قصص قصيرة ( باللهجه العراقيه )

البارت الثاني 2 ( سيوف الغرام )

..
قصه / سيوف الغرام
بقلم ملاك ..

.....................................

.

ودور الحياه و تلعب بينه لعب محد متوقعه ..

هاي اني غرام .

البنيه الجبيرة لاهلي .. و بعدي ولد عمره خمس سنوات

..

قصتي تبلش من قصه امي ..

الي هجره أهلها على مود ابوي .. و تالي عضت اصبعها ندم و عضته اله گصته ..

ابوي هم مثل اي رجال بنه الها احلام و امال و تحت شعار ( اعيشج ملكه بس نزوج )

امي لا ملكه ولا شي .. تحدت اخوانها و اهلها و تزوجته و اهلها گالو الها بس تزوجي بعد لا تشوفينه وجهج ..

امي تزوجه ابوي و عافت أهلها بس بين فترة و فترة جانت تروح عليهم و ترجع العيون حمر دم من البجي ..

ربيت و كبرت واني ما شايفه خوالي ..

ابوي جان عامل بمعمل حديد .. جان يشتغل و الحمد الله

بس بفعل غلط بسيط داخل المعمل ابوي خسر رجله. و صار معاق ..

ابوي من خسر رجله نگلبت حياته ميه و ثمانين درجه ..

ابوي صار واحد ثاني .. يشرب و يسكر يضرب امي و يضربني عيشنه بجحيم طول وقته سكران

..

راتب الرعايه الي سوو اله يخلصه على المشروب .. و ان ما كفاا يطلع يجدي بالشارع من العالم و فضحنه كله على مود المشروب ..

عمري ١٦ سنه و كل مرة امي تعاركه على مودي يريد يزوجني يا ياخذ فلوس المهر يجيب بيها سم ..

كل مرة يجيب جماعه و امي تطردهم و تصير تعيط عليه

يريد بس يبيعني دا يشتري سم الهاري ..

..

مرات احقد عليه و اكرهها. بس من اگعد بالليل على صوته و هو يبجي بالطرمه و يشكي همه و ينعي على حاله ينكسر گلبي عليه ..

..

امي تگول جان كلشي بخير لحد ما خسر رجله رغم كلشي بس جنت جارعه العيشه وياا. هسه صارت ما تنجرع ..

دائماً تگول. لو اهلي يقبلون اعوفه. وارجع يمهم بس مالي مكان هناك طلع ..
ولا كأني المدلله مالتهم جنت

..

امي البنيه الوحيده و الزغيرة جانت لاهلها ..

..

..

مرت حياتنه عاديه و مثل ما هي لحد يوم وصل امي خبر فجعها فجع.

اسمع عياطها و بجيها.. جنت اني و علي اخوي بالبيت وياها ابوي طالع يجدي مدري وين المهم جان ما موجودة