شكولينا

الجزء السادس والخمسين "القسم الاخير"

كل شي حيخليك بعد موتك الا اعمالك الصالحه حتلحقك..
واولها الصلاه..ماتبدي عليها شي في الدنيا مهما كان مهم كله زائل وهي بس اللي حتقعد...الصلاة اولا🌸
قولوا لاإله إلا الله تفلحوا باللسان بالقلب وبصوابعكم اللي تكتب🌷
وصلوا ع الحبيب اسعدكم الله بجواره في جنات النعيم💖
🍫🍫🍫🍫🍫🍫🍫🍫🍫🍫🍫🍫🍫🍫🍫🍫
في الكوجينه واقفه طيب في القهوة..
خشوا خواتها ومرت خوها وهما يتكلموا بنبرة اندهاش..
رنده وهي حاطه ايديها ع خدها:ياربي مش مصدقه!!
لينا:فرجها ربك..
نوريه:باهي اصبروا..كيف بنخلوا عمي جمعه هكي حيعرف القصه كلها وحينشرها..
رندة نزلت ايديها بإحباط وهي تقول:حق..
لينا:لما يعرفها بعرف ان راجلها كذب عليها يعني مافي شي حيعرفه يضر رنده..
رنده قعدت تشبح للينا..
نوريه:صعبه لكن..
لينا:الصعب الوضع اللي فيه رنده..الراجل هدى بس هو اللي يقدر يثبت ان محمد هو اللي جاها ورفعها للفندق..مش هو ناكر ان حتى كلمها في التليفون اهو جبناله ماراه بعيونه ماعنده شن يدير توا..
رتيل تسمع وهي مصدومه ماكانتش تعرف القصه الصحيحه زيها وزي امها الوحيدات في العيله اللي مايعرفوش القصه كامله..
رتيل بصدمه:كيف!؟ قصدكم اتهم رنده انها طلعت مع راجل تاني!!؟
شبحولها التلاته وهما مصدومات نسوا وجودها بكل..
رتيل:ردوا عليا خيركم تعاملوا زي الطفله مش صغيره اني راهو واعيه ونفهم كل شي..
نوريه:مش هكي..حني قلنا مانبوكش تعرفي بش ماتتعبش نفسيتك..
رتيل:باهي فهموني هو شن قال بالزبط..
تنهدت رنده بضيق وبدت تحكي لرتيل ع اللي صار...
رتيل بصدمه:الحقير ناكر انه تواصل معاك !!؟
رنده:قال لاكلمتها لاكلمتني...
رتيل بضحكه:حيي..
نوريه:واحد حقير..
رتيل بضحكه:رنده انتي كنتي تكلمي فيه من تليفوني القديم واني مدايرة فيه تطبيق تسجيل مكالمات مخفي كل مكالماته مسجله..
الثلاته اتفاجئوا ع الآخر..
نوريه:وعلاش ماقلتي كان توا؟!
رتيل:ماهو لو عرفت القصه من البدايه راهو قلتلكم..
نوريه ولينا شبحوا لرنده اللي مندهشه لأبعد حد..
رتيل:انتي غيرتي التليفون قبل لتطلعي من الحوش بشويه يعني لما كلمك الصبح نفس هداكا اليوم مكالمته تسجلت..
نوريه جتها وهي تقول:تبي القرص والمرس..وشدتها وقعدت تريش فيها.
رتيل:اي..شن دخلي اني..انتم ماحكيتوش..حولي والله نعيط..
رنده دموعها نزلوا وقالت:مش قتلك يالينا اني متفائله اليوم..
لينا بإبتسامه فرح:الحمد لله..وانا قتلك ربك مش حيخليك راك مظلومه..
رنده خدت نفس ودموعها مازالوا ينزلوا ونوريه ورتيل يشبحولها بإبتسامه...
لينا:مفروض توا تبلغي محاميتك بكل شي..
نوريه:صح بري جري جري..
رنده مسحت دموعها ومشت طلعت من الكوجينه تجري..
نوريه:ياريتنا حكينالها من الأول هالنتيفه..
رتيل:بش تعرفوا قيمتي.
لينا بإبتسامه:كل شي ليه وقت..
نوريه:صدقتي..
رتيل:لكن هدا محمد حاشا اسمه هالحقير صدمني فيه مانحسباش واطي لهالدرجه..
نوريه:واحد نجس ع قولت سفيان..شن ماكلمكش؟
لينا:لا كلمني قال وصل طرابلس لكن عنده موعد مع صاحبه ابوبكر..
نوريه:اها..
ع خشة عفاف:هيا اطلعوا حناي جت..
نوريه:هيا هي..
ومشوا طلعوا هي ولينا..ورتيل رجعت ولعت ع القهوة وهي تفكر في اللي صار ومازالت مندهشه..
🍁🍁🍁🍁
"اسمعي رنده نقولك غدوة بإذن الله ضروري جدا تجيني للمكتب"
رنده:خلاص نقول لواحد من خوتي يجيبني بس امتى..
"الساعه 11يناسبك اني فاضيه لمدة ساعه"
رنده:تو نشوف ونرد عليك..
"مدا بيك بكري رنده بش نحددلك موعد تاني كان ماصارش"
رنده:ان شاء الله شويه ونرد عليك..
"تمام"..
سكرت رنده ومشت طلعت من دار التقعميز سمعت صوت حناها زبيده مشتلها طول تسلم عليها...
🍁وفهالوقت..
كان انس مقعمز في واحد من المقاهي المطله ع البحر..
كان حاط رجل ع رجل وفيده مشبك الشعر متاع رنده يتفرج عليه..والتنهيده تبع اختها...
مش قادر يحولها من باله مش قادر يفكر في غيرها عقله معاها هي وبس..
جاه النادل حطه فنجان القهوة وقال؛تفضل استاذي..
انتبه انس وقال:شكرا..
مشي النادل..وهو خدي الفنجان وبدي يشرب..
شويه ورن تليفونه..
حط مشبك الشعر في جيت التيشرت..
وقام تليفونه لقي المتصل ..
"أ.نجاح الوداني"
بلهفه فتح الخط ورد..
انس:السلام عليكم استاذة كيف الحال..
"وعليكم السلام..الحمدلله..كيف حالك انت"
انس:الحمدلله..
"كلمتك بش بنبلغك بأخر التطورات تطورات سريعه ومفاجئه"
انس بلهفه:نسمع فيك...
