شكولينا

الجزء الثاني والعشرين

تعودتوا بيا ديما قبل الجزء لازم نذكر بالصلاة ونقول هي أهم من كل شي في الحياه من كل شي...
وقلبي يوجعني وين نشوف بعض التعليقات يقولوا نسهروا ع الروايه ونرقدوا عن صلاة الفجر او القيام...
لا حبيباتي مش هدا اللي نبيه بكل اعوذ بالله من اني نكون سبب في إلهائكم عن الطاعه...كله الا الصلاه..
لهذا ارجوكم...نزلت الروايه في الليل بحكم ظروفي لاني ننشغل حتى اني مش ديما مقعمزة نكتب...نزلت في الليل خليها للصبح اقريها في الصبح بإذن الله..مافي شي اهم من الصلاة...لهذا ارجوكم ماتركبونيش ذنب بالله عليكم..
ماتقدموا شي ع طاعة الله ولاتخلوني اني سبب فهالذنب العظيم...
الصلاة..اولا....الصلاة اولا....ويجي بعدين كل شي...❤
ألا هل بلغت اللهم فأشهد...
🍫🍫🍫🍫🍫🍫🍫🍫🍫🍫🍫🍫🍫🍫🍫🍫
الساعه 11:00 صباحا..
في كوجينة الحاج الشريف..
منى وهي تغسل في الماعين:دار صورة رنين وطل عند الغضروف ضاغط ع العصب والحكايه واصله لمرحلة خطيرة لازم يدير عمليه..
لينا:ايه مشكله والله حكاية الغضاريف هدي..ناس واجد يهملوا فيهن لين يوصلوا لهالمرحله..يديرها ان شاء الله وينوض منها سالم..
منى:اللهم آمين..
"نوريه جيبي البخاره"
"نعم!"
"البخاره البخاره"
"باهي"
منى:يكسرولي في رقبتي لما يتميعوا في الدوة..
لينا:حسيتهم هما هكي حتى اللاي طريقة كلامها هكي فيها شويه دلع..
منى:لكن هادم يزيدوا فيها..
ع خشة نوريه وهي ادور ه البخاره:وين البخاره منى؟
منى:فوق الثلاجه..
نوريه:ترا يالينا جيبها طويله انتي تلحقي..
بردت لينا اعصابها وخلت اللي في بدها ومشت للتلاجه..
رفعت صوابع رجليها وخدت البخاره من فوقها ..ولفت وعطتها لنوريه وهي تقول:اهي..
خدتها نوريه وهي تشبحلها من فوق لتحت ومشت طلعت..
تنهدت لينا بملل ومشت للاوندينو وكلمت اللي دير فيه..
منى:تحملي وخلاص..
لينا هزت راسها وقعدت ساكته...
شويه وكملوا غسل الماعين..
ومنى دارت قهوة معاها كعك حلو...وطلعوا بيها لدار التقعميز..
اول ماخشوا..
لينا؛ناضوا..
وجيهه :ايه..
مشت امهم قعمزت حداهم وهي تشوفلهم كيف يقلبوا في عيونهم ويحركوا في ايديهم شويه شويه..
فرقت منى القهوة ع الموجودات وقعمزوا..
رنده:يام عزوزتي بدير عمليه ع يدها اسبوع الجاي..
وجيهه:خلاص قررولها..
رنده:ايه..
هما يهدرزوا..
وبنت رنده تمرد جهة صغار لينا ولما وصلت فيهم جت بتحط يدها..
لينا بعدتها وقال:احااا..
رنده:بالشويه خلعتيها شن هكي..
زبيده:نوضي خودي بنتك شديها..
ناضت رنده خدت بنتها وهي تقول:معاش تكشخوا عليها..
ومشت قعمزت بيها..
ولينا تشرب في القهوة ببرود ومش حاسبه لوجود رنده اي حساب...
ع خشة نوريه وهي تقول:من وين اللي بيجوا يتغدوا يام..
وجيهه:جماعه من زليطن "زليتن"..
نوريه:اها مالا خل نكلم حسين خل يجي يتغدى قداش ليه يقولي يبي يتلاقى معاهم ويدير معاهم خدمه..
رنده:يتعزموا حسين اعزموا محمد..
عفاف:وحتى عبدالصمد..
وجيهه؛ياودي باهي تو نقول لبوكم يعزم..غير يروح سفيان معاش فيه وقت..
سمعوا باب الحوش الخارجي انفتح..
رنده:ولد الحلال عند ذكره..
نوريه:امتى يروح مرواه منى؟
منى؛مروح قداش ليه راقد فوق..
نوريه:فطرتيه ولا؟
منى:اكيد..
نوريه:وانتي سفيان فطر قبل مايطلع..
لينا وهي تشرب في االقهوة اذكرت انه طلع هكي من غير فطور...
نزلت الفنجان وقالت:لا..
نوريه شهقت..
ووجيهه قالت؛كيف هكي يابنتي معقوله من الصبح لتوا قاعد هكي من غير فطور..
لينا تنهدت وهي تحاول تبان تابته قالت:انشغلت بالعويله..
رنده:انشغلتي بالعويله..لاحول ولاقوة الا بالله وخلاص..
زبيده:خلاص في الجديد اطلعه بالفطور انهوا..
وجيهه:بنتي مايجيش هكي والله مايجي غير كان قتيلي راني درتله اني..
لينا حاسة روحها بتنفجر...مش مقدرين ولامتفهمين اللي هي تمر بيه..المراة توا كيف سكرت شهرين فاقده راجلها...وامس بس ردها سلفها...يعني شي فوق طاقتها اللي قاعده تمر بيه وهما يزيدوا فيها على مابيها..
لينا شدت روحها بقوة وقالت:خلاص مرة تانيه مش حيطلع من غير فطور..
رنده بتهكم:بارك الله فيك..!
ومنى ورتيل وعفاف وزبيده يشبحوا للينا بضيق..
وهي قاعده تقاوم دموعها وتحاول تقوي نفسها قدامهم ع الأقل..
جي هو وفشل هالمحاولات لما سمعاته يقول..
"لينا"..
انتفضت لاإردايا..
وكلهم قعدوا يشبحولها..
