شكولينا

الجزء السادس والعشرين

سئل رسول الله ذات مرة..
أي الأعمال أفضل؟ فقال...الصلاة في وقتها...
الصلاة أولا وقبل كل شي❤
قولوا لاإله إلا الله تفلحوا...
🍫🍫🍫🍫🍫🍫🍫🍫🍫🍫🍫🍫🍫🍫🍫🍫🍫
للزلزال تبعات....
وهالتبعات كانت على لينا قويه...
سمعت من وجيهه كلام جارح ماقدرتش ترد عليه الا بالبكاء وبس...
تهديد سفيان خلاها تخاف تنحرم من صغارها...
برغم ان القانون والشرع معاها...بس ماعندهاش القوة الكافيه بش تستعملهم وتوقف بيهم ضد الجميع...
لهذا اختارت الصمت والإستسلام..
وطبعا...سمعوا خواته باللي صار..
وقعدوا يحرقوا عليها ويراجو امتى يجي يوم يمشوا لحوش اهلهم بش يحصلوا فيها الفرصه..
قبل ليجي هاليوم....
قعدت لينا في الدور الأول اسبوع كامل....
اسبوع كامل سفيان ماقعدش فيه سفيان في الحوش..
يطلع من الصبح ومايروحش الا اخر الليل...وقليل مايتلاقى هو وامه وبوه او حد من خوته..
وهالحاله اللي وجعت وجيهه هلبه خلتها تولي سلبا ع لينا اللي انقلب عليها قلبه وحده ولت مش طايقه تشوفها لاتكلم فيها ولاتقعد معاها في مكان هي فيه..
لهدا لينا كان اكثر قعادها في الكوجينه وماتطلعش الا لو احتاجوها صغارها...
وجي اليوم اللي تلاقوا فيه حمواتها في حوش بوهم..
وصادف هاليوم مرواح نوريه اللي وصلها اللي صار بالتاء والباء زي مانقولوا..
••في دار التقعميز..
اللي كانت مسكرة عليهم هما الأربعه..
نوريه:امر واقع وانفرض عليه هو زي ماانفرض عليك ولابالك تحسابيها ساهله عليه!..ومع هذا نشبح فيه هو قاعد يحاول يتعود ويخلي الحياة تمشي معاك..لكن انتي مش عارفه من حاسبه روحك..ولا وين عقلك اللي تتصرفي هكي..
عفاف:نصيب صار وشي وحصل..خلاص لازم تعيشي حياتك كيف ماهي...وتقدري تضحيته هو راهي اللي داره تضحيه كبيره..
رنده:كان لهالدرجه مش طايقتيه خليه ياخد غيرك ويعيش مرتاح..
لينا وهي تمرر في نظرها عليهم بحده :وبروا زوجوه مانيش واقفه في طريقه..انا رديت بش نربي عويلتي وبس وشي تاني ماليش بيه علاقه..ديروا مايعجبكم..غير خلوني في حالي بس..
ومشت طلعت من حداهم ودموعها ينزلوا..
نوريه لحقتها وهي تقول:هي انتي تعالي هني..
وقفت في مكانها لما شافت بوها واقف يشبحلها بنظرة خوفتها..
الشريف:امتى بتلهوا برواحكم ومعاش تدخلوا في حياة غيركم..
طلعوا بناته التانيات وقعدوا يشبحوله بخوف..
ومرته واقفه حداه وتشبحلهم بضيق..
الشريف رفع سبابته في وجوههم وقال:اسمعوا...كلام مع لينا معاش نبي...اي حد يدير حاجه اضايقها اني نوقفله...هادي حياتها هي وخوكم تخصهم هما بروحهم بس..يتعاركوا يتقاتلوا يتراضوا انتم مالكمش علاقه....اللي بتجي هني مرة تانيه دير الشر والمشاكل تشد حوشها افضلها..معاش عندي قدرة تحمل اكثر من هكي اللي فيا سادني..
ولف ومشي وهو مضايق ع الآخر ومرته اللي خافت عليه لحقاته..
نوريه وهي مصدومه:ريتوا بالله ريتوا تو حني طلعنا نديروا في الشر والمشاكل..
زبيده من الصاله:ماتبوش تهنوا ارواحكم قتلكم مادخلكم في شي..
هزت نوريه راسها وقالت؛كويس..كان مازال جيت...
ومشت بتولي للدار بش تتصل براجلها يجيها..
رنده لحقتها بش تقنعها بالعكس...
مش حيعطوا فرصه للينا ويخلولها حوش بوهم..
وطبعا عفاف معاهم...
••في الكوجينه..
لينا وهي مقعمزة تبكي وتتكلم مع سلفتها:قسما بالله واصله حدي خلاص كان نلقى نموت ونرتاح..استغفر الله العظيم..استغفر الله واتوب اليه..
منى:شن تقولي انتي لينا !!معقوله لينا اللي اني خديت منها القوة والنصايح الحلوة اللي غيرتلي حياتي تقول كلام زي هدا!؟وين ايمانك لينا..وين كلامك لما كنت تقولي البنادم اللي يكون مع ربي يقعد ديما مرتاح حتى في عز همه...!؟
لينا تبكي وخلاص..
منى جتها وضمتها لحضنها..
ولينا كانت محتاجه حد يحضنها ويحتويها ويخفف عنها شويه..
هدا علاش ضمت منى بقوة وقعدت تبكي بعبرتها..
ومنى تمسح ع ظهرها وتقول:اذكري الله حبيبتي اذكري الله..
معليشي شدة وتمر حبيبتي حتمر...
لينا ببكي:يارب...يارب...
☘☘☘☘
ومرت الأيام...
ويوم عن يوم لينا كانت ترجع لهدوئها برغم شعور الفراغ اللي تحس بيه من قعدتها في الحوش..لكن انشغالها بصغارها مهون عليها..
والشريف وتعامله الأبوي معاها كذلك هون عليها..
وزبيده اللي كانت تحب تهدرز وتغير جوها كذلك هونت عليها..
ومنى اللي كانت ليها زي الأخت ردتلها وقفتها معاها قبل وبسببها لينا بدت ترجع تضحك من جديد..
بس وجيهه مش قادره تصفى من ناحيتها وهي تشوف في حال ولدها واللي صاير فيه..
تلاته اسابيع مروا ع سفيان وكأنهم ثلاته سنين..
صارله فيهم اللي عمره ماتوقع..ولاتخيل ولافكر في يوم انه ممكن يصير فيه...
