أبو رعب

مكالمة صلح جزء 2

( أبو رعب )
..بقلم نورس

#السيت_الاحمر_قضيتنا

..............................

مصطفى: قسور ضربته طلقه تايهه

هو حجة هيج وعمتي عاطت واني احس رجلية نملوا ومكاعد يحملوني ..
صراخ عمتي سبه البيت ومصطفى يسكت بيها

.. ما بيه شي والله طلعوا من العمليات ووضعه مستقر

كمت كدامة واطرافي كلها ترجف

لبوة: الله عليك ما بيه شي لو تحجي تريد تسكتنه

مصطفى: والله وداعت جهالي ما بيه شي حتى عمليته سهله الحمدلله مطلعينها من جتفه

اجه اخذلهم اكل وراح
احس كلبي وجر وما على لساني بس الدعاء
كلبي ما يرتاح الا اشوفه بعيني
للعصر واحنه مثل النار ، خابرت عمتي على عمو جهاد كلتله هسه تجي تاخذني

ما خلاها كلها راح نطلعه للبيت وهناك تعاي شوفي
.. جنت كاعدة بالهول وايدي على راسي
حتى ما كدرت انام رغم التعب اللي استحل جسمي من الطريق والهبطة

جان التليفون على اذنها فتحت سبيكر وحجت تسمعني : شلون بله عيد ما سمعتك

جهاد: ام ريم خليها تحضر نفسها وبنتها جاي أسر يرجعها لبيت رجلها

سهير: صار عيني هسه اكلها

سدته منه وباوعتلي ..
واني بس صافنه

.. ها يعمة ؟ مالج نية ترجعين

سكتت وما رديت وافرك بأيدي ودموعي مغوركة عيوني بدون لا تنزل ..

اجت كعدت يمي وتحجي وياي : ارجعي عمة وانسي مو كافي الصار بأبو بنتج ربج لطف بحاله الدكتور يكلهم بين الطلقة وكلبه كم اصبع .. يمكن بخت هالبنية لو بختج انتي وكتبله الله عمر جديد
لو صايرله شي لا سامح الله وانتي بعدج بزعلج .. يفيد الندم بعدين ؟

مسحت دموعي وكملت كلامها وهي توصيني

.. كومي يمه اخذيلج جنطة بيها كم هدمه الج ولبنتج وارجعي لبيتج وفرحي رجلج بشوفتج .. ميدري بيج تردين ترجعين خلي بلكي من يشوفكم ترتاح نفسيته
وهناك شتردين تسوين سوي تعاتبوا تعاركوا تصالحوا بينج وبين رجلج

هزيت راسي بوستني وكامت مني ..
كمت غسلت وجهي وخابرت فاطمة تخليلي جنطة بيها ملابس الي ولريم ومناك عمو أسر يمر يجيبها

اجه عمو جايب وياه ريم وطايره وتضحك لان كلها عمو راح اخذج لأبوج ..
راحت وياي عمتي وهم بالسيارة حجوا وياي وينصحوني واني بس اهز براسي

وصلنه ونزلت طبيت للبيت واباوع لكل شبر بيه ..
جربت نفس براحه ورددت : يا رب اجعلها بداية خير

.......

صار المغرب وفاتت الصلاة
يلا سمعنه صوت السيارة جاي من بره