#طوبى "جنة طوبى"
#جمان_فريد
#الجزء_الستون"فلاش باك"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
🚫تنويه🚫
الرجاء التركيز ع سياق الاحداث..والتركيز ع التواريخ والمرور الزمني قصير او طويل....
☕☕☕☕☕☕☕☕☕☕☕☕☕☕☕☕☕
وفي نفس الوقت..
واقفه في كوجينتها تغسل في الماعين..
وفي جنبها الراديو مفتوح تسمع فيه..
يذاع فيه برنامج آرام اللي يخرج فيه مهند...
والحلقات متاعه مسجله....
🌟آرام:شن اغرب القصص اللي قابلتكم.؟
الضيفه؛والله شن بنقولك القصص الغريبه والصادمه هلبه..
زي مثلا واحد جانا بيحول صغاره كلهم من نفوسه 3هما..
لأنهم تلاته طلعوا مش صغاره هو..
سكتوا كلهم...
وآرام قالت؛لاحول ولاقوة الا بالله..
🍃طوبى وهي عاقده حواجبها بضيق قالت؛اللهم جيرنا...
☘وفي حوش بوها..
كانت عمتها تصفي في الشاهي وهي تسمع...
ع خشة فردوس عليها قالت:طاب الشاهي؟
مطيره؛غير اسكتي شويه..
سكتت فردوس وهي تشوفلها بعدين قعدت تسمع معاها..
🌟ارام:كارثه كبيره..
الضيف:فعلا والله حاجات صارت قدامنا لاتصدق..زي واحد هو شاب عمره30 سنه جانا يبي يحول اسم بوه لأنه اكتشف انه مش بوه..
الضيفه؛هدا قصته اثرت فيا شخصيا..امه في شبابها غلطت مع واحد..ولما عرفوا اهل الراجل باللي دار ولدهم جبروه يتزوجها..طبعا وقتها كانت حامل هو عقد عليها وقعد معاها اسبوع واحد بس بعدين اختفي..
ارام؛لاحول ولاقوة الا بالله..
:سمع باللي صار معاها قريبها راجاها لين ولدت وبعدين عليها وسجل الولد ع اسمه ورباه ع اساس انه ولده لين ولى عمره 30عام ولما عرف الشاب بالحقيقه حاول يغير اسمه لحرمة التبني في الاسلام...
ارام؛شي مؤسف يدمي القلب..
؛جدا..ناهيك طبعا عن قصص عن اللي يتزوجوا بدون مايثبتوا زواجهم هادم بحكم القانون كأنهم مش متزوجين ولو في لحظه يموت الزوج او ينكر الزواج المراة والصغار حيتعبوا هلبه من المشاكل اللي حيواجهوها..
ارام؛في لحظه..وماتأخذونيش ع الكلمه ومايأخذونيش مستمعينا حيتحلوا لأبناء غير شرعيين..
🍃في سيارة صابرين..
اللي كانت فاتحه راديو ويسمعوا هي ونجاة في البرنامج..
قالت؛سمعتي..
نجاه شبحتلها شويه بعدين شبحت القدام...
وصابرين شبحتلها بطرف عينها بعدين حركت عيونها القدام وهي تحرك في راسها يمين ويسار..
🍃🍃🍃🍃🍃
🌟آرام؛وفي ختام حلقتنا اليوم..
نشكر ضيوفي الاستاذه نعيمه بالخير...والاستاذ عبد الرزاق المجذوب ع وجودهم معانا نشكرهم هلبه...
:العفو..بارك الله فيك..
آرام؛ونشكركم انتم مستمعينا ع حسن استماعكم نستقبل ارائكم عن موضوع الحلقه واقتراحاتكم لموضوع الحلقه الجاي ع صفحتنا...ننقل ليكم تحياتي اني المعده والمقدمه ارام عيسى..والمنفد وائل جمعه..والمخرج مهند بن زايد
والسلام عليكم ورحمة الله وبركاته..
🍃لما سمعت فردوس اسم مهند قالت بحسرة؛خسارته والله..
مطيره تنهدت بحسرة وقالت:ايه والله..
بعدين خدت السفره وقالت؛هي تعالي كان بتشربي شاهي..
فردوس:هيا..
ومشت طلعت وراها..
🍃وين جو خاشات للصاله سمعوا صوت سيارة اسعاف..
انفجعوا..
مطيره؛يالطيف!..
فردوس:زعما منو؟
ع جية لطفي من داره وهو يقول:صوت سيارة اسعاف!..
فردوس:ايه..
🍃وفي الشارع..
فاتت سيارة نبيله جنب سيارة الاسعاف اللي كانت مدرسه قدام حوش شنيبه..
درستها قدام حوشهم ونزلت تشوف شن صاير..
شافتهم خاشين بالنقاله لحوش شنيبه..
زي ماشافوهم ربيع والتارقي..والتونسي من قدام محله..
🍃ربيع بقلق؛يستر الله..
وجنبه عبد القيوم يشوف وع وجهه ملامح القلق..
وتطلع النقاله وحواليها نضال وخديجه ومحمد ومغليه طالعه
وراهم وهي تبكي..
ربيع ركز شاف طرف وشاح وشعر طالع..
طول عرفها نسرين..
انفجع وقال:نسرين!
وعبد القيوم طول شبحله..
🍃ركبوها السياره
وركبوا معاها محمد وخديجه..
اما نضال خدي امه وركبها سيارته وركب معاها...
ولحقوا سيارة الإسعاف..
ربيع شاف يزن واقف برا..
