
الجود هزت راسها بنعم وقالت : ادري تغار بس لازم المهمة تتم ؟
عقاب بهدوء : البسي نقابك !
الجود زفرت بملل وقالت : عقيب ! هو الرَيدي شاف وجهي !
عقاب لف لها وقال : ويش هو ؟
الجود ميلت شفايفها لثواني وقالت : اف اقصد انه شاف وجهي يعني م يحتاج اتخفى
عقاب بجدية : النظرة الاولى بقوانيني حرام تبيني اسمح بالثانية م بعّد انهبلت !
الجود عطته ظهرها وقالت : بجلس اقرأ البس وخلص وتعال
طلعت للجلسة اللي جنب غرفة النوم ، نزل كوبه ومشى للدولاب طلع ثوبه ولبسه وانتهى منه وتعطر واخذ شماغه ونسفه وكشّخ ومشى لها ، طلع راسها يناظرها تقرأ بكل حماس هي تدخل الجو علطول وتحب الروايات كُثر حبها للهندسة ، كانت تعضّ اصابعها بتوتر وفجأة تضحك بحماس ، هالشيء كان كثير ع قلبه ، ابتسم ونطق بكل حُب ومشاعر باغتته :
أَأحسُدُ البُنَّ ، أمْ فنْجَان قَهوتِها
‏إنْ بَاتَ فِي يَدهَا تَكسُوهُ بالقُبَلِ !!
-
لفت عليه وسكرت كتابها ونطقت : لا تقول كذا وكأني مقصرة معك !
عقاب : هو فعلاً انتي مقصرة !
الجود : خلاص عيب بكره رمضان
عقاب ابتسم بخبث وقال : شبعيني طيب ارويني قبل الظمأ والعطش واللهفة !
مشت له ولفت جسده بيدينها بحيث يلامس ظهره الجدار ، مسكت وجنتيه ورفعت رجولها ، طبعّت قبلتها بكل شعور فيها وابعدت بخفه ، حاوط خصرها وشّدها عليه يبدأ هو بالشغل ، بعد ثواني مالت للدقايق من القُبل والاحضان ضحكت وقالت : عقيب بس !!
عقاب ابتسم وباس خدها بكُل حنّية ونطق : انا مقدر اكتفي فيتس ابغاتس اكثر واكثر !!
الجود زفرت بتوتر وملامحها كساها اللون الاحمر ، ابعدت بكل م فيها وسحبت كتابها تهّوي ع نفسها ، رجعت له الذكرى ليوم العزبة تحت قمر مكتمل ، ابتسم وقال :
في عنقتس مرت تفاصييل مقتلي
مثل مرّ النسييم الي يلاعب شعرتس
لبى خصرتس وشامتتس وخدتس الندي
والبدر ماخذ منتس لا بالله انتي البدر كلتس !
-
لفت عليه وقالت بذهول وشوق : اول شعر قلته لي !!
عقاب ابتسم وقال : مشينا يالجود مشينا لا نجلس ثواني زيادة حرام معاد اطلع سالم !!
ضحكت ومشت وراه تطلع ، وصلوا ورا غرفتهم وتمسك بالسور وطمّر ونطق : اطلعي واطمّري بمسكتس
الجود وقفت ع الاخشاب اللي ورا البيت وطلعت ع السور وقالت : يمه عقاب ررععب !!
عقاب بعجلة : خلصي علي
غمضت عيونها ونطّت وصرخت برعب مسكها علطول وكتمها وهو يقول : يرحم والديتس اص !
ركب سيارته الونيت الاحمر تحت ضحكاتها ونطقت وقالت : الله شف ورد !
لف وكانت تقصّد الجهنمية اللي ام فهد زارعتها ، ضحك ومشى ووقف جنبها صورتها من شباكها ولقطت لهم كم صوره مع بعضهم ومشوا للرياض ..
" في غرفة ناصر "
غزيل بحدة : تحسبني بسكت !!! والله م اخليها م طلعت الا عشان خاطرك ولا تخسى تمد يدها ع ميلو ووضيحي !!
ناصر ضمّها لصدره ونطق : بس يبنتي بس ي امي انتي بس ي جميلتي وصاحبة الكيرلي اللي فتنّي وانا ماني فاطن له ! بس
حاوطته وقالت : شلون صرت اشوفك الناس كلهم تكفى ي ابوي انت لا تغيّب عن عيوني
ناصر ابتسم وباس راسها وهو يستنشق عطرها وكريم شعرها اللذيذ ، اخذ نفس وزفره ونطق بشيلته المفضلة :
لا تغيب.. قولوا لها في سلوم العشق تبقى
قريب... مافيه داعي تغيب.. !
