لُقياك (عشك الذيب)

احداث اضافيه .

هزيت راسي ورحت كدامه : اطلعك منها لتقلق بس
ماريد اي مشكله بالتوقيف هسه ابد ..

دخل الضابط وطلع قرار بحبسه او توقيفه اربع ايام على
ذمة التحقيق وياه ، سحبني قصي كدام الكل وطلعني
افكار هوايه براسي بس اكعد بالبيت واستقر يلا افكر
عدل ..

قصي : شتتوقعين ؟!..
: ارجع للبيت واشوف بس بيها ملعوب السالفه
لكن اني اطلعه منها واحتاج اروح للشركه
ولمكان اللوريات ..

واكفين اني وقصي برا ، اجه المحامي يمنه : مدام فجر
ممكن نحجي على انفراد..

: اعرفك استاذ زوجي قصي ضابط .. صافحه قصي
وواضح الازعاج على وجهه : احجي هنا مااظم شي عليه..

المحامي : زين هسه وين حتتحركين ..
فجر : افكار هوايه براسي مامستقره ارجع لبيتي
واشوف ..

المحامي : عندك اعتراض اذا نكون على تواصل ..
داطلع تلفوني دغني قصي برجله بخفه..

قصي : اعتقد تشتغلون انتو مو تلعبون اكيد تكونون على
تواصل ، ام جود تلفونج يمج .. رفعتله حاجبي
: لا احم بقه يم جود انطي رقمك واي جديد اتصل عليه..

تبادلوا الارقام فعلاً حبيت تصرف قصي مافشلني كدامه
بس تضايقت من سوايته بنفس الوكت ، رجعنا للبيت بس
قبلها اشتريت لجود وعشق الصغيره ، وصلنه كلنه
الجو متوتر الاعصاب مشدوده كلهم ..

نزهه : وينه حازم وينه ..
مصطفى : وقفوه اربع ايام ..

فجر : لتخافون شي روتيني هذا بس اكمل واجمع كلشي
والله كريم اطلعه ثقي بيه .. تركتهم يحجون وصعدت
بسرعه على جود كاعده هي وعشق الصغيره يلعبون
بالمسدسات ولا عبالك بنات ..

نطيتهم غراضهم حضنوني : عشق نسوي عزيمه شكغاً فجغي
احبچ..

عشق : شكراً فجري بس ماما متقبل اخذ من احد ..

اجتي امها ورايه وتبتسم : وخالة فجر مو اي احد اصلاً اخذي
عادي ..

جود : ماما اني عادي اخذ من واغث ..
فجر : اي طبعاً عادي ..

عشق :خل يسمعها وارث تكول اسمه هيج والله ولا يهدها ..
ضحكت واجتي يمي للغرفه ، ذبيت حجابي وسولفت الها
الصار ، عشق مو سلفتي بس صرنه اكثر من اخوات كلشي
نحجي لبعض كلشي ونسولف ونضحك وحتى علا ونغم
ومرت همام نسجمت ويانه بسرعه ..

عشق : جودي عليه لتخلين بالج يمها بس طلعي حازم ..
اشرت على عيني ، طلعت عشق ، ذبيت الصايه والحجاب
فتحت شعري وغسلت ، طلعت على الميز كعدت وسحبت
ورقه وقلم ، بلشت اثبت القضيه والاطراف الي الها علاقه..