مشاله بسرعه وقف عليه وقاله بقلق بشديد؛شن في يايزن شن صاير؟
يزن شبحله وقال:عمتي طاحت ومش عارف..
قعدت يشوفله بملامح قلق وخوف واضحات..
ومن بعيد شويه عبد القيوم يشبحله..
ربيع بعدين شافله ومشاله وقف عليه وقاله؛وين تتوقعهم رفعوها؟
عبد القيوم؛لأقرب مصحه اوعياده..
هز راسه وقاله؛صح صح..
ومشي خطوتين للخلف بعدين لف ومشي لسيارته يجري
ركبها وشغلها وطلع بيها يجري..
فات من قدام لطفي اللي قص الطريق ومشي لعبد القيوم..
وصل فيه وقاله؛شن صاير؟
عبد القيوم؛مش عارف بالضبط بس الباين وحده من بناتهم صايرتلها حاجه..
🍃وبنات فايزة مروة وصفاء وتاله واقفات في الروشن يشوفوا..
صفاء بقلق؛ابله نسرين شكلها بتجيب..
مروة:مازال نحس فيها..
صفاء؛نسمع في ماما يومها تقول ليها اسبوعين خاشة السابع..
مروة:يجيبوا في السابع؟
صفاء:ايه..
تاله:ان شاء الله ماتموتش..
شهقت مروة..
وصفاء قالت؛بعيد السو..
🍃ومقابلهم في حوش الصيد..
نجاح؛قالت اختها نسرين لقوها طايحه في الكوجينه..
نجمه؛ووه عليها..
عواطف:زعمه تخسر العيل ولاتصيرلها مصيبه!..
نجاح بخوف:لابعيد السو عليها مسكينه ربي يلطف بيها..
نجمه:آمين...
🍃🍃🍃🍃🍃
"علاش تبكي ياسدرة"
سدرة ببكي؛خايفه تموت..
راما:لالا بعيد السو..نحس فيها بتجيب وبيجينا بيبي جديد..
سدرة وهي تبكي؛يارب ومايصيرلهم شي...
🍃🍃🍃🍃🍃
وفي مصحة القدس..
دخلوا نسرين..بعد مادارولها الفحوصات اللازمه لقوا انهم لازم يديرولها عمليه قيصريه وفي اسرع وقت...
خديجه وهي تبكي؛شن فهمتي منها يام لما قعدت تقول خداهم خداهم..!
مغليه ببكي:واني وين نعرف يابنتي وين نعرف..
خديجه وهي ترشف؛خلاص يام خلاص..قعمزي قعمزي حبيبتي..
وبعيد عنهم بمسافه..
كان محمد يتكلم بالتليفون..
محمد بخوف؛ايه توا دخلوها العمليات....تمام..
وسكر..
ع جية نضال وفي يده شيشه ميه؛خبرتهم؟
هز محمد راسه بإيجاب..
وفات من جنبه نضال ومشي لأمه واخته بش يعطيهم يشربوا...
🍃🍃🍃🍃🍃
ركب يجري في الدروج وهي وراه..
الجالي:مش عارف شن صار بالزبط..
طوبى؛بنمشي معاك..
وصلوا فوق وهو يقوللها:وتي روحك فيسع..
ومشوا بسرعه خشوا دار النوم...
🍃🍃🍃🍃🍃
ونسرين تحت العمليه اللي كانت فيها مخدرة تخدير جزئي..
والدكتورة قاعده طلع منها ولدها اللي ماكملش المده المحدده لوجوده في رحم امه..
الخبر المفجع اللي جي لامه خلاه يجي قبل اوانه..
الاتصال اللي جاها كان من قريبه حامد..
اللي خبرتها انه هاجر بأمه وصغاره برا البلاد الى غير رجعه وخدي معاه كل شي واشغاله هني نهاهم...
وين جاها الخبر عقلها ماتحملش..
من جهة صغارها اللي معاش مازال تحلم تشوفهم في حياتها..
ومن جهة العيل اللي حتنجبر تربيه بروحها وتتحمل مسؤوليته كامله...
طلع هالولد للحياة اللي مش معروف شن حيشوف فيها..
طلع لحياة امه رافضه وجوده فيها...
كيف بيكون مصيره وشن حيشوف فيها...الله وحده اللي يعلم...
☘☘☘☘☘
بعيونها اللي لونهم حاير...
كانت تتأمل في الاطفال اللي في الحضانه..
ع وجهها ابتسامه خفيفه وبينها وبين روحها قاعد يدور حديث سري..
"تو انت بتكبر في بطني لين تولي هكي!؟..لالا اكبر من هكي..ياروحي..ياقلبي..ان شاء الله نجيبك بعد 9شهور ع خير يارب وانت في احسن حال ويحطوك جنبي وين نفتح عيوني نلقاك حداي...ياقلبي قداش متشوقه لهداكا اليوم"
قطع عليها حديثها معاه..
صوت حماتها وهي تقول..
"خاطرك ديري الصغار"
شبحتلها وقالت بإبتسامه تخفي التوتر؛هلبه..
خديجه؛وشن تراجو؟
هي هربت بعيونها عنها وقالت؛ربي يسخر الحال..
تنهدت خديجه وقالت؛آمين..
بعدين قعدت تشوف لولد نسرين وهي تقول:ياروحي عليه..عليك وقت وظروف جيت فيهم..
طوبى بضيق؛بتعطيه لبوه زي ماقالت؟
خديجه؛اكيد..من الاول قالت ماتبيشي..
سكتت طوبى وهي تشوف للطفل الرضيع وقلبها موجوع عليه..