وجيهه:نوضي..
لينا بلعت ريقها وحطت الفنجان وناضت..
وربعت ايديها وهي ماشيه طالعه..
وصلت في الباب وقالت..نعم..
هو رفع حواجبه وقال:دخلي..
طبست بترفع ودموعها اللي حاولت تشدهم غلبوها ونزلوا هو شافهم..حول نظاراته وقال:خلاص خلي..
رفعتها فوق..
هو شدها منها وقال:قلت خلي..
لينا شبحتله وقالت:هات بالله عليك مش ناقصه راهو..
سحب ايديه وهي لفت وخشت داخل..
قعد يشبحلها وهي ماشيه لحظات..
بعدين لف ومشي...دار ع الحوش من جهة الكوجينه...شاف من الروشن لقاها هي بس فيها..مشي خش من الباب..
وطول للباب دخلاني سكره..
هي شبحتله وهي مخلوعه وخايفه..
سفيان:الوضع هدا مايجيش منه لازم تتعودي وتتأقلمي زي مااني قاعد نتعود خلي الحياة تمشي طبيعيه..مش كل شويه تقعدي تبكي وقالبه وجهك..
لينا ضم شواربها لداخل بغضب بعدين قالت:ماريتش ناس عديمة احساس في حياتي هكي..
سفيان بحده:احترمي نفسك..
لينا:نا محترمه نفسي وواجد مش شويه..
سفيان تمالك نفسه وحاول يهدي روحه وهو يقول:اسمعي ماتحاوليش تستفزيني يعلم الله اني قاعد نساير فيك فوق المسايرة واني اللي عمري ماسايرت حد اخطا والديا..لهدا ماتخلنيش نتعامل معاك بأسلوب تاني...خلينا محترمين بعض ..
لينا قعدت تشبحله بحده وعيونها معبيات دموع..
هو عقد حواجبه وبلع ريقه وقال:ديريلي فطور..ومشي طلع من حداها...
غمضت عيونها بشده بعدين فتحتهم وهي تقول:الصبر..يارب الصبر..
🌺🌺🌺🌺
هو بعد ركب للشقه..
مشي لداره بيطلع حوايج بش يدوش..
اول ماخش جو عيونه ع البدله العربيه وهي محدده ومحطوطه ع السرير..
هو كان يحب حوايجه بعد الكوي تتعلق بالعلاقه ع الشماعه او في الدولاب ماتنحطش ع السرير..
تنهد بملل بعدين مشي خدي العلاقه من ع الشماعه ومشي للسرير..
اللبسه اللي طلعها كان سوريه عربيه وفرمله وعليها كشابيه "عباية رجاليه تنحط ع الكتاف او تلتبس لبس"..
خداهم بالحاجه بحذر ...
وقعد يحط فيهم ع العلاقه..
بعدين رفعهم ومشي بيهم للشماعه وين علقها..
دخلت لأنفه ريحه حلوة...استغرب...قرب اللبسه ليه وقعد يشم فيها...كانت حلوة بالمرة ومريحه..
خلت ابتسامه خفيفه ترتسم ع وجهه...بس سرعان ماأختفت هالإبتسامه لما فكر في مصدرها....
توتر...ارتبك..عقد حواجبه بغضب.. وعلقها ع الشماعه..
بعدين مشي للزيانه وخدي العطر متاعه..ومشي للبسه بخها كلها من فوق لتحت غسلها غسل..
ولما كمل غطا شيشه العطر وهو يمرر في نظره اللبسه...
تحرك للزيانه وحط عليها العطر..وفتح الدولاب طلع الحوايج اللي بيلبسهم بشي من االعصبيه..
بعدين مشي طلع للحمام...
🌺🌺🌺🌺🌺
حاصلات في الحوت ينظفوا ويخرطوا..
ومعاهم عزوزتهم توتي في فطور ولدها..
اما بناتها واقفات حداها يدقوا في الحنك..
رنده:المهم الارض جايه في مكان حلو وان شاء الله بيبدا يبني فيها قريب..
عفاف:كويس ارتحتي من عيشة الشقق..
وجيهه وهي توتي في السفره:بوه بيساعده ع البني؟
رنده:لالا هو بيبني بروحها اصلا بنبيعوا الشقه اللي ساكنين فيها وبحقها بيكمل البني..
وجيهه:وين بتمشوا كان بعتوها؟!
رنده:ماقتلكش يام..محمد كلم بوي ع الشقه اللي عندها قال نقعدوا فيها بالإيجار..
وجيهه:ع اساس بوك بياخد منه..
رنده:هو حلفله قال مانقعدش فيها هكي..
عفاف:اكيد بوه بياخد منه مبلغ رمزي..
وجيهه:واهله ماقالوا شي؟
رنده:ماعندهم مايقولوا هدا شي يخصني اني وراجلي..
وجيهه:قصدي كيف رضوله يأجر عند نسيبه وهما عندهم.؟
رنده:عندهم شقه في حوشهم واني يام مانبيش نسكن غادي نبي نعيش ع حالي وبحريتي كيف ماتعودت..
شبحوا لينا ومنى لبعض...
ع خشة رتيل وهي تقول:سفيان يبي فطوره..
عفاف ورنده شبحوا للينا..
ووجيهه خدت السفرة وطلعت بيها وهي تشبح للينا بطرف عيونها..
عفاف:بالله نظفوه كويس اخر مرة ماعجبنيش تنظيفه..
منى :ان شاء الله..
رنده:تعالي فوفا..
مشت طلعت رنده وعفاف معاها..
ولينا مكملين شغلهم مابوش يعلقوا حتى التعليق خلاص تعودوا ماعندهم مايقولوا اكثر ماقالوا ولايعيدوا ولايزيدوا..
••في الصاله
حطت وجيهه سفرة الفطور قدامه..
هو شبح للسفره بعدين شبح لأمه وقال:انتي درتيه؟
وجيهه تنهدت وقعمزت وهي تقول:ايه..
رفع حاجبه وقال:لينا...
وجيهه سكتت ومابتش تتكلم هي مضايقه من لينا وتبي سفيان من توا يحطلها حد..
استغربتوا...!