•••••••••
في قاعة المحاضرات...
حديث بين الطلبه...
:مش قتلك مولي معاش زي قبل هادي محاضرة امس..
:ايه صح هي...
وحده من الطالبات قالت:استاذ الشيت هدا متاع محاضرة امس..
هو شاف للشيت..بعدين شبح للاب توب وشاف روحه ع شن حاط...فرك جبهته بصوابعه بعدين قال وهو عاقد حواجبه بإحراج:اسف..اسف جدا..
مرر نظره عليهم وقال:خلاص توا نشرح المحاضرة وانتم بعدين تمشوا تاخدوا الشيت من المصور..
ساوا نظاراته وقال:هي ركزوا معاي هني..
•••••••••
في المكتب...
فاتح قدامه اللاب توب لكن مكانش لاهي معاه بكل..
كان سرحان...
وصاحبه اللي ليه فتره ملاحظ تغير حاله ماباش يلح عليه بالسؤال عن السبب يراجي فيه يحكي بروحه..
وعارفه حيجيه يوم ويحكي...
خش عليهم رئيس القسم..
:السلام عليكم..هي استاذ سفيان..
وسفيان ما انتبهش انه خش من الاساس..
استغرب وقال:استاذ سفيان!
ابوبكر:سفيان..
سفيان استاقظ وقال:نعم..
ابوبكر اشرله ع رئيس القسم..
شبحله سفيان وقال؛تفضل دكتور!
ضحك بإستغراب وقال:شن نسيت المحاضرة اللي بتمشي تعطيها اليوم في الفندق..
سفيان شد ع قبضه يده بقوة محاوله منه مايبينش انه نسي حاجه مهمه زي هادي...
تصنع ابتسامه وقال:لا طبعا مش ناسي غير كنت نراجي فيك..
سكر اللاب توب وقعد يلم في حاجاته وهويقول:من بكري نراجع في مواضيع المحاضرة..
رئيس القسم:راهو مهمه جدا اليوم في اساتذة من برا البلاد جايين يحضروا..
مشاله سفيان وقال:ايه عندي علم..
وطلعوا هو وياه من المكتب..
ابوبكر:كان نعرف خيره بس..!
🍁🍁🍁
ومشي للفندق والقى محاضرته وابلى بلاء حسن فيها..
وهالشي خلاه يحصل دعوة لحضور مؤتمر في مصر..
وهو رحب جدا بهالدعوه..حسها فرصه للهروب من اللي هو فيه..
وقبل التاريخ المحدد للسفر..
رفعوا هو وامه بحر للختان"الطهارة"...
فهداكا اليوم كانت لينا خايفه على ولدها هلبه وقعدت في الحوش ع اعصابها تراجي امتى يروحوا...
في نفس اليوم كان الحاج الشريف مداير عزومه بهالمناسبه...
وطبعا الكل لازم يكون حاضر فيها...
والحوش زحم لأول مرة بعد 5شهور في مناسبة فرح قرروا فيها عيلة الشريف يطلعوا من حزنهم نهائي...
🍁وشرعا هدا الصح..الحداد ع الميت لايتعدى التلاته ايام..
ماعدا حداد زوجته عليه..
برغم ان الحزن يقعد في القلب والشخص اللي انفقد مستحيل ينتسى...بس الحياة ماتوقف ع حد..
تستمر الى قيام الساعه🍁
🌺وسط زحمة العيله..
اللي كانت لينا تشوف فيهم كيف يهدرزوا ويضحكوا وجايين بلبس مبهج وزينه كامله..
ازداد شعورها هي بالحزن والغربه...
لهدا فضلت الانسحاب من هالزحمه..وقعدت اغلب وقتها في الكوجينه بروحها...
مش بيدها...في كل مرحله تمر بيها مع صغارها حتذكر بوهم وتتمنى وجوده..
حيقعد مكانه فاضي مايملاه حد بالنسبه ليها وليهم..
وهي مقعمزة بروحها..
قطع عليها هالإنعزال...اتصال جاها من احب انسانه ع قلبها..
مشت طلعت من الكوجينه للجنان بش ترد عليها...
•••في نفس الوقت..
هو كذلك كانت عنده مكالمه هاتفيه رد عليها برا بعيد عن الزحمه والدوشه...
بعد ماكملها وجاي بيخش...
سمع صوتها اللي ليه فوق الشهر ماسمعاش حتى من بعيد..
" عافيه يما"..
القلب بدي يدق بقوة...بقوة شديده..
خلاه رغما عنه يقرب منها قدر المستطاع بش يشوفها ويسمع صوتها..
حدا نفس الشجرة....كان واقف عيونه عليها...وبكل مشاعره معاها...
لينا؛اها يما الحمد لله حاله باهي..
"سامحينا يابنتي والله ماشدنا عليك كان ظرف بات مرت خوك"
لينا:باهي شن حاله توا..
"والله مامعروف يابنتي كل يوم يقولوا حاجه وهله ميئسين منه بكل يقولوا معاش يصير منه خلاص"
لينا بأسف:لاحول ولاقوة الا بالله..شن حالها نجمه؟
"شن بيكون حالها يابنتي باتها حتى هو"
لينا:باهي يعني مازال مش مروحين ؟
"لايابنتي مازلنا لين نشوفوا شن يصير معاهم"
لينا:باهي كان جيتوا بتروحوا روحوا طيران يما مش بر كيف مامشيتوا..
"من يومنا نعدوا للشرق بر يابنتي والطريق ولت امان والحمد لله ماعندك من شن تخافي سلم بنتي..خلاص تو انا بسكر سلمي ع عربك..."
لينا:حتى انتي سلمي ع اللي عندك...تصبخي ع خير يما
"قدامك كل خير يابنتي..هي بالسلامه"
لينا:بالسلامه يما..بالسلامه...ونزلت التليفون بعد سكرت امها وجت بتخش..رن تليفونها من جديد..
شافت المتصل وقالت بضيق:علاش مصرة هكي بس..
فتحت الخط وردت...
"سلام عليكم لينا"
لينا؛وعليكم السلام دكتور اماني كيف حالك..
"الحمدلله..قالوا طهرتي ولدك ان شاء الله بصحه عليه"
لينا؛تسلمي دكتورة...
"هاه يالولو شن خلاص معاش بتولي للمسشفى بكل معاش في امل"
لينا بضيق:للأسف يادكتورة مافيش امل..شوفي غيري معاش تعبي عليا..
