شكولينا

الجزء السابع عشر

الصلاة أولا💕💕💕《
《في بعض من الحوارات حقيقيه وهي تعبر عن وجهة نظر اصحابها》
🍫🍫🍫🍫🍫🍫🍫🍫🍫🍫🍫🍫🍫🍫🍫🍫🍫
كان لاهي يشوف في اوراق امتحان طلابه..
شويه قام عيونه بيشوف لصاحبه لقاه متكي ع يده ومغمض عيونه استغرب..
ابوبكر:سفيان...سفيان..
هو استاقظ وشبح لصاحبه..
ابوبكر:خيرك مش راقد كويس امس..
سفيان غمض عيونه بعدين مسح وجهه بإيديه ورجع شاف لصاحبه بعيون ناعسه وهو يقول:ايه..ليا فترة...مسح عينه بعدين عاود يقول..ليا فترة هكي نحلم في حلم هو نفسه حلم  وين نوض منه نلقى قلبي مغموم والنفس هارب..
ابوبكر:حلم شني ان شاء الله خير!
تنهد وعقد حواجبه بعدين قال:نحلم وكإني مقعمز في قاعة امتحان كبيره ومعبيه نمتحن وقدامي ورقة اسئله صعبه معقده مستحيل تنحل واني نحاول فيها ونحس في روحي بننجن في الحلم.. كنت خايف من الفشل هلبه ونبي نحلها بأي طريقه..ونوض من الحلم وكأني قاعد في نفس الحاله اللي كنت فيها في الحلم..
ابوبكر وهو يفكر:ان شاء الله خير..
سفيان:خايف نفسره...واسمع لو فسرته وتفسيره طلع زفت ماتقولش..
ابوبكر:لكن بنقولك طلع صدقه عنه وخلاص تدفع شره بعون الله..
مسح بيده ع شعره للخلف وقال:إن شاء الله..
ناض وهو يقول..خل نمشي ناخد قهوه نصحصح شويه..
ابوبكر:احسبني..
هز سفيان راسه بالموافقه وطلع من المكتب..
وصاحبه خدي نفس ورجع لشغله...
🌺🌺🌺🌺🌺🌺
الساعه 1:45 بعد الظهر...
طلعت من الحجرة بعد ماانتهي دوامها بتروح..
وهي ماشيه وقفت لما شافاته واقف في أخر الممر واضح انه يستنى فيها...يبي يبرر..
هي تنهدت وكملت طريقها..وهو جاها وقال..
مروان:شويه لينا..
هي وقفت وقعدت تشبح بعيونها يمينها..
مروان وهو محرج؛شن امورك تمام هني مافي شي مضايقك..
لينا حركت راسها بالنفي بدون ماترد..
هو تنهد وقال:اسمعي اللي شفتيه بكري مانبيكش تفهميه غلط هي قريبة حالة هني بدير عمليه صعبه شويه..وهي نفسيتها تاعبه شي فقلت يعني نخفف عليها..
لينا نزلت عيونها وهزت راسها بعدين رفعت عيونها بدون ماتشبحله وقالت؛حتى منى محتاجه تخفف عنها شويه المراة بتخش في حالة كآبه..
مروان:منى؟!
لينا:ايه منى لو كانت ركزت معاها كيف ماركزت ع قريبه الحاله اللي قلت عنها راك لاحظت اللي صاير فيها..
مروان عقد حواجبه:كلامك فيه تلميح بايخ..
لينا ابتسمت بتهكم وقالت:نا نبيك تريح مستحيل نحكي ولانقول شي في النهايه مايخصنيش..لكن نصحتك لوجه الله وانت حر تاخد بالنصيحه ولا تخليها...السلام عليكم..
ومشت وخلاته وهي حاسه اتجاهه بقرف واشمئزار..وقلبها واجعها ع منى المسكينه زي ماواجعها ع زهور اللي مخليينهم رجالتهم خدم لماليهم وكل واحد فيهم عايش جوه...
وصلت برا...
لقت السواقه تستنى فيها...ركبت السيارة وتحركوا..
ومروان اللي طلع وراها قعد بعيونه مع السيارة لين بعدت..
هز براسه وع وجهه ملامح الغضب بعدين ولى خش داخل...
🏵🏵🏵🏵🏵
الساعه 4:30قبل العصر..
في الصاله واقفات يلبسوا في عبايتهم...
وعزوزتهم تساعد في عزوزتها في لبس جلبابها..
"هيا ياوجيهه"
وجيهه وهي تبطم في الجلابيه:هيا هي خلاص كملنا..
منى بعد حطت خمارها ع راسها طبست خدت ولدها وقاماته..
ولينا تشبحلها وتقول في نفسها"مغطيها من فوق للوطا ويخون فيها مع وحده الباين منها اكثر من المدرق"..
وجيهه:هي اطلعوا...
