I hate that ' I love you '

Part : 24 💘

PD လေးရဲ့ ပြင်းပြတဲ့တောင်းဆိုသံကို Jeon Jung Hwan ဟူ၍ မှင်အနက်ဖြင့် မည်းနက်စွာအမည်တပ်ခံထားရ‌သော အဖြူရောင်အရိုးပြာအိုးလေးက ငြိမ်သက်တိတ်ဆိတ်စွာ နားထောင်ပေးနေသည်။

" မကောင်းတဲ့ကောင်က ငါမို့လို့ တစ်ကိုယ်ကောင်းဆန်တဲ့ကောင်က ငါမို့လို့ အချစ်ဆိုတာတွေ ပျော်ရွှင်မှုဆိုတာတွေကို တစ်သက်လုံးစွန့်လွှတ်ပြီး ငါနေပါ့မယ်...ကျေးဇူးပြုပြီး Taehyung ကို Taehyung ကို.... "

PD လေးက ကြမ်းပြင်ပေါ်သို့ ဒူးထောက်ထိုင်လျက် ခွေယိုင်ကျသွားပြီး ထိုစကားတို့ကိုပဲ အထပ်ထပ်ရေရွတ်နေသည်။ မျက်ရည်တို့သည် ရပ်တန့်နိုင်စွမ်းမရှိစွာ သူ့ပါးပြင်ပေါ်သို့ ခုန်ပေါက်ပြေးဆင်းလာနေကြပါသည်။ 

#...💘...#

မြို့ပြင်အဝေးပြေးလမ်းမပေါ်က သုံးစီးဆင့်ယာဉ်တိုက်မှု။ တစ်စီးကကုန်တင်ကားကြီး၊ ကျန်နှစ်စီးက အိမ်စီးကား။ ဖြစ်စဉ်ရဲ့ အဓိကအကြောင်းအရင်းမှာ အရှိန်လွန်မောင်းနှင်မှု။ ကုန်တင်ကားကြီး၏ ကားမောင်းသူနှင့် ပထမအိမ်စီးကားပေါ်မှ လင်မယားနှစ်ယောက်စလုံး ထိုနေရာမှာပင် ပွဲချင်းပြီး သေဆုံးသွားကြသည်။ 

တစ်ဦးတည်း အသက်ရှင်ကျန်ရစ်သူမှာ ဒုတိယအိမ်စီးကားပေါ်မှ ယောကျာ်းတစ်ဦး။ ဒဏ်ရာပြင်းထန်စွာရသွားသော်လည်း ကံကောင်းစွာဖြင့် ထိုသို့အသက်ရှင်ကျန်ရစ်သူမှာ ကိုရီးယားရဲ့ နိုင်ငံကျော်မင်းသားလေး Kim Taehyung တဲ့။ 

အားလုံးက ကိုယ့်နားကိုယ်မယုံနိုင်ကြပါ။ ဆေးရုံကားပေါ် တင်ခေါ်သွားခြင်းခံရသော မင်းသားချောရဲ့ ပုံရိပ်အပိုင်းအစလေးတွေကို မကြည့်ဝံ့ကြပါ။ ပရိသတ်တွေရဲ့ ဆူပူမှုကလည်း မရပ်တန့်တော့ပါ။ ငိုကြွေးသံဖြင့် ဆူပူကြသည်။ ဒေါသသံဖြင့် ဆူပူကြသည်။ သူတို့ အဆက်မပြတ် မေးခွန်းတွေထုတ်နေကြသည်။ ဘာအကြောင်းကြောင့် မင်းသားတစ်ယောက်တည်း မြို့ပြင်ကို သွားခဲ့ရတာလဲ။ ဘာအကြောင်းကြောင့် ကားကို အရှိန်လွန်မောင်းနှင်ခဲ့ရတာလဲ။ 

အားလုံးသိချင်နေကြတဲ့ မေးခွန်းတွေရဲ့အဖြေသည် မင်းသားရဲ့ ဘေးမှာအချိန်ပြည့်ရှိနေခဲ့ပါသည်။