جحيم الفارس -قيد التعديل-

البارت السادس والعشرون

.....
-ليلي.. دي دينا

هتف "محسن" ببساطة لترد "ليلي" بغيظ:

-بيجاااد؟؟.. دينا؟.. اقوم ارقص يعني؟

كاد يُلقي بمزحة سخيفة لتغير الأجواء لكنه تراجع سريعا ليتحدث بجدية:

-ليلي اتكلمي كويس ، وبعدين ممكن أفهم انتي معترضة علي ايه؟ انتي سبق وكلمتي راجل عليا ولما واجهتك مأنكرتيش وقلتي دا صحبي وانا بقولك اهو دي دينا وحتي هي سلمت عليكي كمان فايه بقي؟

-محسن انت بتتكلم كدا ازاي؟.. انت خنتني

ابتسم بسخرية قبل أن يهز رأسه بيأ:

-دلوقتي خنتك؟ اومال انتي مكنتيش خاينة ليه يا ليلي؟

ردت بهجوم تحاول نفي الخطأ عن نفسها :

-انت كنت سايبني لوحدي في الفترة دي وعملت كدا غصب عني اما انا فقصرت معاك في ايه ؟

هز رأسه بعدم تصديق ليتحدث بصوت مرتفع:

-قصرتي معايا في ايه؟!.. بقي انتي اللي حارق دمك انك مقصرتيش معايا؟.. انتي فاهمة انتي بتقولي ايه؟.. وبعدين وفيها ايه انشغلت عنك في الشغل فترة يعني!! ، دا مش مبرر يسمحلك انك تكلمي راجل من ورايا ، دا مش مبرر لخيانة

-انا مخنتكش

صرخت بقوة فصرخ قبالتها:

-لا خنتيني ، لما تلجأي لراجل غريب عشان يعوض الفراغ اللي انا سببته لكام يوم يبقي خنتي يا ليلي

-وانت كمان خنـ..

كمم فمها بيده قبل أن يتحدث بنبرة أجشة:

-لا مخنتكيش ، وانتي عارفة اني معملهاش يا ليلي

دفعته عنها بغيظ لتتحدث والدموع تلتمع بعينيها:

-أومال بتكلمها ليه ، ومتقوليش عشان صحاب ، ليه بتكلمها وليه عملت فيا كدا ، انا مكنش قصدي اخونك لما كلمته زمان ، انا بس حاولت اشغل نفسي بحاجة وهو ظهر فجاة وكل حاجة حصلت بسرعة اما انت؟! ليه عملت فيا كدا؟

اقترب ليجذبها نحوه متحدثا بهدوء:

-انا معملتش حاجة

-انت بتكلمها عليا

هتفت بنبرة تقطر عتابا وحزنا فابتسم بهدوء وقربها اليه اكثر ليهتف بثبات:

-دي دينا يا ليلي ، دينا جمال ، دفعتي فكراها؟

توسعت عيناها بإدراك ليتحدث بجدية:

-افتكرتيها؟

-بس برضه.. بتكلمها ليه؟

تنهد قبل أن يهتف بتوضيح:

-مبكلمهاش يا ليلي ، انا كنت بقوم من جنبك بالليل اقعد مع نفسي مكنتش بكلم حد الا فارس ، ساعات كان بيبقي فاتح وكنت بكلمه شوية ، انتي يمكن تفهمي اني كان قصدي اوجعك بس انا كان قصدي اعلمك درس ، انا كنت مستنيكي تيجي تساليني بتتسحب وتقوم من جنبي ليه وتصري انك تعرفي وساعتها كنت هقولك بكلم صحبتي زي ما انتي قلتيلي زمان ، كنت عايز اوريكي ان حتي انتي شفتيها خيانة مع انك كنتي شايفة نفسك معذورة ومش خاينة ، انا عارف انك لحد دلوقتي ساعات بتبقي عايزة تعاتبيني عشان طلقتك يومها ، مع اني رديتك بعدها ، بس انا فاهم دماغك كويس.. انا يمكن اكون غلطت لما فكرت اعلمك الدرس بالطريقة دي بس انتي مكنتيش شايفة انك غلطتي ، انتي كنتي شايفة انه عادي يا ليلي وانه مفهاش حاجة انك تصاحبي واحد وانتي علي ذمة راجل مع اني واثق انك من جواكي عارفة ان دا حرام وغلط ، ممكن اكون غلطت بس صدقيني انا عملت كدا عشاننا