🍁🍁🍁🍁🍁
"هي هكي تبي ماقدرتش نعارضها"
ابوبكر:يعني ماشفتوش منه تقصير ولاغلط..
سفيان:نهائيا راجل محترم وكان يخدم ع القضيه بضمير بس اني معاها في ان تكون محاميتها مراة بش تعرف كيف تتفاهم معاها من غير احراج..
ابوبكر:صح...لكن قولي هداكا المريض معاش دار شي تاني.
سفيان:تس..
ابوبكر:والله وين يخطر عليا كيف بعد واحد من طرفه بش يقنعكم بالصلح ويردها نقول الناس في هالبلاد مايفوتهم حد في صحة الوجه
سفيان:هدا مش صحيح وجه..هدا مريض وبصمت عليها بالعشرة..والله لتوا مش مستوعب كيف كنت يوم من الايام نحترم فيه ونعزه كنت مفضله ع باقي النسابه ياراجل..كنت نعارك فيها ع خاطره.....
ابوبكر:ماتعرف البنادم لين تعاشره مزبوط..هو كان جديد وقتها طبيعي مايبانش منه كان الوجه اللي هو يبي يبينه..وطاح في مراة ادرق عليه في عمايله هدا علاش تمادى..
سفيان بكره:زي هداكا التاني..قعدت مرته تبلغ وتغص وادس لين كلتها في صحتها...
ابوبكر:تبي الصراحه ياصاحبي حني مخلوقات متعبه..
سفيان رفع حاجبه اليسار وقال:من حني!؟
ابوبكر مرر سبابته ع سفيان وع نفسه وهو يقول:حني الرجاله..
سفيان:تكلم ع نفسك ..
ابوبكر:تي انت اول من يتكلموا عليه..انت بالذات متعب للميلون تي تعبتني اني ياراجل..
سفيان قعد يشبحله بإمتعاض..
ابوبكر بضحكه:لا بجديات سفيان مش شايف ان حني جنس بشري صعب؟
سفيان:اني شايف ان المراة هي الجنس البشري الصعب..صعب تفهمها وصعب ترضيها..
ابوبكر:صح من ناحيه الفهم والله صعب وهلبه بس في الإرضاء ترضى بسرعه ومن ابسط شي..
سفيان:المراة تعرف تساير ياصاحبي تخليك تشوفها راضيه وهي من داخل مش عاجبها حد...جرب تصير مشكله بينك وبينها طلعك مادرتش معاه خير بكل..
ابوبكر:وحني ماهو نفس الشي كان شفنا شويه تقصير نديروا كأنها عمرها مادارت حاجه..هي شي موجود فينا كلنا..
سفيان:تمام معناها الباهي واللي مش باهي في البشر كلهم..وزي ماحني نشوفوا فيهم مخلوقات متعبه هما يشوفوا فينا نفس الشي..
ابوبكر:فعلا اكبر دليل ع ان الراجل مخلوق متفهم وبسيط يقدر يتزوج اربعين ويحب اربعين مع بعض...
سفيان قعد يضحك وهو يحرك في راسه يمين ويسار..
ابوبكربضحكه:هدا الحق..
سفيان:تكلم على نفسك...
ابوبكر:لا والله هي وحده في القلب والحياه مافيش غيرها..
سفيان:واني قبل قتلك موحد دنيا ودين...
ابوبكر:ايه ياراجل فكرتني..المراة بدير لمة مالمه وتبي العويله كلهم يجوها بدون استثناء..
سفيان:اتصلوا واعزموا..
ابوبكر:يعني يجوا..
سفيان:يغيروا جو...بس هاه اختي توا كيف دايرة عمليه اكيد ماتقدر تجي واكيد في من بيقعد معاها..
ابوبكر:زي مايقولوا اللي يحضر يهني..
سفيان تنهد وهز راسه بعدين قال:خلاص اني بنوض نروح تاعب ونبي نرقد..
ابوبكر:تمام...هي اطلب الحساب..
شبحله سفيان..
وابوبكر رسم ع وجهه ابتسامه استعباط عريضه..
🍁🍁🍁🍁
بعد المغرب...
في صالة حوش الحاج الشريف..
زبيده:حتى اني استاحشتكم واستاحشت الحوش والقعاد فيه صح كنت متريحه عند ربيعه..لكن مش زي الحوش هدا اللي ليا فيه سنين..
وجيهه:والله الحوش من غيرك يااللاي مايسوى من نهار طلعتي منه راحت البركه متاعه..
نوريه؛ايه والله ياحناي ونهار وليتي جبتي معاك الخير كله..
زبيده:سلمهم ونجيهم ياربي..ماشاء الله السبهاويه البطن بدت تكبر..
ابتسمت لينا بخجل..
زبيده؛ربي يحضرني النهار اللي يجي فيه وليد سفيان..
لينا:يطول في عمرك ياحناي وتحضري عرسه..
زبيده بضحكه:لا ياحنه سادني نشوفه وهي في قماطه المهم نشوف ضنوة سويفه..
وجيهه:يطول في عمرك يااللاي...
"امي"
منى لبست وشاحها..
وجيهه:خش وليدي خش..
سفيان قبل يبان عليهم قعد يقول:نسمع في صوت نحبه واستاحشته..
ابتسمت لينا وقلبها يدق بقوة...
سفيان:نتخيل ولاحق...يارب حق يارب حق يارب..
وهما يضحكوا..
لين وصل في الصاله وبان عليهم بعدين قال..
سفيان بضحكه:والله اللا زبيده..يامرحبا يامرحبا ولت للحوش البركه متاعه..
وقدملها وطبس حضنها وهي ضماته وقال؛مرحب بيك وليدي ياغالي....
سفيان؛خلاص راهو معاش في طلوع..
زبيده:لا حتى اني معاش طالعه استاحشت الحوش معاش نقدر تعيش في غيره..
بعد عنها وقعمز جنبها وهو يقول:والله من نهار مشيتي الحوش ولى خيي..البركه متاعه راحت..
وجيهه:كيف كنت نقول في نفس الكلام..
سفيان؛ربي مايحرمنا من هالوجيه...وباسها من خدها..
ضحكوا..
زبيده بضحكه:ولا منك يابو سيف..
شبح للينا لقاها تشبحله ابتسم...
وجيهه؛نهار يجي سيف بنديره مهرجان..