"والله خسارة تعودت ع الخدمه معاك من ايام المجمع وع قد ماخدموا معاي غيرك مالقيتش زيك "
لينا؛لاتلقي ان شاء الله في واجد خير مني..
"بكفائتك صعب..ياالله ربي يوفقك ويفتح عليك ونقولك نهار تبي تولي حتلقيتي تستنى فيك"
لينا ابتسمت وقالت؛مشكورة جدا دكتورة ربي يبارك في عمرك...
" واياك..هي مانعطلش عليك حبيبتي تصبحي ع خير"
لينا:قدامك كل خير...صحيتي...
وسكرت لينا وتنهدت بعدين قالت:الله غالب...
ولفت ومشت خشت داخل...
🌺🌺🌺
وتمت هالليله...وفضت الزحمه ..
وكملت الحوسه..
وركبت منى لشقتها....
ومروان قبل يركب كان واقف ع خوه يهدرز معاه..
مروان:الحق هي كفاءة ممرضة ممتازة حتى في اسلوبها وتعاملها مع المرضى هدا علاش شاده فيها الدكتورة اماني هكي..
مسح حواجبه بعدين عقدهم وقال:تمام..قول لعيالك تكلمها تقوللها ماعنديش مشكله تولي للخدمه وترفعها
المراة اللي كانت ترفع فيها قبل..
ابتسم مروان وقال:تمام تو نقوللها..
سفيان بضيق:تصبح ع خير..
مروان؛راجي..قولي امتى مسافر انت..
سفيان:بعد يومين..
مروان:كويس معناها بتقعد.لين تحضر المباراة عازمنا فيصل راهو..
هز راسه وقال:تمام..
ومشي للدروج..
ومروان تبعه بعيونه بنظرات اسف..بعدين لحقه وركب وراه...
🏵🏵🏵🏵🏵
"بالله عليك!"
مروان بضحكه؛والله..
منى بفرحه؛والله مامصدقه...
مروان؛ولااني ..تنهد وقال..سبحان الله قداش تغير سفيان..
منى شبحت لمروان شويه بعدين قالت..يعني مش واضح علاش؟!
مروان رفع حواجبه ونزلهم وقال:واضح وهلبه..الراجل بادي يحب..
منى ابتسمت بأسف..
مروان:كل شي فيه يقول هكي...الفترة الاخيره بالذات بان عليه هلبه..هو صح شي صعب هلبه...لكن في النهايه مش غلط وهدا المقدر والمكتوب..
منى:اكيد...لكن شكله حيتعب معاها هلبه..
مروان ضيق عيونها وقال:هي شن تحكيلك عليه بالزبط..
منى:طبعا مانقدرش نقولك شن تحكي..بس اللي نقدر نقوله ان علاقة سفيان بلينا من ايام كاين سلفها مش حلوة بكل مش ناسي كيف كان سفيان معاها...
مروان:ع هكي المراة كارهاته...
منى:ومعذورة...زياده عليها اللي صار الفترة الأخيره وكيف ضغطوا عليها ع خاطره..
مروان بأسف:صح..
تنهدت منى وقالت:الله اعلم شن يصير بعدين المهم توا خلاها تولي للخدمه...شبحتله ع جنب وقال..عقبال ماحتى انت تحبني هكي وتدعمني وتخليني ندير اللي نحبه..
مروان بضحكه:كان صبرتي راك حجيتي..
منى بصدمه؛شن قصدك!؟
مروان بإبتسامه؛فتحوا مدرسه خاصه حدانا فيها حتى حضانه دوام صباحي تمشي الصبح وترفعي معاك الشريف وماتعبي فيه حد..
منى بصدمه:مروان....تتسهوك صح!
مروان بضحكه:والله ندوي من جدي..
منى:وامك!؟
مروان ابتسم وقال:ماحد يحقله يعترض ع شي يخصك غيري اني..
منى حطت يدها ع فمها وهي تضحك بدهشه..
وهو يشبحلها ويضحك...
🌺🌺🌺🌺
بعد يومين..
الساعه 7:30صباحا..
صباح ربيعي لطيف...
خلاهم اختارو يفطروا في جنان الحوش..
بس لطافة هالجو نسفتها وجيهه بتذمرها..
وجيهه:قعدت بروحي نكرد ع هالحوش..
الشريف:تي هو كلها كم ساعه الصبح..وبعدين يروحوا وكل شي يقعد ع روسهم....
وجيهه:ماهو هي هكي في الاول وبعدين يشدوا حياشهم ومعاش نشبحولهم وجه..
الشريف:مايصيرش مادامهم قاعد هني ماكلتهم وشرابهم معانا وحياتنا وحده..
زبيده:ايه ياولدي بنقولك ع حاجه تخص صغويرة عدنان الله يرحمه..
الشريف ووجيهه ركزوا معاها..
الشريف:حاجة شني يام..
زبيده؛غرسهم...
وجيهه شبحت للشريف...
زبيده:بعد عمر طويل هما مايورثوا شي ولو صار وسفيان دار صغار صغاره اللي بيورثوه  وصغار خوه بيقعدوا هكي..
وجيهه:ايه والله حق...
الشريف ابتسم وقال:بعد موت المرحوم بشهر درت اللي قلت عليه..كتبتلهم الأرض في عين زارة  وخديتلهم عقار في بن عاشور... وعندهم حساب ومفتوح في المصرف..
وجيهه:وخيرك ماقلت..
الشريف؛مانبي حد يعرف وردوا بالكم تطلع الدوة..
وجيهه وهي تفكر قالت:عندك حق..
زبيده:حتى اني مادابيا كل شي يقعد في السر..
هز الشريف راسه...
ع نزلة سفيان من شقته جاهم وهو يقول؛صباح الخير..
امه وبوه:صباح الخير..
زبيده؛صباحك مبروك وعدوك مهلوك ولدي..قعمز افطر..
سفيان:لاحناي مستعجل عندي حاجه بنديرها قبل السفر...
الشريف:امتى مروح..
سفيان:4ايام بس..
وجيهه؛الخميس يعني..
سفيان:إن شاء الله..
فجأة انفتح باب الحوش..
شبحله طول..وكأنه قلبه كان عارف من اللي يطلع..
كانت لينا..
اوللها يوم دوام بعد انقطاع...
اول ماطلعت جو عيونها في عيونه..
ارتسمت ع وجهها ملامح الضيق وطول غيرتهم عنه وقدمت..