نزلوا زهور ومنى خماراتهم..
وكلهم مشوا مع بعضهم بش يطلعوا..
برا....
سفيان كان مقعمز في سيارته..
ومروان كان واقف ع سيارته..
والحاج الشريف واقف في النص بيناتهم..
شافوهم وهما طالعين..
عيون مروان جو ع لينا كان خايف ومتوتر لأبعد حد..
بس عيون سفيان كانوا ع رتيل اللي خلاته ينزل من السيارة وهو يقول:رتيل ولي بدلي حوايجك..
بوه وخوه ركزوا ع رتيل شن لابسه..
رتيل:خيرهم حوايجي مافيهم شي..
سفيان:اني قلت خشي بدلي حوايجك
وجيهه:خلاص بري خشي وفكينا..
هي تأففت ومشت خشت داخل
والباقي توزعوا ع السيارات
زهور مع راجلها...منى مع راجلها..ومفروض تركب معاهم رتيل والصغار
ولينا مع عزوزتها وشيبانها وامه..
ركبوا زبيده القدام...ولينا ووجيهه قعمزوا من الخلف...
وجيهه:والله دبشها عادي ..
الشريف:لا مش عادي ماعجبنيش حتى اني..
سكتت وجيهه وهي مش عاجبها..
شافت من الروشن لقت رتيل طالعه وتسكر في الباب وهي متنرفزة..ومشت طول لسيارة خوها مروان..
سفيان وهو يشبحلها من الروشن قال:البنت هادي متغيره فيها شي مش عاجبني..
زهور:حتى اني ملاحظه..سرها عند مرت عدنان مرة مرة تخشلها الدار ويسكروا ع ارواحهم..
خبط الدومان بيده وقال:مرت عدنان الزفت هادي مش عارف شن اخرتها معاها..شد الدومان بإيديه وقال..غير يروح راجلها عندي تقعميزة طويله معاه..
••وشويه وطلعوا من الحوش..
متوجهين لحوش اهل راجل نوريه...مروحين اليوم من السعوديه....
🏵🏵🏵
لما وصلوا لقوا رنده وعفاف وربيعه وهنيه سابقينهم...
والحوش كان زحمه بشكل مش طبيعي وكأنه عرس..
طبعا هالزحمه كانت مؤذيه بالنسبه للينا هلبه لأن العيون كانت عليها وهما يشوفوا في وحده سمرا جايه مع عيلة الشريف اصحاب العرق الأخضر...
"اصحاب العرق الأخضر اللي من بياض بشرتهم لين عروقهم تبان"...
طبعا مش كل الحاضرين يعرفوا ان عيلة الشريف عندهم كنه سمراء..
ولانهم كانوا واقفين في الجنان يراجوا امتى يخشوا الحجاج
ماحولوش حجابهم...
زبيده:ووك حسني عطشت..
وجيهه قعدت تشبح حواليها ادور وحده تعرفها لين شافت حماة نوريه نادتها جتهم..
:تفضلي خالتي وجيهه..
وجيهه:بالله ميه بنتي...
:ميه حاضر..شبحت للينا وقالت..تعالي معاي...
لينا استغربت وقعدت تشبح لعزوزتها..
حماة نوريه قالت:معليشي ناخدها منكم نبيها تفرق معانا الميه..
منى وزهور شبحوا لبعض وهما مصدومات..
ولينا شبحت للمراة وقالت بعيون معبيه دموع:فاهمه غلط انتي نا كنتهم مش شغاله..
المراة انصدمت وانحرجت ع الآخر..
وجيهه قعدت تشبح للينا..
حماة نوريه بإحراج وتوتر؛اسفه والله اسفه والله ماكنت نعرف نوريه ماقالتش يعني..سامحيني بالله عليك..
الموقف صعب بايخ محرج وسخيف للغايه ولينا المضغوطه نفسيا ماقدرتش تشد روحها وتتحمله..
قعدوا دموعها ينزلوا ورا وهي تمسح فيهم..
وعزوزتها تشبحلها ماتحملتش فيها يكل وطارتلها من الموثف هلبه..
وحماة نوريه مازال تتعذر...هي قامت تليفونها واتصلت براجلها وهي تقول؛مكان انهانت كنتي والله مانقعد فيه..
حماة نوريه:والله ياخالتي مانعرف والله ولانوريه قالت شي انتوا حتى للعرس ماعزمتونا..
ولينا تسمع في الكلام ودموعها سيل تسمج فيهم وهما يزيدوا ينزلوا ومش قادره تقول كلمه..
وجيهه:هاه شريف....بنروح............ايه بنروح توا...........ياودي بعدين نفهمك..وسكرت
لينا ببكي:خليك اللاي بالله عليك ماصار شي..
جوهم البنات وهما مستغربات..
رنده:شن في يام..
وجيهه:اقعدوا هني انتم استقبلوا اختكم اني مروحه..
