من كفري الى دينكي...

بارت 3

من کفری الی دینکی...

بارت 3

سيلين- الكزاز بعدهو تارس المكان ممكن اتروح برجلك
اجة صوبي و لزم ايدي نشقت نشقا حسيت روحي راحت عاصر ايدي حيل

عمران- خايفة علية لو شنو؟
سيلين- وخر ايدك !
عمران- اوي عمران وخر ايدك لا تلزمني لا تلمسني بس تعرفين هذني الكلامات؟
سيلين- نسيت شروطنة استاذ عمران؟
وخر ايده من زندي و دفعني حيل من الدفعة انضرب ظهري بل كاونتر عضيت شفتي حته لا اصرخ اليوم رسميا ظهري انكسر
عمران- كتلتني بشروطش! خاب وخري...
راح صوب الكاونتر و ضل ايدور بيهن هم رجعنة عله سالفت الشراب
عمران-وين وديتيهن؟ ترديني اجيب وحدة وحدة اخلية بحلگج حته بعد لا اتفكرين اتضمينهن عني؟

سيلين- اني ما كذيتهن و ماادري بيهن وين.
عمران- سيلين ما چنتي اتچذبين ،انظاف لخلاقچ من بعد ما شفتي اهلچ؟ خوش ايعلمونچ
درت وجهي و حاولت انكر مرة ثانية
عمران- اجيب فلفل و اخلي بحلگچ؟ گولي وينهن جدام لا اندمچ!
سيلين- شوف عمران بس لحظه اسمعني...
شال ايده بمعنة السكوت
عمران- شوف باوع ماعدنه هيه فرد كلمة! گولي وين حطيتي ابطالتي؟
باوعت بعيونة و حاولت اقعنة ايبطل
سيلين- حباب لا تشرب ..
عمران- هسه صرت حباب؟ شوفي سيلين قسم بللّة الا ما گلتي وين اراويچ انجوم الظهر
سيلين- شوف عمران روح اگعد اني اسويلك عصير وللة اخليك تنساة
عمران- د شوفين جاهل گدامچ؟ اتسويلي عصير؟ تقشمريني؟ بساع اتكلمي وينهنة؟

سيلين- عمران اني بهاذ البيت جايه اصلي و اصوم..
مرة ثانية رجع لزم زندي و حط وجة بوجهي
عمران- احنه چنة متفقين؟
رفعت ايدي و حطيتة علة ايدة و چنت ناويه ارجع نفس السيناريو
عمران- ادري بيچ هسة تردين اتگولين عمران لا تلزمني اخ عمران توجع ،شوفي گدام لا صگد اخلي كل مكان بجسمچ يوجع گليلي وين ابطالتي؟

سيلين- بلحمام حدر المغسلة
دفعني حيل و راح لل حمام
عمران- اتضمينهن اهنانة؟ الله كريم سيلين خانم!

حطيت ايدي علة وجنتي و ضليت ابچي ،الليلة من هذني الليالي اللازم ابقة گاعده للصبح و هاذ كلة علمود عمران لأن من يشرب يتحول وحش و اني لازم احمي نفسي بكل الطرق

حط بطله گدامي و ضل يشرب و كلشوية يضحك بستهزاء
كرهت نفسي، كرهت كل عشتي من ورا هاذ الأنسان الوصخ
اعيوني من البچي ضلن يوجعني.
سيلين - عمران كافي! عفية بعد لا تشرب حتة لا ايصر مثل ذيچ الليلة!
عمران- بهذيچ الليلة اني ماچنت سكران بس ردت اجي احچي وياچ بس الليلة صگد اريد اسكر..
ما ضلت غلطة ما غلطت علية بگلبي تمنيت ربي ياخذه ولا اشوف هل منظر
عمران- اريد هلگد..هلگد اسكر حته گلبي لا يحترگ عليچ
سيلين- هسه انته خابص روحك بس علشان ذيچ الورقة؟
عمران- لا هاي ذرة من الاوجاع الجاعد اتحملهن..
سيلين- عمران احلفك بيمن حته اتصدگ اني رايحة علمود غير شي و الطبيبة چانت تحجي اوياية و امي سمعت.. بروح ابوية اني ما سويت شي..
عمران- ما سويتي شي؟ ولچ انتي بهاي عملتچ دمرتيني!
ابوچ و امچ بهاي الورقه ما ضل مكان ماگالو اني مو رجال ولچ حطو كل الصوچ بية و ما يدرون اني حته شعرة وحدة منچ ما شايف.
سيلين- عمران ولله العظيم اني احچي وياهم و اخليهم يقنعون...
عمران- تحچين وياهم؟ انتي بس جيبي اسمهم حتة اله اشگ حلگج
عاينت علية بتأسف و گمت من مكاني و جاية اروح لغرفتي
عمران-سيلين؟
رجعت باوعت علية شال البطل ماليتة
- بصحتچ يا مرتي الغالية
استغفرللة ربي و اتوب اليك هسه الا قتلتة هم احد ايگول ليش؟!
دخلت الغرفتي و ضليت اغلط علي
- انشاللة تحترگ بنار جهنم
شلت ايدي و ضليت اندعي
- ربي مو اني عبدتك اترجاك اتخصلني من هاذ العذاب الجاية اعيشة
ققلت الباب و جريت الكرسي و حطيتة ورة الباب ، ضليت اضحك علة نفسي اشجاعده افكر؟ مثلا من ايريد يدخل هاذ الكرسي ايكذ گدامه؟

گعدت حدر التخم و حطيت راسي علية و ضليت ابچي
- ربي بس گلي شسوي؟ ادري بية بعدهو گاعد و ماگدر انام الا هوا گاعد.
ضليت اگرا آيات حتة شوية اهدة و فرد دفعة اجاني صوت الموسيقي رجت البيت رج
- استغفراللة خبالاتة طلعن مره ثانية هسه وين اطي وجهي؟
باوعت علة الساعه بل وحدة نص الليل لو بيدي اروح اكسر ابطالتة علة راسة، السكير..
اريد انام ياالهي اشلون انام و هاذ السكير گاعد يا ربي، نومة اخاف انام و يجي يمسك ياختي يا ربي وينك؟ ...
امي و ابوي هسه جاي يدرون جاعد شيصير بية؟ اختي نسرين تعرف اني جاعده كليوم اموت؟
احس عيوني گبن نار من البچي و راسي حيل يوجعني گمت نمت عله الچارباية و سحبت البطانية علة راسي و ضليت اشاهگ من البچي
-نسرين انتي وين؟ نسيتيني؟ اني اختچ الصغيرة الماتتحميلن اتشوفينة زعلانة! هسة جاية اتموت من القهر و الخوف

عمران- سيلين خانوووممم