صدف

6

#صدف
بقلمي : زينب أمير (6)

أصبحت اليوم التاني  قمت من 9 بعد صليت وكده دخلت الصالون لقيت امي بتتكلم بالتلفون طوالي مشيت المطبخ شلت كبايه شاي وجيت قعدت جنبها خلصت مكالمتها وقبلت على قالت لي دي خالتك بتسلم عليكم قلت ليها الله يسلمهاا (عندي خاله واحده بس اسمها علياء  عندها ولد وبت ح نتعرف عليهم ل قدام شويه،،، عايشين في السعوديهه شهاده عربيه وكده ) ل 10 كده قعدنا فطرنا انا وامي ولمياء ،،، عملت ليهم القهوه وبقينا نتناقش نسوي شنو ونعمل شنو ل بعدين،،، آها مع الضهر كده قمنا نشوف حاجاتنا،، دخلت غرفتي ونزلت الدولاب كلو في الارض بحثا عن فستان بسيط وأنيق،، جاتني لمياء داخله بتسأل ده شنو ده قلت ليها اسكتي مني بالله أسي البس شنو انا؟ م اتكلمت معاي فتحت دولابها طلعت لي فستان لونو رمادي ب ابيض رهيب جدا، مسكتو منها وقلت ليها شكرا جدا جدا سفهتني ومشت م علينا،، جاتني داخله تاني بعد عشره دقائق شايله ماسك كركم في يدهاا قالت لي اقعدي اقعدي عامله وشك الشين ده قلت ليها اعمليهو وانتي ساكته..
باقي اليوم عديناهو كلو ماسكات وش،، م كان في موضوع نهائي وتوتر عجيب كده..

اها زي خمسه عصر كده دخلت المطبخ عملت كيك وجات لمياء عملت بسبوسه امي قالت لينا عمر بجي أسي بجيب معاهو الفواكه والباسطهه قلت ليها خلاص كده كفايه جداً قالت لي اعملي خليه نحل قلت ليها والله ماف داعي ي امي تاني.. كده  كفايه جدا جدا لمياء قالت ليها اي والله كده خلاص امي قالت لينا مخيرات يلا شوفو البيت محتاج حاجه تاني لمياء مشت للبوتجاز شالت الفحمات وطلعت قالت ل امي ماشه أبخر قبلت على امي قالت لي امشي اجهزي بعده الزول ده بجي قلت ليها تمام يلا...

اتجهزت ولبست الفستان مع ميكب بسيط وهادئ يبين ملامحي بس سلسال فضه ع شكل قلب نازل سمعت المغرب اذن الحمدلله كنت متوضيه صليتو ولبست حجابي وقعدت متوتره بعد ربع ساعه جاتني لمياء قالت لي جاا ارح عاينت ليها والتوتر خلاص فيني قلت ليها م ماشه قالت لي لجين قدامي سريع.. اتوكلت وطلعت...

يتبع...