حماة نوريه انسحبت من حداهم...
عفاف:علاش شن صار خيرك تبكي  لينا!؟
زبيده:خلاص اسكتوا توا الناس تتفرج علينا...
رنده:نبوا نعرفوا شن صار..
رن تليفون وجيهه وردت..
وجيهه؛هيا هانا طالعين..وسكرت..
لينا:اللاي مايجي بنتك تروح وماتلقاك..
وجيهه:خلاص بنتي كلمه وقالتها...
ع جية حماوات نوريه قعدوا يتعذروا من وجيهه ولينا لكن وجيهه سكرت راسها ع المرواح..
وطلعت هي ولينا وعزوزتها...
زهور بدهشه:ريتي ياكبدي سيبت بنتها ع خاطرها !!
منى: والله حتى اني مصدومه كيف تخلي نويره وتطلع ع خاطر لينا..سبحانك ياربي..
زهور:تعرفي لينا هادي تزيد تخوف فيا يوم عن يوم نحس فيها اشبح شن دايرتلهم..
منى:شن بدير انتي التانيه..حظها حلو وربي محبب فيها خلقه هي هادي..
زهور مطت شواربها بملل وقالت؛خيرني اني ماطقتهاش..
منى"مايحبها كان الباهي":وين نندري عليك..
🏵🏵🏵🏵🏵
في الطريق..
لينا تبكي بالعبرة..وهي تسمع في كلام عزوزتها..
وجيهه:خل بش يعرفوا مرة كيف يتعاملوا معانا..
زبيده؛كله من بنتك يا وجيهه..
الشريف:من فيهم؟
زبيده:نوريه..مش قايله لمتاعينها ع مرت عدنان شي..من لما ماعزمتهم ع العرس واني عارفتها دايرة هكي..
ولينا  تبكي بزياده..
الشريف شبح لوجيهه من المرايا بحده بعدين قال:خلاص بنتي صل ع النبي واذكري الله..
لينا وهي ترشف قالت..لااله الاالله...اللهم صل ع النبي..
الشريف:لاحول ولاقوة الابالله وخلاص..
لينا ببكي:مفروض قعدتي يا اللاي..
زبيده؛ايه نروح اني وياها وانتي ولي مع راجلك.
وجيهه قعدت تشبح للروشن وهي ساكته..
الشريف:بديري زي ماقالت امي نحطهم هما في الحوش انتي تولي ..
هزت راسها بالموافقه وهي مضايقه...
••بعد طول مسافه..
حط الشريف امه ومرت ولده داخل الحوش..
بعد مااطمن عليهم خشوا وسكروا عليهم الباب ولى هو ومرته ...
في الطريق..
الشريف:بنتك نوريه كان روحت من الحج وقاعده زي ماهي كارثه والله..
وجيهه قعدت ساكته مابتش تعلق في النهايه بنتها ومش حترضى فيها حتى هي..
••بعد ماوصلوا وجيهه والشريف لحوش اهل زوج نوريه بنص ساعه..
كانوا زوج نوريه وامه ومرته واصلين...
استقبلوهم بالزغاريد والدربوكه وبالأحضان والمباركات..
ونوريه تاخد وتحضن في صغارها وتبوس من شوقها ليهم..
بعدين سلمت ع امها وخواتها بحرارة..بالذات رنده اللي كانت تبكي بكي..
نوريه:وين حناي يام؟
وجيهه:تو بعدين نحكيلك ..
نوريه بخوف:راك تقوليلي فيها حاجه!
وجيهه:ت لالا بعيد السو مافيها شي قتلك تو بعدين نحكيلك خليك في الناس اللي جاياتك توا..
نوريه شبحتلها شويه بعدين هزت راسها وقعدت تمرر في نظرها ع الموجودات..
ماهمهاش وجود لينا من عدمه..بالعكس فرحت انها مش موجوده ماتبيش حد من اللي اهل راجلها يشوفها ويبدوا يدووا بيهم...
وماكانتش عندها ادنى فكره ع اللي صاير قبل تجي..
🏵🏵🏵🏵
في حوش الشريف...
دار التقعميز..
كانت لينا مقعمزة ع الصلايه بعد صلت العصر وهي تستغفر بس..
وزبيده تشبحلها وهي تسبح بالسبحه...
شويه وناضت لينا دارت لروحها قهوة وشاهي اخضر لزبيده ومعاهم كعك مالح...
ودارتهم في سفره ومشت بيهم لزبيده قعمزت معاها وبدت تهدرز..
زبيده؛انسي اللي صار خلاص معاش تفكري فيه..
لينا بحزن:نا اللي قهرني ياجداي تصرف نوريه للدرجة هدي!؟ للدرجة هدي ماتبيني ومتحشمه مني والله لو كنت نعرف ماعديت..وبالنسبه ليا نا من اليوم وبرا غادي اي شي لنوريه مش حنكون موجوده فيه..