ايه صح وجيهه تحب لينا بس كانت في حاجات مش عاجبتها فيها وكانت تخاف ع زعلها لأنه من زعل عدنان..
بس توا لينا ولت تخص سفيان نقيض عدنان في الحاجه هادي..
وكيف ماتعرفوا...امه وخواته وعيلته بشكل عام اهم عنده من أي حد...وفي نفس الوقت كانت عنده رغبه انه يكسر شوكة لينا ويخليها تخضعله...هو خدي على هكي ...
🌺طلعت لينا من الكوجينه وتوجهت للصاله..
خشتلها وقالت بجديه:نعم..
سفيان وهو عاقد حواجبه:اني قلت لمن ديري فطور..
لينا:ليا نا..
سفيان:كيف تخلي امي ديره؟
لينا شبحت لعزوزتها بعدين شبحتله ضيقت عيونها وقالت؛معليش...انت من امتى تاكل حاجه نا دايرتها؟!
ارتخوا حواجبه وشبح لأمه..
وامه شبحتله ورفعت حواجبها..
رجع شافلها ورفع حاجه وقال:من اليوم...دف سفرة امه وقال...ارفعيها وديري غيرها..
تنهدت وجيهه وشبحت للينا..
لينا شبحت للسفرة بنظره تبين انها قاعده من داخل تغلي غلي..بس حاولت تبان بارده ع الآخر...مشت خدت السفره وطلعت بيها من الصاله للكوجينه..
سفيان هز راسه وقال:ماتبيش من  يسايرها هادي..
وجيهه مازال ملتزمه الصمت..
شبح لأمه وقال:الصغار وينهم؟
وجيهه:عند جدهم في المربوعه..
سفيان:المربوعه مصقعه يام..
وناض بيمشيلها..
وجيهه:ياودي المكيف مفتوح فيها ع السخون.
ماعدل ع امه وكمل طريقه للمربوعه..
ووجيهه ضحكت وهي تحرك في راسها يمين ويسار بعدين ناضت ومشت لدار التقعميز...
فاتت من حدا الكوجينه..
اللي فيها لينا توتي في فطور سفيان بس وماتوتيش فيه..
كيف!؟
كل اللي دارته انها غيرت مكان الحاجات في الصواني..
يعني متلا الصونيه اللي كان فيها طن حطت  فيها الدحي المطبوخ والعكس وكذلك باقي الصواني..
بس طبعا كل شي كان نظيف ومرتب..
بعد كملت خدتها وطلعت بيها للصاله مالقتاش فيها..
تأففت وقالت:وين عدى هالمصيبه..
"اييه عمو بتفطروا مع عمو تسايروني!؟"
التفتت ولقاته شادهم الزوز في حضنه ويشبحلها بنظره حاده..سمع الكلام اللي قالاته..
هي حطت السفرة وقالت:اهو..
ومشت بتولي..
سفيان:قتلك بري اني؟!
لينا وقفت وشبحتله ...
هو مشي قعمز بالصغار وقال:بري..
لينا تنهدت وقالت في سرها"الصبر يارب"..
ومشت طلعت من حداها..
هو حط صغار خوه حداه وقال:هي خل نفطروا..
وشبح للسفرة...
ضيق عيونه وهو مركز فيها...
غلبت ملامح وجهه ملامح ضحكه خفيفه...
بعدين خدي الخبزة...حلت محل ملامح الضحكه ملامح التردد...كيف بياكل...!؟
《 معليش...انت من امتى تاكل حاجه نا دايرتها؟!》
رفع حاجبه وقال:عناد فيك..
وبدي ياكل وكأنه عمره ماكلي..
بعد كمل...
"هيا ياسفيان وقت ع الصلاه"..
سفيان:هيا هي...رتيل....رتيل..
شويه جاته تجري وهي تقول:نعم...
سفيان؛ارفعي الصفره..
مشت خدت الصفره وطلعت بيها من الصاله وهو رفع الصغار ومشي بيهم لدار التقعميز..
حطت رتيل السفرة ومشت طلعت..
منى شبحتلها وقالت وهي مندهشه؛حي كملها كلها؟!
لينا شبحت للصفره لقت صوانيها فاضيات..ابتسمت بتهكم بدون ماتعلق..
ومنى مشت خدت السفرة بش تغسلها..
لينا قالت:خلي عنك..نا نغسلها مش ناقصه نسمع موشحات.
منى بضحكه:عاد اليوم جمعه يوم الموشحات..خل نولع الراديو..
لينا بضحكه؛ولعي ولعي...خل نظفوا وداننا..
ضحكت منى وولعت الراديو..
كان فيه موشح "عجل بالنصر والفرج"
الزوز شبحوا لبعض..بعدين انفجروا بضحكه مكتومه...
••في دار التقعميز..
وجيهه:ريتي السفتول!؟
عفاف:قسما بالله هدا ماصاير يام يقعد يتسهوك وخلاص بالذات بعد عرف بردة سفيان لمرت عدنان الله يرحمه وهو يلقح وخلاص..في قولت مابعدها مسكينه تو بيدير زي مادار في اللي قبلها...واللي طيح في خوك هدا ربي يكون في عونها..
نوريه:طبعا ماهو سفيان معرفه حجمه..
عفاف بضيق؛والله ماصابرة عليه الا ع خاطر هالصغار..
رنده؛تستاهلي ياعفاف انتي اللي حلتيه...
عفاف قعدت ساكته وهي مضايقه..
وجيهه:تو نقول لبوك يتفاهم معاه..عاد توصل بيه لدرجة يشد علينت الصغار!
عفاف:لا بالله عليك يام لا..والله طلاقي فيها..
زبيده؛اسكتي ياوجيهه ماليكش علاقه..
وجيهه:كيف ماليش علاقه ياللاي هدا مفروض ماينسكتش عليه يهين في البنت ويهين فيها وتبينا نسكتوا؟
عفاف  بخوف؛يام اني نفضفض مانبيش اكثر من هكي ارجوك يام مانبيش حوشي يخرب..
نوريه؛خلاص يام سكري ع الموضوع..
وجيهه:هالمعفن هدا..لما بوك عزمه ماصدق قال باهي طول..