لينا ابتسمت بخجل..
زبيده:حتى ولد سويفه..
سفيان:تسلموا ربي يطول في اعماركم...مرر نظره عليهم وقال..وين عفاف..
لينا:خشت رقدت..
سفيان؛والصغار مالهمش حس..
لينا:بحر وياسمين راقدين معناها الليله بيقيموها..
قعدوا يضحكوا..
وجيهه:الشريف طلع مع جده..وبنات عفاف مع بنت نوريه يلعبوا في الجنان..
سفيان:جنان شني في الليل دخلوهم..
نوريه:شويه وندخلهم..
سفيان؛بوي وين؟
وجيهه:مشي لواحد صاحبه عازمه ع مزرعته بيقعد عنده لبعد العشي..
هز راسه وقال:تمام..وناض وهو يقول..انستينا يااللا..
زبيده:الله يأنسك..
شبح للينا وقال؛اني راكب..
لينا؛ماتبيش غدي؟
سفيان:لالا متغدي نبي نرقد بس..
ومشي طلع مم الصاله..ولينا مشت طلعت وراه ورنده تشبحله وهي تفكر زعمه تحكيله توا ولاتأجلها..
🌺طلعت لينا مع سفيان وقالت..
لينا:الحمد لله ع سلامتك حبيبي..
سفيان شد يدها وقال:لله يسلمك عمري..
لينا؛شن جو المشيه روحت منها راضي..
ركبوا الدروج وهو يقول:الحمد لله رب العالمين.
لينا؛تمام باهي خل نزيد نفرحك..
سفيان ابتسم بإستغراب:قولي شن عندك..
لينا بإبتسامه؛خل نخشوا لشقتنا بعدين نحكيلك..
وصلوا لشقتهم..
فتح سفيان الباب وخشت لينا وهو خش بعدها وسكر الباب...
🍁🍁🍁🍁
ولوطا..
نوريه دخلت البنات داخل ..
وبنات عفاف مشوا يجروا للدار بيشوفوا امهم لقوها راقده...
وحداها تليفونها يرن ع الهزاز..
رفيده:بابا..وخدت التليفون وفتحت الخط وردت..
رفيده:بابا..
"رفيده بابا شن جو؟"
رفيده؛تمام بابا شن جوك انت..
"تمام حبيبتي ماما عطاتك التليفون؟"
رفيده؛لالاماما راقده..
"باهي حالها باهي ماما"
رفيده؛ايه بابا..
"باهي حبيبتي اني توا بنتصل فيديوا افتحي ووريني ماما"
رفيده:حاضر..
سكر عبدالصمد..واتصل تاني فيديو..
فتحت رفيده ووجهت الكاميرا لأمها..
رفيده؛اهيا بابا..
والبنات حداها يشبحولها..
ع خشة نوريه قالت؛شن ديروا...
عبد الصمد سمع صوت نوريه سكر..
غيداء:بابا يبي يشوف ماما...
مطت نوريه شواربها بملل ومشتلها وهي تقول:حطي التليفون وخلي امك ترقد..
رفيده شافت للشاشه لقت بوها سكر...
حطت التليفون في مكانه ومشت مع البنات طلعوا من الدار ونوريه طلعت وراهم سكرت الضي وردت الباب ردان..
🌺🌺🌺
فوق ...في شقة سفيان..
لينا كانت مقعمزة ع الكرسي مقابله رخامه البار...
وسفيان واقف عليها..
سفيان:نوريه عندها حق لو نبوه شاهد لازم يعرف القصه كامله وينشرها بعدين..
لينا:وكان نشرها مش حينشر الا اللي يبرأ اختك ويطلع حقيقة هداك النذل..
سفيان وهو يفكر:خل نزيد نسأل ونشوف..
لينا:حسيتك مافرحت..
سفيان:تعودت مانستعجلش بالفرح بديت نخاف هلبه من خيبات الأمل..
لينا؛ان شاء الله معاد في خيبه ياربي..
سفيان:يارب..
لينا:يعني نكلم رنده ونقوللها غدوة بعون الله ترفعها؟
سفيان؛ايه..
لينا:باهي نزلني..
نزلها من الكرسي اللي كان عالي وقال بضحكه:سمنتي راك..
لينا؛سمنت في عينك...
سفيان شد ع يدها وقال:تحشمي ع وجهك شن عينك هادي..
لينا بضحكه:آسفه..
خداها ومشي بيها للدار بش اطلعله حوايجه ورجعوا يهدرزوا في نفس الموضوع..
بعدين هو خدي حوايجه وخش الحمام..
وهي اتصلت برنده تبلغها عن موافقة سفيان..
🍁🍁🍁🍁
تاني يوم...
مع الساعه 11...
رفع سفيان رنده لمكتب المحاميه حطها ومشي كان يبي يخليها تقعد معاها براحتها..
نجاح؛شن حالك يارنده..
رنده:الحمد لله..
نجاح:نذكر اخر مرة شفتك فيها في عرس نوريه كنتي في الاعدادي وقتها واني كنت متدربه..
رنده؛اني لما شفتك ماذكرتش تغيرتي هلبه..
نجاح بآبتسامه؛حتى انتي كبرتي ماشاء الله..ديما الاجمل والاكثر جاذبيه بين خواتك..
رنده؛كنت..
نجاح؛ومازلتي حتى في وضعك هدا الله يبارك عليك ...
رنده بإبتسامه؛شكرا..
نجاح ابتسمت وقالت:شن تحبي تشربي؟
رنده؛ميه..
نجاح هزت راسها وخدت السماعه متاع التليفون واتصلت برقم ما وقالت:زوز كابتشينو وميه...بعدين سكرت..
ابتسمت رنده بإستغراب...
ونجاح خدت تليفونها النقال و بدت تستخدم فيه وهي تقول:ايه رنده احكيلي عن اللي صار امس...
وحطت التليفون ع الطاوله وشبحتلها..
رنده خدت نفس وبدت تحكي في كل شي بالتفصيل..
نجاح:اكيد شهادة الراجل وتسجيل المكالمات حيقلبوا الوضع لصالحك..
رنده:يعني حياخدوا بيهم التسجيلات..
نجاح:طبعا بعد الفحص والتأكد من صحتهم..
دق باب المكتب.
نجاح بإبتسامه:تفضل..