🍃قدام المصحه...
ممرضه:حالها باهي والعيل حاله باهي حتى هو..
مد ربيع فلوس للممرضه وقال؛بارك الله فيك..
خدتهم منه وحطتهم في جيب البالطو وبسرعه مشت خشت للمصحه..
اما هو مشي طلع من الصحه وع وجهه مرسومه ابتسامه فرح خفيفه وكأن العيل ولده هو...
🍃وامه..
فاقت وهي تبكي...
وامها حداها تسأل فيها..
مغليه ببكي؛غير يابنتي قولي خيري تربحي..
نسرين وهي تشهق وتبكي:هرب بالصغار يام...حامد هرب بالصغار هاجر يام....وحرمني منهم..وخلاني مع هدا بروحي..حتى هو معاش نبيه علاش خلاهولي علاش.
مغليه بخوف؛خلاص اسكتي وهدي روحك تربحي مش باهي ليك راك نافس..
ع خشة الممرضة وفي يدها الولد ووراها خديجه طوبى.
نسرين وين شافاته زادت انفعلت وقعدت تقول؛طلعوه من ع شبح وجهي..مانبيشي..مانبيشي..
خديجه بصدمه:خيرها..
ونسرين قعدت تخبط ع وجهها وهي تقول:طلعوه طلعوه باش تفهموا..
مغليه وهي مرعوبه ع بنتها قالت للممرضه؛طلعيه طلعيه..
طلعت الممرضه بالعيل وهي مصدومه..
وطوبى طلعت وراه...ووقفت في الباب وهي تشوف في الممرضه كيف رافعه العيل ودموعها ينزلوا بألم..
وبحركه لاإراديه حطت يدها ع بطنها وهي حاسه بالخوف..
🍃وداخل..
حاولوا ا امها واختها يهدوها بس ماقدروش..
لين جتها الدكتورة شافت حالتها واضطرت تعطيها ابرة منوم..
🍃🍃🍃🍃🍃🍃
الساعه 7:00مساءا..
في جنان حوش لطفي الواعر جهة الكوجينه..
فايزة وهي تمسح في دموعها:مابتش ترضعه ولاتشوفه قالول جتها حالة هيستريا وين خشوا بيه عليها..
فردوس بوجع؛بالك جتها كآبة بعد الولاده؟
فايزة؛لالا مااعتقدش من قبل ماتجيب كانت حاطه في بالها ماتخليش العيل عندها..
مطيره؛وباهي علاش صار فيها هكي وين عرفت ان طليقها هرب بالصغار برا البلاد؟
رشفت فايزة وقالت؛هي صح ماكانتش تبيهم معاها لكن قلبها مطمن لأنهم قراب عليها وتعرف اخبارهم وتقدر تشوفهم من بعيد لبعيد...
فردوس:قصدك كانت تشوف فيهم من بعيد لبعيد؟.
هزت فايزة راسها وهي ساكته..
مطيره حطت ايديها فوق بعض وقالت وهي تمرر في نظرها عليهم؛نحمد ربي اللي حرمني من الذريه..
شافولها الزوز بضيق...
وكل وحده فيهم للحظه حست ان مطيره في نعمه...
🍃🍃🍃🍃🍃
"كله منك انت علاش تبعتله في ناس يضربوه مش طلق بنتك خلاص معاش قعد بينه وبينا شي"
محمد شنيبه بعصبيه؛دايره روحك خالية قضيه!..اني من خلاني ندير هكي غيرك انتي قولي مني..طيح قدرنا..هان بنتنا..طلع عليها...وغيره وغيراته...راجل غير يسمع كلامك هدا يدير احرف..
هي سكتت وع وجهها ملامح الغضب..
وهو قال؛قولي لبنتك ولدها ولدي ماتخمم في شي خبرت عمامه الكل.ب هداكا وهما قالوا خبرناه وقالوا وكلهم يسجلوا العيل ع اسمه لكن قال مستغني عنه ومايبيشي..
مغليه؛تستغنى عليه صحتك ياربي.
هو قال؛انتي توا هدي بنتك وخليها تحط في عقلها في راسها..
تنهدت بحسره وقالت؛طلعهم من عقولهم ياربي...
🍃🍃🍃🍃🍃🍃
في الطريق...
الجالي بضيق:خلاص ياطوبى وجعتي قلبي..
طوبى ببكي:اسفه..لكن منظره ياروحي بين عيوني شن ذنبه هو شن ذنبه هو مالاش ذنب في شي..يوجع كيف هكي مايبيه حد جي للدنيا وامه وبوه مايبوشي..
وحطت يدها ع فمها وقعدت تبكي..
الجالي ودموعه في عيونه قال؛لاحول ولاقوة إلا بالله والله ماعارف شن نقول..
تنهد..بعدين شبح لطوبى..
ماتحملش شكلها وهي تبكي..
خداها لقلبه وهو يسوق..
هي قالتله بنبرة باكيه؛ماتقدرش تسوق هكي..
الجالي؛نقدر..خلاص سادك بكي...
هي قعدت شاده فيه وتبكي...
لحظات وبعدين هدت روحها وتباعدت عنه وقعدت شاده يده لين وصلوا للفيلا...
🍃🍃🍃🍃🍃
وفي شقه نجاة..
من لما روحوا بالصغار من المدرسه..
وهي حابسه روحها في دارها تفكر في كلام مختار عن الجالي..
برغم انها مش قادره تصدقه لكن دخل لقلبها الشك..
قعدت وهي تفكر..
تحارب كل فكرة بضدها..