هو عقد حواجبه ورفع نظاراته الشمسيه ولبسهم..وركز بنظره عليها و ع شيشة الميه اللي شادتها في يدها..
لينا وصلت فيهم ووقفت حدا زبيده وقالت:صباح الخير..
ردوا عليها:صباح الخير..صباح النور..
الشريف:قعمزي افطري بنتي..
لينا:لاعمي ماعندي نيه..
وجيهه تشبح لولدها كيف خدي بكرج القهوة وبدي يصب..
زبيده:غير كولي حويجه شن بتمشي من غير فطور ادوخي..
لينا:لا عادي مايصيرلي شي بعد مانوصل غادي ناخد حاجه .
خدت زبيده تفاحه ومدتهالها وقالت؛والله ماك ردتيها..
ضحكت لينا وقالت:ع خاطرك بس...وخدتها منها..
وسفيان يشرب في القهوة ع اقل من مهله..
الشريف:قعمز واشربها براحتك..
سفيان حرك راسه بالنفي وقال:هكي كويس..
ولينا تاكل في التفاحه..
وجيهه:ماتنسيش العضاضه..
لينا؛امم حاضر..
سفيان برفعة حواجب:بدوا يسننوا؟!
وجيهه؛ايه خلاص توا خشوا في سته الشهور بطول عمرهم ياربي..
ابتسمت لينا..
سفيان ابتسم بحب وكمل شراب القهوة...
بعدين شبح لشيشة الميه اللي في يد لينا بطرف عينه من ورا النظارة..
لينا:الساعه كم؟
الشريف شاف ساعة يده وقال:تمانيه الاربع..
لينا:عطلت..
فجأة..سفيان بدي يكح..
شبحولها كلهم..
حط الفنجان ع الطاوله وحط قبضة يده ع فمه ويكح بإستمرار..
امه:خيرك!؟
زبيده؛شرق بالقهوة..
الشريف؛قتلك قعمز واشرب براحتك.
مدتله امه طاسة عصير وقالت:اشرب..
سفيان وهو يكح:الشارق...يعطوه...عصير!..
وجيهه وهي متفرفشه:امالا شنو ياهمي..
شبحت لشيشة الميه فيد لينا قالت بعصبيه من الخوف:شن تتفرجي عليه عطيه الميه..
لينا ارتبكت وجاته مدتله الشيشه..
هو خداها منها...
وفتحها وبدي يشرب...
وهي وخرت ولت وقفت حدا زبيده..
فجأة سمعت صوت كلاكس..
لينا شبحت للباب وقالت بتوتر:اهي جت..بالسلامه توا..
ومشت بسرعه فتحت الباب وطلعت..
هو كان يسكر في شيشة الميه ويشوف للباب..
وحناه وبوه يشبحوله..
امه:هاه ولدي شن توا..
شبحلها بعدين هز راسه بإيجاب وقال:كويس..هي توا..
جاها وباس راسها..بعدين باس راس بوه وحناه وقال:استودعكم الله..
وجيهه:وحتى حني استودعناك ربي..
الشريف:في امان بالله..
زبيده:يحفظك ربي ياوليدي...
رفع يده وحياهم ومشي طلع من الحوش وشيشة الميه معاه...
وجيهه؛قريب مات قدامها والميه في يدها ومابتش تعطيهاله..
زبيده:وشن نسيتي هو قال مانبي منها شي..
وجيهه:وهي عاد ماصدقت..تشبح قريب طلع روحه ولاتحركت فيها شعره..
زبيده؛اني بنسكت قبل ليرقى عليا السكر..
الشريف بضحكه:هدا علاش ساكت حتى اني..
هو قعدت تمرر في نظرها عليهم بإمتعاض..وراجلها يضحك عليها..
🌺🌺🌺🌺🌺
خشت لينا للمستشفى وهي تقول في نفسها ..
"وين بنلقى مزهره توا..يعني كان ضروري يشرق قبل مانطلع.."
لينا:استغفر الله العظيم...
وصلت للكافتيريا وخشت...
خدت ميه من الثلاجه ومشت عطت حقها للعامل..
وين جت طالعه كانت ع وشك تخبط حد..
هو اعتذر منها يقول:اسف..
وهي بدون ماتشبحله قالت بإستعجال:اسفه جدا..
وطلعت بسرعه وخلاته يتبع فيها بعيونه وهو مبتسم...
🏵🏵🏵🏵🏵
"ياسلام سلم..."
رنده وهي تكلم في اختها نوريه بالتليفون:كيف سكرت مني امي توا تسحن في روحها سحن..
"هالعبده هادي كلها منها جت قلبت دنيتنا قلب"
رنده:اااه بس لو ربي يتلفها من عنده..
"كبدي عليها دم يارنده معاش متحمله نمشي لحوش ماليا ونلقاها فيه"
رنده:احرف منك...
"الله يسامحك ويرحمك ياعدنان ياوخيي"
رنده:ايه والله الله يسامحه..لكن تعرفي نويرة لو خلينا سفيان يتزوج وحده مرات تتغير هلبه حاجات..
"وكيف بتخليه ياخد وحده تانيه تي هادي كرهاته في روحه مش غير فالنساوين"
رنده:ع اللي صار بيناتهم ولو قعدت هكي حتخليه يديرها نكايه فيها بش يقهرها..
"زعمه!"
رنده :ماهو انتي ماتعرفيش ان الفالحه قاعده تشجع في اساور بش تتقرب منه وياخدها..
"الله!"
رنده؛والله العظيم اساور بروحه قالتلي..
"لهالدرجه مش طايقه سفيان!؟"
رنده:ماتنسيش سفيان حتى هو قبل شن دار معاها ..
"ايه لكن هادي اساور لا مانقبلهاش بكل دراه الكبد هادي"
رنده؛ولا اني نبيهاله...سفيان لازم ياخد تمسح الكبد..
"شكله في فراسك حد انتي؟"
رنده ابتسمت؛ايه ومن العيله..بس من بعيد شويه..
"من هي ترى"
رنده:حور بنت الحاجه عيشه..الحاجه عيشه بنت عم بوي..
"اوباااا...كيف خطرت عليك هادي..بوي يعز بوها هلبه"
رنده:وهني مربط الفرس..
"واااي يافرخه رنده تخوفي "
رنده بضحكه:تربيتك يابيبي..
قعدت تضحك نوريه وهي تقول..
"وخيتي سلمها"
فجاة انفتح باب الشفه..
رنده:محمد جي نويرة نهدرز عليك بعدين....
"تمام بالسلامه"
رنده؛باي بالسلامه..