سكتت رنده وهي تراجي امتى تنحط سفرة الضيافه ويمشي اللي جايبها بش تكمل كلامها..
بس فجأة..شمت ريحة عطر تعرفه....
ارتسمت ع وجهها ملامح الصدمه لما سمعت صوت يقول..
"السلام عليكم"
نجاح:وعليكم السلام استاذ..تفضل..
قعمز قدامها وهويشبحلها بنظرات كلها عتاب..
اما هي بنظرات صدمه شبحت لنجاح..
نجاح:شفت من الأفضل انه يكون موجود بحكم الخلفيه اللي عنده ع القضيه..
انس وهو يتأمل في رنده بنظرات شوق:اني ماعنديش خلفيه عنها...اني غصت في تفاصيلها استاذه..
رنده شبحتله..
انس:سمعت ان في شاهد شاف محمد جايك هداكا اليوم..
رنده فضلت ادير روحها عاديه ردت عليه وقالت:ايه شافه في منطقتها في محل مواد غذائيه قريب علينا بعدين شافه لماجي بالسيارة ووقف في أول الشارع..وشافني واني جاياته..
انس:من يكون..
رنده:جارنا في نفس الشارع..
انس:وتسجيلات المكالمات..
رنده:قبل قتلك اني كنت نستعمل في تليفون اختي بعدين غيرت قبل نطلع وخليت كل شي فيه..هداكا كلمته بيه فيه تطبيق تسجيل مكالمات مخفي ماكانش عندي علم بيه سجل المكالمات..امس سمعتهم كلهم..
انس:كويس..شبح لنجاح وقال..بعد الفحص يتقدموا كدليل.. بعدين شبح لرنده وقال...والراجل هدا دليني عليه اني نمشي نكلمه..
رنده؛بصفتك شني..
رفع حاجبه وقال:المحامي متاعك..
ونجاح تمرر في نظرها عليهم..
رنده شبحتلها..
نجاح؛هو يبي يساعد في القضيه لانه الادرى بيها اني طلبت منه هالشي حيفيدني ويفيدك هلبه..
شبحتله رنده وهي ساكته..
انس:اللي يعرف في حوشكم قوليله يسكت ومايطلع برا ولاحاجه لازم الطرف التاني مايسمع بشي..
رنده:ايه عارفه..
انس:معاش تعرضلكم هداكا..
رنده شبحت لنجاح..
نجاح ابتسمت تهكما وقالت؛بعت لبوها بسيط بش يدير صلح ويردها..
ضحك انس بسخريه ومن داخل كان يغلي غلي وهو يقول:واحد مريض ومتخلف..
نجاح:حني لو نقدروا نثبتوا انه مريض نفسي رانا ضربناه بالقاضيه..وضحكت..
رنده ابتسمت..
وانس يشبحلها بنظرات عيون تلمع و نجاح مركزة عليه..
رنده:باهي استاذه ع هكي الجلسه الجايه النطق بالحكم..
نجاح:حتما...
انس:كل شي يثبت كذب ادعائاته مفروض فوق حقوقك يدفعلك تعويض ع الأذى النفسي اللي تسببلك فيه..
رنده:اني نبي بنتي وبس..
نجاح:ماشفتيهاش بنتك بكل خلال هالفتره..
رنده دموعها نزلوا وهي تقول:شفتلها صور..مسحت دموعها وهي تقول....وتسجيل فيديو..
انس قلبه كان ينعصر عصر وهو يشوف في دموعها..
نجاح مدتلها كلينكس وقالت:ربي يجمعك بيها عن قريب..
رنده:آمين...وخدت الكلينكس وقعدت تمسح بيه..بعدين نزلاته وحطت ايديها ع بعض..
تنهد انس وقال:مش حيصير كان كل خير..نعطيك وعد بنتك تولي ليك الجلسه الجايه بإذن الله..
نجاح بإبتسامه:مفروض اني نعطيه الوعد هدا..
رنده ابتسمت من بين دموعها..
وانس ابتسم لإبتسامتها بعدين ناض وقال:بعد اذنك استاذة نبي رنده ع انفراد شويه..
رنده شبحتله..
انس اشر ع الباب وقال:لو سمحتي..
رنده فكرت شويه بعدين ناضت ومشت طلعت وهو طلع وراها..
ونجاح معاهم بعيونها بعدين قالت:تنحب والله...
🍁🍁🍁🍁
برا..
وقف وقال:علاش سحبتي الدعوة..
رنده:هكي...
انس:ارجوك رنده ماتكلمنيش ببرود..اني كنت ماشي في القضيه ونخدم عليها بكل جهدي رفضت قضايا ع خاطرها..
انتي كنتي تبيني نقعد معاك في القضيه للاخر حتى لو ماقلتي هالشي بلسانك اني فاهمه وحاس بيه..شن غير رايك بعد الجلسه السريه ؟...
رنده:هكي وخلاص شفت ان هكي احسن..
بنفاذ صبر قال:عطيني سبب مقنع اقنعيني اقنعيني يارنده
رنده ببرود مصطنع:انت عطيني سبب واحد يخليني نبررلك..انت كنت المحامي متاعي لاأكثر..
شبحلها شويه وهو يتنفس بسرعه من الانفعال بعدين:كنت المحامي متاعك لاأكثر!؟ هز راسه وقال:تمام تمام...لكن انتي ماكنتيش عندي موكلتي لاأكثر...
رنده تنهدت وقالت:شي يخصك..المهم عندي معاش تجيني مرة تانيه هني ولانبي نشوفك ولاتلحقني ارجوك مانبيش مشاكل...
هو قعد يشبحلها وعيونه تعبوا دموع...
وهي مشت من حداه...حاولت تتمالك نفسها ماقدرتش..
ارتسمت ع وجهه ملامح البكاء..قعدت تبكي بصمت وتحاول توقف بس مش قادره...
وهو معاها بعيونه اللي شدوا الدموع ع حافة الجفن...
والقلب ينزف فدموعه دم حسرة ع حب حياته اللي لقاه في ظروف صعبه وماقدرش ينوله....
نزلت لوطا ومشت طلعت برا واتصلت بنجاح وهي شاده روحها:ايوه نجاح اني مروحه..
"تمام حبيبتي بيناتنا اتصال"
رنده هزت راسها وهي ترشف وقالت:تمام...سلام..سكرت منها واتصلت بسفيان.