ودافع عن الجالي بينها وبين نفسها بكل قوة من حبها الشديد ليه..
وع هالحال قعدت نجاة..
لين ليل الليل...
وجاها اتصال...
وين شافت تليفونها...
شافت اسم المتصل...خافت...
الجالي..يتصل بك..
بس مع هدا ردت...
نجاة وهي تحاول تخفي خوفها:ايوه..
"فايقه ولانوضتك من النوم"
نجاة بإستغراب:لافايقه مازال بكري ع النوم قاعده الساعه عشره..خيره صوتك هكي؟
تنهد بعمق بعدين قال..
"ماسمعتيش باللي صار لنسرين؟"
هي قالت بإستغراب اكبر:لالا خيرها؟
🍃🍃🍃🍃
وفي الوقت اللي يحكي فيه الجالي مع نجاة وهو في الدور الأول..
في الدور التاني..
في المرسم...
طوبى كانت راقده وفي ودانها السماعات تسمع بيهم نبضات قلب عيلها..
ودموعها ينزلوا وهي راقده...
تأثرت هلبه باللي صار مع نسرين وعيلها وماقدرتش تتخطى اللي صار بكل..
🍃وتجيها من عالم المنامات رساله سماويه...
حلم..او رؤيه مش معروف...
☄شافت روحها راكبه مع الجالي في سياره..
هو يسوق ويشبح للطريق وبس..كان يبان بملامح مش مريحه..
وهي جنبه تشوفله وهي مضايقه وفي عيونها حزن..
بعدين غيرت عيونها عنها وشبحت القدام..
كانت تشد في بكاها بس ماقدرتش وقعدت تبكي..
وهي حاطه يدها ع بطنها...
فجأة..
وقفت السيارة..
هي فتحت الباب ونزلت وسكراته..
وقعدت واقفه تراجي فيه هو ينزل بس مانزلش..
شافت للباب الخلفي..
بعدين مشتله..فتحاته وركبت وسكرت الباب..
وشافتله..كان قاعد يشبح القدام وماباش يشوفلها نهائي...
وبدون سابق انذار..
ينفتح الباب وسمعت صوت حد يقوللها..
"انزلي"
هي شافت للباب..
كان فيه واحد واقف قدامه بس ملامح وجهه مش واضحه..
وهي شافتله..
قال...انزلي..للمرة التانيه..
هي قعدت تشبحله بخوف ويدها ع بطنها ومابتش تتحرك...
هو شدها من ذراعها وطلعها من السياره..
وسكر الباب..
والسيارة طول تحركت وتباعدت عنها..
وهي معاها بعيونها لين تباعدت واختفت...
☄فاقت..
فتحت عيونها وهي تشوف لجهة وحده وتتفكر في الحلم..
عقدت حواجبها وناضت بالشويه قعمزت..
حست بالسماعات في وذانها..حولتهم..
بعدين ناضت وقفت ومشت طلعت من حجرة المرسم..
توجهت لدار النوم..
وهي ماشيه شافت لحجرة المكتب متاعها لقتها مفتوحه وضيها مسكر..
غيرت عيونها عنها وهي مكمله طريقها لدار النوم..
خشتلها..
دورت بعيونها ..وشافت للحمام لقت ضيه مطفي..
لفت وطلعت ومشت نزلت من الدروج..
درجه درجه تنزل وهي حافيه..
لين وصلت لوطا...
مررت نظرها ع المكان
شافاته واقف قدام الفيرندا المسكرة يتكلم بالتليفون وهو عاطي بالظهر..
قدمتله لين وصلت فيه وسمعاته يقول...
تمام نتلاقوا غدوة..سلام..
وسكر...بعدين شبح للفيرندا وتنهد...
والتفت بيمشي..وين شافها واقفه انفجع..
وهي واقفه تشوفله بعيون ناعسه ونظرة ضيق..
هو قال:امتى جيتي!؟
هي قالت:توا بس..قدمتله اكثر ومدت يدها وقالت..تعالى معاي مانبيش نقعد بروحي فوق خايفه..
قالت كلامها وهي مازال مش واعيه لروحها..
هو شاف ليدها وشدها بعدين قربلها وقال؛مش شني خايفه..
هي قالت؛من الليل..
استغرب كلامها...
خدت يدها وحطتها ع كتفها وشدت فيه وهي تقول؛هي نركبوا بنرقد..
هو قال؛باهي..
ومشي بيها وهي سألاته؛ماكلمت حد سألته عن نسرين وولدها..
هو قال؛كلمت امي وقالت قاعدين ع نفس الحال مافيش جديد...
هي هزت راسها وسكتت..
وصل بيها الدروج وركبوا..
وهو من داخل يحمد في ربي اللي ماسمعتاش طوبى مع من كان يتكلم...
وهي كانت تفكر في الحلم اللي شافاته وكل ماله الخوف في داخلها يكبر...
🍀🍀🍀🍀🍀
ويعدوا يومين...
ونسرين رافضه ولدها وماتبيش من يكلمها عليه وكل مالها نفسيتها تزيد تتعب اكثر...
وحالها هدا تعب اهلها معاها...
ولدها..
كانوا يطلوا عليه..خالته خديجه ومرت عمه طوبى..
وبوها دفع للتمريض بش يزيدوا يهتموا بيه أكثر..
🍃سمع باللي صار معاها..خوها المهدي ومرته عائشه اتصلوا بالعيله وكلموهم..وهي حاولوا يكلموها بس كانت رافضه تكلم حد ولاتشوف حد...