زبيده:صل ع النبي بنيتي..
لينا تنهدت وقالت:اللهم صل وسلم وبارك عليه..
زبيده؛اسمعي بنيتي الحق من الاول بكل من لما فتح عدنان موضوعك وقال نبي نتزوج من الجنوب كلنا كنا مانبوش وماقبلناش الحكايه بكل ماعدا عمك ولدي الشريف هو اللي وقف مع عدنان وقال كان ماتبوش تمشوا معاه بش يخطبها نبعت عماته..وبعدين اللاك وجيهه غصب عنها مشت معاه..وسبحانك ياربي مشت بشكل وروحت بشكل تاني..
لينا تسمع فيها وهي منزله عيونها لفنجان القهوة..
زبيده؛وحتى اني راهو كنت زيها لكن وين خشيتي العيله وعرفناك خشيتي خاطرنا ويشهد ربي وليت نحبك زي بنيات ولدي..وعزوزتك..وجيهه راهو طبعها واعر ومع كناينها صعبه لكن انتي بروحك عندها..اليوم اني بروحي تعجبت منها كيف جت بتسيب بنتها اللي مروحه من سفر ع خاطرك..ماهنتيش عليها ولاتحملت فيك..ونقولهالك كان كسبتي ام العيله معناها هكتسبي العيله كلها..
لينا؛الحق ياجداي نا مانبي نكسب حد نا نبي الاحترام بس..حتى لو مش قابليني مانبي حبهم بالسيف نا نبي الاحترام بس كيف مانا محترمتهم..
زبيده:عندك حق..عندك حق..
لينا تنهدت وقالت؛تبي الصراحه ياجداي ماكنت نحساب روحي بنتعب هكي..
زبيده :ايييه يابنتي ياما تشوفي وياتعيشي..اني قدامك تزوجت وعمري 15 سنه وكنت نحساب ام الراجل اللي خديته تبيني كيف مايبيني ولدها..لما جت تخطب..كان كلامها عسل ووجها ضحاك..وبعد وصلت فيها..مافمها ولى يقطر سم ووجهها ديما عابس وكانت تعامل فيا معامله اشر منها ماريت..استغربت فيها هلبه وماكنتش نعرف اللي قلبها بعد وقت قالولي كانت تبي بنية اختها غير ولدها سكر راسه عليا..حاولت نرضيها وندير ماتبي لكن بلافايده..وبعد حملت زاد شرها شر قعدت تخدم فيا ليل مع نهار وولدها ماكان يقدر يفتح فمه معاها..وقعد هالحال لين وصلت الشهر سابع خلتني نقيم شكارة دقيق 50كيلو دقيق..
لينا تشبحلها وهي تحكي بنظرات الم وهي متفاعله مع القصه.
زبيده:يومها نحساب روحي بنموت خلاص..جبت ولدي الكبير مسبع..ولما جبته ريت الموت بعيوني وياما صار فيا غير ربي كاتبلي عمر ومن بعدها الله يرحمه شيبانيا طلعني اني وولده لحوش تاني..ماتريحت كان لما حولت وهي سبحانك ياربي بعد تحوليتنا تغيرت هلبه وربك هداها..هدا علاش نقولك بنيتي تحملي واصبري وان شاء الله اخر صبرك خير...
لينا تنهدت وقالت؛ماليا الا الصبر...
🏵🏵🏵🏵
الساعه 1:00ليلا..
كانوا اهل الحوش كلهم راقدين...
ماعدا شخص واحد...كان مقعمز في جنان الحوش ويفكر..
بس الباين انه مش الوحيد اللي كان سهران..
خوه اللي نزل من شقته حتى هو...ولما شافه مشاله طول..
سفيان؛شن صار في الدنيا مروان ساهر!؟
مروان؛لا مروان شاكر..
ريشه سفيان من شعره وقال:معاش تعاودها..باهي..
ضحك مروان بضيق وقال؛غير خليني في حالي ياسفيان والله ماني رايق..
سفيان عقد حواجبه وقال:خيرك؟
مروان شبحله شويه وهو يفكر بعدين قاله:مش عارف كيف بنحكيلك..
سفيان؛خش في الموضوع طول..
مروان تنهد وقال:مرت خوك عدنان..
سفيان رفع حاجبه وقال:خيرها!
مروان؛مش عاجبتني خدمتها ..
سفيان؛من الاخير شن شفت عليها!؟
مروان:لا استغفر الله العظيم شن تقول انت ياراجل مرت خوك هادي..اقسم بالله ماريت عليها غلط ولاعيب..لكن ماتسلمش يعني..من النظرات والكلام والمضايقات واني مش راضيها لاعليها وعلى نفسي..هادي مرت خوي يعني اختي ومانرضلهاش اللي مانرضاه لخواتي..