عفاف:اني قلت كلموه لو عرف ان عدايله تغدوا هني هو لا يقلب عليا الدنيا..من غير شي متحسس..
وجيهه تنهدت وقالت؛بنسكت ونشوف لوين بتوصلوا..
 🌺🌺🌺🌺
الساعه 2:15 بعد الظهر..
وهي تردد في الصلاة ع النبي سرا..
حطت الحوته بطريقه حلوة فوق صونبه الكسكسي..بعدين حطت التلاته التانيات..
منى:يهبل منظر الصونيه...
ابتسمت لينا وقالت:وتو رني ع راجلك بيش اطلعيله..
منى بضحكه:باهي..
ورنت ع مروان..
ع خشة وجيهه شبحت للسفر وقالت:ماشاء الله..هادي اول مرة ديري معانا حوت يالينا..
لينا ابتسمت بحزن وهزت راسها بإيجاب وقالت:الله يرحمه ماكان يحبه..
وجيهه ودموعها عبوا عيونها:الله يرحمه ويسامحه..ولفت ومشت طلعت من حداهم..
"منى"..
قامت منى الصفرة وطلعت بيها برا..
ولينا قعمزت ع الكرسي وقعدت تبكي..
ولت منى تاني وشبحت للينا بحزن بعدين خدت السفرة التانيه وطلعتها..
ع خشة نوريه للكوجينه وهي ترعش؛علاش تجيبوا في سيرة عدنان لأمي بس...
خدت طاسه عبت فيها ميه..
لينا بقلق:خيرها؟
نوريه:وتسألي خيرها هوينا سايخه في الدار..وطلعت تجري.
ولينا ناضت ومشت طلعت وراها..
مروان وهو يرفع في السفر قال:شن في؟!
منى بحزن؛خاطر عليهم عدنان..
مروان لف وهرب بالسفره..
ومنى مشت تشوف شن في...خشت للدار..
لقت وجيهه تبكي في حضن بنتها نوريه ونوريه تمسح ع وجهها بالميه...
واللي حواليها يبكوا..
ولينا تشبحلها بألم ودموعها سيل..
نوريه بدموع:خلاص عدنان الله يرحمه مشي للي خير منك ومنا...
وجيهه تبكي بالعبرة..
لينا طلعت من حداها وهي تبكي..
خشت للكوجينه وقعمزت..حطت ايديها ع الطاوله وراسها عليهم وهي تبكي بالعبره...
اصواتهم ماكانتش واصله للمربوعه..
اللي فيها الضيوف نازلين في صواني الكسكسي ياكلوا بإيديهم ورجليهم ويهدرزوا..
🍁🍁🍁🍁
وبعد حالة الحزن اللي عاشوها النساوين..
قعمزوا حتى هما ع سفرة الغدي يتغدوا..
ماعدا لينا اللي انسدت نيتها وقعدت في الكوجينه تجري وضم..
ع خشة شريف مروان يجري ومشي طلع من الجهه التانيه..
لينا مشت طلعت وراه وهي تقول:وين بتعدي ياعفريت اها..
تعال هنى...ولحقت وخداتها رفعاته وهي تقول..تبي تخليني نجري وراك ونتلاقى نا والتريس وعمك المتخلف يحصل فيا فرصه..
الولد اشرلها ع شجرة البرتقال وقعد يقول؛تقاله تقاله..
ضحكت و قالت؛تقاله صار...
••من بعيد شوي كان سفيان جاي وهو يتكلم بالتليفون شافهم وقعد يشبحلهم وهو يتكلم..
لينا:هدي برتقاله...وهديكا تفاحه..هي قول تفاحه.
الشريف:تقاله..
ضحكت لينا وقالت:باهي هديك نخله قول...نخله..
الشريف:تقاله..
لينا بضحكه:كله تقاله هو....
الشريف يأشر ع الشجره ويقول:تقاله..
لينا:لا مانقدروا ناخدوا منها يعارك جدو بعدين..
وجايه بتخش بيه..
والولد بدي يبكي ويقول "تقاله"..
ع جية سفيان وهو يقول:هي تو نعطيك ياباشا..
لينا تعكرت ملامح وجهها نزلت الشريف ومشت خشت داخل..
وهو تبعها بعيونه ويقول:تعال عمو تعالى..
الشريف مشاله يدب وهو يقول:تقاله..
شبحله سفيان وضحك بعدين شبح للشجره وقطف منها برتقال وقال..اهي تقاله..
خداها الشريف وعيونه يلمعوا بحب شديد..
وعمه يشوفله ويضحك..
ع جية بوه وهو يقول:خوها منه ياراجل توجعله بطنه..
سفيان بضحكه:خليه يلعب بيها ..
مروان؛ايه ويشوفه بوك في يده يلعب بيها..
سفيان:مادخلكمش انتم اني نتحمل المسؤوليه...
مروان بضحكه:كان هكي باهي..
سفيان كان يتفرج ع شريف وهو يلعب بالبرتقاله..
ومروان شبحله وقال؛من كنت تكلم؟
سفيان؛احد من الجماعه في المانيا...غدوة مولي ان شاء الله..
مروان:وخيرك ماتقولش ياراجل؟!
سفيان:تجنبا للصداع لهدا حتى انت ماتصدعليش راسي..
مروان سكت وهو يشبحله بضيق..
الشريف جي لبوه وقال:كشل..."قشر"..
ضحكوا االزوز..
ومروان طب ولده وقال:تعال معاي ياجحش نوروها لجدك قبل..
ولف ومشي وسفيان يشبحلهم بإبتسامه..
بعدين تنهد ولف بيمشي..
"لوسمحت"..
رفع حاجبه والتفت..
هي جاته وقاات متسائله؛بتسافر غدوة؟
حط ايديه ورا ظهره وهز راسه بإيجاب..
لينا:باهي واللي اتفقنا عليه؟
سفيان:اللي هو؟
لينا؛موضوع الخدمه..
سفيان:خيره موضوع الخدمه..
لينا:شن خيره!!مش انت قلت باهي!
سفيان؛ايه..قلت باهي..
لينا عقدت حواجبها وقالت:كنت تمشي فيا؟!