سكرت ع خشة عليها..
محمد:الغدي واتي..
رنده؛اممم..
محمد قعد يحول قعد يحول في الجاكيت متاعه وهو واقف ع الدولاب بش يطلع حوايجه..
رنده:حمودي..
محمد:اممم..
رنده:لمه اختك الخميس الجاي..
محمد:وشن تبيني نديرلها..
رنده؛ديرلي اني مش هي..
محمد؛كيف يعني .
رنده:نبي نشري قفطان..
محمد قعد ساكت ..خدي حوايجه وبيطلع..
هي بعصبيه:محمد نكلم فيك..اني اللمه مانمشيلهاش بدبش قديم..
محمد:خلاص قعمزي..
رنده:كيف نقعمز وهي عازمه امي وخواتي ونساوين خوتي وبيمشوا..
محمد شبحلها وقال:من الاخير ماعنديش فلوس مفلس..تبي تمشي باللي عندك امشي ماتبيش قعمزي..
ومشي طلع من حداها..
رنده بغيظ؛تو نشري والله لما نشري سلم بوي وخوتي ..
🏵🏵🏵🏵
"ماعندي شي جديد معاش شريت حاجه من عرس خوي عدنان الله يرحمه"
عبدالصمد:مسرع نسيتوه عدنان اللي بتخشوا مناسبات من توا..
عفاف دموعها عبوا عيونها وهي تقول:ولو يفوت مية عام ماننسوه وخيي الله يرحمه...لكن في الدين مايجوزش الحداد الطويل..
عبدالصمد متهكما:الحداد الطويل صار..
عفاف شدت روحها وقالت:المهم توا شن بتطلعني اليوم ولا لا؟
عبدالصمد:الحق ماعنديش اللي عندي بنحطه حق سيارة جديده بش نفتك من شبحات خوك وتلميحاته السخيفه وين يشوفني جايبكم بسيارة بوك..قولي لماليك ياخدولك تسلفي منهم سلف..
عفاف؛تو انت بروحك توا تكلمت ع تلميحات خوي اللي مش عجباتك تبيني نطلب منهم فلوس بش نشري قفطان!
عبدالصمد:والله هدا اللي عندي..
ومشي بإتجاه الكوجينه وهو يقول:تحركي حطيلي الغدي..
عفاف"هدا فاش فالح"..
ومشت للكوجينه وهي تغلي غلي...
🌺🌺🌺🌺
الساعه 10:15ليلا..
في حوش الشريف..في الجنان..
منى:شن رايك..
لينا قعدت تشبح للقفطان قالت؛سمح واحد وتفصيلته قاعده موضه..
منى بضيق:لكن قديم لبسته قبل..
لينا؛شافوه عليك هما..
منى:لا..لكن شيابين رنده عيلة فوق الريح وحمواتها لايعجبهم العجب ولاالصيام يعلقوا عليك في وجهك عادي جدا.
لينا بضحكه؛ضحكتيني..
منى بضحكه:تقول يحبوني ويموتوا فيا..
لينا بإبتسامه؛خلينا منها توا..معليش راعي ظروف راجلك وبعدين هي لمه مش عرس اهم شي تكون طلتك حلوة بس..
منى تنهدت وقالت:زعما..
لينا:ايه قداش وحده لبست اغلى الماركات لكن طلتها كانت مش حلوة ومالفتت الانتباه وغيرها وحده تلبس حاجه بسيطه لكن طلتها الحلوة خلت الناس يشوفوها حاجه واو بكل شي فيها..
منى ابتسمت وقالت:اقنعتيني..
لينا بإبتسامه؛كويس...وفتحت شيشة الميه وشربت منها..
منى:شن قصتك مع الميه اليوم..
لينا بضحكه؛من بدري نرجى فيك تسألي...هدي ياحنه مية مزهرة مرقيه..
منى:مرقيه؟!
لينا:ايه من لما داومت عليها وانا حاسه نفسيتي ارتاحت حتى صحتي حسيتها ولت خير من قبل..
منى:وعلاش مزهره؟
لينا:هو عادي مية الرقيه نكون عاديه بس الافضل اللي يندارلها زهر ولامية ورد وتقري عليهن الفاتحه والكرسي واخر ايتين من البقرة والاخلاص والمعوذات...
لينا:والله مانرقي كان لما نجي طالعه ولانحضر مناسبه..
لينا؛كويس بس مية الرقيه مش لهالشي بس..ربي قال وننزل من القرآن ماهو شفاء..
قرايته تشفي...وشراب ميه مقري عليها القرآن تشفي..
جسمك ونفسيتك..وراهو النفسيه هي اول حاجه لازم تتعالج بس يتعالج الجسم..
منى؛باهي ضروري نديرها بمية الزهر مانحباش..
لينا بإبتسامه؛قتلك مش ضروري...نقولك ماتقيدي نفسك بشي اهم شي تحافظي ع الرقيه وشربه منها شيرو...
منى بإبتسامة:إن شاء الله...باهي لينو بنسألك قاعد عندك دلكه وخمره؟..الصراحه بعد ماتموا اللي عطيتهولي قبل جربت ناخد من مكان تاني لكن ماجوش زي اللي عندك..
لينا؛وليش ماقتي؟
منى؛تحشمت الحق..
لينا:مبردك انت والحشم متاعك ..في مازال عندي واجد..وبحسرة كملت تقول...صندوق بتاتي مازال فيه..
منى قعدت تشبحلها بحزن..
ولينا شافتها وضحكت وهي تقول:المهم تو نعدي نجيبلك من فوق..
منى:فوق وين؟!
لينا :شقة نامق الجمري..
منى بدت تضحك وهي تقول:نامق...خزي عليك...ووه عليا..
ولينا ناضت وهي تضحك قالت:شويه وجايه..
منى هدت ضحك وقالت؛عندك مفتاح!؟
لينا؛بيت السبع مايخلى من العظام..وطلعاته من جيب السروال..
ومنى تضحك وخلاص..
لبست وشاحها كويس...ومشت بطريقها للشقه..
وصلت الدروج وبدت تركب وهي تهمس بذكر "الله اكبر"..
لين وصلت الشقه..
فتحت الباب وسمت بالله وخشت..بعدين سكراته ومشت للدار..
فتحتها وخشت وشافت للزيانه..
ضيقت عيونها وقالت:انا خليت شيشة خمره "بضم الخاء" هنى...
قدمت للزيانه وشافت الدلكه قاعده بس الخمرة لا...