سفيان ؛واني هدا علاش مانبيهاش الخدمه هادي..الدوة كلها جايتنا حني فب الاخير..محسوبه علينا..
مروان:باهي شن الحل..مانقدرش نفتح مع عدنان موضوع زي هدا..
سفيان قعد ساكت وهو يفكر...شويه ورفع حاجبه اليسار وقال:ماتفتحاش مع عدنان.....
مروان؛مالا مع منو؟!..
🏵🏵🏵🏵🏵
اليوم التالي...
الساعه5:30بعد العصر..
ماشيه بخطوات سريعه في الجنان...لين وصلت في ااكبر نخله فيه..
وقفت حداها وقالت؛نعم عمي قالوا تبيني..
الشريف؛قعمزي بنتي قعمزي..
لينا شافت للكرسي بعدين مشت قعمزت..
الشريف بإبتسامه؛شن امورك في الخدمه مع بنت اختي ماشيه تمام؟
لينا بإبتسامه:ايه الحمد لله وفي طلب واجد ع الشوكلاته..
الشريف هز راسه وقال:كويس كويس..باهي..مدام امورك ماشيه هكي في الخدمه هادي..شن لزوم التعب والبهدله في العيادات ومرضى ودوشه...مالاش داعي بكل..
خفتت ابتسامة لينا وهي تقول:الحكايه مش حكاية فلوس عمي..نا وين نخدم نرتاح نفسيا مانحبش نقعد في البيت ديما..
الشريف:امم..باهي اسمعيني بنتي..خدمة الممرضه بالنسبه ليا اني مش مقبوله ايه صح ماناقشتش عدنان فيها..قلت مع الوقت تسيب الخدمه بروحها..بس الصراحه اني الوضع هدا مش مريحني مش عاجبني..في النهايه انتي كنتي..فاهمه قصدي ولا؟
لينا نزلت عيونها لإيديها اللي كانت تفرك فيهم في بعض وقالت؛ايه فاهمه...شبحتله وقالت...حاضر عمي..تو نسيب الخدمه في العياده..
الشريف:اريحلك بنتي..
هزت راسها وهي مبتسمه ابتسامه تخفي بيها حزنها وقالت:تسلم عمي ربي يحفظك...
هو ابتسم ووقال :ويحفظك بنتي..
🌺🌺🌺🌺
وتعودت لينا...تفرج عن دموعها والوجع اللي معبي في قلبها لما تقعد في شقتها بروحها..
شقتها اللي بدت ماتفارقش فيها بكل الا في الليل وين تجي ترقد...
خلطتها بالعيله شبه انعدمت...وماجربتش عزوزتها تجبرها دير العكس شافت ان هكي اريح للجميع...
ايه فعلا..
اريح لمروان...اريح لزهور...اريح لسفيان..
للناس اللي شايفه في وجود لينا منغص راحه وازعاج كبير..
وفي الحقيقه لينا هي اللي ارتاحت..
واستمر الحال كماهو عليه لقبل مرواح عدنان بثلاته ايام..
فهداكا اليوم..
كانت زبيده تاعبه شويه..نادت وجيهه ع لينا بإعتبارها ممرضه في وقت غياب مروان عن الحوش..
نزلت لينا قاستلها ضغطها والسكر متاعها لقوه راقي شويه..
ودارولها اللازم بش نزلوه...
فهالوقت..
كانوا زهور ومنى برا يكنسوا في الجنان..
زهور:العشب هادم يبوا التحويل..وطبست تحول فيهم بإيديها..
منى؛لا حمارة علاش اديري هكي مش باهي..
زهور:عادي مافيها شي..
ع طلعة وجيهه شافتها قالت:شن ديري زهور؟
زهور:نحول فيه اللاي..
وجيهه:سيبي البلي مش باهي تو يولوا عليك ايديك..
وزهور تجبد في العشب بقوة وهي تقول:عادي ياللاي مايصيرلي شي..
منى"واااك ياحبك للإستعراض"..
وجيهه بحده:زهور سيبي قتلك مش ناقصينك حتى انتي تصيرلك حاجه وولدي يقعد يدور بيك في العيادات..
منى"تستاهلي"..
ناضت زهور وهي تنفض في ايديها..
وجيهه:وانتي خشي لولدك يعيط..
منى حطت المكنسه ومشت بسرعه خشت داخل..
عزوزتها مررت نظرها ع الجنان بعدين لفت وخشت داخل..
زهور وهي تتحسس في ايديها قالت بصوت منخفض:سحقيتكم..
فجأة انفتح الباب..
التفتت..
لقت رتيل خاشه وفي يدها حاجه تجري بيها..
قعدت معاها بعيونها وهي مستغربه...
••رتيل طلقت السلام..وتوجهت طول لدارها وهي في قمة التوتر والارتباك..