🍃ومع اهلها كان ربيع متغشش عليها زي مانقولوا"قلق"
يفكر فيها وفي حالها ومش عارف كيف بيتصرف هو كان يراجي في هاللحظه بفارغ الصبر وين جت صار عكس اللي توقعه وتمناه...
🍃من جهة تانيه..
عبير علقت في عبد القيوم..وقعدت تجي لطوبى للمدرسه بش تشوفه..
وهو بكل مافيه هايم بأم العيون الحايره اللي قاعد يجاهد بش مايندسش حبه الطاهر ليها...
وين تجي يهرب..وبعيونه مايبيش يلمحها..
لكن سطوة عشقها ع قلبه كانت كبيره واقوى منه بهلبه..
🍃زي ماصار مع وليد اللي صار بينه وبين امه وبوه مشكله كبيره لانهم رفضوا يمشوا يخطبوله بنت عمه..
وهو بش يضغط عليهم ويخليهم يرضخوا لرغبته سيبلهم الحوش واختفي ومعاش عرفوا عنه شي...
🍃وإياد خبره ولده انه انفصل عن آلاء ورفض يقوله الاسباب..
كل اللي قاله انهم ماتفاهموش وهو لأنه عارف ولده كويس عرف ان في شي كبير صار خلاه يتخلى عنهابرغم حبه الكبير
ليها...
لكن اياد دار الاصول ومشي لحوش لطفي الواعر ونهي معاه كل شي بإحترام وبدون خسارة الود اللي بينهم...
وبعد اللي صار رفض مهند يرجع لشارع القهوة وقعدوا هو وبوه في شقه آيجار في احدى احياء العاصمه الشهيرة...
🍃والحال كما هو عليه عند باقي سكان شارع القهوة واصحابهم...
ماعدا حسين اللي حيدير خطوة رسميه ويبعت ماليه يخطبوا حسناء يوم الخميس....
🍃🍃🍃🍃🍃
وجي يوم الخميس....
1مارس...سنة 2018
الساعه 11:00صباحا
في مدرسة اجيال..
طوبى واقفه قدام فصل الروضه تكلم في أبله زهره بخصوص التجهيزات لعرس اختها..
طوبى:حبيبتي والله ماحاسبتها الا وخيتي ودرتلها كل شي واني فرحانه وطامعه نحضر العرس ونهيج فيه..وضحكت..
الابله قالت بإبتسامه؛تجي من غير عزومه استاذه قتلك قبل نفرح هلبه بجيتك..والله امي من امس وهي تدعيلك لعند مااليوم وين جيت طالعه وصتني نسلم عليك وقالت الله يربحها دنيا وآخره..
ابتسمت طوبى وقالت؛يارب..ويطول في عمرها..
زهرة:آمين..تسلمي يارب...
☘وطوبى هني..
وعبير صاحبتها جت في نفس الوقت بس بدون ماتخبرها لأنها كانت ناويه دير شي عارفه طوبى حتعارضها فيه..
طلعت للساحه وشافت جهة المبنى الخارجي..
لقت العمال ومعاهم عبد القيوم ..
بكل جرأة..
مشتله...وهي متحمسه ومتشوقه..
وين وصلت في السياج الفاصل وقفت..
استجمعت شجاعتها وقالت؛لو سمحت..
هو كان مركز مع العمال ماسمعهاش..
بس واحد فيهم شافها وسمعها وقال:باش مهندس..
شبحله عبد القيوم..
اشرله الراجل ع عبير..
هو التفت وشافلها..استغرب..
هي ابتسمت وقال وهي تتكلم بيدها؛شويه بس..
هو غير عيونه للعمال لقاهم يخدموا ويسرقوله في النظر..
انحرج بعدين عقد حواجبه وقدملها..
طلع برا السياج ووقف قدامها بمسافه وقال:نعم!..
هي وين شافت ملامح وجهه الخشنه..ملامح وجه الرجل الصحراوي المميزة..
عقد حواجبه الكثيفه..نظرة عيونه اللي تعطي تعبير الغضب برغم انها كانت عاديه جدا...
لحيته الخفيفه..وشواربه الكثيفه.."شنبه"..
زادت انجذبتله اكثر....وزاد اعجابها بيه...
ضحكت وقالت:داير روحك مش عارفني!
هو قعد يشوفلها بإستغراب اكبر..وهو يحاول يتذكر من تكون...
تنهدت وقالت اللي في داخلها كله في مرة بدون تردد؛عندك حق تتصرف هكي..نزلت عيونها وقالت..بس يعني..شبحتله وقالت..ماكنتش نعرف لما رفضتك ماكنتش نعرف شي عنك..وصاحبتي مديرة المدرسه هادي حكتلي كل شي بصراحه انصدمت وتفاجئت..وحسيت ربي كاتبلي حاجه معاك لما خلانا نتلاقوا مرة تانيه وفوقهاتطلع جار صاحبتي..
ارتخوا ملامح وجهه شويه وهو يفكر في كلامها
وبدي يذكر لما كان يمشي لطوبى الكليه ومرتين شافها مروحه لحوش يحسابه حوشها يعني
هالحوش حوش البنت هادي...!
باهي هي واهلها رفضوه...شن اللي خلاها توا تغير رايها وتجي تكلمه..
وقالتله ماكنتش نعرف...!
شن اللي ماكانتش تعرفه!؟
يعني صاحبتها اللي تحكي عنها واللي هي طوبى حكتلها قصته...وهي اللي غيرتلها رايها!...
عبير:خيرك ساكت؟ تكلم...