لينا؛شكلي تميتها اصلا ماقعدش فيها واجد..
لفت ومشت للدولاب..فتحاته وطلعت صندوق البتات الخاص بالعطور..
فتحتاته..
كان فيه شيش الخمرة وعلب الدلكه..ومعاهم شيشة صغيره من عطر الياسمين الخالص المركز..
كانت لينا تحب اضيف منه قطره مع الخمره..
والخمره عبارة عن مزيج من مسحوق الصندل والظفرة والمحلب والمسك تخلط مع عطور سائله ...
متميزات فيها اللآليء السمراء في جنوبنا الحبيب..
خدت لينا من الدلكه والخمرة وسكرت الصندوق ورداته في مكانه..
بعدين مشت بتطلع...وهي طالعه شافت للزيانه ومازالت شاكه هل كملت الخمرة اللي كانت ع الزيانه ولا لا...!؟
🌺💎وفي الحقيقه الخمرة متاعها سافرت لمصر..
اها حطت في مصر..
محطوطه قدامه وهو يتفرج عليها...وبين عيونه كل موقف جمعه بصاحبتها..
كانت مرسومه ع وجهه ابتسامه حلوة خفيفه تلقائيه..
ومرات يضحك وين يذكر فيها كيف تعامل وهي معصبه..
عقدة حواجبها كانت مميزة واسلوبها الحاد في الكلام ع قد ماكان ينرفز فيه ويوتره ع قعد ماضحكه وهو قاعد يفكر فيها..
بس هالضحكه مادامتش لما ذكر اللي صار بينه وبينها قبل 40يوم..
والكلمه اللي قالتها قاعده ترن في ودانه بصوتها وكأنها قالتها حالا...
《 عمري ماكرهت بنادم كيف مانكرهك..》
تبدلت ملامح وجهه للحزن...وتنهد من قلبه تنهيدة وجع...
اتكى براسه ع ظهر الكرسي وغمض عيونه وهو يقول في نفسه..
"يارب شن اللي اني فيه هدا بس! قالتلي نكرهك واني مانفكر كان  فيها شن هالحال اللي وصلتله وكيف وامتى وصلتله بس.!؟واني نوصله اني!!؟"..
فتح عيونه وقال؛كبير ياربي كبير مافي حد يقعد عالي غيرك انت سبحانك...رجع شاف للشيشة الخمرة وقال...وتقولي ماتحطش في عطر كان هدا مش عطر مالا شن هو العطر!!؟
رفع حاجبه وقال...وكان عندها غيرها اكيد دير منها وهي ماشيه للخدمه!؟
واشتغلت نار لاتخمد وسط ضلوعه..
وقعد يفكر بجنون كيف يدير...مش حيقوللها تقعمز مرة تانيه وقتها رسمي حتحقد عليه حقد نهائي..باهي شن الحل!
مش قادر يتحمل فكرة ان الريحة هادي يشم فيها حد تاني..
وفي الآخر رحمه الرحيم لما الهمه طريقة ما...
🌺🌺🌺
الساعه 12:00ليلا..
رقدت صغارها حداها ومرة مرة تنوض تشوف حرارتهم بدوا يسننوا والتسنين للرضع تلحقه بعض الاعراض المرضيه..
لما اطمنت عليهم ان حرارتهم كويسه..
حطت راسها ع المخده بترقد..شبحت جنبها لقت سلفتها لاهيه بتليفونها تكتب وع وجهها ابتسامه حلوة 
عرفتها تراسل في راجلها اللي بايت في المستشفى..
خطرت عليها اخر ليله تراسلت فيها مع عدنان..
قامت تليفونها وفتحت ع الرسايل متاعه...
《 الناس تعشق من خالا بوجنته...
فكيف بي وحبيبي كله خال....نموت عليكم..》
غمضت عيونها بألم ودموعها قعدوا ينزلوا بحرارة..
وقلبها موجوع هلبه...
وفي عز حزنها...
رن تليفونها بنغمة رساله...فتحت عيونها وهي مخلوعه..
وسلفتها التفتت وشبحتلها..
هي شافت التليفون لقت الرساله جايه من رقم غريب..
فتحتها...
"السلام عليكم كيف حالكم...بحر وياسمين امورهم تمام؟"
لينا مسحت دموعها وقالت:هدى منو؟
منى؛خيرك..
لينا مدتلها التليفون وقالت: وصلتني الرساله هدي توا من رقم غريب ماعرفتش من؟
منى خدت التليفون وقرتها وضحكت.
لينا؛علاش تضحكي؟!
منى بضحكه؛واضحه من منو يابنتي..مدتلها التليفون وقالت:سفيان..
لينا اتفاجئت..خدت التليفون وشافت الرقم كويس كان رقم دولي..
منى:ردي عليه..
لينا شبحتلها شويه بعدين قالت؛مافيش في يدي غير هكي نخاف مانرد يعدي يحكي لامه تجي تسحن كبدي..
ضحكت منى..
وبدت تكتب لينا في الرد وهي مش طايقه روحها..
💎عنده هو..
كان يشبح للتليفون وهو شاد ذقنه بيده ويراجي ع اعصابه..
فجأة ضوت الشاشه..
نزل يده وفتح والرساله طول..
"الحمد لله"
ضحك ضحكة خفيفه..
بعدين بدي يكتب..
🌺هي رقدت ع جنبها الايمن وكيف جايه بتقرا الاذكار..
رن تليفونها بنغمة رساله..
لينا غمضت عيونها بنفاد صبر وقالت؛معاش تحز...
ومنى تضحك..
هي فتحت عيونها وخدت التليفون وفتحت الرساله..
"اسمعي مش كان اني مهناش تاخدي راحتك..
لبس عادي لا...عبايه بس...عطر لا..لا..لا..والله ماني راضي عليك كان حطتيه ورضاي فيه جنه ونار ع فكرة"
لينا قعدت تقرا فيها وتعاود وهي معصبه ع الآخر ماتبيش ترد رد يجيبلها المشاكل..
بعد ماعدت للميه..بعتتله رد..
"لينا عبدالودود ***** تقولك تصبح ع خير"..
هو حط يده ع عيونه وقعد يضحك من جده..
فهم قصدها من ردها......
هدا ضحك وتنهد بعدين ناض ومشي للسرير بش يرقد..
وبعد مامرت ساعه وهو يفكر فيها خداه النوم ورقد...
🌺🌺🌺🌺🌺
بعد تلاته ايام...