قعدت تمرر في نظرها ع الدار..بعدين مشت لدولابها وفتحاته دست حاجه معينه..
وطلعت حوايجها ومشت طلعت من الدار وخشت للحمام..
برا...
انفتح باب الحوش بالكامل وخشت سيارة سفيان.
زهور قعدت تشبحله...لين درس ونزل...
سفيان؛رتيل خشت للحوش توا؟!
زهور شبحت لباب الحوش الدخلاني بعدين قالت؛ايه..
حول نظراته وجاها وهو يشوف لساعته:الساعه 2 خاشه للحوش!!
زهور:هي عندها امتحانات توا ولا معاش في قرايه!
سفيان نزل نظاراته وهو يشبح جهة باب الحوش الدخلاني بغضب..
زهور ؛شفتها خاشه تجري وفيدها حاجه شكلها شافاتك جاي..
هز راسه بعصبيه ومشي بيخش داخل..
زهور"ان شاء الله يقتلها تستاهل الحقيره"..
فهاللحظه...
انفتح الباب مرة تانيه..وخشت سيارة الشريف..
زهور خدت مكنسه ومشت..
••داخل..
سفيان؛وينها وينها.
وجيهه:من هي!؟
سفيان:بنتك الحيوانه اللي مروحه توا من المدرسه نبي نعرف وينك عنها انتي وين..
في دار التقعميز
منى تسمع فيه وهي خايفه..
وفي الكوجينه لينا واقفه تشرب في ميه وتسمع فيه وكل شي فيها يرجف من الخوف..
وجيهه:تي عندها فترتين اليوم..
سفيان:تروح 2يام تروح 2 وجايه ع رجليها ع رجليها يام باصها وين..
وجيهه قعدت تشبحله وهي خايفه مش عارفه شن تقول..
سفيان:حليتولها هلبه البنت هادي..
ومشي لدارها..
وجيهه؛وين ماشي..
فتح الباب وخش لقاها فاضيه قال؛وينك يارتيل..وينك ياحيوانه وين..
وبدي يدور في الدار..
ع طاولة القرايه...ادراج الكامدينوهات...
تحت السرير..
وجيهه:شن دور اختك في الحمام..
سفيان:تو تطلع..
وهو مازال متابع يدور..لين جي للدولاب وفتحه..
هدا كله ورتيل في للحمام من الخوف كانت حتموت...
جتها امها طقت عليها وقالت:رتيل اطلعي...
وهو بعد قلب الدنيا قلب..طلع من الدار وقال:اطلعي ولا والله نخشلك نعدمك داخل..
"سفيان"..
وجيهه؛بوك..!
"سفيان"..
هو غمض عيونه بنفاد صبر بعدين فتحهم ومشي لبوه ..
الشريف لما شافه قال:خير بلاك شن في؟!.
سفيان لما جي بيتكلم شبح جهة الكوجينه بانت عليها لينا واقفه حدا الطاوله..
وهو غير عيونه عنها وقال:في ان في حاجات في الحوش قاعده تصير الفترة الاخيره كلها تلخبيط ولبز شي مش لينا ومش واخدين عليه شي خش علينا جديد..
منى"قصده لينا"..
زبيده؛راسه وراسها لين يهججها..
الشريف:شن تقول انت شن قصدك!
سفيان:بنتك رتيل مفروض اليوم تروح من امتحانها الساعه واحد واني مروح لقيتها مروحه الساعه 2ع رجليها ..
الشريف:كيف!وجيهه!..
جاته وجيهه وهي تقول؛قالتلي اليوم اخر امتحان بتروح مأخر..
سفيان:تقولك انتي وماترجعش لبوها وخوتها شن مش حاسبه التريس اللي فالحوش ولاكيف..طراطير حني يام!
الشريف؛سفيان!
سفيان؛شي يطلع الواحد عن طوره يابوي..ليا فتره نشوف في وضعها بنتك هادي متغير هلبه ومش زي قبل..شوف على من مخلطه قاعد يلعب بدماغها..
الشريف:وينها بنتك هادي وين..رتيل!..
طلعت رتيل من الحمام وهي تحاول تقوي روحها..
جت ورا امها وهي تقول؛والله مادرت حاجه بابا والله..
سفيان؛اللي خشيتي بيها للحوش وينها..
وجيهه:شن هي!؟
سفيان؛هي تعرف اطلعها بالحسنى خيرلها..
الشريف بغضب؛رتيل يابهيمه شن دايره !!
رتيل ببكي :والله العظيم مادرت حاجه...
سفيان:بطلعيها ولاكيف!
رتيل ببكي ؛نطلع شني ماعندي شي!!..
سفيان غمض.عيونه وقال:اففف...
رتيل:انت اشبح من معبيلك راسك عليا ..
فتح عيونه وقال؛من بيعبيلي راسي ياحيوانه! نشبح فيك بعيوني نشوف فيك شن ديري وفي من تكلمي ومن تخالطي والخلطه هادي هي اللي مخرباتك..