🍃ع طلعة طوبى من قسم الروضه اللي يفتح ع الساحه..
شافت للساحه بنظرة عابرة..
بس عيونها ثبتوا ع عبير وهي واقفه ع عبد القيوم..
انصدمت وقالت؛حي عليا هادي شن دير!؟
🍃وهو في حالة من الصدمه مع الارتباك والحيره..
ماعرفش بشن يرد ع عبير..الموقف محرج لعبير اكثر مايكون محرج ليه هو..وهومايبيش يحرجها...
غير عيونه عنها..جو ع طوبى...
طوبى وين شافلها انحرجت غيرت عيونها طول عنه..
وهو غير عيونه وقال:نستأذن..
ومشي وخلى عبير وهو مرتبك ومعصب في نفس الوقت..
الموقف كان صعب ومحرج ومربك هلبه بالنسبه ليه..
وضايقه ع الآخر...
عبير قعدت معاه بعيونها وهي مستغربه فيه..
فجأة..رن تليفونها..
قاماته وشافت المتصل...طوبى..
قالت؛اكيد عرفت اني هني..
خدت نفس بعدين التفتت..
نزلت طوبى تليفونها وهي تشوفلها بغضب بعدين مشت بتخش داخل..
وعبير تأففت وقالت؛شن بيخلصني من لسانها..
رجعت شافت لعبد القيوم..لقاته واقف وعاطيها بالظهر..
ضايقت بعدين لفت ومشت بتلحق طوبى..
🍃🍃🍃🍃🍃
في مكتب الادارة..
عبير:اني نبي نفهم علاش طايرتلك انتي؟
طوبى بشي من الانفعال؛تبي تعرفي علاش طايرتلي!؟ راك صاحبتي والراجل جارنا والحركه اللي درتيها بايخه هلبه تو يفهم ان اني مشجعاتك عليها..
عبير؛مش بيبي اني بش توجهيني انتي ولاغيرك نتصرف من عقلي ماحد ليه علاقه..
طوبى هدت نفسها شويه وقالت؛باهي انتي شايفتيها حلوة في حقك الحركه اللي درتيها!؟
عبير:طوبى هو يحبني ويبيني وياما دار ع خاطري وانتي تعرف كويس اللي درته اني مافيشي تقليل مني بكل.
طوبى؛لافيه ياعبير..الراجل ولامرة جاك وكلمك مشي طول لحوشكم وطلبك من اماليك هو مارضهاش عليك يخش معاك في جو العلاقات ولارضي يديرلك شبهه...تنوضي انتي اليوم وبكل...وسكتت..بعدين قالت..تمشي تكلميه وتقوليله الدوة هادي!..
عبير لما سمعت كلام طوبى وقعدت تفكر فيه اقتنعت بيه وضايقت هلبه..
طوبى:مش قتلك اني بنكلملك بنت عمته وهي تكلمه ياعبير!
عبير بضيق؛الحق كنت نبي نشوفه عن قرب اكثر..
طوبى؛وكنتي تبي تشوفي ردة فعله لما تكلميه ولا؟
ضيقت عبير عيونها بإحراج وهزت راسها وهي ساكته..
ضحكت طوبى غصب عنها وقالت؛هبله..
عبير بضحكه احراج؛حلو الشعور هدا هلبه بيبو وين تشوف علامات الحب ع حد يحبك..
طوبى بضحكه؛يعطيك حبه..استغفر الله العظيم..
عبير قعدت تضحك..
طوبى هدت ضحك بعدين تنهدت وقالت؛نوضي ياهبله خل نمشوا للكليه معاش مازال هلبه ع الامتحان..
ناضوا الزوز وعبير قالت:ماطحتش من عينه طوبى صح؟
لبست طوبى شنطتها وقالت؛مش لهالدرجه..خلاص معاش تفكري في الموضوع..خلي عقلك في الامتحان وبس..
خدت تليفونها وقالت:هيا..
ومشوا الزوز وطلعوا من المكتب وقعدوا يتكلموا في نفس الموضوع اللي مابتش عبير تسكره من كثر ماكان شاغلها...
🍃🍃🍃🍃🍃
الساعه 2:00بعد الظهر..
خشت نبيله لمكتبها وهي تاعبه من الخدمه..
كانوا عندها زوز مرافعات تعبوها جسديا ونفسيا...
قابلتها السكرتيرة وهي تقول؛اهلا استاذه..
نبيله؛اهلا..
؛استاذه عندك ضيف..
عكرشت وجهها بنرفزة وقالت بصوت هامس:اييييه عليا..
السكرتيرة شدت ضحكتها..
وهي قالت؛باهي ديري قهوة..
:درته ودخلتهاله..
نبيله؛ديريلي اني ياستي راسي بيتفجر...
؛حاضر..
مشت نبيله خشت لحجرة المكتب..
وقفت في مكانها لثواني لما شافت الضيف بعدين قال وهي متفاجئه؛اهلا..!
هو ابتسم ووقف وهويقول:اهلا بيك..اسف جيت من غير موعد..
هي شافتله شويه بعدين مشت للطاوله حطت شنطتها وقعمزت ع الكرسي وهي تقول:وكان خديت موعد خير..قعمز..
قعمز وقال:واضح تاعبه..
هي قالت؛مدام واضح لهالدرجه نعطيك موعد ليوم تاني ونوض روح..
رفع حواجبه بتعجب..
هي انحرجت تحسابه بيرد عليها ردوده المازحه بحده زي ايام زمان...
هربت بعيونها عنه وقالت؛ع العموم مش مشكله..شافتله تاني وقالت..تفضل بشن نقدر نخدمك..
