[COMPLETED] ဗီလိန်ဗျူဟာ || ဘာသာပြန်

[၅၆] ခုတင်ငယ်လေး။

!Unicode!

အခန်း(၅၆) ခုတင်ငယ်လေး

-----------

ကျန်းရွှင်းယီကား နောက်ထပ်အလှည့်ကျသူဖြစ်သည်။ မစစ်ဆေးခင်၌မူ၊ သက်လတ်ပိုင်းအရွယ်တောက်ဓမ္မပညာရှင်သည် သူ၏မျက်နှာဖုံးပေါ်မှ သူ၏နှဖူးကို ထိလိုက်သည်။
"ဟေး၊ မင်းကယောက်ျားရင့်မာကြီးတစ်ယောက်ပဲ၊ ဘာများဖုံးကွယ်စရာရှိလို့လဲ။ အကယ်၍ မင်းကရုပ်ဆိုးနေတယ်ဆိုရင်တောင်မှ၊ လူတွေကိုတောင် ရင်မဆိုင်နိုင်ဘူးလို့ ဆိုလိုချင်တာလား။ ချွတ်လိုက်! ချွတ်လိုက်တော့!"

ကျန်းရွှင်းယီဟာ အနည်းငယ်မျှတုံ့ဆိုင်းနေမိသည်။ တောက်ဓမ္မပညာရှင်သည် လက်ဆန့်ကာ မျက်နှာဖုံးအား ကြမ်းတမ်းစွာဆွဲဖြုတ်လိုက်သည်။

သူမျက်နှာဖုံးချွတ်လိုက်သည်နှင့် သူသည် လက်တစ်ဖက်တွင် မျက်နှာဖုံးကို ကိုင်လျက်သားဖြင့် နောက်တစ်ဖက်ကမူ ကျန်းရွှင်းယီ၏ပုခုံးကိုဖိထားကာ သူအေးခဲသွားရလေသည်။ သူအချိန်တော်တော်ကြာကြာတုံ့ပြန်မလာပေ။ ကံကောင်းစွာဖြင့် ကျန်းရွှင်းယီ၏ရုပ်ရည်ကို မြင်လိုက်ရ၍ မှင်သက်နေသူအများအပြားရှိလေရာ သူ၏ကြက်သေသေနေသည့်အကြည့်မှာလည်း ထိုနည်းတူစွာပင်။

ယွင်ရှဲ့သည် မျက်မှောင်ကြုတ်မိကာ အရှေ့ကိုခြေတစ်လှမ်းတိုးလိုက်ပေမယ့် ကျန်းရွှင်းယီက သူ့အား လျို့ဝှက်စွာလက်ဟန်အမူအရာပြလာသည်ဖြစ်၍ သူရပ်တန့်လိုက်ရသည်။ ကံကောင်းသည်ကား တောက်ဓမ္မပညာရှင်သည် ယွင်ရှဲ့၏အောက်ဆုံးစည်းကို ထပ်၍မထိပါးမိသည်ပင်။ သူဟာ အလျင်အမြန်သတိပြန်ဝင်လာကာ ကျန်းရွှင်းယီ၏ခေါင်းပေါ်ကို လက်တင်လိုက်သည်။ အလျင်အမြန်စစ်ဆေးပြီးသည့်နောက်၊ သူလက်ကာပြလေသည်။
"အင်း၊ မင်းလည်း အနောက်မှာသွားရပ်လို့ရပြီ။"

ဤအခြင်းအရာသည် ကျန်းရွှင်းယီတစ်ယောက် အနောက်ကိုလျှောက်သွားပြီး ယွင်ရှဲ့ဟာ သူ၏နားထဲတွင် တီးတိုးမပြောလာသည်အထိပင်။
"အဲ့ဒီ့လိမ္မော်ခွံ မင်းကိုကြည့်​နေတဲ့ပုံစံကို ကိုယ်သဘောမကျဘူး။"

ကျန်းရွှင်းယီဟာ တောက်ဓမ္မပညာရှင်ကို ပြန်ကြည့်မိလိုက်လေရာ သူ့တွင် ဆားဝက်ခြံအများကြီးရှိနေတာကိုသတိထားမိသွားသည်။ ယွင်ရှဲ့၏ဖော်ပြချက်သည် အလွန်မှန်ကန်နေကြောင်း သူရုတ်ခြည်းခံစားမိကာ ကူကယ်ရာမဲ့စွာဖြင့် ရယ်မောလိုက်မိသည်။