ع طلعة انس وقف وقعد يشبحلها..
رنده:ايوه سفيان...ايه خلاص تعالى نراجي فيك.......ونزلت تليفونها والتفتت بتولي تخش..شافاته واقف يشبحلها..
نزلت عيونها ومشت خشت داخل..
وهو تنهد بألم بعدين مشي ركب سيارته..
قعد فيها لين جي سفيان وطلعتله رنده ركبت معاه وتحرك..
وهو تحرك بعدهم بقلب موجوع من صد الحبيب واعراضه...
🍁🍁🍁
هي بعد ماروحت يدوب هدرزت مع خواتها ع اللي صار..
بعدين خشت لدارها ع اساس بترقد..
بس ماقدرتش ترقد...تحت الغطا دموعها مابطلوش نزول..
مش قادر يريح شكله من قدام عيونها...نظراته ملامح وجهه..
نبرة الرفض الحزن في صوته قعد تتردد بكلامه في وذنها مش قادره تنسى شي..
رنده توا بس فهمت وعرفت..انها لأول تعيش الحب وتعرف معناه...الحب اللي ينزرع في القلب زرع وجذروه تكون مغروسه في الروح وألم عذابه يكوي القلب والروح مع بعض..
وهو كذلك فاهم وعارف هالشي..
لأن اللي حسه مع رنده كان طالع من اعماقه..
ولاذرة من المشاعر اللي حسهم اتجاه رنده حسهم مع زوجته السابقه..
وهو مقعمز قدام التلفزيون ورايح في عالم تاني..
امه كانت تشبحله ومركزة معاه...
جاته بنته ضربت ع رجله بخفه وقالت:بابا..
انس استاقظ وشبحلها:نعم بابا؟
فطومه؛بابا معاش ترفعني للجامعه..تشوف خويله رنده؟
تنهد من وسط قلبه وقال:معاش في خويله رنده حبيبتي..
فاطمه بإستغراب:كيف تمت قضيتها؟
انس شبحلها وقال:غيرتني بمحاميه..
فاطمه:انت يغيروك!!؟ ماالا والله هادي مهبوله وماتعرفش مصلحتها..
ضحك ع كلام امه وقلبه موجوع..
بعدين خدي فطومه قعمزها في حجره وباسها ع راسها وضمها بحيث ظهرها يكون لاصق في صدره وقعد يشبح للعقد اللي لابساته وعيونه غارقات بالدموع وامه تشبحله بضيق....
☘☘☘☘☘☘☘
بعد مرور عدة ايام...
"خلاص عاد ليك عشرة ايام في حوش اماليك"
عفاف:والمطلوب.
عبدالصمد ابتسم بإستغراب وقال:كيف شن المطلوب تروحي لحوشي..
عفاف:اني هدا حوشي..
عبد الصمد مرر نظره حواليه بعدين شبحلها وقال:خلينا نروحوا لحوشنا ونتفاهموا غادي برواحنا..
عفاف:هدا حوشي قتلك..
عبدالصمد؛فوفا حبيبتي استهدي بالله وروحي معاي تبي احرجي احرجي في حوشك وخودي راحتك غادي والله ماني جاي جيهتك واللي تبيه انتي قولي نديره..
عفاف:مهما كان..
عبد الصمد:مهما كان..
رفعت حاجبها وقالت...
"طلقني.."
عبدالصمد قعد يضحك..
هي رفعت حواجبها وقالت:قلت نكته.!؟
عبد الصمد بضحكه:لا تبصري...
عفاف:مانبصرش..
مسح ع لحيته وقال:لاتبصري..
عفاف:سرحني بإحسان ياعبد الصمد.
عبدالصمد:والله ماهي صايره راجي لين تترملي بش تفتكي مني اما طلاق والله ماني مطلق..
عفاف:توقعت وعارفه علاش..انت زيك زي اللي كان واخد رنده بالزبط تبيني نقعد عندك زي الجاريه لاتحبني ولاتبيني لكن تبي تقعد مالكني وخلاص ادير فيا ماتبي...ونسيت اني مش مقطوعه من شجرة بش مانقعد تحت رحمتك.
عبدالصمد؛تمام..خل نطلع اني وياك لمكان نهدرزوا فيه بهدوء عفاف..
عفاف:مفروض من وقت درت هكي ياعبدالصمد توا خلاص بالنسبه ليا فات فوت..بعد ماوصلت معاك لهالمرحله كل شي عندي انتهي خلاص..
عبدالصمد ابتسم وقال:من يوم عرفتك وانتي تحبي الدراما مذكره كيف تعرفت عليك..
قعدت تشبحله وهي تذكر في هداكا اليوم..
🔺️في وقت سابق..
في كليه اللغة العربيه جامعة طرابلس قاطع_ب
ايام كانت جامعه ناصر...
كان طالب في السنه الاخيره ..
يحضر في محاضرة عامه في احد مسارح الجامعه..
كانت محاضرة تنميه بشريه..
كان في فيديو يعرض في المحاضرة هادي مؤثر جدا اثر في كل الموجودين..
بس عفاف بزايده..
كانت تبكي من جدها بتموت بالبكي..وهو انتبه معاها وقعد يشبحلها ...
بنيه حلوة هلبه..ولما تبكي تزيد حلاوة هي تبكي وهو يشوفلها ويضحك بصمت..
هي بعد هدت وزعت نظرها حواليها بتشوف كان في حد ركز معاها...جو عيونها في عيونه...
هو ابتسملها..هي شبحتله من فوق لتحت بعدين غيرت عيونها القدام...
🔺️الوقت الحاضر
عبدالصمد؛ومن يومها واني في جرتك ماخلتيكش لين طيحتك..
عفاف؛طيحه سودا نوده..
عبدالصمد ابتسم وقال:مقبوله منك..
عفاف:ماضيعش وقتك ووقتي الكلام هدا معاش ينفع معاي ياعبدالصمد خلاص..كله مات بالنسبه ليا صليت عليه ودفنته..
عبدالصمد؛مافكرتيش في بناتك مافكرتيش في اماليك مش سادهم حال اختك..
عفاف:اهلي معاي في اي شي اني نبيه وبوي قالي بنتي مش زايده عليا لو شايفه انك ماطلعتيش من هالزواج الا بالمرض بلاش منه..