الشريف:خلطة مني!؟
سفيان بتهكم ووقاحه:شوف من خاش علينا جديد !..
وجيهه فنصت فيه...
"لااا لعند وهنى والزم حدك"..
شبحوا كلهم للكوجينه..
لينا وهي شاده في ظهر الكرسي ومستوى نظرها للبساط كانت تتكلم بكل بغضب:فوتتلك واجد في قولت سلفي وخو راجلي الكبير ومعليش تحملي وعديله..لكن لعند هنى وتلزم حدك..نا بنت ناس وجايه من بيت فيه ناس تعرف ربي وتعرف العيب  مش جايه من الشارع..
الشريف:حاشاك يابنتي..
لينا ودموعها ينزلوا؛عمي ولدك كان مش طايق قعادي هنى وقاعد يدورلي في السبل اعطي لعدنان الإذن نطلعوا بالله عليك..
وجيهه؛لا والله ماكم طالعين بالله..
لينا بنبرة باكيه؛معاد قادرة نتحمل ياعمتي قلة القيمه وقلة الاحترام والاهانات وسكاتي عليهن انفهم غلط..هو سلفي الكبير ومفروض يكون بيني وبينه احترام حتى لو كان مش متقبل وجودي..اللي يدير فيه عيب عليه هو وغلط في حقه قبل مايكون غلط في حقي..
سفيان بدون مايعلق بحرف انسحب من حداهم ومشي طلع من الحوش وركب لشقته..
لينا؛سامحوني بس والله العظيم معاد قادره نتحمل خلاص..
الشريف مرر نظره عليهم بعدين خبط رجليه بإيديه بعجز ومشي طلع حتى هو..
لينا حتى هي مشت طلعت ومن الكوجينه وتوجهت لدروج شقتها..
وجيهه وهي مصدومه؛وواك ياربي تقول انطلقوا فينا شياطين اعوذ بالله من الشيطان الرجيم..
رتيل بحقد:زهور الكلبه..
وجيهه شبحتلها وقالت؛شن دخلها زهور..بعدين انتي ليش روحتي توا...ضربتها ع ظهرها وقالت..وين كنتي ادوري ياكلبه..
رتيل قعدت تتحسس في ظهرها وهي تقول:آااي..
كنت مع البنات في حوش صاحبتي في اول شارع هدرزنا وروحت شن هي الجريمه اللي درتها..
ومشت لدارها وخشت وسكرت عليها الباب ..
وقعدت تشوف للدار كيف مقلوبه..
شافت للدولاب ومشت ادور فيه مالقتش الحاجه اللي دستها..قالت بإندهاش..
"حيي وين مشت!؟"
..............
الساعه 9:25ليلا..
"نا شن قتلك رتيل"
رتيل:والله العظيم سمعت كلامك والرساله اللي بعتها رديتهاله مع اخته لكن هي لما مشينا لحوشهم اني والبنات عطتني هديه وقالت منه..وحلفتني ناخدها وقالت هو مايبي مني شي غير اني ناخدها وخلاص..
لينا؛وخديتها وجبتيها للبيت وشافك اللي شافك وصار اللي صار..
رتيل سكتت وهي منحرجه ع مضايقه..
لينا؛كان مش ركزت عليك وانتي خاشه تجري ولاحظت ان في شي مش مزبوط وشفت خوك وهو مصبي برا يكلم في مرته وربي الهمني نعدي ندور في دارك راهو انظر شن صاير فيك توا..
رتيل؛مشكورة يااحلى مرت خو في الدنيا..وبعتتلها قبله بعدين قالت بإبتسامه عريضه..ترا وينها الهديه..
رفعت لينا حواجبها وقالت؛بالله عليك!
رتيل؛بليز ليون نبي نشوفها بس..
لينا؛امم..في الكناسه..
رتيل بصدمه؛كذابه!..
لينا:اها وين تبيني نعدي بيها وقتها وبعدين هدى مكانها طبيعي اللي كنت في جرتها حضيعي روحك..رتيل مش كل مرة تسلم الجرة..بالله حبيبتي خافي ع روحك ومستقبلك وطلعي من راسك هالكلام الفاضي..
رتيل تنهدت بعدين قالت؛باهي ماعندكش شكلاطه..
لينا ابتسمت وقالت؛شن رايك تعلمك اديريها؟
رتيل بإندهاش؛حقه!
لينا بضحكه:اها..
رتيل؛باهي هي نوضي العطله بدت واني بنكسد خل نخدم معاك ع #شكولينا
لينا بضحكه؛تمام حتى نا نبي حد يعاوني..
وناضت ومشوا مع بعض للكوجينه.
رتيل:مقواك كيف رديتي ع سفيان بكري..