يوم الإربعاء...
الجو كان دافي وحلو...
جو مكرونه ع الحطب في الجنان..
دراتها منى بعد ماروحت من المدرسه وكملتها عليها لينا بعد ماروحت من الخدمه..
رتيل:قداش لينا مادرناش شوا من العيد
وجيهه؛راجي لين يروح سفيان..
عفاف:نهار ديروه بنجيكم ديروه اخر الاسبوع الجاي يام..
وجيهه:ان شاء الله..
لينا:رتيل قرضيلي الشبت تلفيه ع الرخامه..
رتيل:اوكي..وناضت خشت للكوجينه..
عفاف وهي تشبح للينا قالت.بصوت منخفض:قاعده مسكرة راسها وماتبيش تمشي للمه..
وجيهه؛قاعده..تحساب روحها بتحس ولدي اكثر مني..
عفاف قعدت ساكته وهي تشوف للينا..
ع جية مروان وهو يتكلم في التليفون فيديو:اهما يتشمسوا..
لينا شبحت مروان وقفت ع حيلها وقعدت تشبحله كيف موجه التليفون لصغار المقعمزين في القعماز.
شويه وسمعت..
"ماشاء الله ماشاء الله الله يبارك."
وجيهه؛سويفه ولدي..
"شن حالك يما"
وجيهه:شن حالك انت حبيبي شن داير..
"تمام التمام الحمد لله...شن مطلعين عيوني للجنان اليوم"
ابتسمت عفاف..
وجيهه بضحكه:ايه..كان تشوف بحر كيف يضحك وهو يسمع فيك..
"ترا وريني مروان"
مروان؛اها..
"والله حق..."
وجيهه؛عرف عمه..
ضحك وقال..
"مالاشنو حتى هو عمه سفيان"
رتيل جت للينا بالشبت:اهو..وولت خشت داخل...صبت لينا الشبت في الطنجره
وهي تسمع فيهم كيف يهدرزو
"بوي مهناش؟"
وجيهه:بوك وحناك اليوم في حوش بنت عمه عيشة عازمتهم
"راجلها صاحبه عاد"
وجيهه؛ايه..سويفه مروح غدوة ولا؟
"بإذن الله علاش"..
وجيهه؛لاغير نبي نتأكد..
عفاف؛لينا خلي صونيه لراجلي ع تركينه..
"شن دخلها بيه راجلك"
فنصت عفاف...ومروان ووجيهه شبحولها...
"عفاف نكلم فيك..راجلك انتي هو نوضي انتي خوديله حصته"
لينا ابتسمت ع جنب وهي تصب في الغدي..
عفاف: ياودي باهي خلاص..سامحنا..
"باك مش عاجبك!"
عفاف:عاجبني ونص ياسيدي غير انت ماتحرجش..وناضت ومشت للكوجينه..
ع طلعت منى...جت للينا وقالت:خيرها هادي خاشة تبكبك..
لينا:تو نقولك بعدين..
وجيهه تشبحلهم هما الزوز بنظرات حاده ..
"هي مالا نخليكم نتغدوا...استودعناكم الله"..
مروان وقف ع حيله ومشي وهو يقول:تمام نيوتن نشوفوك غدوة ان شاء الله...
🌺وحطوا غداهم..
والتموا عليه يتغدوا...
عفاف:شن بتلبسي منى غدوة..
منى:لبس جديد ماخديتش قفطان خديته في بتاتي قاعد يجي عليا..مروان قالي مانقدرش ناخدلك توا..
وجيهه:مش ضروري تاخدي لمة جياب هي..
عفاف:ايه..اهو حتى اني بنلبس قفطان عندي ليه قريب عام لتوا قاعد قنين  علاش نخسر في راجلي...
وجيهه:هدا الصح..نذكر نوريه اول ماتزوجت قعدت عامين تلبس من بتاتها ماخشت عليها حاجه جديده..
عفاف:حتى اني يام ع خاطر البني قعدت تلاته سنين من غير لبس عيد...
وجيهه:ايه هدا هو الوحده لازم تساعد راجلها وتقدر ظروفه..
منى في نفسها"و2000اللي  خدتهم رنده من بوها حق قفطان للمة !!؟"
ولينا تسمع وهي تاكل ومرة مرة تلعب في صغارها..
ماخاطرهاش تسايرهم حتى المسايرة في الموضوع اللي فاتحينه...
🌺🌺🌺
بعد الغدي جي راجل عفاف روح بيها بعد ماخدت من امها حق المزين بالدرقه ع الكناين..
الكناين اللي ضموا الحوشه بسرعه وخشوا اتكوا شويه بعد نهار متعب في الخدمه برا وداخل الحوش..
🏵🏵🏵🏵🏵
تاني يوم...
الساعه 5:00عصرا...
طلع مروان بامه ومرته لحوش حماة رنده..
وقعدت لينا في الحوش مع صغارها والحاجه زبيده ورتيل اللي ماقدرتش تمشي لانها تقرا...السنه هادي شهاده والامتحانات قربت..
••فهالوقت..
خش سفيان للحوش..
ومشي طول لشقته...
دوش ...بعدين قعمز ورا اللاب توب دار دورة ع مواقع التواصل..شاف منشور في قروب الكليه منزلين صور ليه من المؤتمر وكاتبين عنه كلام عجبه هلبه...
والتفاعل ع المنشور كبير....
علق عليه حتى هو وشكر اللي نزل المنشور..
بعدين سكر اللاب توب متاعه..
ومشي بينزل لوطا...
وين خش نادى...
"رتيل"..
لينا وهي في دار التقعميز وين سمعت صوته خافت..
بعدين شاف رتيل وهي طالعه من دارها وماشيتله...
لحظات...وخشت عليها رتيل وقالت:يبي الصغار..
وخدتهم وحطتهم في الشنطه وشدتهم كويس وطلعت بيهم..
زبيده:شن دارلها..
لينا شبحتلها وقالت:من هي..
زبيده:اللي في تمتيليه..
ضحكت لينا وقالت:خدي منها ذهبها من وراها وباعه..
زبيده؛خزي وتفي..
ضحكت لينا..
🏵🏵🏵🏵🏵
في حوش حماة رنده..
امها وخواتها وكنتهم كانوا مقعمزين حدا بعض..
كانوا ملفتين هلبه بجمالهم واناقتهم بالذات وجيهه ماتنعطاش عمرها..
بس الملفت اكثر انهم خشوا مناسبات قبل يسكر ولدهم عام متوفي وهالامر غير مقبول الى حد ما في مجتمعنا..