قعد يشبحلها شويه وعيونه معبيات دموع بعدين قال:تمام..اقعدي في حوش اهلك لبعد العيد الكبير ارتاحي وريحي اعصابك بعدين نهدرزوا..
ولف بيطلع هرب من ردها بس هي فيسع صاباته بيه..
عفاف:معاش تجي هني مرة تانيه ومعاش تتصل بيا لين تجيني ورقة طلاقي..وياريت تجيبها انت مش تبعتها مع حسين..
قعد واقف شويه..بعدين فتح الباب وهي مشت سكراته وراه ولفت وخشت داخل..
اما هو التفت للباب وقعد يشبحله وهو مصدوم..
بعدين شبح يمين ويسار...ولف ومشي لسيارته ركبها وتحرك..
🌺🌺🌺🌺🌺
"الله يبارك الامور كلها تمام"
لينا بإبتسامه:الحمد لله..
اماني:خليك ماشيه ع النظام اللي درتهولك وماتعبيش ع حبوب الفيتامينات بس..كولي يالينا كلي فواكه وخضرا وركزي ع الكالسيوم لانك حملتي قبل بولد وتوا الله يبارك حامل بولد والولد ياخد في الكالسيوم كله..هدا علاش ام الاولاد تلقي عندها نقص كالسيوم ديما وتكون معرضه للهشاشه اكثر من غيرها..
لينا:اها عارفه...انا عندي راجل ملم بالمواضيع هدي كلها لما يكسد يقعد يبحث في القوقل واللي يلقاه يطبقه عليا من ماكله وشراب وحركه وغيره..
اماني:الله يبارك..ربي يكثر من امثاله ويخليكم لبعض..
لينا بإبتسامه:آمين..
🌺وطلعت لينا من المستشفى لقت سفيان يراجي فيها برا..
ركبت السيارة ..
لينا:سلام..
سفيان:وعليك السلام..شن الأخبار.
لينا:الحمد لله تمام التمام...وهاك شوف..وعطاته صورة من جهاز الايكو..
خداها وقعد يتأمل فيها وعيونه مليانات دموع وقال:غير امتى يجي ونشوف..
لينا:مازالن تلاته شهور.
سفيان:زعمه نعيش لهداكا الوقت..
قلب لينا انقبض وقالت:حرام عليك سفيان ليش تحب تنكد عليا..وبدت تبكي..
هو شبحلها وضحك..بعدين شد يدها وقال..تي خيرك انبصر خلاص..
ولينا تبكي..
سفيان:هرمونات هادي ولا..
لينا ببكي: هدى نكد منك انت..
سفيان بضحكه:باهي اسف ياودي خلاص سامحيني..بإذن الله حنعيش لين تشوف صغاري الخمسه..
هي فنصت وقالت:خمسه!
سفيان بضحكه:نموت خير..
ضرباته ع يده وقالت:صامت صامت..مصمتك..
وهو يضحك بعدين شغل السيارة وتحرك..
في الطريق..
جي للينا اتصال من اختها..
لينا:ايوه هنيوه
"مرحبا ليون شن جوك"
لينا:تمام شن جوك انتي؟
"الحمد لله..كيف العويله كلهم باللي في بطنك"
لينا بضحكه:الحمد لله..واللي في بطني توا كيف كنت في موعدي مع الدكتورة قالت اموره تمام..
"باهي ياحنه تحلي عويناتك ع خير"
لينا:آمين..تسلمي يارب..انتي شن حال عويلتك..
"بيطيروا ويطيروا"
لينا بضحكه:سلامتهم..معاش ريتي اموله..
"كنت عندها امس في خيار الخير...ليون"
لينا:اها..
"كلمنا عبدالله وقالت تالت يوم العيدالكبير يبينا نجوه في طرابلس ونقعدوا في مزرعة عم وردة حتى عبالسلام ونجمه بيجوا"
لينا:اها قالي وان شاء الله بنعدي....من توا راكن بتقعدن لخامس يوم بنعزمكن ونبيكن تباتن عندي..
"ياوخيتي مش ازعاج "
لينا:ازعاج عينك..
ضحك سفيان وهي شبحتله وابتسمت..
"باهي ياحنه تو نقول لأمال ونرد عليك.."
لينا؛خلاص نرجى في اتصالك..
"بوسيلي العويله وسلمي ع عربك"
لينا؛ يوصل...حتى انتي بوسيلي العويله هي بالسلامه..
"بالسلامه"..
سكرت لينا وقالت؛تخبر فيا ع لمتنا في العيد الكبير..
سفيان؛مازال العيد..
لينا؛عارفه بس نسقوا من توا..
سفيان:ايه حقه من بيمشي معاكم انتي وامي الليله للمة عيال ابوبكر...
لينا:مرت مروان ونوريه ورتيل قالت بعد كملت امتحانات نبي نغير جوي..
سفيان؛معناها رنده بتقعد مع عفاف..
لينا؛ايه..
سفيان هز راسه وقعد ساكت...
🍁🍁🍁🍁🍁
وجي وقت اللمه..
والكل كانوا جاهزين...
••في شقة مروان..
منى:اسمع مروان من توا دير حسابك عرس هند بعد العيد نبي نشري حوايج مناسبات معاش عندي..
مروان:واللي خدتيه في عرس اساور..
منى:هداكا اي كلام..هدا عرس اختي نبي نشريله احسن شي.
مروان:شن قصدك بأي كلام!؟
منى:نقصد اللبس مش شي تاني خيرك حمقت!
مروان؛ع قدر استطاعتي..
منى:مرت خوك ماخلت خدت في عرس اساور كله الغالي وخوه..
مروان عقد حواجبه وقال:خوي عنده..
منى:وشن انت ماعندكش..عندك حصتك من دخل المحلات اللي قاعد ادس فيه مش عارفه علاش..
رفع مروان حواجبه وقال:نغمه جديده هادي!
منى؛لانغمة جديده لاقديمه هدا الحق يامروان حتى اني من حقي نتمتع..
مروان شبحلها شويه بعدين قال:باهي بري اطلعي قدامي اطلعي..
هي مشت بضيق وطلعت وهو طلع وراه وكان معصب منها..
🌺🌺🌺
لمت جياب سهيله حلوة بالمرة..
وتقديم الشكولاته والحلو كان من محل #شكولينا اللى ولى من اهم المحلات واشهرها وزباينه ولوا من اكابر طرابلس..
وفي اللمه..