بدت ع وجهه ملامح الزعل وناض وقف وهو يقول؛اسف كان مفروض ناخد موعد قبل مانجي نتصل بيك في وقت تاني ونحددوا موعد تكوني فيه بحال احسن نستأذن..
هي قعدت تشبحله بصدمه معاش عرفت تنطق..
وهو مشي طلع من المكتب..
رمشت عيونها وهي مصدومه وقالت في نفسها..
"حي عليا شن درت!؟"
حطت يدها ع فمها وقالت؛عليك احراج..!
غمضت عيونها ونزلت يدها بعدين فتحتهم وهي تشوف للطاوله بضيق..
"حي ع العبيطه اللي صدقت"
فنصت عيونها وشافت للباب..
خش وهو يضحك..وولى قعمز ع الكرسي وقال بضحكه..مازلتي زي زمان تمشي عليك طول..مش عارف كيف وليتي محاميه مخضرمه..
هي قالت:مخضرمة شني متاعك هادي!؟ شن تشوف فيا خاشه ع السبعين!..
هو قال؛كبرنا يانبيله ماتعانديش الوقت..
هي قالت:العمر مجرد رقم العبره بالصحه واني الحمد لله اصح من بنات العشرين وباينه شباب اكثر منهم..
ابتسم وقال:الصراحه صح..بس اني كبرت..وكبرت بزياده ع عمري..الغربه تكبر البنادم ضعفين عمره..
بدت ع وجهها ملامح الحزن وهي تسمع وتشوفله كيف يتكلم..
رفع حواجبه وقال:بس راهو صحتي مليحه الله يبارك لاسكر لاضغط لاقلب لاروماتيزم ولاغيرهم..
ضحكت بإستغراب:مالاشن كبر فيك؟.
تنهدوقال؛روحي يانبيله..روحي من داخل شابت..
رجعت ملامح الحزن ارتسمت ع وجهها..
وهو يقول:مانحبش نشكي ونحكي تعرفيني ولانحب المقدمات اكيد حافظتيني..
بدت نبضات قلبها تتسارع..
هو خدي نفس وقال..نبيله تعالي نكملوا اللي وقفنا فيه قبل 20سنه..
نزلت عيونها ..ووجهها اكتسي باللون الاحمر..
هو قال؛نبيله..اني كلمت نسيبي يقول لوحده من العيله تفتح معاك الموضوع بس شكله فاتني..
هي قالت بدون ماتشبحله:لاقالولي..
هو بإستغراب؛علاش ماردتيش؟
نبيله؛كنت نفكر..
رفع حاجبه وقال؛تفكري!...
قعدت ساكته..
وهو كمل يقول؛ولاثقلي في روحك وتشحطي فيا..
شدت ضحكتها ومازالوا عيونها لوطا..
هو ابتسم وقال؛بنفتح الموضوع مع خوك كان ردني حتى هو بناخد منه بنت اختي..
رفعت عيونها فيه وقعدت تضحك..
هو قعد يشوفلها بإبتسامه عبت وجهه وصغرت عيونه هلبه..
وهي قالت بضحكه؛لابالعكس رؤوف يبي يفرح بيا اكثر مني..
قاللها؛معناها نفتح معاه الموضوع واني مالي يدي..
رجعت نزلت عيونها وهي خجلانه..
وهو حك انفه وقال؛اللي جيت ع خاطره خديته خلاص.
ناض وقف وهويقول؛نخليك ترتاحي..
شبحتله وهي مبتسمه..
هو غمز واشر عليها وقال؛ترقبي..
ضحكت وهي تحرك في راسها يمين ويسار.
هو ابتسم بعدين قال؛سلامات..ومشي طلع من المكتب..
بعد ماطلع..
هي زادت ضحكتها وطقت ايديها في بعض...
لين سمعت باب المكتب يدق..
هدت ضحك ومسحت دموعها العالقات في جفونها وقالت؛خشي..
خشت السكرتيرة وفي يدها اكياس..
ونبيله تشبحلها بعدم استيعاب..
حطتهم السكرتيره ع الكرسي وقالت؛قالك صحتين واربعه عوافي..وابتسمت..
نبيله شدت روحها وحافظت ع ملامح الجديه وقالت؛باهي تقدري تروحي..
هي بإبتسامه قالت؛حاضر..سلام..
ومشت طلعت من حداها..
بعد ماطلعت نبيله اطلقت العنان لضحكتها وشاف للكياس وهي تقول:ماتغيرش ياربي قاعد زي ماهو...
وناضت من مكانها وهي تقول..خل نشوفوا شن جايب..
🍃ومن نبيله اللي كانت عايشه لحظات حلوة في حياتها..
لنجاة اللي كانت في مكان مستخطي في الشركه واقفه ع الجالي وتكلم فيه..
نجاه؛نمشي نروح بالصغار من المدرسه وطول لحوش العيله.
هو قال:ع فكره بتبات في حوش ماليها..
نجاة؛وخديجه خانوم؟
هو قال:معاش دوريها..خلاص..
هي استغربت كلامه..
الجالي:قريب حتولي مرتي علنا والكل راضي واولهم طوبى..
هي قالت؛جالي تتسهوك عليا!!؟
حرك راسه بالنفي بعدين قال؛ندوي من جدي..في بالي حاجه لو درتها نخليهم كلهم يرضوا ويباركوا...
هي قالت بحماس:شن في فبالك قولي؟
هو قال:خليها لوقتها..وتوا بري بسرعه ولي لمكتبك..