جتهم رنده وهي تتبخر وعاجبتها روحها اكعادتها..
وقفت عليهم وقالت:الله يبارك عليكم..
نوريه:وعليك رنودتي..
رنده؛تسلمي نويرة...شن ماماتي شن هالجمال..
وجيهه بضحكه:طبعا انتم لمن طلعتوا مالا..
نوريه:اقوا عليهم جيجي..
عفاف بضحكه:ياجامد انت ياجامد..
رنده:سلملي هالنحله..
ضحكت وجيهه..
بعدين رنده شبحت لمنى اللي كانت مبتسمه بمجامله وقالت؛طالعه حلوة منى عجبتيني اليوم..
منى:تسلمي..
رنده بضحكه؛باهي اللي ماجتش معاكم هديكا راكم وليتوا زي سبات التفاح اللي حطوا فيه بدنجاله بالغلط..
نوريه وعفاف قعدوا يضحكوا..
ومنى تشبحلهم وهي مضايقه.
وجيهه:تحشمي رنده مرت خوك هادي راهو..
شدت رنده ضحكتها وقالت:خلاص خلاص سكتت..شويه وجايتكم ومشت...
وجيهه شافت لبناتها لقتهم شادين ضحكتهم قالت:مافي شي يضحك..ماتجيش تدوي هكي ع مرت خوها الكبير..
نوريه:خلاص يام هي معاش بنضحكوا..
وشبحوا لبعض هي وعفاف وقعدوا يشدوا في ضحكتهم بالسيف..
ومنى منقرفه منهم لأبعد حد بس ماقدرتش تبين..
🌺واستمرت اجواء اللمه زي مانعرفوها...
ولاحظوا البنات في اللمه ان علاقه حموات رنده بسلفاتها قويه عكسها هي..حسوهم مايدوروش فيها برغم انها تحاول تتعامل معاهم قدام الناس...
وهالحال شغلهم هلبه بالذات امها...
🌺🌺🌺🌺
الساعه 8:00مساءا..
مقعمزة لينا تهدرز ع زبيده...
والصغار حداها تلعب عليهم عمتهم..
وعمهم فوق في شقته يجهز في اسئلة الامتحانات..
••لوطا
لينا وهي تخيط في المخاد؛ايه خدت الصغار وروحت بيهم..
وزبيده تسمعلها كيف تحكي ع المسلسل وحاسه بدوخه وتعب..
لينا:وهو عاد ماعجبه هاللي داراته بدي يدورلها في حاجه بش يدير مشكله...
رتيل؛لينا..
لينا شبحتلها وقالت؛نعم..
رتيل بخوف:حناي دايخه..
لينا شبحتله لاحظت انها مش طبيعيه..
لوحت اللي فيدها وقعدت تنوض فيا؛جداي ياجداي..
زبيده بتعب:اممم..
لينا بخوف:خيرك شن تحسي..
زبيده بتعب ؛دايخه...
لينا؛سكرها راقي شكله...اجري كلمي خوك رتيل..
ناضت رتيل تجري للدار خدت تليفونها واتصلت بمروان..
نزل يجري من شقته بعد ماقال لسفيان..
وحتى هو نزل طول..
خشوا الزوز للدار..
مروان بخوف:خيرها..
لينا:سكرها راقي حاولت نخليها فايقه لين تنزل..
مروان:كويس...
لينا وخرت ومشت طلعت..
سفيان بخوف:نرفعوها مروان.
مروان وهو يوتي في اليبرة؛لا مش لازم...مادام قاعده فايقه..
برا..
لينا؛اشبح شن واكله رقالها السكر ماشفتيها كلت شي رتيل.
رتيل بخوف:الحق بكري ترجتني نعطيها من بلح الشام اللي جايبه سفيان..
لينا خبطت بيدها ع وجهها وقالت بهمس:نهارك الاسود!
رتيل حطت يدها ع فمها وهي بتموت من الخوف..
شويه وطلعوا مروان وسفيان.
سفيان حط ايديه في نص وقال:شن عطيتوها!؟
رتيل بتموت من الخوف..
لينا:شن حالها توا..
مروان:احسن..واكله حلو هي؟!
لينا قعدت ساكته..
سفيان بعصبيه؛تكلموا شن واخده..
لينا:شويه من بلح الشام..
مروان:كيف!
سفيان بصدمه:خيرك انتي خيرك بلاعقل..!تعرفي حناي هادي الحلو ماتاكلش فيه بكل ماكلتها كلها صحيه ماتاكل في شي يضر صحتها وانتي تعطيها بلح الشام مرة وحده لو كنتي تبي تقتيلها ماديريش هكي..
مروان؛خلاص هدي.
سفيان:شن هدي متاعك هادي حناك قريب راحت ياراجل.هدا غير ممرضه وتعرف..
لينا ماقدرتش تتحمل هانها وقدام اخته وسلفها..انحرجت منهم ع الآخر وقالت ودموعها ينزلوا:مش عارفه شن نرد والله ماني عارفه شن نقول..تعبت واجد والله تعبت..ومشت طول طلعت من حداهم وهي تبكي.
مروان؛كترتها ياراجل  حناك حالها باهي توا
سفيان بلع ريقه وقلبه يدق بقوة لين وجعه...هو هكي عصبي ولسانه سليط وخوفه ع حناه خلاه ماقدرش يتحكم في روحه.
رتيل وهي تبكي:هي مادخلهاش ماتندريش عليها اصلا..
شبحولها الزوز..
سفيان:وانتي من قالك..
رتيل بخوف:اني عطيتها قعدت تترجى فيا قالت خاطري فيه عطيتها شويه..
بدون تفكير قدملها بيضربها شده عنها مروان..
سفيان بصوت عالي:كيف اديري هكي ياحمارة...
مروان؛بري  اقلبي وجهك..
هي هربت ومشت لدارها سكرتها عليها..
سفيان:والله مامفوتيه ياحيوانه تو نوريك..
مروان:خلاص هدي ياراجل..
سفيان:شن هدي متاعك هادي في جرتها الكلبه.....وسكت..
بعدين بعد عن خوه وقال:خل نرفعوها وخلاص..
مروان:تمام...
مشي مروان طلع..
وسفيان قعد يشبح للجهه اللي ترفع للدار اللي خشتها لينا..
تنهد بضيق...بعدين مشي لحق خوه...

#صلوا_على_محمد

....يتبع.....