كانت فاطمه ام انس متأمله رنده تجي بش تكلمها ع ولدها بس خاب املها...
ووجيهه كانت حاسه بالأحراج منها بعد ماسحبت رنده القضيه من ولدها وعطتها لغيره..بس فاطمه قابلتها بوجه بشوش واسلوب حلو كالعاده وزادت خشت خاطر وجيهه..
روحت فاطمه من اللمه.
لقت انس مازال فاتح الضي في داره ويشتغل ع قضية استلمها مؤخرا..
فكرت تمشي تكلمه بس شافت ان مافيش داعي تقلب ع ولدها المواجع..ماصدقت ولى يعيش حياته زي قبل..
🍁🍁🍁🍁
"خلاص صفحة وانطوت مش قتلك اني ياماما"
:باهي وينه توا...جاك..كلمك..عبرك!؟
رولا:المهم توا انه مش حيكون لغيري وبعدين حيولي ليا ياماما تو تشوفي..
:احلمي مدام الحلم بالبلاش..
رولا؛تو نشوفوا...
🍁🍁🍁🍁
في هالوقت..
رنده كانت راقده في سريرها وفي يدها تليفونها خاشه ع الفيس وتشوف في حساب انس..
كانت تشوف في مناشيره القديمه..
من بينهم واحد واضح انه نساه...
كانت صورة ليده ع يده مرته وقتها وهما شادين ايس كريم وقدامهم برج بيزا المائل..
المنشور من 5سنين فاتت...وكانت رولا دايرتله بيه اشاره وتعليقات مسكرة عليه..
اذكرت كلام رولا ليها لما كلمتها..
وهي تتأمل في الصورة قالت في نفسها اكيد مازال يحبها..
وع خاطر الصغار ممكن يوم من الأيام يردها..
بعدين تقول لروحها..واني شن دخلي فيهم موضوع وسكرته قبل لينفتح ماعندي علاش نشغل نفسي بيه..اني اللي فيا سادني..
مفروض بعد اللي شفته نشعف...
جت بتطلع من حسابه لقاته نزل منشور جديد..
كاتب فيه..
"لعينيك سامحت هذا الزمان..
وكنت عليه طويل العتب..."
مرات يكون منشور عادي مجرد بيت عجبه ونزله مش شرط يكون قاصدها هي بس..
بس شن يقنع قلبها بكلام عقلها خلا دموعها تنزل غصبا عنها..
وقالت في نفسها بألم..
"ليش ماعرفتك كان توا..علاش ربي حطك في طريق في هالوقت..بش يعاقبني بيك..ولايأدبني بيك..ولايعوضني بيك"
حطت تليفونها ع الكامدينو اللي جنبها ودموعها مابطلوش نزول..
وحست قلبها تحول لخرقه باليه من اللي راه واللي مر بيه...
🍁🍁🍁🍁🍁
"مابعد ياحسونه قداش تعاني"
حسين وهو يتوجع من تدليك اكرام لرقبته:هادي خدمتنا..
اكرام:هي شويه ونكمل..
وقعدت ادلكله فيها لين كملت وقالت:هي تمدد حسونه..
رقد حسين ع بطنه...
اكرام؛حسونه عرس بنت ولد خال امي بعد العيد الكبير نبي حوايج..
حسين:حني وين والعيد الكبيره وين..
اكرام؛عارفه بس نوقظ فيك من توا..
حسين:بنت ولد خال امك معناها حتى نوريه ماشيه بنضرب حسبتي في اتنين..
قلبت اكرام عيونها وتأففت ومشت طلعت حداه..
وهو خدي تليفونه من ع الكامدينو وكتب رساله لنوريه وبعتهالها..
شويه جاه رد قراه وقعد يضحك..
ع خشة اكرام وهي تقول؛شن يضحك فيك حسونه..
حسين:حاجه خاصه ياقلبي هي طفي الضي بنرقد حيلي مهدود وتعبان..
اكرام رفعت حاجه وقالت؛حاضر..
☘☘☘☘
وعدت اول ايام الصيف والعطله..
وعيت الشريف اللي كانوا يبوا يغيروا جوهم..
من طلعة لطلعة ومن زرده لزردة...
نست فيهم عفاف كل الهم اللي عاشاته..وحتى بناتها نفسيتهم..ارتاحت..وعبدالصمد مخليها ع راحتها..
حتى لما يتصل تعطي لبناته يردوا عليه وهو يطمن عليها منهم...
اما رنده فكانت وين ماتمشي مش طايح من فمها لا الإستغفار ولا الصلاة ع الرسول...
غير الراحه النفسيه اللي حصلتها ساده..
الراحه اللي عايشه فيها لينا مع سفيان...وحبهم يزيد ماينقصش..
عكس منى ومروان اللي وضعهم متوتر..
بسبب منى اللي بدت تقارن بين وضعها المادي ووضع سلفتها..
منى عمرها ماحسدت لينا..بس غارت منها وتتمنى تعيش بنفس المستوى اللي هي عايشه فيه وقاعده تضغط ع مروان اللي كان يدس في فلوسه لشي في باله لما يجي وقته ينفذه..ومايبيش يقول عليه لمنى بش ماتعفسلاش فيه...
ومافي حد عايش حياته ببال فاضي ومزاج رايق زي رتيل..
اللي كان همها عدد المشاهدات لستورياتها..وعدد اللايكات ع بوستاتها في الفيس والانستقرام وممكن اكثر حاجه تخمم فيها هي النتيجه...
🍁النتيجه...
اللي تراجي فيها رنده اليوم بفارغ الصبر هي وعيلتها كلها..
يوم الجلسه عشرين ستة...
في المحكمه..
حضروا نجاح ورفعه وبس من غير موكلينهم والشي هدا استغراباته نجاح..
وبرا سفيان كان موجود مع العم جمعه..
جمعه:والله لو نطوله نفرغ فيه مخزن الخنزير هدا..
سفيان؛ربك ينتقم منه ياعمي جمعه المهم انت تخلي الموضوع بيناتنا..
جمعه:ويشهد عليا الله ياولدي حتى خالتك نجميه ماتعرف..كل شي عندي عادي الا الاعراض لحمي ينوض شوك شوك في الحاجات هادي عندي ولايا ياولدي.
سفيان؛ربي يطول في عمرك ياحاج..
في القاعه...
رفعه واقفه ورا طاولتها...ونجاح ورا طاولتها..