ابتسم ع جنب وقال:حاجه تانيه لازم تعرفيها عني اني راجل ديما نقعد ورا كلامي..يعني لما نعطي كلمه خلاص..
لينا؛باهي وينها الكلمه عطيتها اهو بتسافر ماحكيتش في الموضوع!؟
سفيان تنهد وقال:انتي عجوله كنت حنكلمك فيه بكري لولا الحركه البايخه اللي درتيها متاع الفطور.
رفعت حاجبها وقعدت ساكته..
مسح حاجبه وقال:ع العموم...اني كلمت مروان اعطي ملفك لمرته بش تعطيهوله وهو يشوفلك مكان في المستشفى..
لينا هزت راسها وقالت:تمام حاجه تانيه..
سفيان؛اللي هي؟!
لينا؛الحاجات اللي ندير فيهم الشكولاته كلهم في شقتي الاولى نبي وين نخدم فيها نخدم غادي اريح..
جاوب بحده وحزم؛لا..
لينا عقدت حواجبها وهي تشبحله بتساؤل..
سفيان:اللي فيها نطلعوه لشقتي وتخدمي غادي..
لينا نزلت عيونها وهي مضايقه وهزت راسها بالموافقه..
سفيان:وغيره..
لينا جت بتخش وهي تقول:شي..
سفيان:قتلك خشي اني..
شبحتله بحده..بعدين قالت..مش قلت ان ورا كلامك وينه الاحترام فأسلوبك هدى؟
رفع حاجبه وقال:المتبادل...واني مش ماشفتش منك احترام بش نبادلك بيه..
قعدت تشبحله بحده وهي ساكته..
وترجع حالة التوتر والإرتباك  تصيبه غير عيونه عنها وعقد حواجبه وقال:خلاص بري..
هي شبحتله من فوق لتحت وجت بتخش..
هو قال:ايه حقه استني..
تنهدت وقعدت واقفه..
سفيان:تحطي في عطر انتي؟
لينا بإستغراب؛لا..
سفيان؛متأكده؟
لينا:اكيد..
سفيان سكت شويه بعدين قال:تمام في حالة كنتي تحطي معاش تحطي بكل...تبي تحطيه حطيه فوق اما لوطا لا..
ولف ومشي وخلاها واقفه تشبحله بغيظ بعدين مشت خشت داخل...
🌺🌺🌺🌺🌺
الساعه 5:00عصرا..
في دار التقعميز..
الزوز امهم قالبتهم ع بطنهم وهما منطرحين ع ايديها..
يشبحوا للعالم الغريب حواليهم اللي مش قادرين يميزوا معالم واصوات يسمعوا فيها مش عارفين شن هي..
 كل شي بالنسبه ليهم ملفت وغريب..
"ياسلمهم هما الزوز فستك ومخلط باللوز"
حناهم تغنيلهم وامهم تشوفلها بإبتسامه ارتاحت اللي قدرت تغير جوها زي ماعكراته..
منى:عدلي علينا ياحنينه ماتنسيناش..
شبحت وجيهه جنبها لقت الشريف يشبحلها وهو حاط صبعه في فمه..
خداته وضماته وهي تقول:لالا هدا هو الأول..غلا الاول مايتحول ياكبدي..
ضحكوا اللي حواليها..
زبيده:امتى بطهروا بحر الدين؟
لينا عقدت حواجبها وهي تقول:راحت عن بالي الحاجه هدي!؟
وجيهه:والله حتى اني..
رنده؛مازال شويه خلوه يكبر شويه اقل شي يسكر الاربعه شهور..
وجيهه:زعمه هكي؟
نوريه:ايه...وتو صقع وشتي ومرض..خلوا لين تدفى الدنيا..
ع خشة عفاف وهي لابسه عبايه ووشاح قالت: نوريه ومنى..
رجالتكم قالولكم هيا....
ناضت نوريه ومشت طلعت..
ومنى مشت خدت ولدها من عزوزتها وقالت:هي بالسلامه توا..
وجيهه:سلمي ع امك وخواتك..
منى:يوصل..
ومشت طلعت من الدار..
عفاف بعد سملت ع حناها واختها رنده جت لأمها تسلم عليها..
وجيهه:اتصلي بيا كل يوم...
عفاف بضحكه:حاضر..هي بالسلامه لينا..
لينا بالسلامه..
عفاف:سلام ياروح عميمه الله يبارك عليكم..
لينا بإبتسامه:تسلمي..
عفاف:هي بالسلامه..
ولفت ومشت طلعت...
تلاقت هي ونوريه في الفم سلموا ع بعض..
بعدين مشت عفاف  وخشت نوريه تسلم عليهم..
وجيهه:كان صارلك من المشيه ابعتي الصغار..
نوريه ابتسمت برفعة حاجب:ايه وبيقعدوا مع لينا..
لينا ابتسمت وقال:مرحبتين بيهم..
نور:باي لينا.
لينا:باي حبيبتي..
نور:باي يابيبيات..
ضحكوا.
لينا وهي تتكلم بصوت طفولي:باي يانور الثموحه..
ضحكت نور..
نوريه:هيا ماما..
مشت نور وطلعت مع امها اللي قالت:هي بالسلامه..
وهما ردوا عليها:بالسلامه..
رنده تنهدت وقالت:قعدنا حني..
وجيهه:راجلك قاعد يتفاهم مع بوك ع الشقه..
رنده: ماطول هالتطويله الا شكله هكي...
ع خشة سفيان شبح لرنده طول وهو يقول:بتبنوا؟
رنده:ايه وخيي بنبنوا..
سفيان وقف في الباب وقال:وعلاش بتقعدوا في شقة *****
رنده:اني هكي نبي..
سفيان قدم وقعمز مقابل امه وحدا لينا وهو يقول:غلط ..
رنده:وين الغلط في الموضوع وخيي هو بيدفع ايجار..
سفيان:حتى لو...كيف يسيب حوش اهله ويسكن في شقة لنساباته اني مش عارف كيف يسمع في كلامك وماشي بيه..
رنده:ان شاء الله دويت هكي قدامه؟!