هي قالت؛بنقعد متشوقه هلبه..
ابتسم وقرص خدها بعدين قال؛بري توا..
تنهدت بعدين مشت من حداه وهي فرحانه وفضولها كبير بش تعرف شن في فراس راجلها..
وهو بعد مشت..مشي من جهة تانيه بش يولي لمكتبه...
🍃🍃🍃🍃🍃
يومها طوبى..
كانوا عندها زوز امتحانات...
اخرهم يتم الساعه الرابعه مساءا...
بعد ماكملاته طلعت من الكليه وتوجهت لمحلات تشوف فيهم موديلات اللبس اللي نازله..
حفظت اسم كم محل..
وكتبتهم في رساله وبعتتهم لرقم معين..
بعدين ركبت سيارتها..
وكملت طريقها..وقفت ع كم محل خدت بضاعه وتسالي لزوم سهرة الليله مع البنات...
ومع هالمشاوير..
وصلت للفيلا...الساعه السادسه مساءا...
درست السيارة قدام الباب واتصلت بالجالي..
طوبى:ايوه جولي..اني توا وصلت للحوش..
"واني في الطريق ربع ساعه ونوصل"
هي قالت؛تمام نراجي فيك..سلام..
"سلام"
سكرت وحطت التليفون ع التابلو..بعدين حركت السيارة وخشت بيها للفيلا...
درستها في مكانها المخصص ونزلت منها..
وين جت بتمشي تخش داخل..
دق الباب..
التفتت شبحتله شويه..
بعدين مشتله...وقفت وراه..
وقعدت تقول..
مني...مني...
سكتت شويه...بعدين فتحت الباب...
مالقت حد..مطت شواربها للأسفل بإستغراب..
وين جت بتخش وتسكر الباب..لمحت في الحديد متاعه ظرف ابيض محطوط...
عقدت حواجبها وهي مستغربه..
بعدين خداته...
وهي تقول؛شن هدا؟
فتحاته...وطلعت منه ورقه متوسطه الحجم مطبقه ع زوز..
حست بالخوف وهي تفتح فيها..
ارتخوا حواجبها ورفعت واحد فيهم وهي تقرا في سرها..
(افتحي عيونك..اللي صنتيه مش قادر يصونك )
رفعت الحاجب التاني ورجعت تقرا فيها مرة تانيه...
بعدين نزلتها وقعدت تشبح للقدام في الفراغ وهي تقول:اللي صنتيه مش قادر يصونك!؟...
غيرت عيونها...
طلعت برا...شافت يمين ويسار مالمحت حد..ولاشافت حد...
ولت خشت وسكرت الباب وهي تفكر وخايفه ومش فاهمه شي من اللي صار بكل..
الكلام وكأنه مكتوب بلغة غير مفهومه..
كأنه طلاسم مش فاهمه منه شي..
واكثر سؤال يدور في عقلها توا..من حط الظرف هدا ع باب حوشها!؟
🍃🍃🍃🍃🍃🍃🍃🍃🍃🍃🍃🍃🍃🍃🍃🍃🍃
ممر طويل...اضويته بيضا..
باريلا رافعه نجاه يجروا بيها التمريض بسرعه..
ودمها مداير وراها وباريلا تانيه رافعه حمزة اللي كان ينزف حتى هو لكن وضع ماكانش خطير زي وضع امه...
وحوسه صايره في المصحه هداكا الوقت...
؛اهو هادي شنطتها واحد طلعناها.معاها ولقينا تلبفونها فيها سليم..
خدت الممرضه الشنطه وفتحتها وهي تقول؛خل ناخدوا رقم حد من اقاربها ونبلغوه..
طلعت التليفون..
في اللحظه اللي اتصل بيها الجالي..
الممرضه شافت الاسم وقالت؛زعما راجلها ولاخوها؟!
وطول فتحت الخط وردت عليه..
:السلام عليكم خوي..
"وعليكم السلام..مني رد عليا"
:خوي اني ممرضه في مشفى**** الخاص صاحبه الهاتف دايره حادث هي وولدها وجابوها هني..
جاها صوته وهو مفجوع ويقول..
"شن تقولي انتي! نجاة وحمزة!؟"
:والله مانعرف ياوخيي..انت تعالى للمشفى وشوف بروحك..
"شن اسمه المستشفى هدا قولي"
؛قتلك **** الخاص في *******..
سكر عليها..
هي نزلت التليفون وقالت:اشبح من هو هدا المهم يقربلها وقال جاي...
؛تمام...حطي الشنطه في الامانات..
؛ماشيه..
وحطت التليفون في الشنطه ومشت لقسم الامانات..
🍃🍃🍃🍃🍃
وفي انغام معزوفة الحرب لبيتهوفن..
كان عايش بكل مشاعره...مغمض عيونه..ومسيب شريط الذكريات يعدي...
احساسه بالاضطهاد يزيد يكبر..ويعيش دور المظلوميه اكثر..
ورغبته في الانتقام تقوا وماتخفش..
قطع عليه انسجامه مع انغام السينفونيه..
رنة تليفونه..
فتح عيونه ورفعه بعدين فتح الخط ..
"الامور مشت تمام"
هو قال؛الاسعاف وصلت ع الوقت..
"بالدقيقه والثانيه استاذ..هما توا في العمليات"
قاله؛يصير جديد بلغني طول..
وسكر...مشي تمدد ع الكرسي الاسود الجلد متاعه..
وغمض عيونه ورجع هام في عالم معزوفة بيتهوفن..
"الحرب"
#فلاش_باك
#طوبى
....يتبع....