القاضي:انتي محامية جديده لرنده بن عامر..
نجاح؛نعم سيدي..
القاضي ؛تفضلي..
نجاح؛سيدي..قضية موكلتي هي قضيه حضانه وحقوق طالبت بيهم موكلتي بعد ان انسلبوا منها سلب يالكيد والخديعه والغدر..طليق موكلتي اتهمها بخيانته وقال انه في اليوم اللي خدي فيه منها البنت كانت مع واحد غيره..واني اليوم جايه بإثباتات تكذب ادعائاته..
رفعه قعدت تشبحلها وهي مضيقه عيونها..
قدمت نجاح بجهاز فيدها وورقه تقرير من الشرطه اللي فحصوا تسجيلات الهاتف وقالت..هادي مكالمات مسجله لموكلتي وزوجها انذاك..قبل تلاته ايام من الحادثه وفي نفس اليوم اللي طلعت فيه من الحوش..
وهدا نقرير من المركز اللي تفحص التسجيلات..
فتح القاضي الجهاز وقعد يسمع..
والكاتبه حداه..
سمعوا بالزبط تلاته مكالمات...نزل الجهاز وهو يهز في راسه ورفعه تشبحله وجهه مخطوف لونه..
نجاح:ومش هكي وبس..هادي تقارير من شركة الاتصال فيه توقيت المكالمات اللي دارت بيت موكلتي وزوجها آنذاك وفي مايثبت انه نفسه رقم محمد الفاسي لأنه قاعد محتفظ ليه لتوا..
والقاضي يشوف للتقارير..
ورفعه تشبح لنجاح من فوق لتحت..
القاضي هز راسه بإيجاب..
نجاح؛وعندي شاهد شاف محمد الفاسي وهو جاي لموكلتي في نفس اليوم اللي طلعت فيه من حوش اهلها..
القاضي:من يكون..
نجاح:جمع عبد السلام الشيباني..
القاضي:نادوا ع جمعه عبد السلام الشيباني..
نادوا عليه..وخش جمعه ورفعه تشبحله..
القاضي:قول ياجمعه اقسم بالله العظيم ان اقول الحق..
جمعه:اقسم بالله العظيم ان اقول الحق..
القاضي؛شفت محمد الفاسي يوم طلعت رنده بن عامر من حوش اهلها يوم السبت الموافق ** * ****؟
جمعه؛ايه ريته اني نعرفه كويس..كان في محل غذائيه عندنا في المنطقه وكان لابس طاقيه زرقا كحلي ومن غير نظارات..
ولما ريته بعدين في السيارة كان لابس نظارات سود ورفع مرش السيارة كله...ريتها هي لما جاته معاها بنيه صغيره وشنطه..ركبت الشنطه وركبت هي وبنتها من غير ماينزل من السيارة..
نجاح:وفي تسجيل الكاميرات التابع للفندق..موكلتي وهي خاشه مع بنتها ومعاهم واحد بنفس المواصفات اللي قال عليهم السيد جمعه..
وعطاته الهاتف يشوف الفيديو..
وقعد يشوفله القاضي ونجاح تقول:مع ملاحظة ان الكاميرات صورت لحظه خروج محمد مع بنته بدون تخفي ولم تسجل لحظه دخوله..يعني حني هني سيدي القاضي قدام مكيده كادها طليق موكلتي ليها..يش يشوه سمعها..ويحرمها من حقوقها ويحرمها من حضانة بنتها...
القاضي مدلها الهاتف وشبح لرفعه قال:عندك شي تردي بيه..
رفعه بأسف:لا..
ابتسمت نجاح..
القاضي:تفضل ياعم جمعه..
جمعه لف وطلع..
القاضي:اكتبي يابنتي بعد حضور الأدله والاستماع لشهادة الشاهد حكمنا بالحضانه لرنده بن عامر..
والزام محمد الفاسي بإعطائها كل حقوقها والزامه بالنفقه ودفع غرامه لمحكمه لمحاولة تضليله القضاء...
ينفد هدا الحكم فور صدوره..
مرر نظره عليهم وقال:تفضلوا..
لفت نجاح وطلعت وهي مبتسمه بنصر ورفعه وراها...
قامت نجاح تليفونها واتصلت برنده..
🍁في حوش الحاج الشريف الكل ع اعصابهم..
رن تليفون رنده..عطاته لنوريه ترد من خوفها مش قادره تتكلم..
خداته نوريه وفتحت الخط وقالت..
نوريه:ايوه نجاح..
"نوريه"
نوريه:ايه..هاه شن صار بشري..
"رنده ربحت القضيه حكملها القاضي بالحضانه"
نوريه بعيطة فرحه؛ربحتي يارنده ربحتي..
رنده عيطت بفرحه وحطت ايديها ع فمها..
وامها بدت تزغرد وعفاف معاها..
نوريه سكرت وجت لرنده تحضن فيها..
ورنده تقول بعياط فرح مخلط بالدموع:الحمد لله ياربي الحمد لله..
وبدوا العيله يحضنوا فيها ويهنوا واحد ورا التاني وهي بطير من فرحتها..
🍁في نفس الوقت..
طلعت نجاح من المحكمه بتبشر سفيان..
بس وقفتها رفعه..
رفعه؛مبروك نجاح اسم ع مسمى..
نجاح:الله يبارك فيك..مانتخيرش عنك..
رفعه؛شكرا..بس في عندي معلومه نبيك توصليها لموكلتك..
نجاح عقدت حواجبها بإبتسامه وقالت:معلومة شني؟!
رفعه:محمد الفاسي ليه تلاته طالع من البلاد مع بنته وماحد يعرف مكانه هو صدقا كان يظن ان الامور كلها ماشيه لصالحه وانه حيربح القضيه لهدا سافر وهو مرتاح..وتوا بعد يعرف انه خسرها..مااظنش مازال يولي للبلاد..
نجاح قعدت تشبح لرفعه وهي مصدومه.
رفعه؛حبيتكم تعرفوا من توا بش ماتفرحش موكلتك ع الفاضي..عن اذنك...ولفت ومشت لسيارتها..
وعيون نجاح معاها وهي مصدومه..
وسفيان يمرر في نظره عليهم بقلق..وحس ان في شي صار مايفرحش.....
وكان اللي توقعه بالزبط...

#ثقلوا_موازينكم

...يتبع....