"كنت تائها لا اعرف الطريق فقط اسلكها مع الجميع "
....جبل سنجار ٢٠١٤ ....
توقيت مغرب ساعة سادسة ونصف
امشي واباوع على الاطفال الى يبجون حركة من الجوع جنت اسمع طفلة وهيا تنوع وتنكطع من البجي وتشتكي تكول لامها اريد اكل بطني تأديني ... وجنت وين مااباوع اشوف هل منضر اكبالي . ناس واكعين من حيلهم (جوع عطش فقدان ) كلشي متوفر
واشكد اتألمت لمن سمعت مرة جبيرة بلعمر تشتكي وتحاجي ربنا .تبجي وتكول
_يايما شصار بينا يايمااا انت تشوف اشسوو بينا ولكم اخدو ابنييييي اخدوووه...
لما لفضت هل جملة وكعت من حليها وصارت تلطم على راسها من حركة كلبها ..
واني جنت واكفة صنم بس اباوع واحس كلمن شايل جروحه بكل ثقله ودا يشمي وكلبهم يحترك ...
.......
_محمد كلي راح نعيش لو نموت ؟
يارب خلصنا منهم بجاهك . يارب نوصل لأمان
زين انت تعرف وين احنا ... جاوبني محمد .....بس ك..
محمد :خلص حنين اسكتي لخاطر ربج ترا ولله راسي يفر بيا مااعرف شي ، نمشي ويا ناس نموت نبقى مااعرف
جفلني كلامه حيل بحيث رجلية نملن ماعرفت اتوازن وحسيت من عيونه مابيه امل .....
.......
اني حنين ،، بنية بعمر ٢٠ سنه جنت عايشة ويا امي بحكم ابوية متوفي (الله يرحمه) تزوجت حب طفولة بعمر ١٩ سنه ابن جيرانه الي جنت العب وياه واعتبرته صديقي وكل شي .. جانت امي رافضة فكرة زواجي لان اعمامي جانو يردوني لابنهم واشكد حاربنا حتى نوصل لبعض ونتزوج رغم الرفض جان من الكل بحيث علاقتي ويا عمامي وخوالي صارت علاقة سطحية وامي نوعا ماا ... بعد زواجنا انتقلت لبيت خاص بيها اني ومحمد بسس .
وجان السعادة يملي البيت و بعدنا وتونه جاي نفرح بس حسافة ماكملت الفرحة شفنا ضيم وقهر من طب داعش من صارت سقوط موصل
قبل ثلات ايام .....
ساعة ١٠ الصبح
واكفة اغسل صحون وادندن بين نفسي واني مستعجلة علمود اخلص الشغل وترتيب البيت،، حتى دخل محمد وجه احمر ومفرفح وباين عليه ملامح عصبية . ركضت يمه أطمن عليه لان هل ايام جنا عايشين بقلق مابين يدخل داعش او يتحرر الموصل وتلعفر وميطبون على سنجار
حنين : ها محمد احجيلي شصاير
محمد : بلغونا راح يجون علينا باصات كبار حتى ينقلون العوائل الماعدها سيارة نقل او امكانيه فا تجهزي المغرب راح نطلع منا
حنين : مفهمت وليش نطلع .....دفهمني
محمد : هو كتلج نطلع منا لان راح يطبون داعش بليل او الصبح مانعرف لازم نستعجل حنين
أنت تقرأ
أسيرة2014
Romanceالعراق وهو من اكثر الدول الذي يزتنزف ارواح شعبه بكل الطرق ومنها الحروب .. حروب كدرت تخلف وراها ألاف من قصص ومنها قصة حنين الي راح تشرد من ايادي داعش ويا زوجها للجبال سنجار وهناك راح تبلش قصتها وألمها وشنو راح تشوف بعقبات حياتها ترقبوو ..
