ذراري الهجرس

الفصل السادس

جحيم الظلم
يطفئه نار الانتقام

لكن ماذا عن ثمن الانتقام

اردفت قائلا. يطفئ الشمس التي تنير الظلام

*********************************

🍁

تنهدت من ضرب هوه حار وجهي من التدفئة مالت السيارة ذهني يغيب ويرجع احس روحي عطشانة كل فكري اريد الحبوب حتى جسمي مساعدني وكام يحكني

سمعت صوت شفع : شبيج

مجاوبت نزلت ايدي اعصر اصابعي واشغل بالي بأي افكار فزيت من حسيت شي بارد على ايدي حجه شفع يهديني : شربي ماي ونامي علما نوصل

أخذته من ايده حكيت ركبتي وكلت : يمته نوصل

شفع : بعد باقيلنا نامي

: مجايني نوم نافله نامت

شفع : اي نامت

تأففت شسوي هسه صداعي مدا يهده احس راسي فرغ وما ضل بي بس احتياجي لهاي الحبوب رجع حجه شفع : كافي راح تنزعين لحم وجهج

: ها لا ما حاكه وجهي

تنهد وكال : تريدين تداومين لو تنطين خارجي

عرفت يريد يلهيني وصدك ردتها وخليت فكري ويا كتله : وين اداوم احنه مامستقرين بمكان اعتقد راح انطي خارجي مثل الثالث

شفع : راح تنتضرين هواي علما يشملج الخارجي

: عادي ماعتقد أكدر اداوم هيجي

شفع : اشوف شيصير اذا لكيتلج مدرسة تاخذج اخليج بي واذا مالكيت اشوف حل للموضوع

: ميحتاج انطي خارجي

شفع : تؤ اني ادبرها

تنهدت : لعد نافله

سكت شويه وكال : لمن تبدي الجامعات اخليها يم ام جابر لو يم ضياء الدين تضل هناك

فتحت عيوني وانداريت علي : لاااا ماكدر بدونها

جر حسره وكال : تقبلين تحرك مستقبلها علمودنا

: لا تكدر تداوم وهي ويانا

شفع : لا ماتكدر احنه كل يوم منتقلين لغير مكان وثاني شغلة تداوملها شهر وراها تعاند الا تضل يمج

سكتت شوي ورجعت كلت : صحيح بس شلون تقنعها

رد هو كال : ماعليج اقنعها

رجع الهدوء كمت افكر بحجيه اعرف راح يسوي عين العقل بس نافله مثل عيوني مايكمل يومي بدونها احس معوضتني عن كل شي

تفاجئت بيد على راسي وراها حجه شفع : بنص السنة اجيبها والعطلة كلها يمنا بنتي لازم أأمن مستقبلها اذا اني صارلي شي بوقتها تكدرون تعتمدون على نفسكم

وخرت ايده : شهل الحجي هسه

ضحك : لا تخافين كاعد على كلبج

: اكعد شسويلك