سفيان:والله لولا انه يعز عليا ومانبيش نحرجه راهو تكلمت..لكن قلت نكلمك انتي افضل..موضوع الشقه انسيه ..
رنده بضيق:علاش ياسفيان؟
سفيان:تي شن علاش..تبي الناس تقول بنت الشريف بن عامر طلعت راجلها من اهله وخلاته ولد نساباته؟!..
وجيهه:كلامك خوك صح يارنده..
سفيان:اسمعي جاي..تروحي وتقوليله ينساه موضوع الشقه وانك طول فتره البني بتقعد في الشقه اللي في حوش اهله فاهمه؟!
رنده وهي مضايقه ع الآخر قالت:باهي..
سفيان شبح للصغار وقال:نوضي وتي روحك يراجي فيك..
رنده خدت بنتها اللي كانت راقده وطلعت بيها..
زبيده:احسن ماقلتلها بوها بروحه مايطيبش عليه..
سفيان خدي بحر من لينا وقال:تحط عقلها في راسها وياسرها من الدلع الزايد..تغيرت ملامح العصبيه ع وجهها لإبتسامه حلوة وهو يشوف لبحر..شن جو ياسموح..
لينا رفعت ياسمين لكتفها..
طول النقاش وهي حاطه عيونها ع صغارها تسمع وبس..
سفيان:ترا شوفي يام فيه مني ولا؟..
لينا شبحتله بطرف عينها ..
وجيهه بضحكه؛من وين لوين...
سفيان شبح لبحر وقال...قصدي الشخصيه..جبارة زي عمه..
لينا"إيوه"
زبيده:سلمه ياربي وسلم عمه...
ابتسم سفيان وهو يبوس في بحر بلطف ع خده..
ع خشة رنده:هي بالسلامه..
سفيان عقد حواجبه وقال:زي ماقتلك..
رنده بضيق:حاضر..تصبحوا ع خير..ومشت طلعت...
تنهد وشبح لأمه وهو يقول:مسافر غدوة..
وجيهه:كيف!؟
سفيان وهو يشبح لبحر:اللي سمعتيه..
وجيهه شبحت للينا لقتها تمسح في فم بنتها وتبان مش مهتمه نهائي..
غيرت عيونها عنها وسكتت مابتش تزيد تسأل ولاتناقش..برغم انها اضايقت هلبه...
وزبيده تشبح لسفيان....
ع خشة الشريف لما شبح احفاده ارتسمت ع وجهه ابتسامه حلوة وهو يقول:جيبهوملي جيبو..
ومشي قعمز حدا امه..
ناضت لينا وهي مبتسمه رفعت ياسمين لجدها خداها وهو يقول..يامرحبا...البنت ولا الولد هادي..
لينا بإبتسامه:شوف ودانها عمي..
الشريف شافهم وقال بضحكه:اها...
سفيان:تعالي..
هي تعكرت ابتسامتها ومشت خدت بحر من عمه..
لما قربت من سفيان شم نفس الريحه..
خدت بحر  ومشت بيه لجده..
وسفيان يشبحلها بحده ويقول في نفسه"هدا شنو كان مش عطر!؟لكن باهي"...
وجيهه:سفيان غدوة مسافر ياحاج..
الشريف وهو يحط في اللاهايه في فم بحر قال؛عارف..
سفيان بيغير الموضوع:شن عشانا..
زبيده:غير انسوا الغدي اللطف..
الشريف:اني اليوم يالينا جاي خاطري في المقروضه بالبن..
زبيده بضحكه:والله حتى اني خاطري فيها غير تحشمت نقوللها..
لينا بإبتسامه:لا ليش الحشم ياحناي قوليلي امتى ماتجي في خاطرك من عيوني نديرهلك...حاضر عمي الليله نديره..
هي تتكلم بحياء وحماس وابتسامه..
ابتسامتها المميزة اللي تزيد فيها جمال...
وهو يشبحلها وخلاص..صح كان عاقد حواجبه..
عاقدهم علاش...لأنه كان حاس بشعور مضايقه هلبه...قاومه بكل قوة لما غير عيونه عنها وناض...
سفيان وهو ماشي للباب:ماشي لواحد صاحب في عين زاره..
وجيهه؛نخلولك عشي..
طلع وهو يقول:مانحبش المقروض..
شبحوت لبعضهم..
لينا وهي مضيقه عيونها قالت:شن حسه قال؟!
وجيهه بضحكه:يحساب المقروضه نوع مقروض مايحباش ماهو...
بوه وحناه قعدوا يضحكوا..
ولينا شدت ضحكتها وهي تحرك في راسها يمين ويسار...
🌺🌺🌺🌺
ومرت باقي ساعات اول الليل...
بهدوء والجو كان لطيف...ولينا ارتاحت نفسيا بعض الشي وهي مع صغارها وشيبانها وعزوزتها والجده زبيده..
بعيد عن اي منغص..
حتى العشي تعشوا مع بعض ومحور هدرزتهم عن الجنوب وعاداته والماكله متاعهم..
ولينا تحكي وهما منسجمين معاها..
اسلوبها في الهدرزة كان لذيذ وممتع ...ومن حديث لينا عن الجنوب...لايمل...
🌺🌺🌺🌺
الساعه 12:00ليلا..
راقد ع السرير وهو حاط ذراعه ع عيونه..
يسمع في صوت بكي الصغار..قلبه كان واجعه هلبه..
بس مايبيش يدخل...
مايبيش يحتك بلينا هلبه...احتكاكه بيها مضايقه هلبه..
اما هي...
لينا ودموعها ينزلوا:خلاص ياماما خلاص حبيبي..
والولد يبكي..
لينا:تغيير وغيرتلك رضاعه ورضعتك وغازات ماعندك ليش تبكي ياماما حتى مرض مانكش مريض....
والولد ولاقال نهدى..
لينا حست بالعجز ومعاش عرفت شن دير..
قعدت تقرا عليه في القرآن بس صوت بكاه وبكي اخته خلاها مش قادره تركز...
لينا بدموع؛ياربي ساعدني ياربي..
طق الباب..
لينا بهمس:تو باهي هكي عاجبكم...!..
مسحت دموعها ومشت للباب فتحاته..
هو بقلق:خيرهم..
