ألهاربه من الضياع

البارت السابع

-     عندما تبتسِم انسى ما اقول••♥️

#ساره_فاضل
#الهاربه_من_الضياع

مهره
خلصت صلاة الضهر وأني كاعده ع السجاده حسيت براحه موطبيعيه مكان أمان ونضيف اكدر اصلي وادعي ربي بدون ماأستحي منه من مكاني القذر  ولااحس بقرف من الجو الي اني بي يارب ديم نعمتك وسترك عليه وسهل طريقي ومشيلي بي اولاد الحلال اليساعدوني امثال أستاذ وائل
ويارب جازي كل خير ع مساعدته ألي وأشفيله والدته وفرحه برجعتهه لبيتهه يااارب وكدرني اقوم بواجبهه وارجع ولو جزء بسيط من فضله عليه ووكفته وياي وانطيني القوه حته اشيل أمه فوك راسي واعينهه ع مرضهه ياااارب

كملت صلاة ذبيت الجادر وخليته بمكانه فوك السجاده وخليتهن ع الكومدي كمت للمطبخ جنت جوعانه رحت للبتيتايه والبيتنجانه المنكعتهم گليتهم وگليت وياهم فلفله خليتهم سوه بماعون واحد وخذتلي صمونتين وزلاطه خليتهم بصينيه زغيره ورحت للصاله أكل كعدت ع القنفه وگدامي ألاكل صفنت ورحت ليامي القديمه من جانت خاله سليمه تبوگلي اكل بالبوگه من صبيحه ومتخليني أكل أكل موزين توكلني من الاكل الزين الياكلونه وتعتني بيه ااااااه ه ه يالدنيه اااه
شغلت التلفزيون حته شوي اضيع وقت وع اقل صوت وياي بالبيت يرد عليه الوحشه يونسني خليته ع مسلسل
وكعدت اكل كملت اكلي الحمدلله  وحسيت نفسي شوي نعسانه وخفت أنام  كلت اكوم انضف المطبخ وارتب كلشي بمكانه لايجون ع غفله ويشوفون وصاخه ويشكون بوجودي وصدگ رحت كملت كلشي ع السريع وخليت كلشي بمكانه ورحت فوك جبت نفنوف اسود وبي ورده زغيره بيضه وشال ابيض من مال أخت استاذ وائل الغسلتهم وجبت المنشف الانطانيا الاستاذ جديد وممستعمله  فتت للحمام لان احس نفسي وصخه صار اسبوع مغاسله وشعري انترس تراب من التنضيف فتت سبحت ع السريع ولبست ملابسي وخسلت الدشداشه الجنت لابستهه والصايه وجففتهم وخذتهم وياي فوك شريتهم ع المنشر فتت للغرفه دافيه وريحتهه حلوه وكفت گدام المرايه واباوع لنفسي وجهي تعبان وعيوني ذبلانه بس اكو لمعه بعيني وأبتسامه خفيفه ماأعرف شنو سببهه أتجاهلت المرايهه كعدت يم الهيتر أمشط شعري وجففته ع الدفو لان حيل طويل وثخين والجو برد لايمرضني  وهمات احب كعدتي كدام الصوبه احس نفسي ارتاح  دفيت وبنفس الوقت نعست اباوع للساعه بال2ونص الضهر كلت انام شوي بين ميجون مشطت شعري ولفيته ورحت للجربايه التفيت ونمت

وائل
وصلت للغرفه مال العنايه وملكيت امي جن جنوني وماعرفت شنو الوضع ذبيت علاليكي ورحت اركض مثل المخبل بالمستشفئ لحد ماتلاكيت ويه الممرض
الجنت بايت ويا البارحه سألته ع امي جان يكول الحجيه قبل ساعه انتكست حالتهه وفقدت القدره ع التنفس وخذوهه لغرفه العمليات الصغرئ يسولهه تنفس اصطناعي من خلال فتحه بالبلعوم وهسه همه خلصو هسه راح يرجعونهه للعنايه المشدده

انتضرت اباب العمليات طلعو امي ومشكلين عليهه كمية اجهزه رهيبه وجهاز بالبلعوم مثل الصونده
وتتنفس منه امي بصعوبه حالتهه يرثئ لها دخلوهه للعنايه واني واكف بعيد رجليه متطاوعني اروحلهه ولاالمسهه مااريد اشوف امي بهيج حاله مااريد افقدهه صعب عليه افقد امي واني ماعندي احد غيرهه أمي كل حياتي