لينا بضيق:بالله معاش ذكريتي قداش كارهه روحي موقف سخيف وقدام عمي..ياريتني تحملتها في روحي وسكتت..
رتيل؛لكن عندك حق كلامه واعر..
تنهدت لينا وقالت:بالله غيري الموضوع وخلينا في #شكولينا
🏵🏵🏵
الساعه 1:30ليلا.
"اسمعي فكينا من خلطتها المراة هادي"
منى:اني مش عارفه شن هي الفكره اللي واخدينها عنها لكن تريح هي جابده روحها من الكل ...
مروان؛شن قصدك بتريح؟
منى بضحكه:شن قصدي عادي كلمه عاديه قلتها وخلاص!..
مروان تنهد وقال:باهي غيري الموضوع خل نهدرزوا في شي تاني..
منى؛لالا والله عيوني نفتح فيهم بالسيف الجنان هد حيلي اليوم وولدك بزايد..تصبح ع خير..وعطاته بالظهر ورقدت...
هو شبحلها شويه..بعدين تنفس بعصبيه وعطاها بالظهر ورقد..
🏵في الشقه اللي مقابلتهم...
كانت مقعمزة ع السرير تشبحله كيف مقعمز في البالكونه..
يشرب في القهوة وفي يده كتاب يقرا فيه..
فجأة سمعت صوت نغمة تليفونه اللي جايه من الصاله وين ماخلاه في الشحن..
هو ماكانش يسمع فيه ويبان منسجم مع الكتاب..
وهي استغلت هالشي وتسحبت وطلعت من الدار للصاله..
وصلت في التلفون شافت المتصل لقاته رقم غريب..
تجرأت..وخداته وفتحت الخط..وحطاته ع وذنها..
جاها صوت انثوي..
"آلو...سفيان..."
هي ولعت فيها النار..
"سفيان حبيبي بالله عليك رد عليا عطيني فرصه نحكيلك بس"
هي سكرت في وجهها طول وهي مصدومه..
"شن ديري انتي"..
التفتت وشبحتله وقالت:من هي هادي؟
جاها وجبد تليفونه وهو يقول؛شن مسسك فيه انتي
زهور ودموعها في عيونها؛قولي من هي هادي اللي تقولك حبيبي قول..
هو شبح لتليفونه وشاف الرقم بعدين شبحلها وقال:هادي وحده تافهه ومش متربيه وتو نعرف كيف نربيها..وانتي مرة تمدي يدك ع تليفوني نقصها..
زهور :معناها مافي بينك وبينها شي ولا بالله عليك قولي الحق..
سفيان حول نظاراته الطبيه وقال:اسمعي جاي اني لو بنعرف وحده تانيه بالزواج بس..اما العفن هدا ماعنديش فيه..
زهور :قصدك حاط في بالك تتزوج وحده تانيه!
ابتسم بتهكم وقال:ولاهادي حاطها في راسي سادني مصيبه وحده..
ولف ومشي وهو يلبس في نظراته..
اما هي مسحت دموعها وهي تضحك ومشت لحقاته..
☘☘☘☘
بعد مرور تلاته ايام...
كان الوضع فيهم كما هو عليه...
سفيان شبه معاش يقعد في الحوش الا في الليل وين يجي طول لشقته...
وهكي ماعطاش فرصه لأساور تشوفه اللي زادت انجنت فيه بعد ماصارحاته بمشاعرها ورفضها...
••اساور؛ينباعوا بسرعه لينا محتاجه تكثفي شغل..
لينا بضحكه؛مالا باهي اللي سيبت خدمتي في العياده..
اساور ابتسمت وقالت؛ايه من صالحنا..
انفتح باب الحوش...
شبحوله الزوز..
كان سفيان خاش بروحه بسرعه..
وعيون اساور معاه ولينا تشبحلها..
لينا؛خلاص الخميس الجاي كيف اليوم نتلاقوا..
اساور شبحتلها ووجهها احمر قالت:ايه تمام...
شويه وجي يجري سفيان وفي يده ملف طلع بيه من الحوش..
تنهدت اساور من قلبها..
لينا قعدت تشبحلها وخلاص..
شبحتلها اساور وقالت؛هي بالسلامه توا..
لينا: بالسلامه..
لبست اساور نظراتها ومشت ركبت سيارتها ...
قعدت لينا معاها بعيونها لين طلعت..
بعد ماطلعت لينا قالت؛ربي يهديها وخلاص..
مررت نظرها ع الشجر اللي قدامها ابتسمت وقالت:امتى يجي الليل بس..
تنهدت...بعدين لفت بتمشي..
شويه سمعت صوت الباب انفتح..
وصوت ماتت من شوقها ليه يقول..
" هي تفضلوا..تفضلوا"..
وقفت والتفتت...
بمجرد ماشافت من خشت قالت بنبرة كلها فرح ومفاجأة...
"يما...باتي!"

....يتبع.....