لينا وهي منزله عيونها لوطا:مش عارفه..
سفيان:ترا هاتي..
مدتله بحر خداه وهو يسأل فيها:مايبي شي؟
لينا بضيق:لا كله درته وهو مايبي يهدا..
سفيان مشي من حداها وقعد يمشي بيه ويجي وهويقول:هي خلاص حبيبي خلاص.....خلاص......
وبدي يقول في التهويده المشهورة...
"نني نني جاك النوم.....امك....وسكت بعدين غيرها وقال...هوها هوها كلبه يلعن بوها"..
وهي تشبخ لولدها كيف سكت عنده واسترخى ع الأخر..
لينا اضايقت هلبه ومشت خشت لبنتها بش تسكتها...
وسفيان ماشي وجاي بالولد في الصاله لين رقد..
شويه ومشي للدار وقف في الفم وقال:اسمعي..
هي شويه وطلعت وقالت:نعم..
سفيان :جيبي المرضعه متاعه خل بنرقده بحداي..
لينا بصدمه:لا طبعا ولدي مايرقدش بعيد عني..
سفيان؛وين بعيد عنك الدار هوينا غادي..وبعدين اني نبي نرقد وراي سفر غدوة مانقعدش كل شويه نوض ونقعد نطوف بيه في الصاله..
لينا بضيق:سامحنا قلقنا راحتك..
سفيان بإمتعاض؛جيبي المرضعه جيبي..
هي خشت داخل ودموعها محبوسات في عيونها..
خدت شيشة بحر وطلعت بيها لعمه مدتهاله وقالت:شدها هكي وانت ترضع...وقعدت توريله في الطريقه..
سفيان خدي المرضعه وقال:تمام..
لينا:رد بالك تنقلب عليه تقتله..
سفيان وهو ماشي ببحر للدار قال:مانتقلبش لما نرقد..
لينا تنهدت بضيق  ودموعها نزل..
خشت للدار وجت بتسكرها ماقدرتش...خلاته مفتوح بش كان سمعت حس ولدها تنوضله..
مشت تمددت ع السرير...رقدت ع جنبها اليمين تحت خدها..
قعدت تفكر في حالها..وتتخيل لو عدنان قاعد حي كيف حيكون شكل حياتهم.....وكيف حيتعامل مع صغاره في هالحاله..وهل كان بحر حيسكت يهدا عنده زي مايسكت عند عمه..!
حست وقتها ان الصغار من توا حاسين بفقدان الأب...هي هكي حست واستنتجت..
لما كانوا في بطنها كان عدنان يهدرز عليهم هلبه..
معقوله يكونوا عارفين وحافظين صوته وكونوا اتجاهه مشاعر من هداكا الوقت..
ولما جو ع الدنيا فقدوا الشخص اللي كان يتواصل معاهم بحب ونبرة صوت كلها حنان...؟!
مش معروف...كل شي وارد..
بس لينا وقتها هدا اللي فهماته..
وخلاها تبكي بألم طول الليل...
••بينما سفيان..
فكان يتأمل في وجه بحر الحلو اللطيف اللي عطاه طاقه ايجايبه وشعور مافيش اجمل منه..وماهي الا لحظات ورقد...
🌺🌺🌺🌺
مع آذان الفجر...
فتح عيونه شاف احلى عيون واجمل وجه ع الاطلاق..
ابتسم بنعس..بعدين قال:صباح الفل والعسل..
ناض قعمز وهو يشوفله..
بعدين قعد يساوي في شعره بإيديه...
نزل من ع السرير وخداه هو ومرضعته وقال:خل نرفعك لأمك..
ومشي طلع بيه من الدار...
شاف باب الدار مفتوح...استغرب..
وهو ماشيلها شبح جيهة الصاله..
لقي لينا لابسه اسدال الصلاه ومقعمزة ع صلايتها..
مشي ناحيتها بهدوء...
بانت عليه وهي تشبح لصوابعها وتسبح عليهم.....
هو عقد حواجبه وتنحنح..
هي طول شبحت ناحيته...بلهفه ناضت وقفت وقالت:هات..
مدهولها ...
خداته ومشت بيه للدار..
وهو تنهد ومشي متوجه للحمام...
••بعد ماتوضى
وطلع لبس مشي للجامع..
وهي صلت الفجر...بعدين رضعت صغارها وغيرتلهم...
ومشت طلعت للكوجينه..
لما خشتلها حست بضيق شديد..
اول مرة دير حاجه لسفيان ياكلها في الشقه..
وهالشي يوقظ فيها لحقيقه هي تبي تهرب منها وبس..
حقيقة انها ولت مرته وهو راجلها..
قداش ثقيله...وصعبه....بس هدا الواقع.....
حاولت تكون عاديه وديرله والفطور عادي...
مهما كان حتى هو اللي داره مش شي بسيط...ضحى وتنازل بش يرعى صغار خوه ويردهم لأهلهم...
حنين عليهم....ومش منقص عليهم شي..
وهدا كله كفيل يخلي لينا تحس اتجاهه بشي من العرفان..
كملت تجهيز الفطور وغطاته ومشت ولت للدار....
خشت وسكرتها عليها...
لحظات...وكان سفيان مروح...
مشي طول للكوجينه بيشرب..شاف سفرة مغطيه ع الطاوله..
مشالها وحول الغطا...
شاف فطور يفتح النفس ولايقاوم...
شبح جهة الدار اللي هي فيها بعدين شبح للفطور.
ابتسم...وقعمز وقرب ليه السفرة وبدي يفطر...
بعد مافطر..جي بيطلع من ويخلي السفره..
بس قعد واقف يشبحلها وهو يفكر..
هي اكيد امس في الليل ماجاهاش النوم بكل...ومية فالميه هي توا راقده..
حس بشعور شفقه اتجاهها...
خدي السفره وحط الماعين في الغساله..شغلها وطلع للدار..
جهز نفسه....
بعدين خدي شنطته وطلع...
وهو ماشي كانت عنده رغبه يشوف الصغار...
تردد هلبه...بعدين مشي للدار..
طق الباب...