-
صوته كان جميل بشكل كبير فيه بحه مميزة ، ينطقها بكل لهفة وحب ضحكت وقالت : لازم اسمعها في مسجل وانت تكررها تمام ؟
ناصر باس خشمها وقال : كم عندي غزالة انا ؟
غزيل عبّست بملامحها ونطقت : غزيييل !
حضنها وقال : معاد صرت اقوى خوفي اترك واطيح وانهد عليتس وم نصبّح الا وانتي متضامنه مع بنات راشد
غزيل توسعت عيونها بصدمة وقالت : اووف ! بريكات بريكات بسم الله
ضحك وهو يشوف ملامحها احمّرت خجلاً ونطق : ايه ؟
غزيل : يووه نسيت ان الغداء علي عشان مسيكينة ضحى انفقش راسها جعل احلام الموت هي وخديجة الجلالة !
طلعت ركض وهو يضحك ، طلع وراها ومشى للحوش وشاف العيال وابو فهد يهاوش البنات اللي صافيين
ابو فهد بحدة : م حشمتوا بيتي !!!
ضحى : يبه فقشوني !!
احلام ببكي : بروح بيت اهلي
ابو فهد بصراخ : روحة بلا ردة ان شاءالله اذلفي وخلي احفادي عندي سامعة !!
فهد بصدمة : بس يبه..
ابو فهد : اص لا اسمع لك حسّ !!!
ثامر قام ونطق : مالي قعدة في بيت امي مطرودة منه !
حصة وقفت جنبه ونطقت : وانا بعد !
ابو فهد بصدمة : صبي انت وياها ! اجلسوا جعله يقعد لكم رمح سمح !!! جدكم يكلاب المجزره !
جلسوا بهدوء يطالعون امهم اللي وقفت وطلعت مع فهد متجهين للمزاحمية بيت اهل احلام ، ابو فهد زفر بقرف وقال بعصبية : وانتوا والله م يسلم من اسلمكم !
البندري : يبه !
ابو فهد بحدة : ع داخل !!
مشوا البندري وضحى وحصة ورا بعض ودخلوا داخل ، لف وقال : اسيّيير ! وين عقيب ؟
اسر : يبه مسيكين دايخ وغطّ له ابو ساعتين
ابو فهد : ايه ازين اجل لحد يصجني بنخمد لين العصر
مشى بمعكازه للمجلس ولحقه راشد بحكم ان سالم راح ورا زوجته خديجة اللي خذت عيالها وبناتها كلهم ..
" فالمركز "
ضيدان رفع صورتها من داخل مكتبه وقال :
ان كان حبي لك هو اعظم خطاياي
‏والله م اقول ي نفسي عن الحب توبي
اجمل خطاياي وآخر حدود دنياي
‏ودالين اصدق معاذيري و اطهر ذنوبي !
-
ابتسم يشوف السي في حقها كامل ومعلوماتها ، ابتسم وقال : وشلون اسويها الحين واخذها حلالٍ لي ؟
قطع تفكيره فيها اتصال من حضرة الفريق عقاب ، ابتسم ورد : ارحب يطويل العمر
عقاب : هلا هلا ضيد قلبي اسمع
ضيدان : لبيه ؟
عقاب : ترانا قريب للرياض والمقابلة بعد ربع ساعة
ضيدان : ترانا ؟ معك الاهل ؟
عقاب ضحك وقال : ايه الله يرجك
ضيدان : ابد اضرب فيهم ولا تسمي
عقاب : الفريق جاهز ؟
ضيدان بحدة صوته : تحت امرك وبأنتظارها حضرة الفريق !
عقاب ابتسم وقال : عسانا ع القوة !
سكر ولف لها وقالت : واو شكثر يحترمونك !
عقاب : الرتُب ي جويدتي الرتُب !
ابتسمت ومسكت يده اللي ع قيّر الموتر ، سحبها ومسكت القيّر وحاصر يدها ولف نظره للطريق بينما هي كانت تتأمل يده اللي مشابكتها طول الطريق ..
::::::::::::::::::::::::::::::::::::::
انتهى البارت ادعموني بنجمة وكومنت عشان اتحفز اكملكم ❤️
( ارحبوا يحباااااني رجعنا ببارت جديد طوييييل جدًا !! استغربت اني طولت م نزلت وطلعت كتبت زيادة عن اللزوم معلينا انا كريمة وانتوا تستاهلون ، عطوها حقها يحباااااني ولاتنسون النجمة انا فداكم ❤️❤️❤️! )