هي كانت مقعمزه حدا صغارها..لما يسمعت طقت الباب..لبست الوشاح كويس..ومشت فتحاته وكالعاده عيونها لوطا..
وهو مشيح بالنظر عنها قال:نبي نخش نشوف الصار..
هي بدون ماتتكلم وخرت وهو خش...
قعدت واقفه حدا الباب
وهو مشي وقف ع السرير وعيونه عليهم وابتسامه حلوة ع وجهه:شنو ياقطاطيس...قولوا بتستاحشوا عمو ولالا...انت بالذات ياخربوش عارفك بتستاحشني...ابتسم وقال...حتى اني بنستاحشكم ومش عارف امتى نرجع نشوفكم..
وخر عنهم ومشي للباب وقف قدام امهم وقال وعيونه لوطا..ماتخلي شي يلهيك عن صغارك هما قبل كل شي..ردي بالك من لبسهم لبسي كويس غطي كويس...وماتخليهم لحد غير امي..
لينا تسمع وساكته..
سفيان:تسمعي فيا!؟
لينا:مالا شنو ندير!..
سفيان شبحلها شويه وقال:فهمتي؟
لينا:انتي توصي في حريص..
سفيان:لسانك مشكله والله..
لينا قعدت ساكته..
هز راسه وقال:السلام عليكم...
ومشي طلع من حداها...وهي طول سكرت الباب وقالت:نراجي فيك انت توصيني ع عويلتلي!..
وهو ماشي شبح للباب وقال برفعة حاجب:نقص يدي من منبتها كان مش تبرطم عليا داخل توا...
هز راسه وقال:ماشي...بعدين ساهل..
وخدي شطنته وحاجاته ومشي طلع من الشقه...
☘☘☘☘
ومن بعد ماسافر سفيان..
كانت الحياة هاديه جدا بالنسبه للينا...لاسفيان ولاخواته..
دابها داب صغارها وسلفتها وشيابينها بس...
عطت ملفها لمنى ومنى عطاته لمروان ومن يومها ماجاهاش اي خبر عن الخدمه...وطبعا الموضوع هدا ماكان حد يعلم بيه اخطاهم الأربعه..
سفيان لينا...مروان منى...
بس خدمة الشوكلاته الكل يعلم بيها..
بدت لينا تخدم عليها ودارت كذا نوع...واتصلت بأساور عزمتها تجيها....
وطبعا اساور كانت مش طايقه تسمع بسيرة لينا بس لبنت الدعوة حب فضول...
بعد ماهدرزت ع خالها ومرت خالها وحناها..
ركبت لشقة سفيان...
اساور بصوت منخفض:يااما نخطم من قدامها يانجيها زياره..امتى نعيش فيها بس...!
رنت الجرس..
شويه وفتحت لينا..
لينا بإبتسامه؛ياهلا بأسو..
اساور ابتسمت مجامله وخشت ..سلمت ع لينا بالسيف ولينا حست بيها دخلتها داخل...
وقعمزتها ع الصالون ومشت للكوجينه وتتلها ضيافه..
واساور تمرر في نظرها ع الحوش وهي بطق من الغيره..
جتها لينا بالضيافه وقالت:يامرحبتين بأسو..
اساور:تعبتي روحك..وخدت طاسه العصير ..
لينا:خودي شكولاته.؟
اساور:لا شكرا مروجمه..
لينا حطت الصفره وقعمزت وهي تقول:شن اخبار الخدمه في المحل..
اساور:الحمد لله..
لينا:والشكولينا مافي حد يسأل عنها..
اساور:هو الصراحه حني تعاملنا مع غيرك خلال المدة اللي فاتت..
لينا:خير من #شكولينا ؟
اساور ابتسمت مجامله وقالت:اسفه بس لازم الشغل يمشي..
لينا شبحت لأساور شويه وقالت:اساور...نا هنى بيش نربي عويلتي بس وهو ردني عشانهم وبس..
اساور شبحت للينا وهي متفاجئه..
لينا بضحكه:اها ماتتفاجئ..عارفه كل شي بدون ماحد يقولك..ونبي نطمنك..سفيان ليه الحق يتزوج بعدين ويشوف حياته..اما نا مش طامعه في شي من هالدنيا غير اني نكون مع عويلتي ونربيهم احسن تربيه في بيئه كل اللي حواليهم فيها يحبوهم...
اساور:تتكلمي جديات!
لينا؛وجد الجد يااساور...اساسا نا وسفيان مانتقابلوا في شي ديما متوازيين....يعني اطمني ع الآخر..
اساور ابتسمت بفرح وقالت:يعني لينا كان طلبت منك تساعديني بش نوصله تساعديني؟
لينا:لا الحق مانقدر..ماتبي نخشله في أي شي يخصه قتلك علاقتي بيه مش حلوة بكل...بس نقدر ننصحك نصيحه..
اساور:شن هي؟
لينا:سفيان شخصيه متكبره وين بلقى حد مهتم بيه ويدور في رضاه يزيد تكبر وآنفه وغرور....لكن لو لقي العكس ممكن يصير العكس..
اساور:باهي كيف؟
لينا:كيف هدي مانعرفهاش اللي نعرفه قتلك عليه...البنت يااسو يحقلها تدلل وتقعمز معززة مكرمه وتخلي النصيب يجيها لعندها..هدي هي نظرتي...كيف ماصارلي مع عدنان الله يرحمه النصيب جابه لعندي..وماكنتش نحلم حتى الحلم تنزوج واحد من برا بلادي وبمواصفاته هو..وربك خلاه يصير..
اساور تنهدت وهزت راسها بإيجاب بعدين قالت: ع فكره مابطلوش سؤال عن #شكولينا والشكولاته اللي نبيعوا فيها توة قاعده مكدسه عندنا ومايبي حد يشيريهت اللي يخش او حاجه يسأل عنها  في #شكولينا ؟
ضحكت لينا وقالت:ونا فهالأسبوع درت 50باكو..
اساور  بضحكه:حلو بكل..وينهم؟
ابتسمت لينا وناضت بتجيبهم ...
واساور بعد مشت مررت نظرها ع الحوش وقالت بضحكه فرح:في امل...مازال..في امل...

#صلوا_على _محمد

...يتبع...